തിരുവനന്തപുരം: കെഎസ്ആർടിസിയിൽ ഒക്ടോബര്‍ രണ്ട് മുതല്‍ പണിമുടക്ക് പ്രഖ്യാപിച്ച തൊഴിലാളി യൂണിയന്‍ നേതാക്കളുമായി ഗതാഗത മന്ത്രി ഇന്ന് ചര്‍ച്ച നടത്തും. ഉച്ചക്ക് 12 മണിക്കാണ് ചര്‍ച്ച. ചർച്ചയിൽ കെഎസ്ആര്‍ടിസി മാനേജിങ് ഡയറക്ടർ ടോമിന്‍ ജെ തച്ചങ്കരിയും പങ്കെടുക്കും.

പണിമുടക്കിന് കേരള ഹൈക്കോടതി സ്റ്റേ നൽകിയിട്ടുണ്ടെങ്കിലും സമരവുമായി മുന്നോട്ട് പോകാനാണ് ജീവനക്കാരുടെ തീരുമാനം. തർക്കവിഷയങ്ങളിൽ മാനേജിങ് ഡയറക്ടറും തൊഴിലാളികളും ചർച്ചയ്ക്ക് തയ്യാറായിട്ടില്ല. ഈ സാഹചര്യത്തിലാണ് ചർച്ച.

സിംഗിള്‍ ഡ്യൂട്ടി പരിഷ്കാരമാണ് കെഎസ്ആർടിസിയിൽ വലിയ പ്രതിഷേധത്തിന് കാരണമായത്. ഈ തീരുമാനം എംഡി ഏകപക്ഷീയമായി സ്വീകരിച്ചതാണെന്ന് തൊഴിലാളികൾ പറഞ്ഞു. ഇക്കാര്യത്തിൽ യൂണിയനുകളുടെ ആവശ്യം പരിഗണിക്കണമെന്ന മന്ത്രിയുടെ നിർദ്ദേശം എംഡി തളളിക്കളഞ്ഞു. ഇന്ധനച്ചെലവിന്റെ പേരില്‍ ഷെഡ്യൂളുകൾ വെട്ടിക്കുറച്ചതും എംഡിക്കെതിരെ തൊഴിലാളികൾ ആയുധമാക്കുന്നുണ്ട്.

മന്ത്രിയുടെ സാന്നിധ്യത്തിലെ ചർച്ചയിൽ എന്ത് തീരുമാനമെടുത്താലും അത് എംഡി പാലിക്കില്ലെന്നും അതിനാൽ തന്നെ ചർച്ച കൊണ്ട് പ്രയോജനമില്ലെന്നും തൊഴിലാളികൾ പറയുന്നു.  സ്ഥലംമാറ്റം കാട്ടി ജീവനക്കാരെ ഭീഷണിപ്പെടുത്തി സമരത്തില്‍ നിന്ന് പിന്‍തിരിപ്പിക്കാനാണ് ശ്രമമെന്നാണ് മറ്റൊരു ആരോപണം.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook