കൊച്ചി: കെഎസ്ആർടിസിയിൽ വൻ അഴിമതി നടന്നെന്ന മാനേജിങ് ഡയറക്ടറുടെ വെളിപ്പെടുത്തലിൽ അന്വേഷണം ആവശ്യപ്പെട്ട് സമർപ്പിച്ച ഹർജി ഹൈക്കോടതി വിധി പറയാനായി മാറ്റി. ഡിജിപിക്ക് പരാതി നൽകിയിട്ടും നടപടി ഇല്ലെന്ന് ചൂണ്ടിക്കാട്ടി കെഎസ്ആർടിസി ജീവനക്കാരനായ ജുഡ് ജോസഫ് ആണ് കോടതിയെ സമീപിച്ചത്. പരാതി പരിശോധിച്ചെന്നും അന്വേഷണം ആവശ്യമില്ലെന്നും ഹർജി നിലനിൽക്കില്ലെന്നും കേസെടുക്കാൻ കോടതിക്ക് നിർദേശിക്കാനാവില്ലെന്നും സർക്കാർ അറിയിച്ചു.

പൊലീസ് എടുത്ത മൊഴിയുടെ പകർപ്പ് പരാതിക്കാരൻ കോടതിയിൽ ഹാജരാക്കി. മൊഴിയുടെ അടിസ്ഥാനത്തിൽ അന്വേഷണം വേണമെന്ന് ഹർജിക്കാരൻ ആവശ്യപ്പെട്ടു. കോർപ്പറേഷനിൽ 100 കോടിയുടെ അഴിമതി നടന്നെന്നായിരുന്നു എംഡിയുടെ വെളിപ്പെടുത്തൽ.

Also Read: ക്രിമിനൽ പശ്ചാത്തലമുള്ള സ്ഥാനാർഥികളെ ഒഴിവാക്കികൂടെയെന്ന് പാർട്ടികളോട് ടിക്കാറാം മീണ

ഓഡിറ്റിലെ കണ്ടെത്തലുകൾ ഗൗരവം ഉള്ളതാണെന്ന് ഹർജിയിൽ പറയുന്നു. ഉന്നത ഉദ്യോഗസ്ഥരും, ജീവനക്കാരും ഉൾപ്പെട്ട എല്ലാ അഴിമതിയും പുറത്തു കൊണ്ട് വരണം. അന്വേഷണമാവശ്യപ്പെട്ട് ഡിജിപിക്ക് പരാതി നൽകിയിട്ടും നടപടി ഉണ്ടായില്ല. കേസ് എടുക്കാൻ ഡിജിപിക്ക് നിർദേശം നൽകണമെന്നും ഹർജിക്കാരൻ ആവശ്യപ്പെട്ടു.

Also Read: സണ്ണി ലിയോണിന്റെ വിദേശയാത്രയ്ക്ക് നിയന്ത്രണം ഏർപ്പെടുത്തണമെന്ന ആവശ്യം തള്ളി ഹൈക്കോടതി

2012-15 കാലയളവിൽ നൂറ് കോടിയുടെ അഴിമതി നടന്നെന്ന് മാനേജിങ് ഡയറക്ടർ ബിജു പ്രഭാകർ വെളിപ്പെടുത്തിയെന്നും ഉന്നതരുടെ അറിവോടെ കഴിഞ്ഞ പത്ത് വർഷത്തിനിടെ കോടികളുടെ കുംഭകോണം നടന്നെന്നുമാണ് ഹർജിയിലെ ആരോപണം.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook

.