നിയമസഭാ തിരഞ്ഞെടുപ്പിനൊരുങ്ങി കേരളം; നിർണായകമായി ജാതി-മത സംഘടനകളുടെ നിലപാടുകൾ

തിരുവനന്തപുരം: ബിജെപിയുടെ കടന്നുവരവോടെ കേരളത്തിന്റെ പരമ്പരാഗത ദ്വിധ്രുവ രാഷ്ട്രീയ ചിത്രം മാറിക്കൊണ്ടിരിക്കുമ്പോൾ, വരാനിരിക്കുന്ന നിയമസഭാ തിരഞ്ഞെടുപ്പിൽ നിർണ്ണായക ശക്തികളായി മാറുന്നത് സംസ്ഥാനത്തെ പ്രബല ജാതി-മത സംഘടനകളാണ്.

Also Read:റിപ്പബ്‌ളിക് ദിനത്തിൽ പ്രസംഗിക്കുന്നിനിടെ മന്ത്രി കടന്നപ്പള്ളി രാമചന്ദ്രൻ കുഴഞ്ഞുവീണു

എൻഎസ്എസ് , എസ്എൻഡിപി , സമസ്ത (എ.പി വിഭാഗം), ജമാഅത്തെ ഇസ്ലാമി ഹിന്ദ്, കാസ ഉൾപ്പടെയുള്ള ക്രിസ്ത്യൻ സംഘടകൾ  തുടങ്ങിയവയുടെ നീക്കങ്ങൾ കേരളത്തിലെ വോട്ട് ബാങ്കുകളിൽ വലിയ ചലനങ്ങൾ സൃഷ്ടിക്കുമെന്നാണ് വിലയിരുത്തൽ.

ഇടതുപക്ഷവും ഹിന്ദു വോട്ടുകളുടെ ഏകീകരണവും

സംസ്ഥാനത്തെ ഏറ്റവും സ്വാധീനമുള്ള രണ്ട് സമുദായ സംഘടനകളായ എൻഎസ്എസും എസ്എൻഡിപിയും അടുത്തിടെ നടത്തിയ പ്രസ്താവനകൾ രാഷ്ട്രീയ കേന്ദ്രങ്ങളിൽ വലിയ ചർച്ചയായിട്ടുണ്ട്. എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനും എൻഎസ്എസ് ജനറൽ സെക്രട്ടറി ജി. സുകുമാരൻ നായരും ഹിന്ദു ഐക്യത്തിനായി നൽകിയ ആഹ്വാനങ്ങളും, ഇടതുപക്ഷ ജനാധിപത്യ മുന്നണിയോടുള്ള  അവരുടെ മൃദുസമീപനവും ശ്രദ്ധേയമാണ്.

Also Read: വിഎസിന് പത്മവിഭൂഷൺ; സ്വാഗതം ചെയ്ത് സിപിഎം, അന്തിമ തീരുമാനം കുടുംബത്തിന് വിട്ടു

പ്രത്യേകിച്ച്, അടുത്തിടെ പത്മഭൂഷൺ പുരസ്‌കാരത്തിന് അർഹനായ വെള്ളാപ്പള്ളി നടേശൻ മുഖ്യമന്ത്രി പിണറായി വിജയനോട് പുലർത്തുന്ന അടുപ്പം രാഷ്ട്രീയ നിരീക്ഷകർ ഉറ്റുനോക്കുന്നു. മുസ്ലിം ലീഗിനെതിരെയുള്ള നടേശന്റെ നിലപാടുകൾ എൽഡിഎഫിന് ഗുണകരമാകുമെന്ന കണക്കുകൂട്ടലിലാണ് സിപിഎം. 

2024-ലെ ലോക്‌സഭാ തിരഞ്ഞെടുപ്പിൽ മുസ്ലിം വോട്ടുകളിൽ ഉണ്ടായ ചോർച്ച പരിഹരിക്കാൻ ഹിന്ദു വോട്ടുകളുടെ ഏകീകരണം സിപഐ(എമ്മിന്) അനിവാര്യമാണ്. ഈ സാഹചര്യത്തിൽ ഈഴവ വോട്ടുകൾ ബിജെപിയിലേക്ക് പോകാതെ കാക്കാനും സമുദായ നേതാക്കളുടെ പിന്തുണ ഗുണകരമാകുമെന്ന് അവർ കരുതുന്നു.

വിവാദങ്ങളും വർഗ്ഗീയ ധ്രുവീകരണവും

തിരഞ്ഞെടുപ്പ് അടുക്കുമ്പോൾ വർഗ്ഗീയ ധ്രുവീകരണത്തിന് വഴിവെക്കുന്ന പ്രസ്താവനകളും ഇരുമുന്നണികൾക്കുമിടയിൽ പുകയുന്നുണ്ട്. കോൺഗ്രസ് നേതൃത്വം നൽകുന്ന യുഡിഎഫ് അധികാരത്തിൽ വന്നാൽ ആഭ്യന്തര വകുപ്പ് ജമാഅത്തെ ഇസ്ലാമിയുടെ നിയന്ത്രണത്തിലാകുമെന്ന് മുൻ മന്ത്രി എ.കെ. ബാലൻ ആരോപിച്ചിരുന്നു. 

