കേരളത്തിലെ ബിജെപിയുടെ വളർച്ച വലിയ ഭീഷണി; ബിനോയ് വിശ്വം

കേരളത്തിലെ ബിജെപിയുടെ വളർച്ച വലിയ ഭീഷണി ഉയർത്തുന്നതാണെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. ബിജെപി വളർച്ചയെ പ്രതിരോധിക്കാൻ ഇടതുപക്ഷം മാർഗങ്ങൾ കണ്ടെത്തണമെന്നും അദ്ദേഹം പറഞ്ഞു. 

Also Read:കേരളത്തിൽ ഭരണമാറ്റത്തിനുള്ള കാറ്റ്; എല്ലായിടത്തും യുഡിഎഫ് ആധിപത്യം

തദ്ദേശ സ്വയംഭരണ തിരഞ്ഞെടുപ്പിൽ ഇടതുപക്ഷ ജനാധിപത്യ മുന്നണിക്ക് തിരിച്ചടി നേരിട്ട പശ്ചാത്തലത്തിൽ, ഇന്ത്യൻ എക്‌സ്പ്രസിന് അനുവദിച്ച അഭിമുഖത്തിലാണ് സി.പി.ഐ. സംസ്ഥാന സെക്രട്ടറിയും മുൻ രാജ്യസഭാ എം.പി.യുമായ ബിനോയ് വിശ്വം തന്റെ നിലപാടുകൾ വ്യക്തമാക്കിയത്. 

ചോദ്യം: തദ്ദേശ തിരഞ്ഞെടുപ്പിൽ എൽ.ഡി.എഫിന് ഇത്രയും വലിയ തിരിച്ചടി നേരിടാൻ കാരണമായ ഘടകങ്ങൾ എന്തൊക്കെയാണ്?

ഉത്തരം: ഇത് ജനങ്ങളുടെ വിധിയാണ്. അതുകൊണ്ട് തന്നെ ഇതൊരു പാഠമായിട്ട് ഞങ്ങൾ ഇതിനെ കാണുന്നു. സി.പി.ഐ. മാത്രമല്ല, ഇടതുപക്ഷം മൊത്തത്തിൽ ഈ വിധി കൂട്ടായിട്ടും വ്യക്തിപരമായിട്ടും വിലയിരുത്തണം. ജനങ്ങളാണ് ഏത് നേതാവിനേക്കാളും വലുത് എന്ന മനോഭാവത്തോടെ വേണം പാഠങ്ങൾ പഠിക്കാൻ. പാഠങ്ങൾ പഠിക്കുമ്പോൾ, എവിടെയാണ് നമുക്ക് പിഴവുപറ്റിയത് എന്ന് ഞങ്ങൾ സ്വയം ചോദിക്കും. സത്യത്തിൽ, ഞങ്ങൾ വിജയം പ്രതീക്ഷിച്ചിരുന്നു. ചില അന്തർധാരകൾകാണാൻ ഞങ്ങൾ പരാജയപ്പെട്ടു എന്നതാണ് ഇതിലേറെ ഗൗരവമായ കാര്യം.

Also Read:ആലപ്പുഴയിലും കടപുഴകി എൽഡിഎഫ്; നഗരസഭകളിൽ യുഡിഎഫിന് മിന്നും വിജയം

ചോദ്യം: സർക്കാരിനെതിരായ വികാരം നിലനിന്നിരുന്നോ? വരാനിരിക്കുന്ന നിയമസഭാ തിരഞ്ഞെടുപ്പിന് ഇത് എത്രത്തോളം ആശങ്കയുണ്ടാക്കുന്നു?

ഉത്തരം: ഞങ്ങൾ പാഠങ്ങൾ പഠിക്കും എന്ന് ജനങ്ങളോട് പറയുമ്പോൾ, തോൽവിയുടെ എല്ലാ വശങ്ങളും ഞങ്ങൾ പരിശോധിക്കും. ജനങ്ങൾ ഞങ്ങളുടെ ഭരണത്തെ എങ്ങനെ വിലയിരുത്തി എന്നതും പരിശോധിക്കേണ്ട ഒരു വിഷയമാണ്. അതിന് യാതൊരു തടസ്സവുമില്ല.

ചോദ്യം: ശബരിമലയിലെ സ്വർണ്ണമോഷണ കേസ് ഇടതുപക്ഷത്തിന്റെ മോശം പ്രകടനത്തിൽ ഒരു പങ്ക് വഹിച്ചുവെന്ന് കരുതുന്നുണ്ടോ?

