Weekly Horoscope Malayalam June 25- July 01, 2023: വാരഫലം സമ്പൂര്‍ണ്ണം, അശ്വതി മുതല്‍ രേവതി വരെ

Weekly Horoscope in Malayalam: June 25- July 01 Weekly Horoscope Astrological Predictionsfor stars Aswathi to Revathy: തിരുവാതിര ഞാറ്റുവേലയിലാണ് സൂര്യൻ. ബുധൻ മൗഢ്യത്തോടെ മിഥുനത്തിലേക്ക് പ്രവേശിക്കുന്നു. ശനി കുംഭത്തിൽ വക്രഗതിയിലാണ്. വ്യാഴം ഭരണി നക്ഷത്രത്തിൽ പ്രവേശിക്കുന്നു. രാഹു വാരാന്ത്യത്തിൽ അശ്വതി രണ്ടാം പാദത്തിലേക്കും കേതു ചിത്തിരയിലേക്കും നിഷ്ക്രമിക്കുകയാണ്. ചന്ദ്രൻ പൂരത്തിൽ തുടങ്ങി അനിഴത്തിൽ യാത്ര തുടരുന്നു. ചൊവ്വ ആയില്യം നാളിലെ അവസാന ആഴ്ചയിലാണ്. ശുക്രൻ ആയില്യത്തിൽ സഞ്ചാരം തുടരുന്നു.

ഈവിധമുള്ള ഈ ആഴ്ചയിലെ ഗ്രഹനില അശ്വതി മുതൽ രേവതി വരെയുള്ള 27 നാളുകാരെ എങ്ങനെ സ്വാധീനിക്കുന്നു/ എങ്ങനെ ബാധിക്കുന്നു എന്നതാണ് ഇവിടെ അന്വേഷിക്കുന്നത്.

അശ്വതി: വ്യാഴം ജന്മനക്ഷത്രത്തിൽ നിന്നും മാറുന്നത് ആശ്വാസമാണ്. ശനിയുടെ വക്രഗതി ഫലം കണ്ടുതുടങ്ങും. കിട്ടാക്കടങ്ങൾ കിട്ടിയേക്കാം. ബുധന് മൗഢ്യം ഉള്ളതിനാൽ വിദ്യാഭ്യാസത്തിൽ ചില മനക്ലേശങ്ങൾ ഭവിച്ചേക്കാനിടയുണ്ട്. ദേശാന്തരയാത്രകൾ കാര്യസാധ്യത്തിന് ഉതകിയേക്കും. ഗൃഹനവീകരണത്തിന് സാധ്യതയുണ്ട്. സഹപ്രവർത്തകർ സഹായിക്കും. ഞായർ, തിങ്കൾ ദിവസങ്ങൾക്ക് മികവ് കുറയാം.

ഭരണി: മനക്ലേശത്തിനറുതി വരാം. തൊഴിൽ, പഠനം ഇവയുമായി ബന്ധപ്പെട്ട ഗവേഷണം, പ്രോജെക്ട് എന്നിവ ചെയ്യാനായേക്കും. വേണ്ടത്ര തയ്യാറെടുപ്പുകൾ നടത്താനായത് മെച്ചത്തിന് കാരണമാകാം. ചന്ദ്രൻ ആറ്, ഏഴ് എന്നീ അനുകൂലഭാവങ്ങളിലൂടെ സഞ്ചരിക്കുന്നതിനാൽ പലതരം നേട്ടങ്ങൾ സ്വാഭാവികമായി വന്നെത്തും. എതിർപ്പുകളെ തൃണവൽഗണിക്കും. ദാമ്പത്യസൗഖ്യം ഭവിക്കുന്നതാണ്.

കാർത്തിക: ക്രയവിക്രയങ്ങളിൽ ശ്രദ്ധ കുറയരുത്. ഭൂമി സംബന്ധിച്ച അവകാശത്തർക്കങ്ങൾ ഉയർന്നേക്കാം. വാരത്തിന്റെ തുടക്കത്തിന് ശുഭത്വം കുറവായിരിക്കും. വാരാന്ത്യത്തിൽ തുടർപഠനത്തിന് കളമൊരുങ്ങും. തൊഴിലിൽ നിന്നും വരുമാനമുയരാം. ഉത്തരവാദിത്വമുള്ള പ്രവർത്തനങ്ങൾ അധികാരികളുടെ പ്രശംസ നേടിത്തരും. കുടുംബാംഗങ്ങൾക്കിടയിലെ അനൈക്യം പരിഹരിക്കാനാവും. കഫജന്യരോഗങ്ങൾ ഉപദ്രവിച്ചേക്കാം.

