scorecardresearch
Latest News

ഡാം തുറക്കൽ: തെറ്റായ കാര്യങ്ങൾ പ്രചരിപ്പിക്കാതിരിക്കുക, ദുരന്ത നിവാരണ അതോറിറ്റിയുടെ 19 സുരക്ഷാ നിർദ്ദേശങ്ങൾ

കനത്ത മഴയിൽ ഇടുക്കി ഡാം സംഭരണശേഷിക്കൊപ്പം ജലനിരപ്പ് എത്തുന്ന സാഹചര്യത്തിൽ​ ചെറുതോണി ഡാമിലെ ഷട്ടറുകൾ തുറക്കുമ്പോൾ ജനങ്ങൾ സ്വീകരിക്കേണ്ട സുരക്ഷാ മുൻകരുതലുകളെ കുറിച്ച് ദുരന്ത നിവാരണ അതോറിറ്റിയുടെ നിർദ്ദേശങ്ങൾ

ഡാം തുറക്കൽ: തെറ്റായ കാര്യങ്ങൾ പ്രചരിപ്പിക്കാതിരിക്കുക, ദുരന്ത നിവാരണ അതോറിറ്റിയുടെ 19 സുരക്ഷാ നിർദ്ദേശങ്ങൾ
ഇടുക്കി ആർച്ച് ഡാം ഫയൽ​ചിത്രം

തൊടുപുഴ: കനത്ത മഴയെ തുടർന്ന് കാൽനൂറ്റാണ്ടിന് ശേഷം ഇടുക്കി വൈദ്യുതി പദ്ധതിയിലെ ഡാമുകളിലെ സംഭരണശേഷിക്കൊപ്പം ജലം നിറയുകയാണ്. വെളളം തുറന്നുവിടേണ്ട അവസ്ഥയിലേയ്ക്കാണ് നിലവിൽ​ മഴയും നീരൊഴൊക്കും കൊണ്ട് സ്ഥിതിഗതികൾ എത്തി നിൽക്കുന്നത്. ഈ​ സാഹചര്യത്തിൽ ചൊവ്വാഴ്ച ഡാം തുറക്കുന്നതിന്റെ ട്രയൽ റൺ നടത്താനാണ് സർക്കാർ തീരുമാനം. ​​ഈ സാഹചര്യത്തിൽ ജനങ്ങൾ​ സ്വീകരിക്കേണ്ട സുരക്ഷാ മുൻകരുതലിനെ കുറിച്ച് ദുരന്ത നിവാരണ അതോറിറ്റി നിർദ്ദേശങ്ങൾ പുറപ്പെടുവിച്ചു.

ഇടുക്കി അണക്കെട്ട് നിറഞ്ഞു ഷട്ടറുകൾ തുറന്നാല്‍ ആ സമയത്ത്   എടുക്കേണ്ട മുൻകരുതലുകൾ എന്തൊക്കെയാണെന്ന്  ദുരന്ത നിവാരണ അതോറിറ്റി അറിയിച്ചു. പുഴയോരത്ത് താമസിക്കുന്നവരും യാത്രികരും ഉൾപ്പടെ വെളളം ഒഴുകുന്ന പ്രദേശങ്ങളിലെ എല്ലാവർക്കും ബാധമാകുന്നതാണ് ഈ​ നിർദേശങ്ങൾ. 2013ല്‍ ഇടമലയാര്‍ അണക്കെട്ട് തുറന്നു വിട്ടപ്പോള്‍ വെള്ളം കയറിയ എല്ലാ പ്രദേശങ്ങളിലും ഉള്ളവര്‍ ഈ വിവരം പ്രത്യേകം ശ്രദ്ധിക്കണമെന്നും അതോറിറ്റി അറിയിച്ചു.

