Kerala Floods: കൊച്ചി: പ്രളയക്കെടുതിയിൽ കൂടുതൽ പേരെ ചെങ്ങന്നൂരിലെ ജില്ലാ ആശുപത്രിയിലേക്ക് അയക്കാൻ തീരുമാനിച്ചു. ഇവിടെ 24 മണിക്കൂറും പ്രവർത്തിക്കുന്ന എമർജൻസി കൺട്രോൾ റൂം തുറക്കാനും മന്ത്രി കെകെ ശൈലജ ഉത്തരവിട്ടു. മറ്റ് ജില്ലകളിൽ നിന്ന് ഇവിടേക്ക് ജീവനക്കാരെ നിയോഗിക്കും.

ചെങ്ങന്നൂരിലെ ആളുകളെ പാർപ്പിച്ചിരിക്കുന്ന വിവിധ ക്യാമ്പുകളിലേക്കാവശ്യമായ മരുന്നുകളും ജീവനക്കാരേയുമെല്ലാം എമർജൻസി കൺട്രോൾ റൂമിൽ നിന്ന് ഏകോപിപ്പിക്കും. അടിയന്തിര സാഹചര്യം കണക്കിലെടുത്ത് ജീവനക്കാരോട് അത്യാവശ്യ സന്ദർഭങ്ങളിലല്ലാതെ അവധിയെടുക്കരുതെന്ന് ആവശ്യപ്പെട്ടു. അവധി നൽകുന്ന കാര്യത്തിൽ കടുത്ത നിയന്ത്രണങ്ങൾ നൽകാൻ മേലുദ്യോഗസ്ഥർക്ക് മന്ത്രി നിർദ്ദേശം നൽകി.

എസ്എച്ച്എസ്ആര്‍സി എക്‌സിക്യൂട്ടീവ് ഡയറക്ടര്‍ ഡോ. കെ.എസ്. ഷിനുവിനാണ് ചെങ്ങന്നൂരിലെ സ്‌പെഷ്യല്‍ ഓഫീസറുടെ ചുമതല. ആരോഗ്യ കേരളം തിരുവനന്തപുരം ജില്ലാ പ്രോഗ്രാം മാനേജര്‍ ഡോ. പി.വി. അരുണിന് മേൽനോട്ടത്തിന്റെ ഉപചുമതല നൽകി. ആലപ്പുഴ ജില്ലാ മെഡിക്കല്‍ ഓഫീസര്‍ ഡോ. വസന്ത ദാസ്, ആരോഗ്യ കേരളം ജില്ലാ പ്രോഗ്രാം മാനേജര്‍ ഡോ. രാധാകൃഷ്ണന്‍ എന്നിവരും ഇവിടെ ദുരിതാശ്വാസ പ്രവർത്തനങ്ങൾക്ക് മേൽനോട്ടം വഹിക്കും.

ചെങ്ങന്നൂരിൽ രക്ഷാപ്രവര്‍ത്തനങ്ങള്‍ക്കായി എട്ട് 108 ആംബുലന്‍സുകള്‍ തിരുവനന്തപുരം ജില്ലയിൽ നിന്ന് മാത്രം സജ്ജമാക്കി. സ്വകാര്യ ആംബുലന്‍സുകള്‍ വാടകയ്ക്ക് എടുക്കും. എല്ലാ ക്യാംപിലും മുഴുവൻ സമയവും വൈദ്യ സഹായം ലഭ്യമാക്കുമെന്നും മന്ത്രി വിശദീകരിച്ചു.

ദുരിതബാധിത മേഖലയിലെ ഒറ്റ മരുന്നുകടയും അടച്ചിടാൻ പാടില്ല. സംസ്ഥാനത്തെ സ്വകാര്യ ആശുപത്രികളിലെ ജീവനക്കാരുടെ കൂടി സഹായത്തോടെയാണ് ദുരിതാശ്വാസ പ്രവർത്തനങ്ങൾ ആരോഗ്യവകുപ്പ് നടത്തുന്നത്. എല്ലാ മെഡിക്കല്‍ കോളേജുകളിലേയും സർക്കാർ ആശുപത്രികളിലെയും ഡോക്ടര്‍മാരെ വിവിധ ക്യാമ്പുകളിലേക്കയച്ചിട്ടുണ്ട്.

തിരുവന്തപുരം മെഡിക്കല്‍ കോളേജില്‍ നിന്നും 30 പേരടങ്ങുന്ന സംഘം ചെങ്ങന്നൂരിലും 18 പേരടങ്ങുന്ന സംഘം പത്തനംതിട്ടയിലും എത്തി. ചെങ്ങന്നൂരില്‍ ആലപ്പുഴ മെഡിക്കല്‍ കോളേജിലെ ഡോക്ടര്‍മാരും ബിലീവിയേഴ്‌സ് മെഡിക്കല്‍ കോളേജിലെ 20 അംഗ മെഡിക്കല്‍ സംഘവും എത്തിയിട്ടുണ്ട്. മരുന്നിന് ഒരു ക്ഷാമമില്ലെന്നും ആവശ്യത്തിന് സ്വരൂപിച്ചിട്ടുണ്ടെന്നും മന്ത്രി വ്യക്തമാക്കി.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook

.