ട്രെയിന്‍ തീവെയ്പ്: പൊലീസ് പിടിയിലായയാളെ പരിസരത്ത് കണ്ടിരുന്നു, നിര്‍ണായകമായത് ബിപിസിഎല്‍ ജീവനക്കാരന്റെ മൊഴി

കണ്ണൂര്‍: കണ്ണൂര്‍ റെയില്‍വേ സ്റ്റേഷനില്‍ നിര്‍ത്തിയിട്ട ട്രെയിനിനു തീയിട്ട കേസില്‍ പൊലീസ് പിടിയലായ ആളെ പരിസരത്ത് കണ്ടതായി ബിപിസിഎല്‍ ജീവനക്കാരന്റെ മൊഴി. ബംഗാള്‍ കൊല്‍ക്കത്ത സ്വദേശി പുഷന്‍ജിത്ത് സിദ്ഗര്‍ (40) പൊലീസ് കസ്റ്റഡിയിലുള്ളത്. ബിപിസിഎല്‍ ഇന്ധനസംഭരണശാലയിലെ ജീവനക്കാരന്റെ മൊഴിയും സിസിടിവി ദൃശ്യങ്ങളുമാണ് ഇയാളിലേക്ക് അന്വേഷണം എത്തിയത്. ഇയാളെ രഹസ്യകേന്ദ്രത്തില്‍ ചോദ്യം ചെയ്യുകയാണ്. എന്‍ഐഎ സംഘം സ്ഥലത്തെത്തിയിട്ടുണ്ട്. മറ്റു കേന്ദ്ര ഏജന്‍സികളും വിവരങ്ങള്‍ തേടി.

പിടിയിലായ പുഷന്‍ജിത്തിന്റെ മാനസികാരോഗ്യം സംബന്ധിച്ചു സംശയങ്ങളുണ്ട്. ട്രെയിനില്‍നിന്നു ലഭിച്ച 10 വിരലടയാളങ്ങളില്‍ നാലും ഇയാളുടേതാണെന്നാണ് റിപോര്‍ട്ടുകള്‍ പറയുന്നത്. ഇന്നലെ ട്രെയിനിനു തീയിട്ട സ്ഥലത്തിനു സമീപത്ത് ഈ വര്‍ഷം ഫെബ്രുവരി 13ന് തീയിട്ടതും ഇയാളാണെന്ന സൂചനയാണ് പൊലീസിനുള്ളത്.

ആലപ്പുഴ കണ്ണൂര്‍ എക്സിക്യൂട്ടീവ് എക്‌സ്പ്രസ് ട്രെയിനിന്റെ തീപിടിച്ച കോച്ചില്‍നിന്ന് 100 മീറ്റര്‍ അകലെ ബിപിസിഎല്ലിന്റെ ഇന്ധന സംഭരണകേന്ദ്രമാണ്. ഇവിടേക്കുള്ള ഇന്ധനക്കുഴല്‍ കോച്ചിന് തൊട്ടടുത്തുമുണ്ടായിരുന്നു. കോച്ചിലെ തീ അണക്കാന്‍ ഒരു മണിക്കൂറോളം വൈകുകയും ചെയ്തിരുന്നു. ഇന്നലെ രാത്രി ഒന്നരയോടെയായിരുന്നു സംഭവം. മൂന്നാം പ്ലാറ്റ് ഫോമിനു സമീപം എട്ടാമത്തെ യാര്‍ഡില്‍ ഹാള്‍ട്ട് ചെയ്തിരുന്ന ട്രെയിനിന്റെ ബോഗിയാണ് കത്തിയത്. രാത്രി പതിനൊന്നോടെ എത്തിയ ട്രെയിന്‍ നിര്‍ത്തിയിട്ടതാണ്. ഒരു ബോഗി പൂര്‍ണമായും കത്തിനശിച്ചു. പുറമേനിന്നു തീയിട്ടതാകാമെന്നാണ് പ്രാഥമിക നിഗമനം. ഡ്യൂട്ടിയിലുണ്ടായിരുന്ന സ്റ്റേഷന്‍ മാസ്റ്ററും അധികൃതരും അറിയിച്ചതനുസരിച്ച് അഗ്നിരക്ഷാ സേന രാത്രി 2.20-ഓടെ തീ അണക്കുകയയിരുന്നു.

രണ്ടു മാസത്തിനിടെ രണ്ടാം തവണയാണ് എക്‌സിക്യൂട്ടീവ് എക്‌സ്പ്രസിനു തീയിടുന്നത്. ഏപ്രില്‍ രണ്ടിനു രാത്രി ഓടിക്കൊണ്ടിരിക്കെ എലത്തൂരില്‍ എക്‌സിക്യൂട്ടീവ് എക്‌സ്പ്രസിന്റെ 2 കോച്ചുകളില്‍ അക്രമി തീയിട്ടതിനെത്തുടര്‍ന്ന് 3 പേര്‍ മരിച്ചിരുന്നു. ഈ കേസില്‍ ഡല്‍ഹി സ്വദേശി ഷാറുഖ് സെയ്ഫിയെ അറസ്റ്റ് ചെയ്തിരുന്നു.