  • പരിഭ്രാന്തരാവാതിരിക്കുകയും തെറ്റായ കാര്യങ്ങൾ പ്രചരിപ്പിക്കാതെയിരിക്കുകയും ചെയ്യുക.
  • ഇടുക്കി അണക്കെട്ട് നിറഞ്ഞ് ഷട്ടറുകൾ തുറക്കുന്നത് കാണുവാന്‍ വിനോദ സഞ്ചാരികള്‍ ആയി പോകരുത്. ഇത് അടിയന്തിര സാഹചര്യ നിയന്ത്രണ പ്രവര്‍ത്തങ്ങള്‍ക്ക് വിഘാതം സൃഷ്ടിക്കും. ഇടുക്കി ജില്ലയിലെ വാഴത്തോപ്പ്, മരിയാപുരം, കഞ്ഞിക്കുഴി, വാത്തിക്കുടി, കൊന്നതടി എന്നീ പഞ്ചായത്തുകളിലേയ്ക്കുളള വിനോദ സഞ്ചാരം നിലവില്‍ ഒഴിവാക്കേണ്ടതാണ്.
  • ഒരു കാരണവശാലും ഷട്ടർ തുറന്ന ശേഷം നദി മുറിച്ചു കടക്കരുത്
  • പാലങ്ങളിലും, നദിക്കരയിലും മറ്റും കയറി കൂട്ടം കൂടി നില്‍ക്കരുത്
  • പാലങ്ങളിലും, നദിക്കരയിലും മറ്റും കയറി സെല്‍ഫി എടുക്കല്‍ ഒഴിവാക്കുക.
  • നദിയില്‍ കുളിക്കുന്നതും, തുണി നനയ്ക്കുന്നതും, കളിക്കുന്നതും ഒഴിവാക്കുക.

നദിക്കരയോട് ചേർന്ന് താമസിക്കുന്നവരും മുൻകാലങ്ങളിൽ വെള്ളം കയറിയ പ്രദേശങ്ങളിൽ ഉള്ളവരും പ്രാഥമികമായി ചെയ്യേണ്ടത് ഒരു എമർജൻസി കിറ്റ് ഉണ്ടാക്കി വയ്ക്കുക എന്നതാണ്.

എമർജൻസി കിറ്റില്‍ ഉണ്ടാകേണ്ട വസ്തുക്കള്‍:

– ടോര്‍ച്ച്
– റേഡിയോ
– 500 ml വെള്ളം
– ORS ഒരു പാക്കറ്റ്
– അത്യാവശ്യം വേണ്ടുന്ന മരുന്നുകൾ
– മുറിവിന് പുരട്ടാവുന്ന മരുന്ന് (Antiseptic Ointment)
– ഒരു ചെറിയ കുപ്പി ആന്റി സെപ്ടിക് ലോഷന്‍ (detol, savlon etc)
– 100 ഗ്രാം കപ്പലണ്ടി
– 100 ഗ്രാം ഉണക്ക മുന്തിരി അല്ലെങ്കില്‍ ഈന്തപ്പഴം
– ചെറിയ ഒരു കത്തി
– 10 ക്ലോറിന്‍ ടാബ്ലെറ്റ്
– ഒരു ബാറ്ററി ബാങ്ക് അല്ലെങ്കില്‍ ടോര്‍ച്ചില്‍ ഇടാവുന്ന ബാറ്ററി
– ബാറ്ററിയും, കാള്‍ പ്ലാനും ചാര്‍ജ് ചെയ്ത ഒരു സാധാരണ മൊബൈല്‍ ഫോണ്‍ – അത്യാവശ്യം കുറച്ച് പണം

  • പ്രധാനപ്പെട്ട രേഖകൾ സർട്ടിഫിക്കറ്റുകൾ, ആഭരണങ്ങൾ പോലെ വിലപിടിപ്പുള്ള സാധനങ്ങൾ തുടങ്ങിയവ പ്ലാസ്റ്റിക് ബാഗുകളിൽ എളുപ്പം എടുക്കാൻ പറ്റുന്ന ഉയര്‍ന്ന സ്ഥലത്തു വീട്ടിൽ സൂക്ഷിക്കുക.
  • ഔദ്യോഗികമായി ലഭിക്കുന്ന വിവരങ്ങളെല്ലാം വീട്ടിൽ എല്ലാവരോടും പറയുക. അടിയന്തര സാഹചര്യത്തിൽ നിങ്ങൾ പുറത്താണെങ്കിൽ നിങ്ങളെ കാത്തുനിൽക്കേണ്ടതില്ല എന്ന് വീട്ടിലുള്ളവർക്ക് നിർദ്ദേശം നല്‍കുക.
  • ടിവിയിലും റേഡിയോയിലും വരുന്ന മുന്നറിയിപ്പുകൾ ശ്രദ്ധിക്കുക. ആകാശവാണിയുടെ ഈ നിലയങ്ങള്‍ റേഡിയോയില്‍ ശ്രദ്ധിക്കുക
    1. Trivandrum തിരുവനന്തപുരം MW (AM Channel): 1161 kHz
    2. Alappuzha ആലപ്പുഴ MW (AM Channel): 576 kHz
    3. Thrissur തൃശൂര്‍ MW (AM Channel): 630 kHz
    4. Calicut കോഴിക്കോട് MW (AM Channel): 684 kHz
  • ആവശ്യമാണെങ്കില്‍ ഓരോ വില്ലേജിലെയും ആളുകൾക്ക് സുരക്ഷിതമായ സ്ഥാനങ്ങൾ അതാതു പ്രാദേശിക ഭരണകൂടങ്ങൾ അറിയിക്കും. അവിടേയ്ക്ക് എത്രയും പെട്ടെന്ന് സ്വമേധയാ മാറാൻ ശ്രമിക്കുക. സഹായങ്ങൾ വേണ്ടവർ അധികൃതരുമായി മടിയൊന്നും കൂടാതെ ബന്ധപ്പെടുക.
  • ജലം കെട്ടിടത്തിനുള്ളില്‍ പ്രവേശിച്ചാല്‍, വൈദ്യുതആഘാതം ഒഴിവാക്കുവാനായി മെയിന്‍ സ്വിച്ച് ഓഫ് ആക്കുക
  • ജില്ലാ എമര്‍ജന്‍സി ഓപ്പറേഷന്‍സ് സെന്റര്‍ നമ്പരുകള്‍

