പാലക്കാട്: സംസ്ഥാനത്ത് ഡെങ്കിപ്പനി ബാധിച്ച് ഒരാൾകൂടി മരിച്ചു. പാലക്കാട് മുതലമട സ്വദേശിനി ദീപ (31)മരിച്ചത്. തൃശ്ശൂർ ജില്ലയിലെ സ്വകാര്യ ആശുപത്രിയിൽ 5 ദിവസമായി ചികിത്സയിൽ കഴിയുകയായിരുന്നു ദീപ. ഇതോടെ സംസ്ഥാനത്ത് ഡെങ്കിപ്പനി ബാധിച്ച് മരിക്കുന്നവരുടെ എണ്ണം 13 ആയി. പാലക്കാട് ജില്ലയിൽ​ പനി ബാധിച്ച് മരിച്ചവരുടെ എണ്ണം 4 ആയി.

സംസ്ഥാനത്ത് മഴ കനത്തതോടെ പനി പടരുകയാണ്. ശുചീകരണ പ്രവർത്തനങ്ങൾ ഊർജ്ജിതമായി നടത്തിയിരുന്നെങ്കിലും പനി പടരുകയാണ്. സംസ്ഥാനത്തെ സര്‍ക്കാര്‍ ആശുപത്രികളില്‍ ഇന്നലെവരെ പനി ബാധിച്ചെത്തിയത് ഒന്നരലക്ഷത്തിലധികം പേരാണ്. ആരോഗ്യവകുപ്പിന്റെ കണക്കുകള്‍ പ്രകാരം വിവിധ പനി ബാധിച്ച് ഇതുവരെ 82 പേരാണ് സംസ്ഥാനത്ത് മരിച്ചത്. ഇന്നലെ മാത്രം നാലുപേരാണ് മരിച്ചത്.

ഈ മാസം ഇന്നലെവരെ പനി ബാധിച്ച് സര്‍ക്കാര്‍ ആശുപത്രിയിലെത്തിയത് 156225 പേരാണ്. സ്വകാര്യ ആശുപത്രികളിലെ കണക്കുകള്‍ ഇതിന് പുറമെയാണ്. നിരവധി പേര്‍ സ്വകാര്യ ആശുപത്രികളിലും ചികിത്സ തേടിയെത്തുന്നുണ്ട്. ഇതുസംബന്ധിച്ച പൂര്‍ണമായ കണക്കുകള്‍ ലഭ്യമല്ല.

സര്‍ക്കാര്‍ ആശുപത്രികളില്‍ ചികിത്സ തേടി എത്തിയവരില്‍ 1597 പേര്‍ക്ക് ഡെങ്കിപ്പനിയും 706 പേര്‍ക്ക് ചിക്കന്‍പോക്സുമാണ്. എച്ച് 1 എന്‍ 1 ബാധിച്ച് ‍128 പേരും ചികിത്സക്കെത്തി. പകര്‍ച്ചപ്പനി ബാധിച്ച് 17 പേരാണ് മരിച്ചത്. എച് 1എന്‍ 1 ബാധിച്ചാണ് കൂടുതല്‍ പേര്‍ മരിച്ചത്. 53 പേരാണ് എച്ച്1 എന്‍1 ബാധിച്ച് മരിച്ചത്.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook

.