വഖഫ് ബിൽ പാസായതിനു പിന്നാലെ മുനമ്പത്ത് 50 പേർ ബിജെപിയിൽ ചേർന്നു

തിരുവനന്തപുരം: പാർലമെന്റ് വഖഫ് ഭേദഗതി ബിൽ പാസാക്കിയതിനു പിന്നാലെ, മുനമ്പത്ത് 50 പേർ ബിജെപിയിൽ ചേർന്നു. ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറാണ് അംഗത്വം നൽകിയത്. തുഷാര്‍ വെള്ളാപ്പള്ളി, ഷോണ്‍ ജോര്‍ജ്  ഉൾപ്പെടെയുള്ള നേതാക്കളുടെ സാന്നിധ്യത്തിലാണ് 50 പേര്‍ അംഗത്വം സ്വീകരിച്ചത്.

സംസ്ഥാനത്തിന്റെ രാഷ്ട്രീയ ചരിത്രത്തിലെ ഒരു സുപ്രധാന ദിവസമാണിതെന്നും മുനമ്പത്തെ ജനങ്ങള്‍ അവരുടെ റവന്യൂ അവകാശം നേടിയെടുക്കും വരെ കൂടെയുണ്ടാകുമെന്നും രാജീവ് ചന്ദ്രശേഖർ പറഞ്ഞു. മുനമ്പത്തെ ജനങ്ങളെ അവർ തിരഞ്ഞെടുത്ത എംപിമാരും എംഎൽഎമാരും വഞ്ചിച്ചുവെന്നും സഭയില്‍ കോണ്‍ഗ്രസ്, സിപിഎം എംപിമാര്‍ പറഞ്ഞതെല്ലാം നുണകളാണെന്നും രാജീവ് ചന്ദ്രശേഖർ കൂട്ടിച്ചേർത്തു.

സമരസമിതി, ക്രിസ്തുവിന്റെ തിരുവത്താഴ ചിത്രം രാജീവ് ചന്ദ്രശേഖറിന് ഉപഹാരമായി നല്‍കി. പ്രധാനമന്ത്രിയെ നേരില്‍ കണ്ട് നന്ദി അറിയിക്കാന്‍ അവസരം ഉണ്ടാക്കണമെന്ന് സമരസമിതി രാജീവ് ചന്ദ്രശേഖറിനോട് ആവശ്യപ്പെട്ടു. പ്രധാനമന്ത്രിയുടെ സമയം തേടി അവസരം ഒരുക്കുമെന്ന് രാജീവ് ഉറപ്പു നൽകി.

അതേസമയം, ബിൽ പാസായതിന് പിന്നാലെ മുനമ്പത്ത് ഭൂസംരക്ഷണ സമിതി പടക്കം പൊട്ടിച്ച് ആഹ്ലാദ പ്രകടനം നടത്തിയിരുന്നു. കേന്ദ്രസര്‍ക്കാരിന് അഭിവാദ്യം വിളിച്ച് സമരക്കാർ നിരത്തില്‍ ഇറങ്ങുകയും ആഹ്ലാദ പ്രകടനം നടത്തുകയും ചെയ്തിരുന്നു.

Read More

• ED Raids Gokulam Gopalan's Offices: ഗോകുലം ​ഗോപാലന്റെ വീട്ടിലും സ്ഥാപനങ്ങളിലും റെയ്ഡ് തുടരുന്നു; പരിശോധന നടക്കുന്നത് അഞ്ചിടങ്ങൾ
• Suresh Gopi angry with Media: നിങ്ങളാരാ? ബി കെയർഫുൾ;മാധ്യമങ്ങളോട് കയർത്ത് വീണ്ടും സുരേഷ് ഗോപി
• രാഷ്ട്രീയത്തിൽ താത്പര്യമുണ്ട്, കുടുംബപശ്ചാത്തലം അങ്ങനെയാണല്ലോയെന്ന് പിണറായി വിജയന്റെ ചെറുമകൻ
• മാസപ്പടി കേസ്; വീണ വിജയനെ പ്രതിചേർത്ത് കുറ്റപത്രം; വിചാരണയ്ക്ക് അനുമതി