കേരളത്തിന് രണ്ടാം വന്ദേഭാരത്; പ്രഖ്യാപനം ഉടനുണ്ടാകുമെന്ന് സുരേന്ദ്രന്‍

ന്യൂഡല്‍ഹി: കേരളത്തിന് ഒരു വന്ദേഭാരത് എക്സ്പ്രസ് ട്രെയിന്‍ കൂടി കേന്ദ്ര സര്‍ക്കാര്‍ അനുവദിക്കുമെന്ന് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍. കേന്ദ്ര റെയില്‍വെ മന്ത്രി അശ്വിനി വൈഷ്ണവ് ഉറപ്പ് നല്‍കിയതായും സുരേന്ദ്രന്‍ പറഞ്ഞു. കേന്ദ്ര റെയില്‍വെ മന്ത്രിയെ സന്ദര്‍ശിച്ചതിന് ശേഷമായിരുന്നു സുരേന്ദ്രന്‍ ഇക്കാര്യം വ്യക്തമാക്കിയത്.

"കേരളത്തിന്റെ യാത്രാ ദുരിതം പരിഹരിക്കുന്നതിന് ഒരു വന്ദേഭാരത് തീവണ്ടികൂടി നല്‍കാന്‍ കേന്ദ്ര സര്‍ക്കാര്‍ തീരുമാനിച്ചിരിക്കുന്നു. മലയാളികളെ സംബന്ധിച്ച് ഇത് ഏറ്റവും സന്തോഷകരമായ കാര്യമാണ്. ഇന്ന് കേന്ദ്ര മന്ത്രി അശ്വിനി വൈഷ്ണവിനെ പാര്‍ലമെന്റിലെത്തി കാണുകയും കേരളത്തിന് പുതിയ വന്ദേഭാരത് നല്‍കണമെന്ന് അഭ്യര്‍ത്ഥിക്കുകയും ചെയ്തു," സുരേന്ദ്രന്‍ പറഞ്ഞു.

"വൈകാതെ തന്നെ കേരളത്തിന് ഒരു വന്ദേഭാരത് തീവണ്ടികൂടി പ്രഖ്യാപിക്കാമെന്ന് അദ്ദേഹം പറഞ്ഞു. തിരുവനന്തപുരം - കാസര്‍ഗോഡ് ട്രെയിനിന് സമാനമായി കാസര്‍ഗോഡ് - തിരുവനന്തപുരം റിവേഴ്സ് ട്രെയിനായിരിക്കും പ്രഖ്യാപിക്കുക. വൈകാതെ തന്നെ കേരളത്തില്‍ പുതിയ വന്ദേഭാരത് ഓടിത്തുടങ്ങും," സുരേന്ദ്രന്‍ അവകാശപ്പെട്ടു.

കേരളത്തിന് പ്രധാനമന്ത്രി നരേന്ദ്ര മോദിയുടെ ഓണസമ്മാനമാണിത്. വിഷുക്കൈനീട്ടമായി കേന്ദ്രം നൽകിയ വന്ദേഭാരത് എക്സ്‌പ്രസിനെ ഇരുകയ്യും നീട്ടിയാണ് കേരളം സ്വീകരിച്ചത്. ഈ ട്രെയിനിലെ തിരക്കിനെത്തുടർന്നാണ് കേന്ദ്ര സർക്കാർ അതേ റൂട്ടിൽ രണ്ടാമത്തെ വന്ദേ ഭാരത് അനുവദിക്കുന്നതെന്നും സുരേന്ദ്രന്‍ പറയുന്നു.