ലിങ്കെവിടെ?; അപകീര്‍ത്തി കേസില്‍ ചെന്നിത്തലയോട് 'പോരാളി ഷാജി'യുടെ ലിങ്ക് ചോദിച്ച് പൊലീസ്

തിരുവനന്തപുരം: തനിക്കെതിരായി അപകീര്‍ത്തികരമായ സോഷ്യല്‍ മീഡിയ പോസ്റ്റുകളിട്ടവര്‍ക്കെതിരെ പ്രതിപക്ഷ നേതാവ് രമേശ് ചെന്നിത്തല നല്‍കിയ പരാതിയില്‍ പൊലീസിന്റെ മറുപടി. പരാതിയില്‍ പറയുന്ന പോസ്റ്റുകളുടെ ലിങ്കുകള്‍ നല്‍കാന്‍ ആവശ്യപ്പെട്ടാണ് പൊലീസിന്റെ മറുപടി. 2017 ല്‍ നല്‍കിയ പരാതിക്കാണ് രണ്ട് വര്‍ഷങ്ങള്‍ക്ക് ശേഷം പൊലീസിന്റെ മറുപടി എന്നതും ശ്രദ്ധേയമാണ്.

പ്രതിപക്ഷനേതാവ് സമര്‍പ്പിച്ച പരാതിയില്‍ ഹൈടെക് ക്രൈം സെല്‍ അന്വേഷണം നടത്തിയെങ്കിലും പരാതിയില്‍ പറയുന്ന പോരാളി ഷാജി, ചെഗുവേര ഫാന്‍സ് ഡോട് കോം എന്നീ പേജുകളില്‍ പോസ്റ്റുകള്‍ കാണാനില്ല. അതിനാല്‍ കേസ് മുന്നോട്ട് പോകണമെങ്കില്‍ പരാതിയില്‍ പറയുന്ന പോസ്റ്റുകളുടെ യുആര്‍എല്‍ നല്‍കണമെന്നാണ് പൊലീസിന്റെ മറുപടിയില്‍ പറയുന്നത്.

സംഭവത്തില്‍ പ്രതിപക്ഷ നേതാവിന്റെ ഓഫീസ് ശക്തമായ പ്രതിഷേധം രേഖപ്പെടുത്തി. മുഖ്യമന്ത്രി പിണറായി വിജയനെതിരെ പോസ്റ്റിട്ടാല്‍ മണിക്കൂറുകള്‍ക്കുള്ളില്‍ നടപടി സ്വീകരിക്കും. എന്നാല്‍ പ്രതിപക്ഷ നേതാവിന്റെ പരാതി തള്ളിക്കളയുകായണെന്നും അത് അദ്ദേഹത്തിന്റെ പദവിയോടുള്ള അനാദരവാണെന്നുമാണ് ചെന്നിത്തലയുടെ ഓഫീസിന്റെ പ്രതികരണം. വിഷയം നിയമസഭയില്‍ ഉന്നയിക്കാനും നീക്കമുണ്ട്.