മാറി നില്‍ക്കാമെന്ന് പറഞ്ഞത് ധാര്‍മികത മുന്‍നിര്‍ത്തി; എം വി ഗോവിന്ദനെതിരെ മാനനഷ്ടക്കേസ് നല്‍കുമെന്ന് കെ സുധാകരന്‍

കണ്ണൂര്‍: ധാര്‍മികത മുന്‍നിര്‍ത്തിയാണ് താന്‍ നേതൃസ്ഥാനത്ത് നിന്ന് മാറി നില്‍ക്കാമെന്ന് അറിയിച്ചതെന്ന് കെപിസിസി പ്രസിഡന്റ് കെ സുധാകരന്‍. എന്നാല്‍ നേതൃത്വം നേതൃത്വം ഒറ്റക്കെട്ടായി സ്ഥാനത്ത് തുടരണമെന്നാവശ്യപ്പെട്ടതോടെ ആ ചാപ്റ്റര്‍ അവസാനിച്ചെന്ന് സുധാകരന്‍ കണ്ണൂരില്‍ മാധ്യമങ്ങളോട് പറഞ്ഞു.

കേസിന്റെ പശ്ചാത്തലത്തില്‍ കെപിസിസി പ്രസിഡന്റ് സ്ഥാനം ഒഴിയില്ല. കേസുമായി ബന്ധപ്പെട്ട് അറസ്റ്റ് ഉള്‍പ്പെടെ ഉണ്ടായ സാഹചര്യത്തില്‍ ധാര്‍മികത മുന്‍നിര്‍ത്തിയാണ് രാജിസന്നദ്ധത അറിയിച്ചത്. ഒഴിയരുതെന്ന് ഹൈക്കമാന്‍ഡും നേതാക്കളും ഒറ്റക്കെട്ടായി ആവശ്യപ്പെട്ട സാഹചര്യത്തിലാണ് തീരുമാനം. ചോദ്യം ചെയ്യലിനു ശേഷം പൂര്‍ണ ആത്മവിശ്വാസമുണ്ടെന്നും, കേസില്‍ ഒരു ചുക്കും ചുണ്ണാമ്പുമില്ലെന്നും അദ്ദേഹം പറഞ്ഞു.

സിപിഎം സംസ്ഥാന സെക്രട്ടറി എം.വി.ഗോവിന്ദനെതിരെ മാനനഷ്ടക്കേസ് ഫയല്‍ ചെയ്യുമെന്നും കെ.സുധാകരന്‍ പറഞ്ഞു. മോന്‍സന്‍ മാവുങ്കല്‍ പ്രതിയായ പോക്‌സോ കേസില്‍ സുധാകരനും പങ്കുണ്ടെന്ന തരത്തില്‍ വാര്‍ത്താ സമ്മേളനത്തില്‍ നടത്തിയ പ്രസ്താവനയുടെ പശ്ചാത്തലത്തിലാണു മാനനഷ്ടക്കേസ് ഫയല്‍ ചെയ്യാനുള്ള നീക്കം. എം.വി.ഗോവിന്ദനും ദേശാഭിമാനിക്കുമെതിരെ കേസ് കൊടുക്കുമെന്ന് അദ്ദേഹം വ്യക്തമാക്കി. രണ്ടു ദിവസത്തിനുള്ളില്‍ കേസ് ഫയല്‍ ചെയ്യുമെന്നും അദ്ദേഹം അറിയിച്ചു. മോന്‍സന്‍ മാവുങ്കല്‍ ജീവനക്കാരിയുടെ പ്രായപൂര്‍ത്തിയാകാത്ത മകളെ പീഡിപ്പിക്കുമ്പോള്‍ കെ.സുധാകരനും സ്ഥലത്തുണ്ടെന്നായിരുന്നു ഗോവിന്ദന്റെ പ്രസ്താവന. ദേശാഭിമാനി പത്രത്തിലെ വാര്‍ത്തയെ ആധാരമാക്കിയായിരുന്നു പരാമര്‍ശം.

കോണ്‍ഗ്രസുകാരനാണ് സുധാകരനെതിരെ പരാതി നല്‍കിയതെന്ന എകെ ബാലന്റെ പ്രതികരണത്തില്‍ പാര്‍ട്ടിക്കുള്ളില്‍ നിന്നാണ് തനിക്കെതിരെ പരാതി വന്നതെങ്കില്‍ അപ്പോള്‍ ആലോചിക്കാം. വരാന്‍ പോകുന്ന ജന്മത്തില്‍ പട്ടിയാകുമെന്ന് കരുതി ഇപ്പോഴെ കുരച്ചുപഠിക്കുമോ?. ഇല്ലല്ലോ, പട്ടിയാകുമ്പോള്‍ കുരയ്ക്കാം. എകെ ബാലന്‍ പറയുന്നത് അത്രസീരിയസായി എടുക്കേണ്ട. ഗോവിന്ദന്‍ മാഷല്ല, ഗോവിന്ദന്‍. എംവി ഗോവിന്ദനും എകെ ബാലനും പറയുന്നത് ഏതാണ്ട് തുല്യമാണ്. അതിനൊന്നും അര്‍ഥവും നിലവാരവുമില്ല'- സുധാകരന്‍ പറഞ്ഞു.