കോഴിക്കോട്: ഹര്‍ത്താല്‍ ദിവസം കോഴിക്കോട് മിഠായിത്തെരുവില്‍ ആക്രമണം അഴിച്ചു വിട്ട സംഘപരിവാര്‍ പ്രവര്‍ത്തകര്‍ക്കെതിരെ പൊലീസ് കലാപ ആഹ്വാനത്തിനും കേസെടുത്തു. മിഠായിത്തെരുവിലെ കടകള്‍ തല്ലി തകര്‍ക്കുകയും പ്രകോപനപരമായ മുദ്രാവാക്യങ്ങള്‍ വിളിച്ചു പറയുകയും ചെയ്തതിനാണ് കേസ്.

ഹര്‍ത്താല്‍ ദിവസം മിഠായിത്തെരുവിലെ കടകള്‍ അടപ്പിക്കാന്‍ എത്തിയ ഹര്‍ത്താല്‍ അനുകൂലികള്‍ കടകള്‍ തല്ലിപ്പൊളിക്കുകയും ഉടമകളെ കയ്യേറ്റം ചെയ്യുകയും ചെയ്തിരുന്നു. ഭീഷണി മുഴക്കുകയും ചെയ്തിരുന്നു. 27 പേരെയാണ് അറസ്റ്റ് ചെയ്തിരിക്കുന്നത്. 153 എ പ്രകാരമാണ് കേസ് രജിസ്റ്റര്‍ ചെയ്തിരിക്കുന്നത്.

തെരുവിലെ കടകളിലെ സിസി ടിവി ദൃശ്യങ്ങളുടെ സഹായത്തോടെയാണ് പ്രതികളെ തിരിച്ചറിഞ്ഞത്. ഇനിയും ചിലരെ അറസ്റ്റ് ചെയ്യാനുണ്ടെന്നാണ് പൊലീസ് നല്‍കുന്ന വിവരം. ഹര്‍ത്താലിന്റെ അന്ന് സംഘര്‍ഷമുണ്ടാക്കിയവരെ മിഠായിത്തെരുവിലെ വിഎച്ച്പി ഓഫീസില്‍ നിന്നും പൊലീസ് അറസ്റ്റ് ചെയ്തിരുന്നു.

കടകള്‍ ആക്രമിച്ച സംഘത്തെ തിരഞ്ഞ് പൊലീസ് വിഎച്ച്പിയുടെ ഓഫീസിലേക്ക് പ്രവേശിച്ചപ്പോള്‍ ചിലര്‍ ചിതറി ഓടിയിരുന്നു. നാല് പേരെയായിരുന്നു അപ്പോള്‍ പിടികൂടിയിരുന്നത്. ഓഫീസില്‍ നിന്നും വടിവാളടക്കമുള്ള ആയുധങ്ങളും പൊലീസ് കണ്ടെടുത്തിരുന്നു.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook

.