കാഞ്ഞങ്ങാട്: പെരിയ ഇരട്ടക്കൊലപാതകവുമായി ബന്ധപ്പെട്ട് മുഖ്യമന്ത്രി പിണറായി വിജയനെതിരെ കാസർഗോഡ് പ്രതിഷേധം. കോൺഗ്രസ് പ്രവർത്തകരാണ് പ്രതിഷേധവുമായി രംഗത്ത് വന്നത്. കാസർഗോഡ് നടന്ന പരിപാടിക്ക് ശേഷം കാഞ്ഞങ്ങാടേക്കുളള യാത്രയിലാണ് മുഖ്യമന്ത്രിയും സംഘവും അടങ്ങിയ വാഹനവ്യൂഹത്തിന് മുന്നിലേക്ക് കോൺഗ്രസ് പ്രവർത്തകർ കരിങ്കൊടിയുമായി ചാടിവീണത്.

കാസർഗോഡ് ജില്ലാ കമ്മിറ്റി ഓഫീസിന്റെ പുനർനിർമ്മാണത്തിന്റെ ശിലാസ്ഥാപനത്തിനായാണ് മുഖ്യമന്ത്രി കാസർഗോഡ് എത്തിയത്. ഈ ചടങ്ങിൽ പങ്കെടുത്ത ശേഷം കാഞ്ഞങ്ങാട് മുനിസിപ്പൽ ബസ് സ്റ്റാന്റ് ഉദ്ഘാടനത്തിന് വേണ്ടിയാണ് മുഖ്യമന്ത്രി റോഡ് മാർഗം യാത്ര തിരിച്ചത്. സിപിഎം നേതാക്കളും മന്ത്രിമാരും ഉൾപ്പെട്ട വലിയ സംഘവും ഇതോടൊപ്പം ഉണ്ടായിരുന്നു.

രാവിലെ 11.30 യോടെ വാഹനവ്യൂഹം പൊയിനാച്ചിയിലെത്തിയപ്പോഴാണ് പത്തോളം കോൺഗ്രസ് പ്രവർത്തകർ വാഹനവ്യൂഹത്തിന് മുന്നിലേക്ക് കരിങ്കൊടിയുമായി ചാടിവീണത്. സ്ഥലത്ത് പൊലീസ് ഉണ്ടായിരുന്നില്ലെന്നാണ് ലഭിക്കുന്ന വിവരം.

പെരിയയിൽ രണ്ട് യൂത്ത് കോൺഗ്രസ് പ്രവർത്തകർ കൊല്ലപ്പെട്ട കേസിൽ സിപിഎം ലോക്കൽ കമ്മിറ്റിയംഗം പീതാംബരനെ പൊലീസ് അറസ്റ്റ് ചെയ്തു. അഞ്ച് പേരെ കൂടി ഇന്നലെ പൊലീസ് കസ്റ്റഡിയിൽ എടുത്തിരുന്നു. എന്നാൽ അക്രമത്തിൽ പാർട്ടിക്ക് പങ്കില്ലെന്ന് പറഞ്ഞ മുഖ്യമന്ത്രി കൊലപാതകം ഹീനമാണെന്ന് അപലപിച്ചിരുന്നു. രാവിലെ യൂത്ത് കോൺഗ്രസ് പ്രവർത്തകരുടെ വീട് സന്ദർശിക്കാൻ മുഖ്യമന്ത്രി താത്പര്യം പ്രകടിപ്പിച്ചിരുന്നു. എന്നാൽ പ്രവർത്തകർ എങ്ങിനെ പ്രതികരിക്കുമെന്ന് അറിയില്ലെന്നായിരുന്നു ജില്ലാ കോൺഗ്രസ് അദ്ധ്യക്ഷന്റെ മറുപടി.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook

.