'കുട്ടികളെ സ്റ്റേഷനിലേക്ക് വിളിപ്പിച്ച് മൊഴി രേഖപ്പെടുത്തരുത്'; പൊലീസിന് നിര്‍ദേശവുമായി ബാലാവകാശ കമ്മിഷന്‍

തിരുവനന്തപുരം: കുട്ടികളെ സ്റ്റേഷനിലേക്ക് വിളിച്ചുവരുത്തി മൊഴി രേഖപ്പെടുത്തെരുതെന്ന് ബാലാവകാശ കമ്മിഷന്‍. ഇത് സംബന്ധിച്ച് കമ്മിഷന്‍ അംഗം പി പി ശ്യാമളദേവി പുറപ്പെടുവിച്ച ഉത്തരവിലാണ് സംസ്ഥാന പൊലീസ് മേധാവിക്ക് നിര്‍ദേശം.

15 വയസില്‍ താഴെയുള്ള കുട്ടികളെ മൊഴി രേഖപ്പെടുത്തുന്നതിനായി സ്റ്റേഷനിലേക്ക് വിളിപ്പിക്കരുതെന്നാണ് ഉത്തരവില്‍ പറയുന്നത്. ഇത്തരം നടപടികള്‍ കുട്ടികള്‍ക്ക് മാനസികമായി ബുദ്ധിമുട്ടുണ്ടാക്കുമെന്നും അവരുടെ സ്വഭാവ രൂപീകരണത്തെ ബാധിക്കുമെന്നും കമ്മിഷന്‍ നിരീക്ഷിച്ചു.

നിരവധി പൊലീസ് സ്റ്റേഷനുകളില്‍ കുട്ടികളെ വിളിച്ചുവരുത്തി മൊഴിയെടുക്കുന്നെന്ന വിവരത്തിന്റെ അടിസ്ഥാനത്തിലാണ് കമ്മിഷന്‍ ഉത്തരവ്. തിരുവനന്തപുരം സ്വദേശി നല്‍കിയ പരാതിയിന്മേലാണ് നടപടിയുണ്ടായിരിക്കുന്നത്.