തിരുവനന്തപുരം: ഡിവൈഎഫ്ഐ വനിതാ നേതാവ് നൽകിയ പരാതിയിൽ മണ്ണാർക്കാട് എംഎൽഎയും സിപിഎം പാലക്കാട് ജില്ലാ സെക്രട്ടേറിയേറ്റ് അംഗവുമായ പി.കെ.ശശിക്കെതിരെ നടപടിക്ക് സാധ്യത. പാർട്ടി കമ്മിഷൻ നടത്തിയ അന്വേഷണത്തിൽ പി.കെ.ശശി കുറ്റക്കാരനാണെന്ന് കണ്ടെത്തിയതായാണ് റിപ്പോർട്ട്. കമ്മിഷൻ റിപ്പോർട്ട് നാളെ ചേരുന്ന സംസ്ഥാന സെക്രട്ടേറിയേറ്റ് തീരുമാനമെടുക്കും.

ശശിക്കെതിരായ റിപ്പോർട്ടിൽ നാളെ സംസ്ഥാന സെക്രട്ടേറിയേറ്റ് എന്ത് നടപടി വേണമെന്ന് തീരുമാനിക്കും. പിന്നീട് മറ്റന്നാൾ ചേരുന്ന സംസ്ഥാന കമ്മിറ്റി യോഗത്തിൽ ഈ തീരുമാനം അറിയിക്കും. സംസ്ഥാന കമ്മിറ്റിയാകും നടപടിയിൽ അന്തിമ തീരുമാനം കൈക്കൊളളുക.

നിലവിൽ ജില്ലാ സെക്രട്ടറിയേറ്റ് അംഗമായ ശശിയെ തരംതാഴ്ത്തുകയോ, പാർട്ടിയില്‍ നിന്ന് പുറത്താക്കുകയോ ചെയ്യാം. പാർട്ടിയില്‍ നിന്ന് പുറത്താക്കുകയാണെങ്കിൽ ശശിയോട് സിപിഎം എംഎൽഎ സ്ഥാനം രാജിവയ്ക്കാൻ ആവശ്യപ്പെടേണ്ടി വരും. ലോക്‌സഭാ തിരഞ്ഞെടുപ്പ് വരാനിരിക്കെ ശശിയെ രാജിവയ്പിച്ചാൽ അത് ജനങ്ങൾ ഏത് വിധത്തിലാവും സ്വീകരിക്കുക എന്നതും സിപിഎം ആലോചിക്കുന്നുണ്ട്.

സംഭവത്തിൽ തനിക്കെതിരെ ഗൂഢാലോചന നടന്നെന്ന ശശിയുടെ പരാതിയും കമ്മീഷൻ പരിശോധിച്ചിട്ടുണ്ട്. മന്ത്രി എ.കെ.ബാലന്നും കേന്ദ്രകമ്മിറ്റിയംഗം പി.കെ.ശ്രീമതിയും അടങ്ങിയ കമ്മിഷനാണ് അന്വേഷണം നടത്തിയത്. കമ്മീഷന്‍ ശശിയില്‍ നിന്നും യുവതിയില്‍ നിന്നും പ്രാദേശിക നേതാക്കളില്‍ നിന്നും മൊഴിയെടുത്തിരുന്നു.

ഓഗസ്റ്റ് 14നാണ് യുവതി പി.കെ.ശശിക്കെതിരെ സംസ്ഥാന സെക്രട്ടറി കോടിയേരി ബാലകൃഷ്ണന് പരാതി നല്‍കിയത്. എന്നാൽ പരാതി പാർട്ടി തലത്തിൽ അന്വേഷിച്ച് നടപടിയെടുത്താൽ മതിയെന്ന നിലപാടിൽ യുവതി ഉറച്ചുനിന്നു. പൊലീസിൽ പരാതി നൽകാൻ അവർ തയ്യാറായില്ല.

Get Malayalam News and latest news update from India and around the world. Stay updated with today's latest Kerala news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