ന്യൂഡൽഹി: രാജ്യത്ത് ഏറ്റവും പുരോഗതിയുള്ള നഗരം കൊച്ചിയാണെന്ന് പഠന റിപ്പോർട്ട്. ഏഷ്യന്‍ ഡെവലപ്മെന്റ് ബാങ്കിന് (എ.ഡി.ബി.) വേണ്ടി നഗരവികസന മന്ത്രാലയത്തിനുകീഴിലെ നാഷണല്‍ ഇന്‍സ്റ്റിറ്റിയൂട്ട് ഓഫ് അര്‍ബന്‍ അഫയേഴ്‌സ് നടത്തിയ പഠനത്തിലാണ് ഈ വിലയിരുത്തല്‍. മാതൃഭൂമിയാണ് വാർത്ത റിപ്പോർട്ട് ചെയ്യുന്നത്.

സ്മാര്‍ട്ട്‌സിറ്റികളായി വികസിപ്പിക്കുന്ന ആദ്യത്തെ 20 നഗരങ്ങളിലെ സൗകര്യങ്ങള്‍ പഠനവിധേയമാക്കിയാണ് തിരഞ്ഞെടുപ്പ്. ബഹുതല പുരോഗതി സൂചിക(മള്‍ട്ടി-ഡയമെന്‍ഷനല്‍ പ്രോസ്​പരിറ്റി ഇന്‍ഡക്‌സ്-എം.പി.ഐ.) അടിസ്ഥാനമാക്കിയായിരുന്നു പഠനം. നഗരതലത്തില്‍ ലഭ്യമായ വിവരങ്ങള്‍, 2011-ലെ സെന്‍സസ്, നാഷണല്‍ സാമ്പിള്‍ സര്‍വേ ഓഫീസിന്റെ യൂണിറ്റ്തല ഡേറ്റ, വിവിധ റിപ്പോര്‍ട്ടുകള്‍, നഗരവികസന മന്ത്രാലയമടക്കം വിവിധ മന്ത്രാലയങ്ങളുടെ പക്കലുള്ള വിവരങ്ങള്‍ എന്നിവ ക്രോഡീകരിച്ച് 28 മാനദണ്ഡങ്ങളുണ്ടാക്കിയാണ് ബഹുതല പുരോഗതിസൂചിക തയ്യാറാക്കിയത്.

ഭൗതികവും സാമ്പത്തികവുമായ അടിസ്ഥാനസൗകര്യങ്ങള്‍, ആരോഗ്യ-വിദ്യാഭ്യാസ സൗകര്യങ്ങള്‍, സാമൂഹിക ആവശ്യങ്ങള്‍ക്കുള്ള ആസ്തികള്‍, മറ്റ് സൗകര്യങ്ങള്‍, വീടുകളിലെ സൗകര്യങ്ങള്‍ എന്നിവ താരതമ്യംചെയ്തു. ഈ നാലു കാര്യങ്ങളുടെയും സൂചികയില്‍ കൊച്ചിക്ക് 329.8 പോയന്റ് ലഭിച്ചപ്പോള്‍ തൊട്ടുതാഴെയുള്ള ന്യൂഡല്‍ഹിക്ക് 248.3-ഉം മൂന്നാം സ്ഥാനത്തുള്ള ലുധിയാനയ്ക്ക് 173.7-ഉം ലഭിച്ചു.

ഭൗതിക-സാമ്പത്തിക അടിസ്ഥാന സൗകര്യങ്ങളുടെ കാര്യത്തില്‍ മറ്റ് 19 നഗരങ്ങളെക്കാളും ബഹുദൂരം മുന്നിലാണ് കൊച്ചി. സാമൂഹിക ആവശ്യങ്ങള്‍ക്കുള്ള ആസ്തികള്‍, ബന്ധപ്പെട്ട സൗകര്യങ്ങള്‍ എന്നിവയുടെ കാര്യത്തിലും അതുതന്നെയാണ് സ്ഥിതി. അതേസമയം, വീടുകളിലെ സൗകര്യങ്ങള്‍, വിഭ്യാഭ്യാസ-ആരോഗ്യ സൗകര്യങ്ങള്‍ എന്നിവ കൊച്ചിയില്‍ കുറവാണ്.

ഇന്ത്യയിൽ ഏറ്റവും പുരോഗതിയുള്ള പത്ത് നഗരങ്ങൾ:

കൊച്ചി

ന്യൂഡൽഹി

ലുധിയാന

ധാവങ്കര

കോയന്പത്തൂർ

ജയ്പൂർ

ചെന്നൈ

വിശാഖപട്ടണം

അഹമ്മദാബാദ്

പൂണെ

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook

.