രോഹിണി: ഉദ്യോഗസ്ഥർക്ക് ജോലിഭാരം കൂടുന്നതാണ്. കുടുംബവുമൊന്നിച്ച് തീരുമാനിച്ചിരുന്ന ചില വിനോദപരിപാടികൾ മാറ്റിവെക്കേണ്ടി വന്നേക്കാം. യാത്രാക്ലേശം മടുപ്പിച്ചേക്കും. പൊതുപ്രവർത്തകർക്ക് വലിയ വെല്ലുവിളികളെ നേരിടേണ്ടിവരാം. സാമ്പത്തിക സ്രോതസ്സുകൾ അധികാരികളെ ബോധ്യപ്പെടുത്തേണ്ട സാഹചര്യം സംജാതമാകാം. ബുധമൗഢ്യം തുടങ്ങിയതിനാൽ വിദ്യാർത്ഥികൾക്ക് പഠനത്തിൽ ശ്രദ്ധക്കുറവ് ഉണ്ടായേക്കും.

മകയിരം: ശത്രുക്കളുടെ പ്രവർത്തനങ്ങൾ അതിരുകടക്കുന്നതായി തോന്നും. ക്ഷോഭിക്കേണ്ട സാഹചര്യം ഉയരാം. ധനപരമായി തരക്കേടില്ലാത്ത കാലമാണ്. എന്നാൽ ഭൂമിയിൽ നിന്നും പ്രതീക്ഷിച്ച ലാഭം വന്നുചേരണമെന്നില്ല. പുതുജോലിക്കായുള്ള ശ്രമം തുടരുന്നത് അഭികാമ്യമാവും. കരാറുകൾ പുതുക്കിക്കിട്ടാൻ കാലതാമസം ഉണ്ടാവും. വാരമധ്യം മുതൽ ഗുണാനുഭവങ്ങൾ കൂടും. സാഹസകർമ്മങ്ങൾ ഒഴിവാക്കണം.

തിരുവാതിര: ജന്മരാശിയിലും ജന്മനക്ഷത്രത്തിലു മായാണ് സൂര്യസഞ്ചാരം. ദേഹക്ലേശം, പാഴ്ചെലവുകൾ, ചെറുതോൽവികൾ എന്നിവ സാധ്യത. പ്രവൃത്തികളിൽ ആശയക്കുഴപ്പം ഏർപ്പെടാനിടയുണ്ട്. കലാകാരന്മാർക്ക് അംഗീകാരം ഭവിച്ചേക്കാം. ഊഹക്കച്ചവടത്തിൽ നല്ലശ്രദ്ധ വേണ്ടതുണ്ട്. ഗാർഹികമായ ആവശ്യങ്ങളിൽ ചിലതെങ്കിലും നിറവേറ്റപ്പെടുന്നതാണ്. പിന്തുണക്കാൻ സുഹൃത്തുക്കൾ മുന്നോട്ടുവരും. ബുധനാഴ്ച മുതൽ നല്ല അനുഭവങ്ങൾ പ്രതീക്ഷിക്കാം.

പുണർതം: യാത്രകൾ വ്യാപാര പുഷ്ടിയുണ്ടാക്കും. പുതിയ സംരംഭങ്ങളുടെ ആരംഭജോലികൾ നടക്കും. മികച്ച സംഘാടകവൈഭവം പുറത്തെടുക്കേണ്ട സന്ദർഭം സംജാതമാകും. വാക്കുകളിൽ പൗരുഷവും ക്ഷോഭവും ഒപ്പം സൗമ്യതയും നിറയാം. മക്കളുടെ തുടർപഠനാവശ്യത്തിന് പണച്ചെലവ് വന്നുചേരും. വ്യക്തിപരമായ ചിലവുകൾ ചുരുക്കാൻ ശ്രമിക്കുന്നതാണ്. ശ്വാസകോശ രോഗങ്ങൾ വിഷമിപ്പിക്കാം.

