Weekly Horoscope Malayalam June 18- June 24, 2023: വാരഫലം സമ്പൂര്‍ണ്ണം, അശ്വതി മുതല്‍ രേവതി വരെ

Weekly Horoscope in Malayalam: June 18-June 24, 2023, Astrological Predictions for stars Aswathi to Revathy: സൂര്യൻ മകയിരം ഞാറ്റുവേല കഴിഞ്ഞ് തിരുവാതിര ഞാറ്റുവേലയിലേക്ക് കടക്കുന്നു. വാരാദ്യദിനം അമാവാസിയും തുടർന്നു ചന്ദ്രൻ ആഷാഢമാസത്തിലേക്കു പ്രവേശിക്കുകയുമാണ്. മിഥുനം 6 ന് ബുധന് ക്രമമൗഢ്യമാരംഭിക്കുന്നു. ശനിക്ക് വക്രഗതി തുടങ്ങുന്നതാണ് ഏറ്റവും പ്രധാനം. രാഹുവും വ്യാഴവും മേടത്തിൽ, കേതു തുലാത്തിൽ, ശുക്രനും ചൊവ്വയും കർക്കടകത്തിൽ, ബുധൻ എടവത്തിൽ എന്നിങ്ങനെയാണ് ഈയാഴ്ചയിലെ ഗ്രഹനില.

ഇതിന്റെ ഗുണദോഷാനുഭവങ്ങൾ അശ്വതി മുതൽ രേവതി വരെ 27 നാളുകാരെയും എങ്ങനെ സ്വാധീനിക്കുന്നു എന്നതാണ് ഇവിടെ അന്വേഷിക്കുന്നത്.

അശ്വതി: സ്ഥിതിഗതികൾക്ക് കാര്യമായ മാറ്റം പ്രതീക്ഷിക്കേണ്ടതില്ല. വിദ്യാർത്ഥികൾക്ക് ആശിച്ച ഉപരിപഠനത്തിൽ പ്രവേശിക്കാനാവും. യാത്രകൾ അനിവാര്യമാവും. അവകൊണ്ടു വലിയ നേട്ടങ്ങൾ പറയാനില്ല. സാമ്പത്തിക സ്ഥിതിയിൽ നേരിയ മെച്ചം വരാം. വ്യാഴം അശ്വതിയിൽ തുടരുന്ന അവസാന ആഴ്ചയാണ്. അതിനാൽ കുറച്ചുകൂടി ജീവിതത്തിനു ശക്തിയുണ്ടാവും. രാഹു അശ്വതി മൂന്നാം പാദത്തിൽ നിന്നും രണ്ടിലേക്ക് നിഷ്ക്രമിക്കുകയാൽ അശ്വതി രണ്ടാം പാദക്കാർക്ക് ചില സമ്മർദ്ദങ്ങളെ നേരിടേണ്ടതായി വരാം.

ഭരണി: മനസ്സന്തോഷം കൂടുകയല്ലാതെ കുറയുകയില്ല. കുടുംബാംഗങ്ങളുമായി ഒത്തുചേരാനാവും. തൊഴിലിലും വ്യക്തിജീവിതത്തിലും നല്ല പിന്തുണ ലഭിച്ചേക്കും. അധികാരികളുടെ പ്രശംസ നേടും. വാരമദ്ധ്യത്തിനുശേഷം വ്യാഴം ഭരണിയിലേക്ക് പ്രവേശിക്കുന്നത് നേരിയ ആത്മസംഘർഷങ്ങൾക്ക് വഴിവെക്കാം. പ്രണയികൾ എതിർപ്പുകളെ നേരിടാൻ സാധ്യതയുണ്ട്. ധനപരമായി വളർച്ച വരും. വിജയത്തിനും പുരോഗതിക്കും തന്നെയാണ് ഈയാഴ്ച മുൻതൂക്കം.

കാർത്തിക: ദുര്യോഗങ്ങളകന്നു സദ്യോഗങ്ങൾ ഭവിക്കും. ഉദ്യോഗത്തിൽ ഉയർച്ചക്കുള്ള വഴികൾ തെളിയും. ഭാവനാവിലാസം പ്രകാശിക്കും, ഗവേഷകർ, ശാസ്ത്രജ്ഞർ, പഠിതാക്കൾ, സാഹിത്യകാരന്മാർ എന്നിവരുടെ സർഗശക്തി ഉന്നമിക്കും. സമൂഹത്തിന്റെ ആദരവ് ലഭിക്കും. സൽകാര്യങ്ങൾ ചെയ്യാൻ സന്ദർഭമുണ്ടാകും. വ്യാപാരത്തിലെ ജാഡ്യം അകലും. ആരോഗ്യപരമായി ശ്രദ്ധ കാട്ടേണ്ട സന്ദർഭം കൂടിയാണ്.

