പ്ലസ് വൺ, വിഎച്ച്എസ്‌സി; ആദ്യ അലോട്ട്മെന്റ് ലിസ്റ്റ് ഇവിടെ അറിയാം

തിരുവനന്തപുരം: ഹയർ സെക്കൻഡറി, വൊക്കേഷണൽ ഹയർ സെക്കൻഡറി ഒന്നാംവർഷ ഏകജാലക പ്രവേശനത്തിന്റെ ആദ്യ അലോട്ട്‌മെന്റ് പ്രസിദ്ധീകരിച്ചു. ബുധൻ വൈകിട്ട് നാലിനകം ആവശ്യമായ സർട്ടിഫിക്കറ്റുകൾ സ​ഹിതം അലോട്ട്‌മെന്റ് ലഭിച്ച സ്‌കൂളുകളിൽ പ്രവേശനം നേടണം.

http://www.admission.dge.kerala.gov.in, https://hscap.kerala.gov.in എന്നീ വെബ്സൈറ്റുകളില്‍ രജിസ്റ്റർ ചെയ്‌ത ഫോൺ നമ്പരും പാസ്‌വേഡും നൽകുമ്പോൾ അലോട്ട്‌മെന്റ് വിവരങ്ങൾ ലഭിക്കുന്നതാണ്. ആദ്യ ഓപ്ഷനിൽത്തന്നെ അലോട്ട്‌മെന്റ് ലഭിക്കുന്നവർ സ്കൂളിലെ സർട്ടിഫിക്കറ്റ് പരിശോധനയ്‌ക്കുശേഷം ഫീസ് അടച്ച് സ്ഥിരപ്രവേശനം നേടേണ്ടതാണ്.

അലോട്ട്‌മെന്റ് ലിസ്റ്റിൽ ഉൾപ്പെട്ടിട്ടും ബുധനാഴ്ചയ്‌ക്കകം സ്ഥിരമായോ താൽക്കാലികമായോ പ്രവേശനം നേടാത്തവർക്ക് അഡ്മിഷൻ ലഭിക്കില്ല. സ്‌പോർട്‌സ് ക്വോട്ട അലോട്ട്‌മെന്റ് ഫലവും തിങ്കളാഴ്ച പ്രസിദ്ധീകരിക്കും. അഡ്മിഷൻ വെബ്‌സൈറ്റിലെ കാൻഡിഡേറ്റ് ലോ​ഗിനിലെ സ്പോർട്സ് റിസൾട്ട് എന്ന ലിങ്കിലാണ് ഈ വിവരങ്ങൾ ലഭിക്കുക. ചൊവ്വ, ബുധൻ ദിവസങ്ങളിലാകും അഡ്മിഷൻ.

അലോട്ട്‌മെന്റ് ലഭിച്ചിട്ടും താത്കാലിക പ്രവേശനം നേടാതിരിക്കുന്ന വിദ്യാർഥികളെ തുടർന്നുള്ള അലോട്ട്‌മെന്റുകളിൽ പരിഗണിക്കില്ല. ആദ്യ അലോട്ട്‌മെന്റിൽ ഇടം നേടാത്തവർ അടുത്ത അലോട്ട്‌മെന്റുകൾക്കായി കാത്തിരിക്കുക. അലോട്ട്‌മെന്റ് ലഭിക്കുന്ന വിദ്യാർഥികളെല്ലാം നിർദിഷ്ട സമയത്ത് തന്നെ സ്‌കൂളുകളിൽ പ്രവേശനത്തിന് ഹാജരാകണമെന്നും പൊതുവിദ്യാഭ്യാസ ഡയറക്ടർ അറിയിച്ചു.