മുസ്‌ലിം ലീഗിന് പുതിയ ഭാരവാഹികൾ; ഖാദർ മൊയ്തീൻ ദേശീയ അധ്യക്ഷൻ

ചെന്നൈ: മുസ്‌ലിം ലീഗിന്റെ പുതിയ ദേശീയ ഭാരവാഹികളെ പ്രഖ്യാപിച്ചു. അന്തരിച്ച ഇ.അഹമ്മദിന് പകരക്കാരനായി ഖാദർ മൊയ്തീൻ ദേശീയ അധ്യക്ഷ സ്ഥാനം ഏറ്റെടുക്കും. തമിഴ്നാട്ടുകാരനായ ഖാദർ മൊയ്തീൻ പാർട്ടിയിലെ മുതിർന്ന നേതാക്കളിലൊരാളാണ്.

കേരളത്തിൽ നിന്നുള്ള പി.കെ.കുഞ്ഞാലിക്കുട്ടിയെ ദേശീയ ജനറൽ സെക്രട്ടറിയായും മുതിർന്ന നേതാവ് ഇ.ടി.മുഹമ്മദ് ബഷീറിന ഓർഗനൈസിങ് സെക്രട്ടറിയായും തിരഞ്ഞെടുത്തു. കേരള ഘടകത്തിലെ അബ്ദുൾ വഹാബായിരിക്കും പാർട്ടിയുടെ പുതിയ ട്രഷറർ.

പുതിയ ഭാരവാഹികളെ പ്രഖ്യാപിച്ചതോടെ മലപ്പുറത്ത് ആര് മത്സരിക്കും എന്നതിൽ വ്യക്തത വരുന്നുണ്ട്. പാർട്ടിയുടെ പുതിയ ദേശീയ ജനറൽ സെക്രട്ടറി പി.കെ.കുഞ്ഞാലിക്കുട്ടി തന്നെയായിരിക്കും മലപ്പുറത്ത് ഇ.അഹമ്മദിന്റെ പിൻഗാമി. മലപ്പുറത്തെ സ്ഥാനാർഥിത്വം സംബന്ധിച്ച് ഔദ്യോഗിക പ്രഖ്യാപനം ഉണ്ടാകുമെന്ന് പാർട്ടിയുടെ പുതിയ അധ്യക്ഷൻ ഖാദർ മൊയതീൻ പറഞ്ഞു.