രോഹിണി: തൊഴിലിൽ നേട്ടങ്ങൾ വന്നുചേരും. ശനിക്ക് വക്രം തുടങ്ങുകയാൽ പദവികൾ ലഭിക്കുവാനുള്ള തടസ്സങ്ങൾ നീങ്ങും. കുടുംബബന്ധുക്കളുടെ വാചികമോ മാനസികമോ ആയ പിന്തുണ ഭവിക്കുന്നതാണ്. മാനസിക സന്തുഷ്ടിയേകുന്ന വിഷയങ്ങളിൽ അഭിരമിക്കാനാവും. എതിർപ്പുകളിൽ സ്ഥൈര്യവും ധൈര്യവും പുലർത്തും. ദമ്പതികൾക്കുള്ളിൽ ഹൃദയൈക്യം വർദ്ധിക്കും.

മകയിരം: ആദിത്യൻ ജന്മനക്ഷത്രത്തിൽ നിന്നും മാറുകയാൽ വാരമധ്യം മുതൽ ശാരീരിക സൗഖ്യം, കർമ്മവിജയം എന്നിവ പ്രതീക്ഷിക്കാം. കിട്ടാക്കടങ്ങൾ ലഭിക്കാൻ വഴി തെളിയും. മക്കളുടെ വിവാഹകാര്യത്തിൽ നല്ല തീരുമാനം ഉണ്ടാകുന്നതാണ്. തീർത്ഥാടനയോഗം ഫലവത്താകും. വൈജ്ഞാനികവും സാങ്കേതികവുമായ അറിവുകൾ നേടാൻ മുന്നോട്ട് വരും. ജീവകാരുണ്യപ്രവർത്തനങ്ങളിൽ ഭാഗഭാക്ത്വം വഹിക്കും. കഫജന്യരോഗങ്ങൾ ക്ലേശിപ്പിക്കാനിടയുണ്ട്.

തിരുവാതിര: ഉപരിപ്ലവമായ ചർച്ചകളിൽ നിന്നും വിട്ടുനിൽക്കും. ചില ആകുലതകൾ വന്നുചേരും. തിരുവാതിരയിൽ വാരമദ്ധ്യം മുതൽ സൂര്യൻ സഞ്ചരിക്കുകയാൽ ശാരീരിക ക്ലേശമനുഭവപ്പെടും. കർമ്മപുഷ്ടിയുള്ള കാലമാകയാൽ വ്യാപാരം, ഉദ്യോഗം തുടങ്ങിയവയിൽ വിജയിക്കുന്നതാണ്. അന്യദേശത്ത് തൊഴിൽ ലഭിക്കാനിടയുണ്ട്. പ്രണയികൾക്ക് നല്ലവാരം എന്ന് പറയാനാവില്ല. സാമ്പത്തിക ശോച്യത ചെറുതായെങ്കിലും മാറുന്നതാണ്.

പുണർതം: തിടുക്കത്തിൽ തീരുമാനങ്ങൾ കൈക്കൊള്ളന്ന രീതി ഉപേക്ഷിക്കണം. ജന്മരാശിയിൽ സൂര്യൻ സഞ്ചരിക്കുകയാൽ ആയാസമേറും. വിഭവക്ഷയം ഭവിക്കും. സർക്കാർ കാര്യങ്ങളിൽ സമ്മർദ്ദം ഉണ്ടാകും. സാമ്പത്തിക കാര്യങ്ങളിൽ ശ്രദ്ധ കുറയരുത്. വ്യയത്തിൽ നിയന്ത്രണം വേണം. വ്യാപാരത്തിൽ വലിയ മുതൽ മുടക്കിന് കാലം അനുകൂലമല്ല. കുടുംബാംഗങ്ങളുടെ ജോലിക്കായി അലച്ചിലുണ്ടായേക്കും. പിതൃസമ്പാദ്യങ്ങളിൽ അവകാശത്തർക്കം വന്നേക്കാം. ആരോഗ്യ പരിശോധന മാറ്റിവെക്കരുത്.

