scorecardresearch

കൂടത്തായി കൊലപാതകം: മൊഴി രേഖപ്പെടുത്തിയ ശേഷം ഷാജുവിനെ വിട്ടയച്ചു

ഷാജുവിന്റെ മകന്റെ ആദ്യകുര്‍ബാനദിവസമാണ് മകള്‍ മരിച്ചത്

കോഴിക്കോട്: കൂടത്തായി കൊലപാതക കേസില്‍ മൊഴി രേഖപ്പെടുത്തിയ ശേഷം ഷാജുവിനെ വിട്ടയച്ചതായി റൂറല്‍ എസ്‌‌പി കെ.ജി.സൈമണ്‍. വിശദമായ ചോദ്യം ചെയ്യല്‍ നടന്നെന്നും അതിനു ശേഷമാണ് ഷാജുവിനെ വിട്ടയച്ചതെന്നും എസ്‌‌പി മാധ്യമങ്ങളോട് പറഞ്ഞു. ഷാജുവിന്റെ മൊഴികള്‍ വ്യക്തമായി പരിശോധിക്കുമെന്നും കൊലപാതകത്തില്‍ ഷാജുവിന് നേരിട്ട് പങ്കുണ്ടോ എന്ന കാര്യം വ്യക്തമായിട്ടില്ലെന്നും അന്വേഷണ ഉദ്യോഗസ്ഥനായ കെ.ജി.സൈമണ്‍ പറഞ്ഞു.

മുഖ്യപ്രതി ജോളിയുടെ രണ്ടാം ഭര്‍ത്താവ് ഷാജുവിനും കൊലപാതകങ്ങളില്‍ പങ്കുള്ളതായി നേരത്തെ റിപ്പോർട്ടുകൾ പുറത്തുവന്നിരുന്നു. പൊലീസ് കസ്റ്റഡിയിലുള്ള ഷാജു കുറ്റസമ്മതം നടത്തിയെന്നും വാർത്തകളുണ്ടായിരുന്നു. ആദ്യ ഭാര്യ സിലിയെയും ഒരു വയസുള്ള കുഞ്ഞിനെയും കൊലപ്പെടുത്താനുള്ള സാഹചര്യം ഒരുക്കിയത് താനാണെന്ന് ഷാജു കുറ്റസമ്മതം നടത്തിയെന്നാണ് നേരത്തെ പുറത്തുവന്ന വാർത്തകൾ. എന്നാൽ, ഷാജു കുറ്റക്കാരനാണെന്ന തരത്തിൽ വ്യക്തമായ തെളിവുകൾ തങ്ങൾക്ക് ലഭിച്ചിട്ടില്ലെന്നും കൂടുതൽ പേരെ ചോദ്യം ചെയ്യുമെന്നും എസ്‌പി കെ.ജി.സെെമൺ വ്യക്തമാക്കി.

Read Also: ജോളി കസ്റ്റമര്‍ മാത്രം, സ്റ്റാഫല്ല: ബ്യൂട്ടി പാര്‍ലര്‍ ഉടമ സുലേഖ

ജോളി നടത്തിയ കൊലപാതകങ്ങളെ കുറിച്ച് തനിക്ക് അറിയാമായിരുന്നുവെന്നും ഭയം കൊണ്ടാണു പുറത്തുപറയാതിരുന്നതെന്നും ഷാജു മൊഴി നൽകിയെന്ന സൂചനകളാണ് ആദ്യം പുറത്തുവന്നത്.

Read Also: ജോളി നാട്ടുകാരുമായി ശരിക്കും ‘ജോളി’; ആര്‍ക്കും പിടികൊടുത്തില്ല

ഷാജുവിന്റെ മകന്റെ ആദ്യകുര്‍ബാന ദിവസമാണ് മകള്‍ മരിച്ചത്. 2016ല്‍ ജോളിക്കൊപ്പം ദന്താശുപത്രിയില്‍ ഇരിക്കുമ്പോഴാണ് സിലി കുഴഞ്ഞുവീണു മരിച്ചത്. രണ്ട് മരണങ്ങളിലും ഷാജുവിന്റെ പങ്കുണ്ടോ എന്നാണ് അന്വേഷണ സംഘം ഇപ്പോൾ പരിശോധിക്കുന്നത്.

മൃതദേഹങ്ങളുടെ രാസപരിശോധന വിദേശത്ത് നടത്താനും അനുമതിയായിട്ടുണ്ട്. ഡിജിപി ലോക്നാഥ് ബെഹ്റ പൂര്‍ണപിന്തുണ അറിയിച്ചിട്ടുണ്ടെന്നും എസ്‌പി മാധ്യമങ്ങളോടു പറഞ്ഞു.

Stay updated with the latest news headlines and all the latest Kerala news download Indian Express Malayalam App.

Web Title: Koodathayi murder jolis husband shaju murder investigation