ശക്തിവേലിന് പിന്നാലെ നാലാം പ്രതി സി.പി പ്രവീണും പിടിയിലെന്ന് സൂചന

കോയമ്പത്തൂർ: ജിഷ്ണുക്കേസിൽ ഒളിവിലായിരുന്ന ശക്തിവേലിനെ അറസ്റ്റ് ചെയ്തതിന് പിന്നാലെ നാലാം പ്രതി സി.പി.പ്രവീണിനേയും കസ്റ്റഡിയിൽ എടുത്തതായി സൂചന. നാഗർകോവിലിൽനിന്നും പ്രവീണിനെ അന്വേഷണ സംഘം കസ്റ്റഡിയിൽ എടുത്തതായാണ് റിപ്പോർട്ടുകൾ. നേരത്തെ കോയമ്പത്തൂരി​ൽ വെച്ചാണ് ശക്തിവേലിനെ പ്രത്യേക അന്വേഷണ സംഘം അറസ്റ്റ് ചെയ്തത്. പമ്പാടി നെഹ്റു കോളേജിലെ വൈസ് പ്രിൻസിപ്പലാണ് ശക്തിവേൽ.

കോയമ്പത്തൂരിലെ നാമക്കല്ലിൽ വെച്ചാണ് എൻ.കെ.ശക്തിവേലിനെ അറസ്റ്റ് ചെയ്തത്. ക്രൈംബ്രാഞ്ച് എഡിജിപി ദിനേന്ദ്ര കശ്യപിന്റെ നേതൃത്വത്തിലുള്ള സംഘമാണ് ഇയാളെ കസ്റ്റഡിയിൽ എടുത്തത്. ശക്തിവേലുൾപ്പെടെയുള്ള 3 പ്രതികളുടെ മുൻകൂർ ജാമ്യാപേക്ഷ നാളെ പരിഗണിക്കാനിരിക്കെയാണ് ശക്തിവേലിനെ പൊലീസ് കസ്റ്റഡിയിൽ എടുക്കുന്നത് എന്നത് ശ്രദ്ധേയമാണ്.

തൃശൂരിൽ എത്തിച്ച ശക്തിവേലിനെ ഐജിയുടെ നേതൃത്വത്തിൽ ചോദ്യം ചെയ്യുന്നു. പൊലീസ് ക്ലബ്ബിലാണ് ചോദ്യം ചെയ്യൽ നടക്കുന്നത്. ഇതിന് ശേഷം ഇന്ന് തന്നെ  ശക്തിവേലിനെ  വടക്കാഞ്ചേരി കോടതിയിൽ​ ഹാജരാക്കും. ശക്തിവേലിന്രെ ബന്ധുക്കളുടെ ഫോൺ വിവരങ്ങളിൽ നിന്നാണ് ശക്തിവേലിനെ കണ്ടെത്താനായത്. നാലാം പ്രതി സി.പി.പ്രവീൺ, ബിബിൻ എന്നിവരെയും പൊലീസ് കസ്റ്റഡിയിൽ എടുത്തിട്ടുണ്ട് എന്നാണ് വാർത്തകൾ.

ഇതോടെ ജിഷ്ണുക്കേസിലെ പ്രതികളെ അറസ്റ്റ് ചെയ്യണമെന്നാവശ്യപ്പെട്ട് മഹിജയും കുടുംബാഗങ്ങളും നടത്തുന്ന നിരാഹാരസമരം ഒത്തു തീർപ്പാകാനുള്ള സാധ്യത ഏറി.