പൂയം: രണ്ടാം നക്ഷത്രത്തിൽ ശുക്രനും കുജനും സഞ്ചരിക്കുകയാൽ വൈകാരികവിക്ഷോഭങ്ങൾ ഭവിക്കാം. മനോനിയന്ത്രണം ശീലമാക്കണം. ധനവരവ് ഏറുകയും കുറയുകയും ചെയ്യും. ശാരീരികക്ലേശങ്ങൾ, ആലസ്യം എന്നിവയ്ക്ക് ശമനം കണ്ടേക്കും. കുടുംബാംഗങ്ങളുമായി പൊരുത്തക്കേടുണ്ടാവാം. പൂർണമനസ്സില്ലാതെ ചില കാര്യങ്ങൾ ചെയ്യേണ്ടിവരുന്നതാണ്. ഉദ്യോഗത്തിൽ പുതുദൗത്യങ്ങൾ ഏറ്റെടുക്കേണ്ട സാഹചര്യം ഉണ്ടാകും. മൂന്നാം ഭാവാധിപനായ ബുധന് മൗഢ്യം ഭവിക്കുകയാൽ പ്രതീക്ഷിച്ച സഹായം വന്നുചേരാൻ വൈകും.

ആയില്യം: ജന്മനക്ഷത്രത്തിൽ ചൊവ്വ സഞ്ചരിക്കുകയാൽ ഉദ്വേഗവും ഉൽക്കണ്ഠയും കൂടും. ബൗദ്ധികമായി പ്രവർത്തിക്കേണ്ടിടത്ത് വൈകാരികപ്രതികരണം നടത്തും. പഠനത്തിൽ മടുപ്പോ നൈരാശ്യമോ വരാം. നക്ഷത്രനാഥനായ ബുധന് മൗഢ്യം വന്നിരിക്കുകയാൽ പ്രവർത്തികളിൽ പിന്നോട്ടുപോയേക്കും. ധനവരവ് മുഴുവൻ ചെലവായി മാറുന്ന സ്ഥിതിയുണ്ടാകാം. സർക്കാർ അനുമതികൾ നേടാൻ ഊർജ്ജവും സമയവും കൂടുതൽ വ്യയം ചെയ്യേണ്ടിവരും. ഇഷ്ടവിനോദങ്ങൾ, സുഹൃൽ സമാഗമം എന്നിവ പിന്നീടത്തേക്ക് മാറ്റി വെക്കേണ്ട സ്ഥിതി സംജാതമാകാം.

മകം: ആദ്യതീരുമാനങ്ങൾ പിൻവലിക്കാം. പലതിലും പുനശ്ചിന്തയുണ്ടാവും. വിയർപ്പൊഴുക്കാതെ വിജയിക്കാൻ കഴിഞ്ഞേക്കും. പതിനൊനിലെ സൂര്യബുധയോഗം ഗുണപ്രദമാവുന്നതാണ്. ഉദ്യോഗസ്ഥർക്ക് പ്രൊജക്ടുകളിൽ നേട്ടം ഉണ്ടാക്കാനായേക്കും. ഗൃഹോപകരണങ്ങൾ വാങ്ങാനും ഗൃഹം നവീകരിക്കാനും ശ്രമം തുടങ്ങും. ബന്ധുക്കളെ സന്ദർശിക്കാൻ സമയം കണ്ടെത്തുന്നതാണ്. ദാമ്പത്യകാര്യങ്ങളിൽ സംതൃപ്തി ഭവിക്കും.

പൂരം: നക്ഷത്രാധിപനും ചൊവ്വയും ചേർന്ന് പന്ത്രണ്ടിൽ നിൽക്കുകയാൽ ക്ലേശാനുഭവങ്ങൾ ഉണ്ടാവാം. അനാവശ്യ തർക്കങ്ങളിൽ ഇടപെടേണ്ടിവരും. വിജയം നേടാൻ അദ്ധ്വാനം ഏറുന്നതാണ്. വ്യാപാര ആവശ്യങ്ങൾക്കായി യാത്രകൾ ഉണ്ടാവും. പന്ത്രണ്ടിലെ സൂര്യസ്ഥിതിയാൽ സർക്കാർ കാര്യങ്ങളിൽ അനുകൂല ഫലങ്ങൾ വന്നുചേരും. കൃത്യനിർവഹണത്തിലെ ശുഷ്കാന്തി പ്രശംസ പിടിച്ചുപറ്റും. വ്യാപാരത്തിൽ വിജയതന്ത്രങ്ങൾ ആവിഷ്കരിക്കും.