പൂയം: പന്ത്രണ്ടിലെ ആദിത്യൻ സ്വസ്ഥത കുറയ്ക്കാം. പിതാവിന്റെ ആരോഗ്യസ്ഥിതി അത്ര മെച്ചമായിരിക്കില്ല. ചെറിയ നേട്ടത്തിനായി പോലും കൂടുതൽ വിയർപ്പൊഴുക്കേണ്ടിവരും. ബന്ധുക്കൾ പ്രതികൂല നിലപാടുകൾ കൈക്കൊള്ളാം. അന്യദേശത്ത് പഠനം/ ജോലി ഇവ എളുപ്പം സാധ്യമാകുന്നതാണ്. കച്ചവടത്തിൽ മുഴുവൻ സമയവും ചെലവഴിക്കേണ്ടതായി വരും. ലാഭം ഉണ്ടാകുന്നതാണ്. എന്നാൽ അനാവശ്യം എന്ന് തോന്നുന്നതരത്തിലുള്ള ചെലവുകളും വർദ്ധിക്കുന്നതാണ്.

ആയില്യം: കുജൻ ജന്മരാശിയിൽ, ജന്മനക്ഷത്രത്തിൽ സഞ്ചരിക്കുകയാൽ ആരോഗ്യകാര്യത്തിൽ കരുതൽ വേണം. ആഴ്ചയുടെ തുടക്കത്തിൽ രാശിനാഥനായ ചന്ദ്രൻ ദുർബലനാവുകയാൽ മനശ്ശക്തിയും കുറഞ്ഞേക്കും. കഫജന്യരോഗങ്ങൾ ബാധിക്കാം. വൈകാരികപ്രതികരണങ്ങളെ നിയന്ത്രിക്കേണ്ടതുണ്ട്. സമയനിഷ്ഠപാലിക്കുവാൻ സാധിച്ചേക്കില്ല. നിത്യച്ചെലവുകൾ ഒരുവിധം നടന്നുപോകും. ആഴ്ചയുടെ പകുതിക്ക് ശേഷം ഗുണാനുഭവങ്ങൾ ഉണ്ടാവാം. പ്രതീക്ഷിച്ച ധനസഹായം ലഭിക്കും. വീടുവിട്ടുനിന്നവർക്ക് കുടുംബാംഗങ്ങളെ കാണാനാവും.

മകം: പതിനൊന്നാൽ സൂര്യൻ സഞ്ചരിക്കുന്ന കാലമാകയാൽ വിജയവും ഐശ്വര്യവും ഭവിക്കും. നേട്ടങ്ങൾ അഭംഗുരമാവും. പിതൃധനം അനുഭവത്തിലെത്തും. രാഷ്ട്രീയക്കാർക്ക് പദവികൾ വന്നെത്തും. നിയമപ്രശ്നങ്ങളിൽ അനുകൂല വിധിയുണ്ടാവും. ഉദ്യോഗസ്ഥർക്കു ശമ്പളവർദ്ധനവ് ഉണ്ടാകുന്നതാണ്. കുടുംബകാര്യങ്ങളിൽ സ്വസ്ഥത ഭവിക്കും. പന്ത്രണ്ടിലെ ചൊവ്വയാൽ ഭൂമിയിടപാടുകൾ തടസ്സപ്പെടാം.

പൂരം: നല്ലകാര്യങ്ങൾ ചെയ്യാനും തന്മൂലം സൽപ്പേര് സസാദിക്കുവാനും അവസരം ലഭിക്കും. വിദ്യാർത്ഥികളുടെ മനോരഥത്തിനനുസരിച്ച് തുടർ പഠനം സാധ്യമാകുന്നതാണ്. വിജയഘടകങ്ങൾ പലതും ഒത്തുവരുന്ന അനുഭവം വന്നുചേരും. സർക്കാർ കാര്യങ്ങളിലെ തടസ്സം നീങ്ങുന്നതാണ്. ഭൂമിയിൽ നിന്നും ആദായം കുറഞ്ഞേക്കും. അധികാരികളുമായി തർക്കം ഉണ്ടാവാം. ബൗദ്ധികമായ കാര്യങ്ങളിൽ വിജയം നേടിയെടുക്കുവാൻ കഴിഞ്ഞുവെന്ന് വരാം. വിവാഹാലോചനകൾ തടസ്സപ്പെടാനിടയുണ്ട്.

