Latest News

ഡിസിസി പുനസംഘടനയില്‍ ചര്‍ച്ച നടത്തിയില്ല എന്ന് പറയുന്നത് വാസ്തവ വിരുദ്ധം: കെ. സുധാകരന്‍

ഡിസിസി പ്രസിഡന്റ് പട്ടിക പുറത്ത് വന്നതിന് പിന്നാലെ ഉമ്മന്‍ ചാണ്ടിയും രമേശ് ചെന്നിത്തലയും പരസ്യമായി അതൃപ്തി അറിയിച്ചിരുന്നു

K Sudhakaran
Photo: Screengrab

തിരുവനന്തപുരം: ഡിസിസി പുനസംഘടനയുമായി ബന്ധപ്പെട്ട് ഉമ്മന്‍ ചാണ്ടിയും രമേശ് ചെന്നിത്തലയുമായി രണ്ട് തവണ ചര്‍ച്ച നടത്തിയതായി കെപിസിസി അധ്യക്ഷന്‍ കെ സുധാകരന്‍. “ചര്‍ച്ച നടത്തിയിട്ടില്ല എന്ന് പറയുന്നത് അസത്യവും വാസ്തവ വിരുദ്ധവുമാണ്. വിമര്‍ശിക്കുന്നവര്‍ സ്ഥാനാര്‍ഥി നിര്‍ണയം നടത്തിയപ്പോള്‍ ആരോടാണ് ചോദിച്ചിട്ടുള്ളത്? നാല് വര്‍ഷം കെപിസിസി വൈസ് പ്രസിഡന്റ് ആയിരുന്നിട്ട് എന്നോട് ഒരു ചര്‍ച്ചയും നടത്തിയിട്ടില്ല. ഉമ്മന്‍ ചാണ്ടിയുടെ വാക്കുകളില്‍ സങ്കടമുണ്ട്,” സുധാകരന്‍ പറഞ്ഞു.

ഡിസിസി പുനസംഘടനയില്‍ ചര്‍ച്ച നടന്നിട്ടില്ല എന്ന ഉമ്മന്‍ ചാണ്ടിയുടേയും രമേശ് ചെന്നിത്തലയുടേയും വാദം തള്ളി വടകര എംപി കെ. മുരളീധരന്‍. “പുനസംഘടനയുമായി ബന്ധപ്പെട്ട് മുന്‍പില്ലാത്ത വിധം ചര്‍ച്ച നടന്നിട്ടുണ്ട്. രാഹുല്‍ ഗാന്ധി മുതിര്‍ന്ന നേതാക്കന്മാരുമായി സംസാരിച്ചിരുന്നു. ശിവദാസന്‍ നായര്‍ക്കും എ.പി. അനില്‍കുമാറിനും തിരുത്തി തിരിച്ചു വരാം,” മുരളീധരന്‍ പറഞ്ഞു.

“പുനസംഘടനയിലൂടെ കൂടുതല്‍ ജനകീയമായ മുഖം കോണ്‍ഗ്രസിന് ലഭിച്ചു. അഭിപ്രായ വ്യത്യാസങ്ങള്‍ സാധാരണയാണ്. അതില്‍ കൂടുതല്‍ അഭിപ്രായ വ്യത്യാസങ്ങള്‍ ഉണ്ടായതായി കരുതുന്നില്ല. ഗ്രൂപ്പുകള്‍ എല്ലാ കാലത്തും ഉണ്ട്. അതൊരു യോഗ്യതാ മാനദണ്ഡമല്ല,” മുരളീധരന്‍ വ്യക്തമാക്കി.

“ഇപ്പോള്‍ നിയമിച്ചിട്ടുള്ള എല്ലാവരും ആ സ്ഥാനങ്ങളില്‍ ഇരിക്കാന്‍ യോഗ്യതയുള്ളവരാണ്. പലര്‍ക്കും പ്രായമായി എന്ന വിമര്‍ശനം വന്നു. പറയുന്നവരുടെ വയസ് ആരും ഇതുവരെ ചോദിച്ചിട്ടില്ല. തിരഞ്ഞെടുക്കപ്പെട്ടവര്‍ നന്നായി പ്രവര്‍ത്തിക്കാന്‍ കഴിവുള്ളവരാണ്,” മുരളീധരന്‍ കൂട്ടിച്ചേര്‍ത്തു.

മുരളീധരന് പിന്നാലെ പി.ടി തോമസും പുതിയ പട്ടികയ്ക്ക് പിന്തുണ പ്രഖ്യാപിച്ചു. “ഗ്രൂപ്പിനേക്കാള്‍ പാര്‍ട്ടിക്ക് പ്രാധാന്യം നല്‍കുന്നതാണ് പ്രസിഡന്റ് പട്ടിക. രമേശ് ചെന്നിത്തലയുടേയും ഉമ്മന്‍ ചാണ്ടിയുടേയും താത്പര്യങ്ങല്‍ സംരക്ഷിക്കുന്നതാണ് പട്ടിക,” പി.ടി. തോമസ് മനോരമ ന്യൂസിനോട് പറഞ്ഞു.

പ്രസിഡന്റ് തിരഞ്ഞെടുപ്പില്‍ വേണ്ടത്ര ചര്‍ച്ച നടന്നിട്ടില്ലെന്നായിരുന്നു ഉമ്മന്‍ ചാണ്ടിയുടേയും ചെന്നിത്തലയുടേയും ആരോപണം. “ചര്‍ച്ച നടന്നിരുന്നെങ്കില്‍ പ്രതിഷേധം ഒഴിവാക്കാമായിരുന്നു. ആദ്യം ചര്‍ച്ച നടത്താമെന്ന് പറഞ്ഞിരുന്നു. പക്ഷെ പിന്നീട് ഒന്നും ഉണ്ടായില്ല. കൂടിയാലോചനകള്‍ ഇല്ലാതെയാണ് സംസ്ഥാന നേതൃത്വം തീരുമാനമെടുത്തത്. എല്ലാം ഹൈക്കമാന്റിനെ അറിയിച്ചിട്ടുണ്ട്,” ഉമ്മന്‍ ചാണ്ടി പ്രതികരിച്ചു.

ശിവദാസന്‍ നായര്‍ക്കും അനില്‍കുമാറിനുമെതിരെ സ്വീകരിച്ച നടപടിയില്‍ രമേശ് ചെന്നിത്തല അതൃപ്തി രേഖപ്പെടുത്തി. കെപിസിസി അധ്യക്ഷന്‍ ഭരണഘടനാപരമായി മാത്രമെ അച്ചടക്ക നടപടി എടുക്കാവൂവെന്ന് ചെന്നിത്തല പറഞ്ഞു.

Also Read: ഡിസിസികൾക്ക് പുതിയ അധ്യക്ഷന്മാർ; പിന്നാലെ ശിവദാസൻ നായർക്കും അനിൽകുമാറിനും എതിരെ നടപടി

Get the latest Malayalam news and Kerala news here. You can also read all the Kerala news by following us on Twitter, Facebook and Telegram.

Web Title: Congress leaders backs and slams new dcc president list

Next Story
വടക്കന്‍ കേരളത്തില്‍ മഴ ശക്തമാകും; ഒന്‍പത് ജില്ലകളില്‍ ഓറഞ്ച് അലര്‍ട്ട്Rain , Monsoon, Umbrella, മഴ , Iemalayalam
The moderation of comments is automated and not cleared manually by malayalam.indianexpress.com