ഉത്രം: നയോപായം കൊണ്ടും വാക്ചാതുരി കൊണ്ടും വിജയിക്കാനാവുന്ന വാരമാണ്. ശനിയുടെ വക്രസ്ഥിതിയാൽ കർമ്മരംഗത്ത് നേട്ടങ്ങൾ വന്നുചേരും. കരാറുകൾ വീണ്ടും പുതുക്കപ്പെടും. വേതനത്തിൽ വർദ്ധനയുണ്ടാവും. ഉദ്യോഗാർത്ഥികൾക്ക് പ്രതീക്ഷ ഭാഗികമായെങ്കിലും നിറവേറപ്പെടും. വിവാഹാർത്ഥികൾക്ക് നിരാശപ്പെടേണ്ടി വരില്ല. ഉപരിപഠനം അന്യദിക്കുകളിൽ സാധ്യമാകുന്ന സ്ഥിതിയുണ്ടാവും. ഭാര്യാഭർത്താക്കന്മാർക്കിടയിലെ തെറ്റിദ്ധാരണ നീങ്ങി ഹൃദയൈക്യം പുലരും.

അത്തം: തിങ്കൾ, ചൊവ്വ ദിവസങ്ങളിൽ സൽകാര്യങ്ങൾ ഭവിക്കും. ദൗത്യത്തിൽ മുന്നേറ്റം വരും. ബുധനും വ്യാഴവും വാക്കും പ്രവൃത്തിയും രണ്ട് വഴിക്ക് നീങ്ങും. വാഗ്ദാനങ്ങൾ നിറവേറ്റപ്പെടില്ല. വെള്ളിയും ശനിയും നേട്ടങ്ങളുടേതാണ്. ധനപരമായ ക്ലേശങ്ങൾക്ക് താൽകാലികാശ്വാസം ലഭിക്കും. നഷ്ടപ്പെട്ടെന്ന് കരുതിയ വസ്തുക്കൾ തിരികെ കിട്ടിയെന്നുവരാം. പൊതുവേ ആരോഗ്യപരമായി ഗുണദോഷസമ്മിശ്രമായ കാലമാണ്.

ചിത്തിര: വിജയസാധ്യതയും ലക്ഷ്യനിർവഹണവും പൊരുത്തപ്പെടുത്താൻ ക്ലേശിക്കും. ആശയപരമായി വിഭിന്നതയിലുള്ള വരുമായി ഇണങ്ങി പ്രവർത്തിക്കേണ്ടി വന്നേക്കാം. കുടുംബജീവിതത്തിലെ വിഭിന്നതകൾ ഭാഗികമായി പരിഹൃതമാകും. മക്കളുടെ ശ്രേയസ്സിനായി ചില നീക്കിയിരുപ്പുകൾ പുതുക്കിസംരക്ഷിക്കും. ബുധന് മൗഢ്യവും ചൊവ്വക്ക് നീചവും തുടരുകയാൽ എത്ര ഊർജ്ജിതാശയന്മാരായാലും കർമ്മപുഷ്ടി കുറയും. വായ്പാ തിരിച്ചടവുകൾ മുടങ്ങാം.

ചോതി: ജന്മരാശിയിലും അഞ്ച്, ഒമ്പത് ഭാവങ്ങളിലും പാപഗ്രഹങ്ങൾ സ്ഥിതി ചെയ്യുകയാൽ സാഹചര്യങ്ങളുടെ തടവറയിലായ സ്ഥിതിവരാം. പുതുകാര്യങ്ങൾ ആലോചിക്കുമ്പോൾ തന്നെ തടസ്സങ്ങൾ ഉണ്ടാകാം. സാങ്കേതിക വിഷയങ്ങളിൽ വിദഗ്ദോപശം സ്വീകരിക്കുന്നത് ഉചിതം. കുടുംബകാര്യങ്ങൾ കുറച്ചൊക്കെ ഭംഗിയായി നടന്നേക്കും. ആവശ്യമായതിന്റെ പകുതി ധനം പോലും ലഭിക്കണമെന്നില്ല. വിമർശനങ്ങൾ കണ്ടില്ലെന്നു നടിക്കും. സൽസംഗങ്ങളിൽ പങ്കെടുക്കാൻ കഴിയുന്നതാണ്.