ഉത്രം: കർമ്മരംഗത്ത് ജാഗ്രതയോടെ ഇടപെടും. കൃത്യമായ ആസൂത്രണങ്ങളിലൂടെ ശത്രുക്കളുടെ നീക്കങ്ങളെ പ്രതിരോധിക്കും. കുടുംബ ബിസിനസ്സിൽ വളർച്ചയുണ്ടാവും. ഉദ്യോഗസ്ഥലത്ത് പദവികളും ചുമതലകളും വർദ്ധിക്കുന്നതാണ്. തൊഴിൽ അന്വേഷകർക്ക് ഒരു വരുമാനമാർഗം തുറന്നുകിട്ടും. ഭൂമസംബന്ധിച്ച ഇടപാടുകളിൽ സൂക്ഷ്മത പുലർത്തണം. വാതകഫരോഗങ്ങൾ വർദ്ധിച്ചേക്കാം. ആരോഗ്യപരിപാലനത്തിൽ അലംഭാവമരുത്.

അത്തം: വ്യാപാര കാര്യങ്ങളിൽ ഉണ്ടായിരുന്ന മാന്ദ്യം നീങ്ങും. ചില നവീകരണങ്ങൾ ഗുണപരമായ മാറ്റം ഉണ്ടാക്കുന്നതാണ്. പഠനത്തിൽ ഇഷ്ടവിഷയപ്രവേശം സാധ്യമാകും. ബാങ്കുകളിൽ നിന്നും മറ്റും വായ്പാസഹായം പ്രയോജനപ്പെടുത്താനാവും. ഗവേഷകർക്ക് പ്രബന്ധം സമർപ്പിക്കുന്നതിന് കാലം അനുകൂലമാണ്. കരാർ പണികളിൽ വേതനവർദ്ധനയും തുടർച്ചയും സാധ്യമാകുന്നതാണ്. കുടുംബവും കൂട്ടുകാരും നൽകുന്ന പ്രോൽസാഹനങ്ങളിൽ ആഹ്ളാദിക്കും. ചെലവ് നിയന്ത്രിക്കാനാവും.

ചിത്തിര: നക്ഷത്രനാഥനായ ചൊവ്വയുടെ നീചം സൃഷ്ടിക്കുന്ന തൊഴിൽപരവും വ്യക്തിപരവുമായ സമ്മർദ്ദങ്ങൾ തുടരുന്നതാണ്. കന്നിക്കൂറുകാരായ ചിത്തിരനാളുകാർ കർമ്മരംഗത്ത് ചില നേട്ടങ്ങൾ ഉണ്ടാക്കാം. സ്ഥാപനം തുടങ്ങാൻ സർക്കാർ അനുമതി, വായ്പ തുടങ്ങിയവ ലഭിക്കും. കടബാധ്യത തെല്ലൊന്ന് ലഘൂകൃതമാവും. വിശ്വാസയോഗ്യമായ കേന്ദ്രങ്ങളുടെ പിന്തുണ ശക്തി പകരും. വിജ്ഞാന സമ്പാദനത്തിന് അവസരങ്ങൾ തുറന്നുകിട്ടും. മക്കളുടെ ജോലി, വിവാഹം തുടങ്ങിയ കാര്യങ്ങളിൽ ആശാവഹമായ പുരോഗതി ഭവിക്കും. ക്ഷോഭം നിയന്ത്രിക്കേണ്ടതുണ്ട്.

ചോതി: വ്യക്തിപരമായും കർമ്മപരമായും പുഷ്ടിയുള്ള വാരമാണ്. വിജയം അകലെയല്ല എന്ന ആശ്വാസമുണ്ടാകും. ഉത്തരവാദിത്വങ്ങൾ ഭംഗിയായി പൂർത്തിയാക്കും. പ്രതീക്ഷിച്ച പ്രതിഫലം വന്നുചേരും. നിക്ഷേപങ്ങളിൽ നിന്നും ആദായം ഉയർന്നേക്കും. പണയവസ്തുക്കൾ പുതുക്കാനോ തിരിച്ചെടുക്കാനോ സാധിക്കുന്നതാണ്. ചെറുപ്പക്കാരുടെ പ്രേമകാര്യങ്ങളിൽ വിജയം ഉണ്ടാകും. ഗാർഹികമായി സന്തോഷിക്കാൻ സന്ദർഭം വന്നുചേരും. കിടപ്പ് രോഗികൾക്ക് ആശ്വാസമനുഭവപ്പെടും.

