ഹല്‍വയില്‍ കഞ്ചാവ് ഒളിപ്പിച്ച് പ്രവാസിയുടെ കൈയില്‍ നല്‍കിയ യുവാവ് പിടിയില്‍

കോഴിക്കോട്: ദുബായിലേക്ക് പോവുകയായിരുന്ന യുവാവിന്റെ കൈയില്‍ കഞ്ചാവ് ഒളിപ്പിച്ച് നല്‍കിയ യുവാവിനെ നാട്ടുകാര്‍ പൊലീസില്‍ ഏല്‍പ്പിച്ചു. അടിവാരം വളളിക്കെട്ടുമ്മല്‍ മുനീഷാണ് പിടിയിലായത്. നാട്ടുകാരനായ അനീഷിന്റെ കൈയിലാണ് മുനീഷ് കഞ്ചാവ് കൊടുത്തത്. ഹല്‍വയില്‍ ഒളിപ്പിച്ച രീതിയിലാണ് കഞ്ചാവ് നല്‍കിയത്.

ദുബായിലുളള സുഹൃത്തിന് ഹല്‍വ എത്തിച്ച് നല്‍കണമെന്നാണ് മുനീഷ് ആവശ്യപ്പെട്ടത്. ബുധനാഴ്ചയായിരുന്നു അനീഷ് മടങ്ങാനിരുന്നത്. എന്നാല്‍ ഭദ്രമായി കെട്ടിയ രീതിയില്‍ കണ്ടതിനെ തുടര്‍ന്ന് സംശയം തോന്നിയ അനീഷിന്റെ ബന്ധു കെട്ടഴിച്ച് നോക്കിയപ്പോഴാണ് അകത്ത് ഹല്‍വക്കൊപ്പം കഞ്ചാവ് കണ്ടെത്തിയത്.

ഉടന്‍ തന്നെ അനീഷും ബന്ധുക്കളും മുനീഷിനെ വിളിച്ച് ചോദ്യം ചെയ്തു. തുടര്‍ന്ന് മുനീഷ് കുറ്റം സമ്മതിക്കുകയായിരുന്നു. തുടര്‍ന്ന് താമരശ്ശേരി പൊലീസില്‍ വിവരം അറിയിച്ച് പ്രതിയെ പൊലീസിന് കൈമാറി. മുനീഷിനെ പൊലീസ് കസ്റ്റഡിയിലെടുത്തു.