വിശാഖം: തുലാക്കൂറുകാരായ വിശാഖം നാളുകാർക്ക് ഈയാഴ്ച കർമ്മഗുണം കുറയും. ബാഹ്യാഭ്യന്തര സമ്മർദ്ദങ്ങൾ കൂടും. തീരുമാനങ്ങൾ എടുക്കാൻ ക്ലേശിച്ചേക്കും. പണവരവ് എത്രയുണ്ടായാലും ചിലപ്പോൾ ആവശ്യങ്ങൾക്ക് തികയാതെ വരാം. വൃശ്ചികക്കൂറുകാർക്ക് നേട്ടങ്ങൾ കൂടും. മത്സരങ്ങളിൽ വിജയിക്കും. തൊഴിൽ രംഗം പുഷ്ടിപ്പെടും. സാമ്പത്തികമായ ആവശ്യങ്ങൾ നിറവേറപ്പെടും. കഫരോഗങ്ങളും പനിയും രോഗസാധ്യതകൾ.

അനിഴം: മറ്റുള്ളവരെക്കുറിച്ചുള്ള വിലയിരുത്തലുകൾ ശരിയാണെന്ന് അനുഭവം കൊണ്ട് ബോധ്യമാകും. ഗുണവശങ്ങളിൽ പ്രധാനം ചുമതലകൾ പൂർത്തിയാക്കുകയാൽ മേലധികാരികളിൽ നിന്നും ഉള്ള അനുമോദനങ്ങൾ ലഭിക്കും എന്നതാണ്. നിക്ഷേപങ്ങളിൽ നിന്നും ആദായം പ്രതീക്ഷിക്കാം. കുടുംബത്തോടൊപ്പം വേണ്ടത്ര സമയം ചെലവഴിക്കാൻ കഴിഞ്ഞെന്നു വന്നേക്കില്ല. അതിന്റെ ഖേദവും പിണക്കവും ചിലപ്പോൾ ഗൃഹാന്തരീക്ഷത്തെ കലുഷമാക്കിയേക്കാം. ആരോഗ്യപരമായി ശ്രദ്ധ വേണ്ടതുണ്ട്.

തൃക്കേട്ട: തുടർപഠനം സംബന്ധിച്ച തീരുമാനങ്ങൾ ഉണ്ടാവും. അന്യദേശയാത്രകൾ ആസൂത്രണം ചെയ്യും. വിജ്ഞാന / ഗവേഷണ പ്രബന്ധങ്ങളുടെ സമർപ്പണത്തിനൊരുങ്ങും. ഉദ്യോഗസ്ഥർ മേലധികാരികളുടെ അനിഷ്ടം നേരിടാനിടയുണ്ട്. ബിസിനസ്സിൽ മാറ്റങ്ങൾ വരുത്താനൊരുങ്ങും. പാരമ്പര്യ തൊഴിലുകൾ നവീകരിക്കുന്നതിന് ശ്രമം തുടങ്ങും. ബന്ധുക്കളുടെ പിന്തുണ ചിലപ്പോൾ പ്രതീക്ഷിച്ചത്ര കൈവന്നില്ലെന്ന് വരാം. വൈകാരികക്ഷോഭം കൂട്ടുകാരുടെ പിണക്കത്തിന് ഇടവരുത്തിയേക്കാം.

മൂലം: പ്രതീക്ഷിച്ച കാര്യങ്ങൾ മിക്കതും ഭംഗിയായി നിറവേറാനാവും. കരുതൽ ധനം ഉണ്ടാവും. ചന്ദ്രൻ 9, 10, 11 ഭാവങ്ങളിൽ സഞ്ചരിക്കുകയാൽ കർമ്മരംഗം ശോഭനമാകും. വ്യാപാരികൾക്ക് തൊഴിൽ വിപുലീകരണം സാധ്യമാകും. ഉദ്യോഗസ്ഥർക്ക് സ്വന്തം സ്വാധീനം ഉയർത്താൻ കഴിയും. ഇഷ്ടവിഷയങ്ങളിൽ ഉപരിപഠനം, പരീക്ഷകളിൽ മികവ് എന്നിവയുണ്ടാവും. ആരോഗ്യപ്രശ്നങ്ങൾ കുറയുന്നതാണ്. കുടുംബസദസ്സുകളിൽ നന്നായി കാര്യങ്ങൾ അവതരിപ്പിക്കും.

