എസ് ഐയെ കള്ളക്കേസില്‍ കുടുക്കിയ സിഐക്കെതിരെ അന്വേഷണം

തൃശൂര്‍: ക്രൈംബ്രാഞ്ച് എസ്.ഐയെ കള്ളക്കേസില്‍ കുടുക്കിയെന്ന പരാതിയില്‍ സിഐക്കെതിരെ അന്വേഷണം. തൃശൂര്‍ നെടുമ്പുഴ സി ഐ ദിലീപിനെതിരെയാണ് അന്വേഷണത്തിന് ഉത്തരവിട്ടത്. ക്രൈംബ്രാഞ്ച് എസ് ഐ ആമോദിനെയാണ് റോഡരികില്‍ മദ്യപിച്ചെന്ന കേസില്‍ സി ഐ അറസ്റ്റ് ചെയ്തത്.

കഴിഞ്ഞ ജൂലൈ 30നാണ് സംഭവം. വഴിയരികില്‍ ഫോണ്‍ ചെയ്തു നില്‍ക്കുമ്പോഴാണ് ആമോദിനെ എസ്.ഐ കസ്റ്റഡിയിലെടുത്തതെന്നാണ് ആരോപണം. തുടര്‍ന്ന് അബ്കാരി ആക്ട് പ്രകാരം കുറ്റം ചുമത്തി അറസ്റ്റ് ചെയ്യുകയായിരുന്നു. 12 മണിക്കൂറിനകം ഇയാളെ സസ്‌പെന്‍ഡ് ചെയ്തു. പിന്നീട് സ്റ്റേറ്റ് സ്‌പെഷ്യല്‍ബ്രാഞ്ചിന്റെ അന്വേഷണ റിപ്പോര്‍ട്ട് പ്രകാരമാണ് ക്രൈം ബ്രാഞ്ച് എസ് ഐ ആമോദിനെതിരെ ചുമത്തിയത് കള്ളക്കേസാണെന്ന് തെളിഞ്ഞത്. ആമോദിനോടുള്ള വ്യക്തിവൈരാഗ്യത്തിന്റെ പേരിലാണ് കള്ളക്കേസ് ചമച്ചതെന്നാണ് സൂചന.

കള്ളക്കേസില്‍ കുടുക്കി ആമോദിനെ ഒരു ദിവസം കസ്റ്റഡിയില്‍വെച്ചെന്നും കുടുംബം ആരോപിക്കുന്നു. സംഭവത്തില്‍ എസ്.ഐയുടെ കുടുംബം മുഖ്യമന്ത്രിക്ക് പരാതി നല്‍കിയിരുന്നു. സംസ്ഥാന സ്പെഷ്യല്‍ ബ്രാഞ്ചും ജില്ലാ സ്പെഷ്യല്‍ ബ്രാഞ്ചും നടത്തിയ അന്വേഷണത്തില്‍ എസ്.ഐ കുറ്റക്കാരനല്ലെന്ന് കണ്ടെത്തിയിരുന്നു.

സംഭവത്തില്‍ തൃശൂര്‍ റേഞ്ച് ഐ.ജി അന്വേഷണത്തിന് നിര്‍ദേശം നല്‍കി. സി ഐക്കെതിരെ റിപ്പോര്‍ട്ട് സമര്‍പ്പിച്ചിട്ടും യാതൊരു നടപടിയും ഉണ്ടായില്ലെന്നും ആരോപണമുയര്‍ന്നു. തുടര്‍ന്ന് ആമോദിന്റെ കുടുംബവും പരാതിയുമായി മുന്നോട്ട് പോകുകയായിരുന്നു. തുടര്‍ന്നാണ് സി ഐക്കെതിരെ വകുപ്പ് തല അന്വേഷണത്തിന് ഉത്തരവിട്ടത്. അന്വേഷണത്തിന്റെ അടിസ്ഥാനത്തില്‍ സി ഐ ദിലീപിനെതിരെ വരും ദിവസങ്ങളില്‍ വകുപ്പ് തല നടപടിയുണ്ടായേക്കും.