ഇതിനെ മുഖ്യമന്ത്രി പിണറായി വിജയൻ പിന്തുണച്ചതും വലിയ വിവാദങ്ങൾക്ക് വഴിതെളിച്ചു. കൂടാതെ, കാസർകോട്, മലപ്പുറം ജില്ലകളിലെ തദ്ദേശ തിരഞ്ഞെടുപ്പ് ഫലങ്ങളെ വർഗ്ഗീയ ധ്രുവീകരണവുമായി ബന്ധിപ്പിച്ച മന്ത്രി സജി ചെറിയാന്റെ പ്രസ്താവനയും വലിയ പ്രതിഷേധങ്ങൾക്ക് ഇടയാക്കി.

ന്യൂനപക്ഷ വോട്ടുകളും പുതിയ സമവാക്യങ്ങളും

കേരളത്തിലെ മുസ്ലിം ജനസംഖ്യയുടെ 27 ശതമാനത്തിൽ ജമാഅത്തെ ഇസ്ലാമി ചെലുത്തുന്ന സ്വാധീനം നിർണ്ണായകമാണ്. തദ്ദേശ തിരഞ്ഞെടുപ്പിൽ യുഡിഎഫിനെ പിന്തുണച്ച ജമാഅത്തിന്റെ രാഷ്ട്രീയ രൂപമായ വെൽഫെയർ പാർട്ടി ഇത്തവണ ആരെ തുണയ്ക്കുമെന്നത് പ്രധാനമാണ്. അതേസമയം, സുന്നി വിഭാഗത്തിലെ സ്വാധീനശക്തിയായ കാന്തപുരം എ.പി. അബൂബക്കർ മുസ്ലിയാർ ജമാഅത്തെ ഇസ്ലാമിയുടെ നിലപാടുകളെ കർശനമായി എതിർക്കുന്നത് ഇടതുപക്ഷത്തിന് ആശ്വാസമേകുന്നു.

Also Read: പ്രകൃതിയുടെ കാവലാൾക്ക് രാഷ്ട്രത്തിന്റെ ആദരം; കൊല്ലക്കയിൽ ദേവകിയമ്മയ്ക്ക് പത്മശ്രീ

ക്രിസ്ത്യൻ വോട്ടുകളുടെ കാര്യത്തിൽ കേരള കോൺഗ്രസ് (എം) എൽഡിഎഫിലേക്ക് മാറിയത് യുഡിഎഫിന് തിരിച്ചടിയാണ്. ബിജെപി ക്രിസ്ത്യൻ സമുദായത്തിലേക്ക് അടുക്കാൻ ശ്രമിക്കുമ്പോൾ, തീവ്ര നിലപാടുകൾ ഉയർത്തുന്ന 'കാസ' പോലുള്ള സംഘടനകളുടെ ഇടപെടലുകളും ശ്രദ്ധേയമാണ്. ഇതിനുപുറമെ കിറ്റെക്‌സ് ഗ്രൂപ്പിന്റെ 'ട്വന്റി 20' പാർട്ടി എൻഡിഎയിൽ ചേർന്നത് മധ്യകേരളത്തിലെ ക്രിസ്ത്യൻ വോട്ടുകളിൽ ചലനമുണ്ടാക്കുമെന്ന് കരുതപ്പെടുന്നു.

ശബരിമല വിഷയത്തിലുണ്ടായ തിരിച്ചടി മറികടക്കാനും ഹിന്ദു സമുദായ സംഘടനകളുടെ പിന്തുണ ഉറപ്പാക്കാനും സിപഐ(എം) ശ്രമിക്കുമ്പോൾ, ജാതി-മത സമവാക്യങ്ങൾ മാറ്റിമറിക്കാൻ ബിജെപിയും കോൺഗ്രസും തന്ത്രങ്ങൾ മെനയുകയാണ്. വരാനിരിക്കുന്ന തിരഞ്ഞെടുപ്പ് ഫലം നിശ്ചയിക്കുന്നതിൽ ഈ സമുദായ സംഘടനകൾ വഹിക്കുന്ന പങ്ക് നിസ്സാരമായിരിക്കില്ലെന്ന് നിസംശയം പറയാം.

Read More:രക്തസാക്ഷി ഫണ്ട് തട്ടിപ്പ് ആരോപണം; വി കുഞ്ഞുകൃഷ്ണൻ സിപിഎമ്മിൽ നിന്ന് പുറത്തേക്ക്, നിർണായക തീരുമാനം ഇന്ന്