ന്യൂഡല്‍ഹി: ആരോഗ്യ, കുടുംബക്ഷേമ മേഖലയില്‍ കഴിഞ്ഞ അഞ്ചുവര്‍ഷത്തെ കേരളത്തിന്റെ ബജറ്റ് വിഹിതം മറ്റ് സംസ്ഥാനങ്ങളുടെ ശരാശരിയേക്കാള്‍ കൂടുതല്‍. പിആര്‍എസ് ലെജിസ്ലേറ്റീവ് റിസര്‍ച്ചില്‍നിന്നുള്ള കണക്കുകളാണ് ഇക്കാര്യം വ്യക്തമാക്കുന്നത്.
2015-2020 കാലയളവില്‍ ആരോഗ്യ, കുടുംബക്ഷേമ മേഖലയില്‍ ബജറ്റിന്റെ ശരാശരി 5.6 ശതമാനമാണു കേരളം വകയിരുത്തിയത്. ഈ മേഖലയില്‍ സംസ്ഥാനങ്ങള്‍ ചെലവഴിക്കുന്നതിന്റെ ശരാശരി 5.3 ശതമാനമാണ്. ശരാശരി 7.4 ശതമാനം അനുവദിച്ച മേഘാലയയാണ് ഒന്നാമത്.
വിദ്യാഭ്യാസ രംഗത്ത് കേരളം വകയിരുത്തിയ 16 ശതമാനം സംസ്ഥാന ചെലവുകളുടെ ശരാശരിക്കു തുല്യമാണ്. ബജറ്റിന്റെ 22 ശതമാനം അനുവദിച്ച അസമാണ് ഈ മേഖലയില്‍ ഏറ്റവും കൂടുതല്‍ ചെലവഴിച്ചത്.
കൃഷി, സാമൂഹ്യ സുരക്ഷ, റോഡുകള്‍, പാലങ്ങള്‍, പട്ടികജാതി-വര്‍ഗങ്ങളുടെയും ഒബിസി വിഭാഗത്തിന്റെയം ക്ഷേമം തുടങ്ങിയ കാര്യങ്ങളില്‍ കേരളം ചെലവഴിച്ചതു മറ്റു സംസ്ഥാനങ്ങളുടെ ശരാശരി ബജറ്റ് വിഹിതത്തിനു തുല്യമാണ്.
ഊര്‍ജം, ഗ്രാമവികസനം, നഗരവികസനം എന്നീ മേഖലകളില്‍ കേരളത്തിന്റെ വിഹിതം സംസ്ഥാന ശരാശരിയേക്കാള്‍ ചെലവിനേക്കാള്‍ കുറവാണ്.
