ബിജെപി പ്രവേശനം സംബന്ധിച്ച വിവാദം; കോൺഗ്രസ്-ബിജെപി തിരക്കഥയെന്ന് ഇ.പി.ജയരാജൻ

കണ്ണൂർ: ബിജെപി പ്രവേശനം സംബന്ധിച്ച വിവാദത്തിനു പിന്നിൽ കോൺഗ്രസ്-ബിജെപി തിരക്കഥയെന്ന് എൽഡിഎഫ് കൺവീനർ ഇ.പി.ജയരാജൻ. പല വിഷയങ്ങളിലും വിവാദം പ്രതീക്ഷിച്ചവർ നിരാശരായി. ഗൂഢാലോചനയാണ് നടന്നതെന്നും ഇതിനു ദല്ലാൾ നന്ദകുമാറിനെ കൂടെ കൂട്ടുകയും ചെയ്തുവെന്ന് ഇ.പി മനോരമ ന്യൂസിനോടു പറഞ്ഞു.

കേരളത്തിലെ ലോക്സഭാ തിരഞ്ഞെടുപ്പ് ദിവസമായ വെള്ളിയാഴ്ചയാണ് ബിജെപി ദേശീയ നേതാവ് പ്രകാശ് ജാവഡേക്കറുമായി കൂടിക്കാഴ്ച നടത്തിയെന്ന് ഇ,പി.ജയരാജൻ തുറന്നു സമ്മതിച്ചത്. മകന്റെ ഫ്ലാറ്റിൽ ഞാൻ ഉണ്ടെന്ന് അറിഞ്ഞ് പരിചയപ്പെടാനായി വന്നതെന്നാണ് അദ്ദേഹം എന്നോട് പറഞ്ഞത്. അതിനു മുൻപ് ഞാൻ അദ്ദേഹത്തെ കണ്ടിട്ടില്ല. എനിക്കൊരു മീറ്റിങ് ഉണ്ടെന്നു പറഞ്ഞ് ഞാൻ ഇറങ്ങി. തൊട്ടുപിന്നാലെ അദ്ദേഹവും ഇറങ്ങി. രാഷ്ട്രീയ കാര്യങ്ങളൊന്നും സംസാരിച്ചിട്ടില്ലെന്നും ഇ.പി പറഞ്ഞിരുന്നു.

ദല്ലാൾ നന്ദകുമാറിന്റെ സാന്നിധ്യത്തിലുള്ള ഇ.പി-ജാവഡേക്കർ കൂടിക്കാഴ്ച വിവാദമായിട്ടുണ്ട്. ഇ.പി-ജാവഡേക്കർ കൂടിക്കാഴ്ച സിപിഎം ചർച്ച ചെയ്യും. തിങ്കളാഴ്ച ചേരുന്ന തിരഞ്ഞെടുപ്പ് അവലോകന യോഗത്തിൽ ഈ വിഷയം ചർച്ച ചെയ്തേക്കും. 

മുഖ്യമന്ത്രിയുടെ അറിവോടെയാണ് ജയരാജൻ ബിജെപിയുമായി ചർച്ച നടത്തിയതെന്നാണ് കോൺഗ്രസ് ആരോപണം. ജാവഡേക്കർ ഫ്ലാറ്റിൽ വന്നത് ചായ കുടിക്കാൻ മാത്രമാണെന്നാണ് ഇപി പറഞ്ഞത്. ഇ.പിയുടെ ഫ്ലാറ്റിൽ ചായക്കടയുണ്ടോ എന്നായിരുന്നു കെ.സുധാകരൻ ചോദിച്ചത്. ജയരാജൻ ജാവഡേക്കറെ കണ്ടതു മുഖ്യമന്ത്രിയുടെ അറിവോടെയാണെന്നാണ് വി.ഡി.സതീശൻ പ്രതികരിച്ചത്. ഇ.പി.ജയരാജൻ ബിജെപി നേതാവ് പ്രകാശ് ജാവഡേക്കറുമായി നടത്തിയതു മുഖ്യമന്ത്രിക്കു വേണ്ടിയുള്ള ‘ഡീൽ’ ആണെന്ന് കെ.സി.വേണുഗോപാൽ പ്രതികരിച്ചു.

രാഷ്ട്രീയ പ്രവർത്തനത്തിന്റെ ഭാഗമായി നേതാക്കൾ പലരെയും കാണാറുണ്ട്. ഞാനും ജാവഡേക്കറെ കണ്ടിരുന്നുവെന്നാണ് ഇ.പി പിന്തുണച്ചുകൊണ്ട് സിപിഎം സംസ്ഥാന സെക്രട്ടറി എം.വി.ഗോവിന്ദൻ പറഞ്ഞത്. എന്നാൽ, മുഖ്യമന്ത്രി പിണറായി വിജയൻ പരസ്യമായി ഇ.പിയെ കുറ്റപ്പെടുത്തി. പാപിയുടെ കൂടെ ശിവൻ കൂടിയാൽ ശിവനും പാപിയാകുമെന്ന് നമ്മുടെ നാട്ടിൽ ഒരു പഴഞ്ചൊല്ലുണ്ട്. ജയരാജൻ ഇത്തരം കാര്യങ്ങളിൽ വേണ്ടത്ര ജാഗ്രത കാണിക്കാറില്ല എന്നതു നേരത്തേയുള്ള അനുഭവമാണ്. ആളെപ്പറ്റിക്കാൻ ശ്രമിക്കുന്നവരുമായുള്ള കൂട്ടുകെട്ട് ഇ.പി ഒഴിവാക്കണമെന്നും മുഖ്യമന്ത്രി ആവശ്യപ്പെട്ടു.

Read More

• ‘ഞങ്ങൾ കണ്ടുമുട്ടിയിരിക്കാം..അതൊരു കുറ്റമാണോ?’; ഇ.പി ജയരാജനുമായുള്ള കൂടിക്കാഴ്ച്ചയിൽ പ്രകാശ് ജാവദേക്കർ
• ജാവ്ദേക്കർക്ക് ചായ കുടിക്കാൻ വരാൻ ജയരാജന്റെ വീടെന്താ ചായപ്പീടികയോ? കെ സുധാകരൻ
• ഇ.പി.ജയരാജനുമായുള്ള ചര്‍ച്ച 90 % വിജയമായിരുന്നു: ശോഭ സുരേന്ദ്രന്‍
• പ്രകാശ് ജാവഡേക്കറെ ഫ്ലാറ്റിൽവച്ച് കണ്ടിരുന്നു, രാഷ്ട്രീയകാര്യങ്ങളൊന്നും സംസാരിച്ചില്ല: ഇ.പി.ജയരാജൻ