    Ernakulam എറണാകുളം – 0484-1077 (Mob: 7902200300, 7902200400)
    Idukki ഇടുക്കി – 04862-1077 (Mob: 9061566111, 9383463036)
    Thrissur തൃശൂര്‍ – 0487-1077, 2363424 (Mob: 9447074424)

  • പഞ്ചായത്ത് അധികാരികളുടെ ഫോണ്‍ നമ്പര്‍ കൈയ്യില്‍ സൂക്ഷിക്കുക.
  • വീട്ടിൽ അസുഖമുള്ളവരോ, അംഗപരിമിതരോ, ഭിന്നശേഷിക്കാരോ, പ്രായമായവരോ കുട്ടികളോ ഒക്കെയുള്ളവർ അവരെ പ്രത്യേകം ശ്രദ്ധിക്കുക. വെള്ളപ്പൊക്കം ഉണ്ടായാല്‍ അവരെ ആദ്യം മാറ്റാൻ ശ്രമിക്കുക. പ്രത്യേക സഹായം ആവശ്യമാണെങ്കില്‍, ഇവരെ സംബന്ധിച്ച വിവരം അടുത്തുള്ള പൊലീസ് സ്റ്റേഷനില്‍ അറിയിക്കുക.
  • വൈദ്യുതോപകരണങ്ങള്‍ വെള്ളം വീട്ടിൽ കയറിയാലും നശിക്കാത്ത തരത്തിൽ ഉയരത്തില്‍ വയ്ക്കുക.
  • വളർത്തു മൃഗങ്ങളെ സുരക്ഷിത സ്ഥാനത്തേക്ക് മാറ്റുകയോ അതിനു പറ്റാത്ത അവസ്ഥയിൽ കെട്ടഴിച്ചു വിടുകയോ ചെയ്യുക. മൃഗങ്ങൾക്ക് പൊതുവിൽ നീന്താൻ അറിയുമെന്നോർക്കുക.
  • വാഹനങ്ങൾ ഉയർന്ന പ്രദേശങ്ങളിലേക്ക് മാറ്റി പാർക്ക്‌ ചെയ്യുക.
  • താഴ്ന്ന പ്രദേശത്തെ ഫ്ലാറ്റുകളില്‍ ഉള്ളവര്‍ ഫ്ലാറ്റിന്‍റെ സെല്ലാറില്‍ കാര്‍ പാര്‍ക്ക്‌ ചെയ്യാതെ കൂടുതല്‍ ഉയര്‍ന്ന സ്ഥലങ്ങളില്‍ പാര്‍ക്ക് ചെയ്യുക.
  • രക്ഷാപ്രവർത്തനങ്ങളിൽ പരിശീലനം ലഭിച്ചവർ മാത്രം ദുരിതാശ്വാസ സഹായം നല്‍കുവാന്‍ പോകുക. മറ്റുള്ളവർ അവർക്ക് പിന്തുണ കൊടുക്കുക.

    Read More:​ഡാം തുറന്നാൽ വെളളം ആലുവയിലെത്തുന്നത് എപ്പോൾ? ഡാമിനെ കുറിച്ച് അറിയേണ്ട കാര്യങ്ങൾ

Stay updated with the latest news headlines and all the latest Kerala news download Indian Express Malayalam App.

Web Title: Kerala disaster management authority directions in idukki kseb dam opening

Best of Express