ദീപാവലിക്ക് കേരളത്തിന് മൂന്നാം വന്ദേ ഭാരത്; ചെന്നൈ, ബെംഗളൂരു, എറണാകുളം റൂട്ടില്‍ ഓടും

തിരുവനന്തപുരം: ദീപാവലിക്ക് കേരളത്തിലേക്ക് പുതിയൊരു വന്ദേ ഭാരത് എക്സ്പ്രസ് ട്രെയിൻ കൂടി ഓടിത്തുടങ്ങുമെന്ന് റിപ്പോർട്ട്. ദക്ഷിണ റെയില്‍വേയെ ഉദ്ധരിച്ച് മാതൃഭൂമി ചാനലാണ് വാർത്ത റിപ്പോർട്ട് ചെയ്തത്. കര്‍ണാടക, തമിഴ്‌നാട്, കേരളം എന്നീ സംസ്ഥാനങ്ങളെ ബന്ധിപ്പിച്ച് കൊണ്ടായിരിക്കും പുതിയ വന്ദേ ഭാരത് സര്‍വീസ്. ചെന്നൈയില്‍ നിന്ന് ബെംഗളൂരുവിലേക്കും ബെംഗളൂരുവിൽ നിന്ന് എറണാകുളത്തേക്കുമാണ് സര്‍വീസ് നടത്തുക.

മൂന്ന് സംസ്ഥാനങ്ങളെ ബന്ധിപ്പിച്ചുകൊണ്ട് എട്ട് സര്‍വീസുകള്‍ നടത്താനാണ് ദക്ഷിണ റെയില്‍വേ ഉദ്ദേശിക്കുന്നത്. ചെന്നൈ-ബെംഗളൂരു, ബെംഗളൂരു-എറണാകുളം സൗത്ത് എന്നിങ്ങനെ എട്ട് സർവീസുകൾ നടത്തും. ചെന്നൈ സെൻട്രലിൽ നിന്ന് പുറപ്പെട്ട് രാവിലെ നാല് മണിയോടെ ബെംഗളൂരുവിലെത്തും. തുടർന്ന് 4.30ന് ബെംഗളൂരുവിൽ നിന്ന് പുറപ്പെട്ട് ഉച്ചയ്ക്ക് ഒന്നരയോടെ എറണാകുളത്തെത്തും. തിരിച്ചും ഈ രീതിയിൽ സർവീസ് നടത്തും. വാരാന്ത്യങ്ങളിലെ തിരക്ക് കുറയ്ക്കുന്നത് ലക്ഷ്യം വെച്ചാണ് ഈ പുതിയ സർവീസ് നടത്തുന്നത്.

ഓണം പ്രമാണിച്ച് ഇക്കഴിഞ്ഞ സെപ്തംബർ 26നാണ് കേരളത്തിനുള്ള രണ്ടാം വന്ദേ ഭാരത് ട്രെയിൻ പ്രധാനമന്ത്രി നരേന്ദ്ര മോദി ഫ്ലാഗ് ഓഫ് ചെയ്തത്. കാസർഗോഡ് നിന്ന് ആലപ്പുഴ വഴി തിരുവനന്തപുരത്തേക്കാണ് രണ്ടാം വന്ദേ ഭാരത് സർവീസ് നടത്തുന്നത്. കാസര്‍ഗോഡ് നിന്ന് തിരുവനന്തപുരത്തേക്ക് വരുന്ന കേരളത്തിലെ ഏക വന്ദേ ഭാരത് ട്രെയ്ന്‍ കോട്ടയം വഴിയാണ് സര്‍വീസ് നടത്തുന്നത്. നിലവിൽ ആഴ്ചയിൽ ആറ് ദിവസവും വന്ദേ ഭാരത് സർവീസ് നടത്തുന്നുണ്ട്.

രാവിലെ ഏഴ് മണിക്ക് കാസർഗോഡ് നിന്ന് യാത്ര തിരിച്ച്, ആലപ്പുഴ വഴി ഉച്ച കഴിഞ്ഞ് മൂന്ന് മണിയോടെ തിരുവനന്തപുരത്തെത്തുന്ന രീതിയിലാണ് രണ്ടാം വന്ദേ ഭാരത് സർവീസ് നടത്തുന്നത്. കണ്ണൂർ (8.03), കോഴിക്കോട് (9.03), ഷൊർണൂർ (10.03), തൃശ്ശൂർ (10.38), എറണാകുളം (11.45), ആലപ്പുഴ (12.38), കൊല്ലം (ഉച്ചയ്ക്ക് 1.55) എന്നിങ്ങനെയാണ് സ്റ്റോപ്പുകൾ.

മടക്ക ട്രെയിൻ വൈകിട്ട് 4.05ന് തിരുവനന്തപുരത്ത് നിന്ന് യാത്ര പുറപ്പെടും. തുടർന്ന് രാത്രി 11.55ന് കാസർ‌ഗോഡ് എത്തുന്ന വിധത്തിലാണ് സമയവും റൂട്ടും ക്രമീകരിച്ചിരിക്കുന്നത്. കൊല്ലം (4.53), ആലപ്പുഴ (5.55), എറണാകുളം (6.35), തൃശ്ശൂർ (രാത്രി 7.40), ഷൊർണൂർ (8.15), കോഴിക്കോട് (9.16), കണ്ണൂർ (10.16), കാസർഗോഡ് (രാത്രി 11.55) എന്നിങ്ങനെയാണ് ടൈം ഷെഡ്യൂൾ.

അതേസമയം, 2022 നവംബർ 11നാണ് ദക്ഷിണേന്ത്യയിലെ ആദ്യ വന്ദേ ഭാരത് ട്രെയിന്‍ ഓടിത്തുടങ്ങിയത്. മൈസൂരില്‍ നിന്ന് ബെംഗളൂരു വഴി ചെന്നൈ വരെ ആയിരുന്നു ഈ സര്‍വീസ്. അക്കാലത്ത് രാജ്യത്തെ അഞ്ചാമത്തെ സെമി ഹൈസ്പീഡ് ട്രെയിനായിരുന്നു ഇത്.