വിശാഖം: വിവേകമുള്ള നടപടികളാൽ മേലുദ്യോഗസ്ഥരുടെ പ്രശംസനേടും. ധാർമ്മിക നിലപാടുകൾ മനസ്സംതൃപ്തിക്ക് ഹേതുവാകും. നവമഭാവത്തിലെ സൂര്യൻ പിതാവിന്റെ ആരോഗ്യത്തിൽ പ്രശ്നങ്ങൾ സൃഷ്ടിക്കാം. ദൈവസമർപ്പണങ്ങൾക്ക് നേരം കിട്ടിയില്ലെന്ന് വരാം. സഹപ്രവർത്തകരുടെ നിശിതമായ വിമർശനങ്ങൾ കണ്ടില്ലെന്ന് നടിക്കും. സാമ്പത്തികസ്ഥിതി ആശ്വാസകരമാവും. നിഷ്പ്രയോജനം എന്ന് ഉറപ്പുള്ള ചില യാത്രകൾ ഉണ്ടായേക്കാം.

അനിഴം: മറ്റുള്ളവരെ ഉപദേശിച്ച് നേർവഴി നടത്താനുള്ള ശ്രമം ഉപേക്ഷിക്കും. സ്വന്തം കാര്യങ്ങളിൽ കൂടുതൽ ശ്രദ്ധ ചെലുത്തും. വാരത്തിന്റെ തുടക്കത്തിൽ ക്ലേശങ്ങൾക്കാവും മുഖ്യത്വം. ക്രമേണ ചില ആനുകൂല്യങ്ങൾ പ്രതീക്ഷിക്കാനാവും. വിജയവഴി സ്വയം തെരഞ്ഞെടുക്കും. അധികാര സ്ഥാനത്തുള്ളവരുടെ മതിപ്പ് ഉയരും. കർമ്മവൈഭവം പ്രശംസിക്കപ്പെടും. സഹോദരരുടെ ജോലിക്കാര്യത്തിൽ ചില തടസ്സങ്ങൾ ഉയരും. മുതൽമുടക്കിയുള്ള സംരംഭങ്ങൾക്ക് അല്പം കൂടി കാത്തിരിക്കുകയാവും നന്ന്.

തൃക്കേട്ട: പ്രായോഗിക സമീപനം വിജയത്തിലെത്തിക്കും. വിശ്വസിച്ചേല്പിക്കുന്ന ദൗത്യങ്ങൾ ഭംഗിയായി പൂർത്തീകരിക്കുന്നതാണ്. പഠനകാര്യങ്ങളിലെ ആശങ്കകൾക്ക് അറുതിയാവും. വീടുവിട്ടുനിൽക്കുന്നവർക്ക് കുടുംബത്തോട് ഒത്തുചേരാൻ സാധിക്കുന്നതാണ്. ഉടമ്പടികൾ പുതുക്കിക്കിട്ടും. വേതനം ഉയരുന്നതാണ്. രാഷ്ട്രീയ മത്സരങ്ങളിൽ വിജയം കാണും. ആഴ്ചയുടെ തുടക്കത്തിൽ ചില തടസ്സങ്ങൾ വന്നെത്തിയേക്കും. ഭാര്യാഭർത്താക്കന്മാർക്കിടയിലെ പിണക്കങ്ങൾ അവസാനിച്ചേക്കാം.

മൂലം: സ്ഥിതിഗതികൾ അനുകൂലമാണ് എന്ന് പറയാൻ കഴിയില്ല. പ്രവൃത്തിപഥത്തിൽ ആലസ്യമേറും. സൂര്യൻ ഏഴാം ഭാവത്തിലാകയാൽ അലച്ചിൽ കൂടും. വ്യാപാരകാര്യങ്ങളിൽ ചെറിയ ലാഭമാവും വന്നെത്തുക. ദാമ്പത്യത്തിലെ സ്നേഹാ ന്യോന്യാദികൾ കുറയും. അനാവശ്യകലഹങ്ങൾ വരാം. സാമ്പത്തിക ഇടപാടുകളിൽ ജാഗ്രത വേണം. വാരമദ്ധ്യത്തിൽ അഷ്ടമരാശി വരികയാൽ കൂടുതൽ ആരോഗ്യപരമായും മറ്റും കരുതൽ വേണം.