ഉത്തരം: ഫലങ്ങൾ വന്ന ശേഷം, എല്ലാ തുറകളിലുമുള്ള ജനങ്ങളുടെ പെട്ടെന്നുള്ള പ്രതികരണങ്ങൾ കാണുമ്പോൾ, ശബരിമല സംഭവം ഞങ്ങൾ വിചാരിച്ചതിനേക്കാൾ വലിയ സ്വാധീനം ചെലുത്തിയിട്ടുണ്ട് എന്ന് മനസ്സിലാക്കുന്നു. ഇടതുപക്ഷത്തിന് ഇങ്ങനെയൊക്കെ പെരുമാറാൻ കഴിയുമെന്ന് ജനങ്ങൾ അംഗീകരിക്കാൻ തയ്യാറല്ല.

ചോദ്യം: ആത്മപരിശോധന നടത്താനും പാഠങ്ങൾ പഠിച്ച് തിരുത്തൽ നടപടികൾ സ്വീകരിക്കാനും ഇടതുപക്ഷത്തിന് ലഭിക്കുന്ന ഈ സമയം വളരെ കുറവല്ലേ?

ഉത്തരം: ഞങ്ങൾക്ക് വളരെ കുറച്ച് സമയമേയുള്ളൂ, അതിനുള്ളിൽ തന്നെ ഞങ്ങൾ ആത്മപരിശോധന നടത്തണം. എല്ലാ കുറവുകളും കണ്ടെത്തി അത് തിരുത്തണം. ഇടതുപക്ഷം ഒരു വ്യത്യസ്ത സ്വത്വമാണ്. ഞങ്ങൾ ജനങ്ങളോട് അനിതരസാധാരണമായ പ്രതിബദ്ധത കാണിക്കേണ്ടതുണ്ട്.

Also Read:അനന്തപുരിയിൽ ചരിത്രം കുറിച്ച് ബിജെപി; കോൺഗ്രസിനും നേട്ടം, എൽഡിഎഫിന് വൻ തിരിച്ചടി

ഇടതുപക്ഷവും വലതുപക്ഷവും പേരുകളിൽ മാത്രമേ വ്യത്യാസമുള്ളൂ എന്ന് ഒരു വിഭാഗം ആളുകൾ പ്രചരിപ്പിക്കുന്നുണ്ട്. അതുകൊണ്ട് തന്നെ ഇടതുപക്ഷം കൂടുതൽ ശ്രദ്ധേയവും, കൂടുതൽ പ്രത്യയശാസ്ത്രപരവും, കൂടുതൽ ദാർശനികവും, കൂടുതൽ രാഷ്ട്രീയപരവും, കൂടുതൽ പ്രായോഗികവുമാകണം എന്ന് ഞാൻ വിശ്വസിക്കുന്നു. നമ്മുടെ പെരുമാറ്റം, പ്രവൃത്തികൾ, ചിന്തകൾ, ജീവിതരീതി എന്നിവയിലൂടെ ഈ വ്യത്യാസം നമ്മൾ അടിവരയിട്ട് കാണിക്കണം.

ചോദ്യം: പത്തുവർഷത്തെ ഭരണത്തിന് ശേഷം ഇടതുപക്ഷത്തിലേക്ക് അമിത ആത്മവിശ്വാസം കടന്നുകൂടിയോ? 

ഉത്തരം: ബംഗാളിൽ സംഭവിച്ചത് നമുക്കൊരു കണ്ണ് തുറപ്പിക്കലായിരിക്കണം എന്ന് സി.പി.ഐ. പലതവണ കണ്ടെത്തിയിട്ടുണ്ട്. നമ്മൾ ഒരു സ്വയം വിമർശനാത്മകമായ വിശകലനം നടത്തേണ്ടതുണ്ട്. ഞങ്ങൾക്ക് പോരായ്മകളുണ്ട് എന്നും, ഈ പോരായ്മകളെ മറികടന്ന് കമ്മ്യൂണിസ്റ്റ് പ്രസ്ഥാനത്തിന്റെ മൂല്യങ്ങൾ ഉയർത്തിപ്പിടിക്കുക എന്നതാണ് ഞങ്ങളുടെ ദൗത്യമെന്നും ഞങ്ങൾ പാർട്ടിയിലും അണികൾക്കിടയിലും എപ്പോഴും പറയാറുണ്ട്. 

ഈ മൂല്യങ്ങൾ ഇല്ലാതായാൽ ഇടതുപക്ഷം വലതുപക്ഷമായി മാറും. വലതുപക്ഷം അഴിമതി കാണിച്ചാൽ, അത് അവർ ചെയ്യേണ്ടതാണെന്ന് ആളുകൾ പറഞ്ഞേക്കാം, പക്ഷേ ഇടതുപക്ഷം അത് ചെയ്താൽ ജനം സഹിക്കില്ല. കാരണം ഇടതുപക്ഷം അങ്ങനെ പ്രവർത്തിക്കാൻ പാടില്ലാത്തവരാണ്.

