തിരുവനന്തപുരം: ശബരിമലയിൽ യുവതി പ്രവേശനമുണ്ടായതിന് പിന്നാലെ ശുദ്ധിക്രിയ നടത്തിയ തന്ത്രിക്ക് പട്ടികജാതി-പട്ടിക വർഗ കമ്മീഷന്റെ നോട്ടീസ്. കമ്മീഷൻ അംഗം എസ്.അജയകുമാർ ഫെയ്സ്ബുക്കിലൂടെയാണ് നോട്ടീസ് അയച്ച വിവരം അറിയിച്ചത്.
ശബരിമലയിൽ പ്രവേശിച്ച യുവതികളിൽ ഒരാൾ ദലിത് ആയതുകൊണ്ട് നടത്തിയ ശുദ്ധിക്രിയ അയിത്താചാരമായി കണക്കാക്കാവുന്നതാണെന്നും അതിനാലാണ് നോട്ടീസ് അയച്ചതെന്നും അജയകുമാർ വ്യക്തമാക്കി. ഈ മാസം 17ന് കമീഷന് മുമ്പാകെ ഹാജരാവാൻ തന്ത്രിക്ക് നിർദേശം നൽകിയിരുന്നു. അതിന് തയാറാകാത്തതിനാൽ തന്ത്രിക്ക് കാരണം കാണിക്കൽ നോട്ടീസ് നൽകിയിട്ടുണ്ട്. തന്ത്രി നാട്ടിലെ ഭരണഘടനക്കും നിയമവ്യവസ്ഥക്കും അതീതനല്ലെന്നും കെ.അജയകുമാർ വ്യക്തമാക്കി.
‘ഒരു തന്ത്രിയും ഈ നാട്ടിലെ ഭരണഘടനക്കും നിയമ വ്യവസ്ഥക്കും അതീതരല്ല. ഭരണഘടനയ്ക്ക് മുകളിൽ പറക്കാൻ സവർണാധിപത്യത്തെ അനുവദിച്ചുകൂടാ. സമൂഹത്തിൽ ഇത്തരത്തിൽ ഉള്ള അയിത്താചാരവും ജാത്യാചാരവും ശക്തിയുക്തം എതിർക്കേണ്ടതാണ്. ഇത്തരം വിഷയങ്ങളിൽ സംസ്ഥാന പട്ടിക ജാതി – പട്ടിക വർഗ കമ്മീഷൻ ശക്തമായി ഇടപെടുന്നതായിരിക്കും,’ അജയകുമാര്‍ വ്യക്തമാക്കി. ശബരിമലയില്‍ ആദ്യം കയറിയ യുവതികളില്‍ ബിന്ദു ദളിത് യുവതിയായിരുന്നു. ദളിതരെ അധിക്ഷേപിക്കുന്ന നടപടിയാണ് തന്ത്രി ചെയ്തതെന്ന് നേരത്തേ ബിന്ദു ആരോപിച്ചിരുന്നുയ ഇത് ചൂണ്ടിക്കാട്ടി സുപ്രിംകോടതിയെ സമീപിക്കുമെന്നും ബിന്ദു വ്യക്തമാക്കിയിരുന്നു.
Get Malayalam News and latest news update from India and around the world. Stay updated with today's latest Kerala news in Malayalam at Indian Expresss Malayalam.
ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ
