ചെങ്ങന്നൂർ: സംസ്ഥാനത്തെ രക്ഷാപ്രവര്‍ത്തനത്തിന്റെ ചുമതല പൂര്‍ണമായും സൈന്യത്തിന് ഏല്‍പ്പിക്കാനല്ല താന്‍ ആവശ്യപ്പെട്ടതെന്ന് പ്രതിപക്ഷ നേതാവ് രമേശ് ചെന്നിത്തല. സൈന്യത്തേയും ഉള്‍പ്പെടുത്തിയുളള സജീവ രക്ഷാപ്രവര്‍ത്തനത്തിനാണ് താന്‍ പറഞ്ഞതെന്നും അദ്ദേഹം വ്യക്തമാക്കി. ചെങ്ങന്നൂരിലെ ക്യാന്പുകൾ സന്ദർശിക്കുകയായിരുന്നു അദ്ദേഹം. ദുരന്ത ബാധിത മേഖലകളിൽ സൈന്യത്തിന്റെ സാന്നിധ്യം ശക്തമാക്കിയാൽ മാത്രമെ രക്ഷാപ്രവർത്തനം കാര്യക്ഷമമാക്കി മുന്നോട്ട് കൊണ്ടുപോകാൻ കഴിയൂ. ജനങ്ങൾ നേരിടുന്ന ദുരിതം സർക്കാരിന്റെ ശ്രദ്ധയിൽപ്പെടുത്തുകയാണ് ചെയ്തതെന്നും അദ്ദേഹം വ്യക്തമാക്കി.

ദുരിതാശ്വാസ ക്യാമ്പുകളിൽ സർക്കാരിന്റെ കൂടുതൽ ശ്രദ്ധ എത്തേണ്ടതുണ്ടെന്നും അദ്ദേഹം പറഞ്ഞു. പല ക്യാമ്പുകളിലും റവന്യൂ ഉദ്യോഗസ്ഥരുടെ സാന്നിദ്ധ്യമില്ല. ഡോക്ടർമാരുടെ അഭാവവുമുണ്ട്. ദുരിതം അനുഭവിക്കുന്നവർക്ക് ആവശ്യമുള്ള വസ്തുക്കൾ പല ക്യാമ്പുകളിലും ലഭ്യമല്ല. ഇനിയും പല സ്ഥലങ്ങളിൽ കുടുങ്ങിയിട്ടുള്ളവരെ രക്ഷിക്കേണ്ടതുണ്ടെന്നും ഇതിന് കൂട്ടായ പരിശ്രമം ആവശ്യമാണെന്നും ചെന്നിത്തല പറഞ്ഞു. രക്ഷാപ്രവർത്തനത്തിന് രംഗത്തിറങ്ങിയ മത്സ്യത്തൊഴിലാളികളെ അഭിനന്ദിക്കുന്നു. അവർ ഇല്ലായിരുന്നുവെങ്കിൽ സ്ഥിതിഗതികൾ എന്താകുമായിരുന്നുവെന്ന് ചിന്തിക്കാൻ കഴിയില്ലെന്നും അദ്ദേഹം ചൂണ്ടിക്കാട്ടി.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook

.