ചോദ്യം: പിണറായി വിജയൻ സർക്കാരിന് കേന്ദ്രത്തിലെ ബി.ജെ.പി.യുമായി ഒരടുപ്പമുണ്ടെന്ന ധാരണ ന്യൂനപക്ഷ വോട്ടുകൾ ഇടതുപക്ഷത്തുനിന്ന് അകലാൻ കാരണമായെന്ന് കരുതുന്നുണ്ടോ?

ഉത്തരം: വ്യക്തിപരമായി ഞാൻ അങ്ങനെ കരുതുന്നില്ല. എന്നിരുന്നാലും, ഞങ്ങളോടൊപ്പം ഉണ്ടായിരുന്ന ന്യൂനപക്ഷ വിഭാഗങ്ങൾക്ക് ചില വിഷയങ്ങളിൽ സർക്കാരിന് ബി.ജെ.പി.യുമായി ഒരടുപ്പമുണ്ടെന്ന് തോന്നലുണ്ടായി എന്നത് ഇടതുപക്ഷത്തെ സംബന്ധിച്ചിടത്തോളം നിർഭാഗ്യകരമാണ്. എങ്കിലും, ഈ തോൽവി ഇടതുപക്ഷത്തിന്റെ ഭാവിയിൽ വലിയ സ്വാധീനം ചെലുത്തുന്ന ഒന്നല്ല. 

എൽ.ഡി.എഫ്. സർക്കാരുകൾക്ക് മുമ്പും ഇത്തരം തിരഞ്ഞെടുപ്പ് തിരിച്ചടികൾ നേരിട്ടിട്ടുണ്ട്. 2010-ലെ തദ്ദേശ തിരഞ്ഞെടുപ്പിലും ഞങ്ങൾ വലിയ തോൽവി നേരിട്ടു. പക്ഷേ അടുത്ത വർഷത്തെ നിയമസഭാ തിരഞ്ഞെടുപ്പിൽ എന്ത് സംഭവിച്ചു? ഞങ്ങൾ അധികാരത്തിൽ വന്നില്ല, പക്ഷേ വ്യത്യാസം വെറും രണ്ട് സീറ്റ് മാത്രമായിരുന്നു. ഇത് അവസാനമല്ലെന്ന് ഞങ്ങൾ വിശ്വസിക്കുന്നു.

ചോദ്യം: കേരളത്തിൽ ബി.ജെ.പിയുടെ വളർച്ചയെ നിങ്ങൾ എങ്ങനെയാണ് കാണുന്നത്?

ഉത്തരം: അതൊരു ഗൗരവമായ വിഷയമാണ്. ഞങ്ങൾ അതിനെ അതീവ ഗൗരവത്തോടെയാണ് കാണുന്നത്. ബി.ജെ.പി. വിശ്വസിക്കുന്നത് ചതുർവർണ്ണ വ്യവസ്ഥയിലാണ്. ഈ പ്രത്യയശാസ്ത്രവുമായി അവർ കേരളത്തിലേക്ക് വരുമ്പോൾ, അത് ഒരു വലിയ ഭീഷണിയാണ്. ഇതിനെ പ്രതിരോധിക്കാൻ ഞങ്ങൾ ഒരു വഴി കണ്ടെത്തണം. ഈ വെല്ലുവിളിയുടെ ഗൗരവം മനസ്സിലാക്കാൻ കമ്യൂണിസ്റ്റ് പ്രസ്ഥാനത്തിന് ഒരു കടമയുണ്ടായിരിക്കാം. 

ന്യൂനപക്ഷങ്ങളോടുള്ള ഞങ്ങളുടെ സന്ദേശം, ഞങ്ങൾ അവർക്കുവേണ്ടി നിലകൊള്ളാനും അവരുടെ അവകാശങ്ങൾ ഉയർത്തിപ്പിടിക്കാനും ഇവിടെയുണ്ട് എന്നതാണ്. അവർക്കുള്ള ആശങ്കകൾ ഞങ്ങൾ മനസ്സിലാക്കുന്നു. സംസ്ഥാനത്തിനും രാജ്യത്തിനും മുന്നോട്ടുള്ള ഏക വഴി മതേതരത്വമാണ്, അതിൽ ഞങ്ങൾ 100 ശതമാനം പ്രതിജ്ഞാബദ്ധരാണ്.

Read More:കുന്നത്തുനാട്ടിൽ അടിതെറ്റി ട്വന്റി 20; കിഴക്കമ്പല്ലത്ത് വിജയം