തലശ്ശേരി: അമേരിക്കയിലെ കാലിഫോർണിയയിൽ സെൽഫിയെടുക്കുന്നതിനിടെ കൊക്കയിൽ വീണ് മലയാളി ദമ്പതികൾ മരിച്ചു. തലശ്ശേരി കതിരൂർ ‘ഭാവുക’ത്തിൽ വിഷ്ണു (29), ഭാര്യ മീനാക്ഷി (29) എന്നിവരാണ് മരിച്ചത്. ട്രക്കിങ്ങിനിടെ പർവ്വതനിരകളിൽനിന്നും സെൽഫിയെടുക്കുന്നതിനിടെ തെന്നിവീണാണ് അപകടമെന്നാണ് ബന്ധുക്കള്‍ക്ക് ലഭിച്ച വിവരം. യോസാമിറ്റി നാഷണല്‍ പാര്‍ക്കില്‍ ട്രക്കിങ്ങിന് എത്തിയതായിരുന്നു ദമ്പതികള്‍. 3000 അടി ഉയരത്തില്‍ നിന്നാണ് ഇരുവരും വീണത്.
കീശയിൽനിന്ന് ലഭിച്ച തിരിച്ചറിയൽ കാർഡ്, ഡ്രൈവിങ് ലൈസൻസ് എന്നിവയിൽ നിന്നാണ് തിരിച്ചറിഞ്ഞത്. മൃതദേഹം നാട്ടിൽ കൊണ്ടുവരാനുള്ള ശ്രമത്തിലാണ് ബന്ധുക്കൾ.
വിഷ്ണു കാലിഫോർണിയയിലെ സിഡ്‌കോ സോഫ്റ്റ്‌വെയർ കമ്പനി എൻജിനീയറാണ്. ബുധനാഴ്ച ഓഫിസിൽ എത്താത്തതോടെ സഹപ്രവര്‍ത്തകര്‍ അന്വേഷിച്ചപ്പോഴാണ് മരണവിവരം അറിഞ്ഞത്. കതിരൂർ ശ്രേയസ് ഹോസ്പിറ്റലിലെ ഡോ. എം.വി.വിശ്വനാഥ്-ഡോ. സി. സുഹാസിനി ദമ്പതികളുടെ മകനാണ് വിഷ്ണു. സഹോദരൻ: ജിഷ്ണു. കോട്ടയം യൂണിയന്‍ ക്ലബിനു സമീപത്തെ രാമമൂര്‍ത്തി-ചിത്ര ദമ്പതികളുടെ മകളാണ് മീനാക്ഷി. ഇരുവരും ചെങ്ങന്നൂരിലെ ഐഎച്ച്ആർഡി എൻജിനീയറിങ് കോളേജിൽ സഹപാഠികളായിരുന്നു.
Get Malayalam News and latest news update from India and around the world. Stay updated with today's latest Kerala news in Malayalam at Indian Expresss Malayalam.
ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ
