കൊച്ചി: നടിയെ ആക്രമിച്ച് അപകീർത്തികരമായ ദൃശ്യങ്ങൾ പകർത്തിയ മെമ്മറി കാർഡിന്റെ പകർപ്പ് ലഭിക്കണമെന്ന ആവശ്യവുമായി ദിപീല് കോടതിയെ സമീപിക്കാൻ ഒരുങ്ങുന്നതായി മാതൃഭൂമി ന്യൂസ് റിപ്പോർട്ട്. കേസിലെ എട്ടാം പ്രതിയായ ദിലീപിന് കുറ്റപത്രവും അനുബന്ധ രേഖകളും കോടതി നൽകിയിരുന്നു. എന്നാൽ മെമ്മറി കാർഡിന്റെ പകർപ്പ് നൽകിയിരുന്നില്ല. മെമ്മറി കാർഡിനു പുറമേ സുപ്രധാനമായ ചില മൊഴികളും ശാസ്ത്രീയ പരിശോധനാ ഫലങ്ങളും ദിലീപ് ആവശ്യപ്പെടുമെന്നും മാതൃഭൂമി ന്യൂസ് റിപ്പോർട്ടിൽ പറയുന്നു.

മെമ്മറി കാർഡിലെ ദൃശ്യങ്ങൾ കാണണം എന്ന ആവശ്യവുമായി ദിലീപ് നേരത്തെ അങ്കമാലി മജിസ്ട്രേറ്റ് കോടതിയെ സമീപിച്ചിരുന്നു. തുടർന്ന് ദിലീപന്റെ സാന്നിധ്യത്തില്‍ അഭിഭാഷകര്‍ക്ക് ഇത് പരിശോധിക്കാന്‍ കോടതി അവസരം നല്‍കി. ഇതിനുപിന്നാലെയാണ് മെമ്മറി കാർഡിന്രെ പകർപ്പ് ആവശ്യപ്പെട്ട് ദിലീപ് കോടതിയെ വീണ്ടും സമീപിക്കാനൊരുങ്ങുന്നത്.

നടിയെ ആക്രമിച്ച കേസിലെ കുറ്റപത്രത്തിൽ ദിലീപ് എട്ടാം പ്രതിയാണ്. 350 ഓളം സാക്ഷി മൊഴികളും 450 ലേറെ രേഖകളും കുറ്റപത്രത്തിൽ ഉൾക്കൊളളിച്ചിട്ടുണ്ട്. ദിലീപ് ഉൾപ്പെടെ 12 പ്രതികളാണ് കുറ്റപത്രത്തിലുളളത്. അയ്യായിരത്തോളം പേജുകളാണ് കുറ്റപത്രത്തില്‍ ഉള്ളത്. മഞ്ജു വാര്യരുമായുള്ള ദാമ്പത്യ ബന്ധം തകരാൻ ഇടയാക്കിയത് ആക്രമണത്തിന് ഇരയായ നടിയാണെന്ന വിശ്വാസമാണ് ദിലീപ് ക്വട്ടേഷൻ നൽകാൻ കാരണമെന്ന് കുറ്റപത്രത്തിൽ പൊലീസ് പറയുന്നു.

പള്‍സര്‍ സുനിയാണ് കേസിലെ ഒന്നാം പ്രതി. സുനിക്കെതിരെ ചുമത്തിയ വകുപ്പുകള്‍ തന്നെയാണ് എട്ടാം പ്രതിയായ ദിലീപിനെതിരേയും ചുമത്തിയിരിക്കുന്നത്. മഞ്ജുവാര്യരാണ് കേസിലെ പ്രധാന സാക്ഷി. മഞ്ജു വാര്യരെ കൂടാതെ സിനിമാ മേഖലയില്‍ നിന്ന് അമ്പതോളം സാക്ഷികള്‍ ഉണ്ടെന്നാണ് വിവരം.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook

.