തിരുവനന്തപുരം: കൗമാരക്കാര്‍ കൂടുതലായി ഉപയോഗിക്കുന്ന ലഹരിവസ്തു കഞ്ചാവാണെന്ന് എക്‌സൈസ് വകുപ്പിന്റെ സര്‍വേ റിപ്പോര്‍ട്ട്. പുകവലിയിലൂടെയാണു കഞ്ചാവിലേക്കെത്തുന്നതെന്നും ലഹരിക്കേസുകളില്‍ ഉള്‍പ്പെടുകയും ലഹരി ഉപയോഗിക്കുകയും ചെയ്യുന്ന കൗമാരക്കാരെ സംബന്ധിച്ച റിപ്പോര്‍ട്ട് വ്യക്തമാക്കുന്നു. മയക്കുമരുന്ന് കേസില്‍ പിടിക്കപ്പെട്ടവരും വിമുക്തിയുടെ ഡീ അഡിക്ഷന്‍ കേന്ദ്രങ്ങളിലും കൗണ്‍സലിങ് കേന്ദ്രങ്ങളിലും ചികിത്സയ്ക്കായി എത്തിയതുമായ 19 വയസില്‍ താഴെയുള്ള 600 പേരിലാണു പഠനം നടത്തിയത്.
എക്‌സൈസ് വകുപ്പിലെ സോഷ്യോളജിസ്റ്റ് വിനു വിജയന്‍, സൈക്കോളജിസ്റ്റ് റീജാ രാജന്‍ എന്നിവരാണു പഠനത്തിനു നേതൃത്വം നല്‍കിയത്. റിപ്പോര്‍ട്ട് എക്‌സൈസ് മന്ത്രി എം ബി രാജേഷ് എക്‌സൈസ് കമ്മിഷണര്‍ ആനന്ദകൃഷ്ണനു നല്‍കി പ്രകാശനം ചെയ്തു.
എസ് പി സി കേഡറ്റുകളുടെ സഹായത്തോടെ പൊതുജനങ്ങള്‍ക്കിടയില്‍ വിപുലമായ സര്‍വേ ആരംഭിച്ചിട്ടുണ്ട്. വിദ്യാര്‍ഥികള്‍, യുവജനങ്ങള്‍, തൊഴിലാളികള്‍, ഉദ്യോഗസ്ഥര്‍, ആദിവാസി- തീരദേശ വാസികള്‍, അതിഥി തൊഴിലാളികള്‍, ഐടി പ്രൊഫഷണലുകള്‍ തുടങ്ങി വ്യത്യസ്ത 26 വിഭാഗങ്ങളില്‍പെട്ട ഒരു ലക്ഷം പേരില്‍നിന്ന് വിവരം ശേഖരിക്കും.
സര്‍വേയിലെ പ്രധാന കണ്ടെത്തലുകള്‍:
- കേസുകളില്‍ ഉള്‍പ്പെട്ടവരിലെയും ലഹരി ഉപയോഗവുമായി ബന്ധപ്പെട്ട് കൗണ്‍സലിങ്, ചികിത്സ എന്നിവയ്ക്കു വിധേയരായവരിലെയും 97 ശതമാനം പേര്‍ ഒരു തവണയെങ്കിലും ലഹരിവസ്തു ഉപയോഗിച്ചവരാണ്.
- 82 ശതമാനം പേരും ഉപയോഗിച്ച പ്രധാന ലഹരിവസ്തു കഞ്ചാവാണ്. 75.66 ശതമാനം പേര്‍ പുകവലിയും 64.66 ശതമാനം മദ്യവും 25.5 ശതമാനം ലഹരി ഗുളികകളും ഉപയോഗിച്ചവരുമാണ്. നിലവില്‍ 77.16 ശതമാനം പേരും പുകവലി ഉള്ളവരാണ്. മദ്യം ഉപയോഗിക്കുന്ന 69.9 ശതമാനം പേരും കഞ്ചാവ് ഉപയോഗിക്കുന്ന 63.5 ശതമാനം പേരുമുണ്ട്.
- ലഹരി എന്താണെന്ന് അറിയാനാണ് ഭൂരിപക്ഷം പേരും ലഹരി ഉപയോഗിച്ച് തുടങ്ങിയത്, 78 ശതമാനം പേര്‍. സ്വാധീനം മൂലം ലഹരി ഉപയോഗിച്ചു തുടങ്ങിയവര്‍ 72 ശതമാനവും സന്തോഷം ലഭിക്കുമെന്ന പ്രതീക്ഷയില്‍ തുടങ്ങിയവര്‍ 51.5 ശതമാനവുമാണ്.
- 78.1 ശതമാനം പേരും പുകവലിയിലൂടെയാണ് ലഹരിയിലേക്കെത്തിയത്. ആദ്യലഹരിയായി മദ്യം ഉപയോഗിച്ചവര്‍ 36.66 ശതമാനവും കഞ്ചാവ് ഉപയോഗിച്ചവര്‍ 16.33 ശതമാനവുമാണ്.