പൂരാടം: പ്രധാനതീരുമാനങ്ങൾ ചിലതൊക്കെ കൈക്കൊള്ളും. ഒട്ടൊക്കെ സ്വാശ്രയത്വം സാധ്യമാകും. മേലധികാരികളുടെ വിശ്വാസമാർജ്ജിക്കും.ആശയങ്ങളുടെ മികവുറ്റ അവതരണത്തിലൂടെ സഹപ്രവർത്തകരുടെ നേതൃത്വപദവി ഏറ്റെടുക്കുന്നതാണ്. ശുക്ര – കുജ യോഗത്താൽ ചെറിയ മനപ്രയാസങ്ങളുണ്ടാവും. ആരോഗ്യകാര്യത്തിൽ ജാഗ്രത വേണം. വസ്തു, വാങ്ങി വിൽക്കുന്നവർക്ക് നഷ്ടം വന്നേക്കും. പൊതുവേ മനസ്സമാധാനവും ശാന്തിയും അനുഭവപ്പെടുന്ന വാരമായിരിക്കും.

ഉത്രാടം: ഉത്തരവാദിത്വങ്ങൾ നിറവേറുന്നതിൽ വിജയിക്കും. അമിതാദ്ധ്വാനം വിഷമിപ്പിച്ചേക്കാം. ധനപരമായി മെച്ചമുള്ള സമയമാണെങ്കിലും വ്യയം അധികമാകുന്നതാണ്. പുണ്യസ്ഥലങ്ങൾ സന്ദർശിക്കും. മക്കളുടെ വിദ്യാഭ്യാസ കാര്യങ്ങളിലെ പുരോഗതി സന്തോഷമുണ്ടാക്കും. കൃഷികാര്യങ്ങൾക്ക് കൂടുതൽ നേരം ചെലവഴിക്കാൻ തയ്യാറാവും. വസ്തുസംബന്ധിച്ച ക്രയവിക്രയങ്ങളിൽ തടസ്സം നേരിട്ടേക്കാം. സാഹിത്യകാരന്മാർക്ക് മുടങ്ങിയ രചനകൾ പൂർത്തിയാക്കാൻ കഴിഞ്ഞേക്കും.

തിരുവോണം: ആഴ്ചയുടെ തുടക്കം ക്ലേശകരമാവാം. ബുധൻ തൊട്ട് സദ്ഫലങ്ങൾ പ്രതീക്ഷിക്കാം. കുടുംബത്തിലെ മുതിർന്നവരുടെ രോഗദുരിതങ്ങൾ കുറയാം. ധനപരമായി നേട്ടങ്ങൾക്കാവും മുൻതൂക്കം. നവസംരംഭങ്ങൾക്കായി ബാങ്ക് / സർക്കാർ ധനസഹായം പ്രയോജനം ചെയ്യാം. വൈജ്ഞാനികമായും ധനാത്മകമായ വാരമാണ്. ആത്മീയയാത്രകൾക്ക് സാധ്യതയുണ്ട്. കൃത്യനിർവ്വഹണം സ്തുത്യർഹമായിരിക്കും

അവിട്ടം: ഉദ്യോഗത്തിലെ സത്യസന്ധത ശ്ലാഘിക്കപ്പെടും. വിമർശനങ്ങൾക്ക് മറുപടി നൽകുന്നതിൽ വിജയിക്കും. വ്യാപാരവിപുലീകരണം ആലോചനയിൽ നിറയും. കുടുംബാംഗങ്ങളുടെ അനൈക്യം രമ്യമാക്കാൻ വലിയ ഊർജ്ജം വേണ്ടിവന്നേക്കും. കുംഭക്കൂറുകാർക്ക് ചൊവ്വാ, ബുധൻ ദിവസങ്ങൾ കുറച്ചൊന്ന് കഠിനങ്ങളാവാം. സാഹസങ്ങൾ ഒഴിവാക്കുക അഭികാമ്യം. ഊഹക്കച്ചവടത്തിൽ ശ്രദ്ധ പുലർത്തണം.

