തിരുവനന്തപുരം: വേനല്‍ ചൂടില്‍ ആശ്വാസമായി സംസ്ഥാനത്ത് വിവിധ ഇടങ്ങളില്‍ വേനല്‍ മഴ പെയ്തു. ഇടുക്കി, എറണാകുളം, തൃശൂര്‍, കോട്ടയം, പത്തനംതിട്ട,ആലപ്പുഴ തുടങ്ങിയ ജില്ലകളില്‍ വിവിധ ഇടങ്ങളില്‍ മഴ പെയ്തു. വേനല്‍ മഴ വെള്ളിയാഴ്ച വരെ പ്രതീക്ഷിക്കാമെന്നാണ് കാലാവസ്ഥ പ്രവചനം.
അന്തരീക്ഷത്തില്‍ വിഷപ്പുകയുടെ സാന്നിധ്യം ഉള്ള സാഹചര്യത്തില്‍ മഴ പെയ്യുമ്പോള്‍ ജാഗ്രത പാലിക്കണമെന്ന് വിദഗ്ദര്‍ അഭിപ്രായപ്പെട്ടിരുന്നു. രാത്രി ഏഴ് മണിയോടെയാണ് കൊച്ചിയുടെ വിവിധ ഭാഗങ്ങളില്‍ മഴയെത്തിയത്. കനത്ത മഴയില്ലെങ്കിലും ശക്തമായ ഇടിമിന്നലുണ്ടായിരുന്നു.
പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം, വയനാട് എന്നീ ജില്ലകളില്‍ ഒറ്റപ്പെട്ടയിടങ്ങളില്‍ ഇടിയോടു കൂടിയ മഴയ്ക്കും മണിക്കൂറില്‍ 40 കീ.മി വരെ വേഗതയില്‍ വീശിയടിച്ചേക്കാവുന്ന കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചിരുന്നു.