പൂരാടം: പ്രതീക്ഷിച്ച കാര്യങ്ങൾ നടന്നുകിട്ടാൻ അദ്ധ്വാനമേറും. വേണ്ടപ്പട്ടവരുടെ സഹായം നാമമാത്രമാകും. തൊഴിലിൽ വിഘ്നങ്ങളുണ്ടാവാം. അധികാരികളുടെ പരിശോധനകൾ ഉണ്ടായേക്കും. ബിസിനസ്സ് യാത്രകൾ കൂടാം.കുടുംബ ജീവിതം ഗുണദോഷസമ്മിശ്രമായിരിക്കും. മക്കളുടെ കല്യാണക്കാര്യത്തിൽ ചില തീരുമാനങ്ങൾ വന്നുഭവിക്കാം. മാതാപിതാക്കളുടെ ആരോഗ്യകാര്യത്തിൽ അലംഭാവമരുത്. ബുധൻ, വ്യാഴം ദിനങ്ങൾക്ക് മേന്മ കുറയുന്നതാണ്.

ഉത്രാടം: ഉന്മേഷകരമായ കർമ്മങ്ങളിൽ ഏർപ്പെടും. ഊഹക്കച്ചവടം, ഭൂമിയിടപാടുകൾ എന്നിവയിൽ നിന്നും ആദായം വർദ്ധിക്കാം. വിശിഷ്ട വ്യക്തകളുടെ പിന്തുണ സിദ്ധിക്കുന്നതാണ്. പ്രൊഫഷണൽ വിദ്യാഭ്യാസത്തിന് പ്രവേശനം ലഭിക്കുന്നതാണ്. തൊഴിൽ, പഠനം എന്നിവ സംബന്ധിച്ച് അന്യദേശവാസവും ഒരു സാധ്യതയാണ്. പൊതുപ്രവർത്തകർക്ക് വെല്ലുവിളികളേറും. വാരാവസാനം ചന്ദ്രാഷ്ടമം ഭവിക്കുകയാൽ ശുഭാരംഭങ്ങൾ ഒഴിവാക്കുകയാവും ഉചിതം.

തിരുവോണം: കുടുംബജീവിതത്തിൽ ചില സന്തോഷങ്ങൾ വന്നുചേരും. ബന്ധുക്കളുടെ വിവാഹത്തിൽ പങ്കെടുക്കാനാവും. സ്വയം സ്ഥാപനം നടത്തുന്നവർക്കും കച്ചവടക്കാർക്കും മറ്റും സുഗമതയും ലാഭവും ഉണ്ടാവും. ഉപഭോക്താക്കളെ ആകർഷിക്കുന്ന പുതിയകാര്യങ്ങൾ ആസൂത്രണം ചെയ്യുന്നതാണ്. ഗൃഹനിർമ്മാണത്തിന് തദ്ദേശസ്ഥാപനങ്ങളുടെ അനുമതി ലഭിച്ചേക്കും. കടബാധ്യതയിൽ ചെറിയ ആശ്വാസം വന്നെത്തുന്നതാണ്. വാരമദ്ധ്യത്തിൽ അഷ്ടമരാശിയുള്ളതിനാൽ ആ ദിവസങ്ങളിൽ മനോവാക്കർമ്മങ്ങളിൽ ശ്രദ്ധയുണ്ടാവണം.

അവിട്ടം: ചിന്താപരമായ ഉണർവ് പ്രവൃത്തിയിൽ പ്രതിഫലിക്കണം എന്നില്ല. മനസ്സില്ലാമനസ്സോടെ ചിലരെ ആശ്രയിക്കേണ്ടിവരും. ഗാർഹിക ജീവിതത്തിൽ അനുരഞ്ജന ശ്രമം വേണ്ടിവരുന്നതാണ്. മക്കളുടെ ജോലിക്കാര്യത്തിൽ താമസം ഭവിച്ചേക്കും. വ്യാപാരികൾക്ക് വായ്പകളുടെ തിരിച്ചടവ് മുടങ്ങാനിടയുണ്ട്. സംഘടനാ തെരഞ്ഞെടുപ്പുകളിൽ വിജയപ്രതീക്ഷ മങ്ങിയേക്കും. താമസം നേരിട്ടാലും ചില താൽപര്യങ്ങൾ വിജയിപ്പിക്കാൻ സാധിക്കുന്നതാണ്.