ചതയം: ശനി ചതയം നാളിൽ വക്രസഞ്ചാരം നടത്തുകയാൽ കടുത്ത അനുഭവങ്ങൾ കുറഞ്ഞുതുടങ്ങും. കാര്യതടസ്സവും കർമ്മപുഷ്ടിക്കുറവും നീങ്ങിക്കിട്ടും. കച്ചവടത്തിൽ ലാഭം കൂടുന്നതാണ്. ഉപഭോക്താക്കളെ ആകർഷിക്കുന്ന കച്ചവടതന്ത്രങ്ങൾ വിലപ്പോവും. വിദ്യാർത്ഥികൾക്ക് ഭാവിപഠനത്തെ സംബന്ധിച്ച വ്യക്തത സിദ്ധിച്ചേക്കും. ദുഷ്പ്രേരണകളെ സമർത്ഥമായി പ്രതിരോധിക്കാൻ കഴിയും. പ്രോജക്ടുകൾ മേലധികാരികളുടെ അംഗീകാരം നേടുന്നതായിരിക്കും. കിടപ്പ് രോഗികൾക്ക് സമാശ്വാസം കൈവരുന്നതാണ്.

പൂരുരുട്ടാതി: ദുർഘടങ്ങൾ ഒഴിഞ്ഞുപോകുന്നതായി തോന്നും. ശരീരവും മനസ്സും ഉന്മേഷഭരിതമാവും. പുതുസംരംഭങ്ങൾക്ക് കുറച്ചൊക്കെ കാലം അനുകൂലമായി വരും. സാമ്പത്തിക കാര്യങ്ങളിൽ ആശ്വാസം ഭവിക്കാം. തൊഴിൽ തേടുന്നവർക്ക് പുതിയ അവസരങ്ങൾ വന്നെത്തുന്നതായിരിക്കും. വീടുമായി പിണങ്ങിക്കഴിയുന്നവർ, അകന്ന ഭാര്യാഭർത്താക്കന്മാർക്ക് ഒന്നിക്കാൻ സാഹചര്യം സംജാതമായേക്കാം. ലക്ഷ്യബോധത്തോടെയുള്ള പഠനം വിജയിക്കാൻ തുടങ്ങും.

ഉത്രട്ടാതി: ഗ്രഹങ്ങൾക്ക് കുറച്ച് അനുകൂലാവസ്ഥയുള്ള തിനാൽ നീണ്ടുപോയ വിവാഹം നടക്കാനിടയുണ്ട്. തൊഴിലിൽ തടസ്സങ്ങൾ മാറുന്നതാണ്. കടബാധ്യതകളാൽ വിഷമവൃത്തത്തിൽ പെട്ടുപോയവർക്ക് തിരിച്ചടവിന് കഴിയും. പണയവസ്തുക്കൾ ഭാഗികമായെങ്കിലും മടക്കിയെടുക്കാൻ സാധിച്ചേക്കും. അനാവശ്യപിടിവാശികൾ കലുഷമാക്കിയ ബന്ധങ്ങൾ പുനശ്ചിന്തയിലൂടെ ഐക്യപ്പെടാം. പഠനത്തിൽ പുരോഗതി ദൃശ്യമാകുന്നതാണ്. കൂട്ടുകാരുടെ പിന്തുണ പ്രചോദനമേകും. അനാവശ്യ വിവാദങ്ങളിൽ നിന്നും ഒഴിഞ്ഞുനിൽക്കുന്നത് നന്ന്.

രേവതി: കഠിനവ്യഥകൾ ക്ക് ഒട്ടൊക്കെ ശമനം വരുന്ന കാലമാണ്. വ്യവഹാര വിഷയങ്ങളിൽ നീതികിട്ടാം. വലിയ തർക്കങ്ങളിൽ അനുരഞ്ജനം പ്രതീക്ഷിക്കാനാവും. അന്യനാടുകളിൽ കഴിയുന്നവർക്ക് നാട്ടിലേക്ക് മടങ്ങാൻ അവസരം വന്നെത്തുന്നതാണ്. അനാവശ്യച്ചെലവുകൾ നിയന്ത്രണവിധേയമായേക്കും. വായ്പകളുടെ തിരിച്ചടവ് മുടങ്ങിയവർക്ക് അവ തുടരാൻ സാധിക്കും. ഗൃഹനിർമ്മാണത്തിലെ തടസ്സങ്ങൾ മാറും. പൊതുവേ ആശ്വാസത്തിന്റെ കാലമാണ്. എങ്കിലും അനാവശ്യമായ തിടുക്കം ഒഴിവാക്കുകയാവും ഉചിതം.