രാജസ്ഥാനില്‍ ഇന്ന് 23 മന്ത്രിമാര്‍ സത്യപ്രതിജ്ഞ ചെയ്യും; 17 പേര്‍ പുതുമന്ത്രിമാര്‍

ജയ്‌പൂര്‍: രാജസ്ഥാനില്‍ ഇന്ന് 23 മന്ത്രിമാര്‍ കൂടി സത്യപ്രതിജ്ഞ ചെയ്യും. മുഖ്യമന്ത്രി അശോക് ഗെഹ്‌ലോട്ടും ഉപമുഖ്യമന്ത്രി സച്ചിന്‍ പൈലറ്റും ഒരാഴ്ച മുന്‍പ് സത്യപ്രതിജ്ഞ ചെയ്ത് ചുമതല ഏറ്റിരുന്നു.

ഞായറാഴ്ച രാജ്സഥാനില്‍ നടന്ന യോഗത്തിന് ശേഷം മന്ത്രിമാരുടെ പട്ടികയ്ക്ക് രാഹുല്‍ അംഗീകാരം നല്‍കിയിട്ടുണ്ട്. പുതിയ മുഖ്യമന്ത്രിക്കെതിരെ ചില വിഭാഗങ്ങളില്‍ നിന്നും പ്രതിഷേധം ഉയര്‍ന്നെങ്കിലും അത് ചര്‍ച്ചയായില്ല. നാളെ ജയ്പൂരില്‍ വച്ച് 23 എംഎല്‍എമാര്‍ സത്യപ്രതിജ്ഞ ചെയ്ത് മന്ത്രിസഭാംഗങ്ങളാകും. ഇതില്‍ 17 പേര്‍ ആദ്യമായിട്ടാണ് മന്ത്രിമാരാവുന്നത്.

അഞ്ച് മന്ത്രിസ്ഥാനങ്ങള്‍ ഒഴിച്ചിടുമെന്നും റിപ്പോര്‍ട്ടുണ്ട്. ഇന്ന് തന്നെ ഛത്തീസ്ഗഡിലേയും മധ്യപ്രദേശിലേയും മന്ത്രിസഭാ പട്ടികയ്ക്ക് രാഹുല്‍ ഗാന്ധി അംഗീകാരം നല്‍കിയേക്കും.