ചതയം: തൊഴിൽ തേടുന്നവർക്ക് വരുമാനമാർഗം തുറന്നുകിട്ടും. എന്നാൽ നിലിവിലെ തൊഴിൽ ഉപേക്ഷിച്ച് പുതിയതിനായി ശ്രമിക്കുന്നത് ഗുണം ചെയ്യണമെന്നില്ല. ആലോചനകൂടും. സ്വയം തിരുത്താനുള്ള ഉദ്യമങ്ങളുണ്ടാവും. ജന്മനക്ഷത്രത്തിൽ നിൽക്കുന്ന ശനി വക്രഗതിയിലേക്ക് മാറുന്നതിനാൽ സ്വജീവിതത്തിൽ ഗുണപരമായ ചെറുമാറ്റമെങ്കിലും വരാം. സൗഹൃദങ്ങൾ ഗുണകരമാവും. ആലോചനാ സഭകളിൽ ആദരിക്കപ്പെടും. ഗൃഹസ്ഥജീവിതത്തിൽ സന്തോഷം സംജാതമാകുന്നതാണ്.

പൂരുട്ടാതി: ചെറിയ ചില ചലനങ്ങൾ പ്രതീക്ഷിക്കാൻ കഴിയുന്ന വാരമാണ്. സാമ്പത്തികമായി മാറ്റം വരാം. കിട്ടാക്കടങ്ങൾ കുറച്ചെങ്കിലും മടങ്ങിവന്നേക്കും. നിയമപ്രശ്നങ്ങൾ തീരുമാനമുണ്ടാകാതെ നീളുന്നതാണ്. പാരമ്പര്യവസ്തുക്കളിൽ നിന്നും ആദായം പ്രതീക്ഷിക്കാം. സ്വദേശ-വിദേശങ്ങളിൽ പഠന സാധ്യതയുണ്ട്. സർക്കാർ അനുമതി നേടാൻ പ്രയത്നം കൂടും. ഗുരുജനങ്ങളെയും പഴയ സഹപാഠികളേയും സന്ദർശിക്കാൻ സാധിക്കും. ക്രിയാത്മക കാര്യങ്ങളിൽ ശ്രദ്ധയുണ്ടാവും. പ്രണയികൾക്ക് കാലം അനുകൂലമാകുന്നതാണ്.

ഉത്രട്ടാതി: രോഗാവസ്ഥക്ക് കുറവുവരും. മാനസികമായ ബലവും ഭവിച്ചേക്കും. വിദ്വാന്മാരോട് ഇടപഴകാൻ സന്ദർഭമുണ്ടാകുന്നതാണ്. തൊഴിലിൽ വേറിട്ട ചില ചിന്തകൾ ഉണ്ടാകുമെങ്കിലും അത് നടപ്പാക്കാൻ വിഷമിക്കും. പഠനത്തിന് മികച്ച തുടർച്ചയുണ്ടാകാം. നാലിൽ സൂര്യൻ വരികയാൽ വീട് വിട്ട് നിൽക്കേണ്ടിവരാം. വിശ്വസിച്ച് ഏല്പിച്ച ജോലികൾ ഭംഗിയായി പൂർത്തീകരിക്കും. സകുടുംബം വിനോദയാത്രയ്ക്ക് പോകാനാവും. ചെലവ് കൂടും; വരവും ഉയരുന്നതാണ്.

രേവതി: സ്വാധീനം ഉയരുന്നതാണ്. അതിൽ സന്തോഷിക്കും. സ്വാധീനത്തെ അധികാരവും അഹങ്കാരവുമാക്കാൻ അഞ്ചാം ഭാവത്തിലെ ചൊവ്വ ശ്രമിച്ചേക്കും. പാപഗ്രഹങ്ങൾക്ക് മേൽക്കൈയുള്ള വാരമാകയാൽ പ്രവർത്തനങ്ങൾ, പഠനം, കൊടുക്കൽ വാങ്ങൽ എന്നിവയിൽ ജാഗ്രത വേണം. പാഴ്ച്ചെലവുകൾ ഉണ്ടായേക്കാം. മക്കളുടെ കാര്യത്തിനായി യാത്രകൾ വേണ്ടി വരുന്നതാണ്. പ്രണയികൾക്ക് സന്തോഷിക്കാനാവുമെന്ന് തോന്നുന്നില്ല.