വ്യാജ ബിരുദ സര്‍ട്ടിഫിക്കറ്റ് കേസ്: മുന്‍ എസ്എഫ്‌ഐ നേതാവ് നിഖില്‍ തോമസ് പിടിയില്‍

കോട്ടയം: വ്യാജ ബിരുദ സര്‍ട്ടിഫിക്കറ്റ് നല്‍കി പ്രവേശനം നേടിയെന്ന കേസില്‍ മുന്‍ എസ്എഫ്‌ഐ നേതാവ് നിഖില്‍ തോമസ് പിടിയില്‍. അര്‍ധരാത്രി 12.30 ഓടെയാണ് കോട്ടയത്തു വച്ച് നിഖില്‍ പിടിയിലായത്. കായംകുളം സിഐ മുഹമ്മദ് ഷാഫിയുടെ നേതൃത്വത്തിലുള്ള പൊലീസ് സംഘമാണ് നിഖിലിനെ പിടികൂടിയത്. ഇയാളെ ഇന്ന് കൂടുതല്‍ ചോദ്യം ചെയ്യും. നിഖിലിനെ റിമാന്‍ഡ് ചെയ്ത് ഇന്നു കോടതിയില്‍ ഹാജരാക്കും.

കഴിഞ്ഞ അഞ്ചുദിവസമായി ഒളിവിലായിരുന്നു നിഖില്‍ തോമസ് കട്ടപ്പനയില്‍ നിന്ന് കോട്ടയത്തേക്ക് കെഎസ്ആര്‍ടിസി ബസില്‍ വരുന്നതിനിടെയാണ് പൊലീസിന്റെ പിടിയിലായത്. ഛത്തീസ്ഗഢിലെ കലിംഗ സര്‍വകലാശാലയുടെ വ്യാജ ബിരുദ സര്‍ട്ടിഫിക്കറ്റ് ഹാജരാക്കി നിഖില്‍ എംഎസ്എം കോളേജില്‍ എം.കോം പ്രവേശനം നേടിയെന്നാണ് ആരോപണം.

ആരോപണത്തിന് പിന്നാലെ ആദ്യം നിഖിലിനെ എസ.എഫ്.ഐ ന്യായീകരിക്കാന്‍ ശ്രമിച്ചെങ്കിലും പിന്നീട് സംഘടനയില്‍ നിന്നും പുറത്താക്കിയിരുന്നു. എസ്.എഫ്.ഐ. കായംകുളം മുന്‍ ഏരിയാ സെക്രട്ടറിയാണ് നിഖില്‍. സിപിഎമ്മില്‍ നിന്ന് കഴിഞ്ഞ ദിവസം നിഖിലിനെ പുറത്താക്കുകയുണ്ടായി. 2018-2019-ല്‍ കേരള സര്‍വകലാശാല യൂണിയന്‍ ജോയന്റ് സെക്രട്ടറിയായിരുന്നു നിഖില്‍.