പൊതുമേഖല സ്ഥാപനമായ ഫുഡ് കോർപറേഷൻ ഓഫ് ഇന്ത്യയിൽ വിവിധ ഒഴിവുകൾ. നോർത്ത്, സൗത്ത്, ഈസ്റ്റ്, വെസ്റ്റ്, നോർത്ത്-ഈസ്റ്റ് സോണുകളിലായി 4103 ഒഴിവുകളും കേരളം ഉൾപ്പെടുന്ന സൗത്ത് സോണിൽ 540 ഒഴിവുകളുമാണുളളത്. ഫെബ്രുവരി 23 മുതൽ ഓൺലൈനായി വേണം അപേക്ഷ സമർപ്പിക്കേണ്ടത്. മാർച്ച് 25 ആണ് അപേക്ഷ സ്വീകരിക്കുന്ന അവസാന തീയതി.

ജൂനിയർ എൻജിനീയർ (സിവിൽ/ഇലക്ട്രിക്കൽ മെക്കാനിക്കൽ), സ്റ്റെനോ ഗ്രേഡ് II, അസിസ്റ്റന്റ് ഗ്രേഡ് II (ഹിന്ദി), ടൈപ്പിസ്റ്റ് (ഹിന്ദി), അസിസ്റ്റന്റ് ഗ്രേഡ് III (ജനറൽ/അക്കൗണ്ട്സ്/ടെക്നിക്കൽ/ഡിപ്പോ) എന്നീ തസ്തികയിലാണ് ഒഴിവുകൾ. അപേക്ഷകർ ഏതെങ്കിലും ഒരു സോണിലെ ഒരു തസ്തികയിലേക്ക് മാത്രമേ അപേക്ഷിക്കാവൂ. 500 രൂപയാണ് അപേക്ഷ ഫീസ്. സ്ത്രീകൾ, പട്ടികവിഭാഗം, വിമുക്ത ഭടന്മാർ, ഭിന്നശേഷിക്കാർ എന്നിവർക്ക് ഫീസില്ല.

ഓൺലൈൻ ടെസ്റ്റ്, സ്കിൽ ടെസ്റ്റ്, ഡോക്യുമെന്റ് വെരിഫിക്കേഷൻ എന്നിവയുടെ അടിസ്ഥാനത്തിലായിരിക്കും തിരഞ്ഞെടുപ്പ്. കേരളത്തിൽ കണ്ണൂർ, കൊച്ചി, തിരുവനന്തപുരം, കൊല്ലം, കോട്ടയം, കോഴിക്കോട്, തൃശൂർ എന്നിവിടങ്ങളിൽ ഒന്നാംഘട്ട ഓൺലൈൻ ടെസ്റ്റിന് സെന്ററുകളുണ്ട്. രണ്ടാംഘട്ട ഓൺലൈൻ ടെസ്റ്റിന് കൊച്ചിയിൽ മാത്രമാണ് സെന്ററുളളത്. കൂടുതൽ വിവരങ്ങൾക്ക് www.fci.gov.in സന്ദർശിക്കുക.

Get all the Latest Malayalam News and Kerala News at Indian Express Malayalam. You can also catch all the Jobs News in Malayalam by following us on Twitter and Facebook