ജിഷ്ണുവിന്റെ അമ്മാവൻ ശ്രീജിത്ത് ഇപ്പോഴും പാർട്ടി അംഗമാണെന്ന് കോടിയേരി ബാലകൃഷ്ണന്‍

കോഴിക്കോട്: ജിഷ്ണുവിന്റെ അമ്മാവൻ ശ്രീജിത്ത് ഇപ്പോഴും പാർട്ടി അംഗമാണെന്ന് സി.പി.എം. സംസ്ഥാന സെക്രട്ടറി കോടിയേരി ബാലകൃഷ്ണൻ. ഏതെങ്കിലും തരത്തിലുള്ള നടപടികൾ സ്വീകരിക്കുന്നതിനു മുൻപ് ശ്രീജിത്തിന്റെ വിശദീകരണം തേടുമെന്നും അദ്ദേഹം പറഞ്ഞു. പാർട്ടി യോഗത്തിൽ ഇക്കാര്യം ചർച്ച ചെയ്യുമെന്നും കോടിയേരി കൂട്ടിച്ചേര്‍ത്തു.

ഇതിനിടെ സർക്കാരിനെതിരായിരുന്നില്ല സമരമെന്ന് ആവർത്തിച്ച ശ്രീജിത്ത് പക്ഷെ സർക്കാരിന്റെ ഭാഗത്ത് നിന്ന് നീതി നിഷേധിക്കപ്പെട്ടുവെന്ന് പറഞ്ഞ് രംഗത്ത് വന്നിരുന്നു.

"പാർട്ടി അംഗത്വത്തിൽ നിന്ന് പുറത്താക്കിയതിൽ വിഷമമുണ്ട്. സമരം ചെയ്തത് ഭരണകൂടത്തിനോ സർക്കാരിനോ എതിരായല്ല. പൊലീസ് അന്വേഷണത്തിൽ വരുത്തിയ വീഴ്ചയ്‌ക്കെതിരായാണ്" അദ്ദേഹം മാധ്യമപ്രവർത്തകരോട് പറഞ്ഞു.

പൊലീസ് ആസ്ഥാനത്ത് നടന്ന സംഭവങ്ങളുമായി ബന്ധപ്പെട്ട് മാധ്യമങ്ങളിൽ പ്രതിഷേധിച്ചത് സർക്കാരിനോ പാർട്ടിക്കോ എതിരായല്ലെന്ന് അദ്ദേഹം പ്രതികരിച്ചു. "ഇക്കാര്യം പാർട്ടിയോട് വിശദീകരിക്കും. സർക്കാരിന്റെ ഭാഗത്ത് നിന്ന് നീതി നിഷേധിക്കപ്പെടുന്ന സാഹചര്യമുണ്ടായി. ഇതിനാലാണ് ഇങ്ങിനെ പ്രതികരിക്കേണ്ടി വന്നത്. സംഭവത്തിൽ റിമാന്റിൽ കഴിയുന്ന ഷാജർഖാനും ഭാര്യ മിനിക്കും നീതി ലഭിക്കുമെന്നാണ് വിശ്വാസമെന്നും" അദ്ദേഹം കൂട്ടിച്ചേർത്തു.

ഈ വാർത്ത പുറത്തു വന്നതിന് പിന്നാലെ ഇന്ന് രാവിലെ ദേശാഭിമാനിയിലെ ജോലി രാജിവച്ച ശ്രീജിത്ത്, താൻ ഒരിക്കലും പാർട്ടിക്ക് എതിരായി ഒന്നും ചെയ്യില്ലെന്ന് പറഞ്ഞു. തന്റെ ഭാഗം പാർട്ടിയോട് വിശദീകരിക്കുമെന്നും ഒരിക്കലും പാർട്ടിക്കെതിരെ നിൽക്കാൻ സാധിക്കില്ലെന്നും അദ്ദേഹം വ്യക്തമാക്കി.