തിരഞ്ഞെടുപ്പിനൊരുങ്ങാൻ കോൺഗ്രസ്; പുനഃസംഘടന പൂർത്തിയായെന്ന് മുല്ലപ്പളളി

ന്യൂഡൽഹി: ലോക്സഭാ തിരഞ്ഞെടുപ്പിന്റെ മുന്നൊരുക്കങ്ങൾക്ക് കോൺഗ്രസ് രൂപം നൽകി. പ്രചാരണ പ്രവർത്തനങ്ങൾക്ക് തുടക്കം കുറിക്കാനുളള തീരുമാനങ്ങളാണ് കൈക്കൊണ്ടിരിക്കുന്നത്. കോണ്‍ഗ്രസ് പുന:സംഘടനാ ചര്‍ച്ചകള്‍ പൂര്‍ത്തിയായതായി കെ.പി.സി.സി അധ്യക്ഷന്‍ മുല്ലപ്പള്ളി രാമചന്ദ്രന്‍  ഡൽഹിയിൽ പറഞ്ഞു.

കോൺഗ്രസ് പുനസംഘടനയുമായി ബന്ധപ്പെട്ട് ഈ മാസം പതിനഞ്ചിനകം പ്രഖ്യാപനമുണ്ടാകുമെന്നാണ് അദ്ദേഹം അറിയിച്ചിരിക്കുന്നത്. എന്നാൽ ലോക്സഭാ തിരഞ്ഞെടുപ്പിന് മുമ്പ് സമഗ്ര അഴിച്ചുപണി ഉണ്ടാകില്ല. ഇക്കാര്യത്തിൽ എ, ഐ ഗ്രൂപ്പുകളുടെ സമാന നിലപാട് നിർണ്ണായകമാകും.

എ.ഐ.സി.സി ജനറല്‍ സെക്രട്ടറി മുകുള്‍ വാസ്നിക്കുമായി മുല്ലപ്പള്ളി രാമചന്ദ്രന്‍, രമേശ് ചെന്നിത്തല, ഉമ്മന്‍ ചാണ്ടി എന്നിവര്‍ ചര്‍ച്ച നടത്തി.  സംസ്ഥാന ഭാരവാഹികളുടെ എണ്ണം പരമാവധി കുറയ്ക്കണമെന്ന നിലപാടാണ് മുല്ലപ്പളളിക്ക്.  എന്നാല്‍ സമ്പൂര്‍ണ പുന: സംഘടന അപ്രായോഗികമാണെന്ന് ഉമ്മന്‍ ചാണ്ടിയും രമേശ് ചെന്നിത്തലയും നിലപാടെടുത്തു.

മുന്‍ ഡി.സി.സി അധ്യക്ഷന്‍മാര്‍ പുതുതായി ഭാരവാഹികളാകും. ലോക്സഭാ തിരഞ്ഞെടുപ്പിന് ശേഷം സംഘടനയിൽ അടിമുടി മാറ്റമുണ്ടാകും. അതേസമയം തിരഞ്ഞെടുപ്പ് പ്രചാരണത്തിന്റെ ഉദ്ഘാടനത്തിനായി ഈ മാസം 29 ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി കൊച്ചിയിലെത്തും. ബൂത്ത്തല അധ്യക്ഷന്‍മാരെ രാഹുല്‍ ഗാന്ധി അഭിസംബോധന ചെയ്യും.