- 79 ശതമാനം വ്യക്തികള്‍ക്കും സുഹൃത്തുക്കളില്‍നിന്നാണ് ആദ്യമായി ലഹരി പദാര്‍ത്ഥം ലഭിക്കുന്നത്. കുടുംബാംഗങ്ങളില്‍നിന്ന് ലഹരി ആദ്യമായി ലഭിച്ചവര്‍ അഞ്ച് ശതമാനമാണ്. സര്‍വേയുടെ ഭാഗമായവരില്‍ 38.16 ശതമാനം പേര്‍ ലഹരി വസ്തുക്കള്‍ കൂട്ടുകാര്‍ക്കു കൈമാറി.
- 70 ശതമാനവും പത്തിനും പതിനഞ്ചിനും ഇടയിലുള്ള പ്രായത്തിലാണു ലഹരി ആദ്യമായി ഉപയോഗിച്ചത്. 15-19 വയസിനിടയില്‍ ലഹരി ഉപയോഗം തുടങ്ങിയവര്‍ 20 ശതമാനം. പത്തുവയസിനു താഴെയുള്ള പ്രായത്തില്‍ ആരംഭിച്ചവര്‍ ഒന്‍പതു ശതമാനം.
- 46 ശതമാനം പേരും ഒരു ദിവസം ഒന്നില്‍ കൂടുതല്‍ തവണ ലഹരി ഉപയോഗിക്കുന്നു.
- 80 ശതമാനവും കൂട്ടുകാരോടൊപ്പമാണു ലഹരി ഉപയോഗിക്കുന്നത്. ഒറ്റയ്ക്ക് ഉപയോഗിക്കുന്നത് 20 ശതമാനം പേര്‍. മാനസിക സമ്മര്‍ദമുണ്ടാകുമ്പോള്‍ ലഹരി ഉപയോഗിക്കുന്ന 35.16 ശതമാനം പേരുമുണ്ട്.
- 94.16 ശതമാനം പേരും പുകവലിക്കുന്ന രീതിയിലാണു ലഹരി പദാര്‍ത്ഥങ്ങള്‍ ഉപയോഗിക്കുന്നത്. 77.16 പേര്‍ നിലവില്‍ പുകയില വസ്തുക്കള്‍ ഉപയോഗിക്കുന്നുണ്ട്.
- ലഹരി ഉപയോഗിക്കുന്നവരില്‍ 61.5 ശതമാനത്തിനും വായ് വരണ്ടുപോകുന്ന രോഗാവസ്ഥയുണ്ട്. 52 ശതമാനത്തിനു ക്ഷീണമുണ്ട്. 38.6 ശതമാനത്തിന് ഉറക്കസംബമായ പ്രശ്‌നങ്ങളുണ്ട്. അക്രമ സ്വഭാവമുള്ള 37 ശതമാനവും ഡിപ്രഷനുള്ള 8.8 ശതമാനവും ഓര്‍മപ്രശ്‌നമുള്ള 8.6 ശതമാനവുമുണ്ട്.
- കേസുകളില്‍ ഉള്‍പ്പെട്ടവരില്‍ (37.3%) 4.83 ശതമാനം പേര്‍മാത്രമാണ് രണ്ടില്‍ കൂടുതല്‍ തവണ ലഹരിയുമായി ബന്ധപ്പെട്ട കുറ്റകൃത്യങ്ങളില്‍ ഏര്‍പ്പെട്ടത്.
- വീണ്ടും ലഹരി ഉപയോഗിക്കാനും ലഹരിക്കടത്തിനും തയാറാകാനുള്ള കാരണം ലഹരിയോടുള്ള ആസക്തി കൊണ്ടാണെന്നാണു 16.66 ശതമാനം പേരും പറയുന്നത്. സാമ്പത്തിക പ്രശ്‌നങ്ങളാണു പിന്നിലെന്ന് 11.16 പേര്‍ പെറയുന്നത്.
- ലഹരി കുറ്റകൃത്യങ്ങളില്‍ ഏര്‍പ്പെട്ടവരില്‍ 39.83 ശതമാനത്തിനും ചെയ്ത കാര്യത്തില്‍ പശ്ചാത്താപമുണ്ട്. 9.6 ശതമാനത്തിനു പശ്ചാത്തപമില്ല.
- കുറ്റാരോപിതരില്‍ 38.16 ശതമാനം പേര്‍ ലഹരി ഉപയോഗത്തിനു സുഹൃത്തുക്കളെകൂടി പ്രലോഭിപ്പിച്ചിട്ടുണ്ട്. 41.5 ശതമാനം പേര്‍ കൗണ്‍സലിങ്ങിനു വിധേയരായവരാണ്. 30.78 ശതമാനം പേര്‍ ചികിത്സക്ക് വിധേയരായി.
- ചികിത്സയിലൂടെ ലഹരിമുക്തി നേടിയവരില്‍ 87.33 ശതമാനം പേര്‍ ലഹരി ഉപയോഗം കുറയ്ക്കുന്നതില്‍ കൗണ്‍സലിങ് ഏറ്റവും പ്രധാനപ്പെട്ട ഘടകമായി സൂചിപ്പിക്കുന്നു.
