മുഖ്യമന്ത്രിക്കെതിരെ വധഭീഷണി മുഴക്കി ഏഴാം ക്ലാസുകാരൻ; ഒപ്പം അസഭ്യ വർഷവും

തിരുവനന്തപുരം: മുഖ്യമന്ത്രി പിണറായി വിജയനെതിരെ വധഭീഷണി മുഴക്കി ഏഴാം ക്ലാസുകാരൻ. ഇന്നലെ വൈകിട്ടാണ് പൊലിസ് ആസ്ഥാനത്ത് മുഖ്യമന്ത്രിക്കെതിരെ അസഭ്യ വർഷവുമായി ഫോൺ വിളിയെത്തിയത്. മ്യൂസിയം പൊലിസ് നടത്തിയ അന്വേഷണത്തില്‍ എറണാകുളം സ്വദേശിയായ പന്ത്രണ്ടുകാരനാണ് ഭീഷണിക്ക് പിന്നിലെന്ന് കണ്ടെത്തി.

ബുധനാഴ്ച വൈകിട്ട് അഞ്ചിനാണ് ഫോണ്‍വിളിയെത്തിയത്. തിരുവനന്തപുരത്ത് പൊലിസ് ആസ്ഥാനത്തെ എമര്‍ജന്‍സി നമ്പറിലേക്കാണ് കോള്‍ വന്നത്. ഫോണ്‍ എടുത്തപ്പോള്‍ അപ്പുറത്ത് നിന്ന് മുഖ്യമുഖ്യമന്ത്രിക്ക് നേരെ അസഭ്യവര്‍ഷവും വധഭീഷണിയുമാണ് വന്നത്. തുടർന്ന്, പൊലിസ് ആസ്ഥാനത്ത് നിന്ന് പരാതി മ്യൂസിയം പൊലിസിന് കൈമാറി.

പിന്നീട് മ്യൂസിയം പൊലിസ് നടത്തിയ അന്വേഷണത്തിലാണ് കുട്ടിയെ കണ്ടെത്തിയത്. പൊലിസ് കുട്ടിയുടെ വീട്ടിലെത്തി ഫോൺ വിളിച്ചത് വിദ്യാർഥി തന്നെയാണെന്ന് ഉറപ്പുവരുത്തുകയായിരുന്നു. പ്രായപൂര്‍ത്തിയാകാത്തതിനാല്‍ വിദ്യാര്‍ഥിക്കെതിരെ മറ്റ് നിയമനടപടികൾ ഒന്നുമുണ്ടാകില്ല. കൗണ്‍സിലിങ്ങ് നല്‍കുമെന്നാണ് പൊലിസ് നല്‍കുന്ന വിവരം.