വക്രമൗഢ്യ ശുക്രന്റെ സ്വാധീനം 27 നാളുകളിലും

Venus Retrogression 2023 Horoscope Astrological Predictions Aswathi to Revathi: ശുക്രൻ മനുഷ്യരുടെ ഭൗതികവാഞ്ഛകളുടെ കാരകഗ്രഹമാണ്. പ്രണയം, വാത്സല്യം, സ്നേഹം, രതി, ഇന്ദ്രിയകാമനകൾ, ദാമ്പത്യസുഖം, വസ്ത്രാഭരണാദികൾ, മദ്യപാനം, ദുഷ്പ്രേരണകൾ, കവിത, സാഹിത്യം, സിനിമ, എന്നിവ ശുക്രനെ മുൻനിർത്തിയാണ് പരിഗണിക്കുക. ജീവിതത്തോട് ഏറ്റവും ഉരുമ്മിയും ഹൃദയത്തോട് ചേർന്നും നിൽക്കുന്ന ഗ്രഹമാണ് ശുക്രൻ. ശുഭഗ്രഹം എന്ന പരിഗണനയാണ് ജ്യോതിഷം ശുക്രന് നൽകിയിട്ടുള്ളത്.

ചിങ്ങം രാശിയിൽ സഞ്ചരിക്കുന്ന ശുക്രൻ വക്രഗതിയായി (Retrograde) 2023 ആഗസ്റ്റ് 7 ന്
(1198 കർക്കടകം 22 ന്) പകൽ 11:19 ന് കർക്കടകം രാശിയിലേക്ക് നിഷ്ക്രമിക്കുകയാണ്. ആഗസ്റ്റ് 8 (കർക്കടകം 23) മുതൽ ശുക്രന് മൗഢ്യം ((combustion) കൂടി സംഭവിക്കുകയാണ്. ഇത് അല്പകാലത്തേക്ക് മാത്രമാണ്. 2023 ആഗസ്റ്റ് 19 ന് /1199 ചിങ്ങം 3ന് മൗഢ്യം തീരുന്നു. എന്നാൽ വക്രം തീരുന്നതാകട്ടെ, 2023 സെപ്തംബർ 5 നാണ്. (അതായത് ചിങ്ങം 20നും). ആകയാൽ വക്രവും മൗഢ്യവും ഒരുമിച്ച് സംഭവിക്കുന്ന ആഗസ്റ്റ് 8 മുതൽ 19 വരെ ശുക്രൻ സഹജഗുണങ്ങൾ ഒന്നും നൽകില്ല. എന്നല്ല ദോഷപ്രദനാവുകയും ചെയ്യുന്നതാണ്.

2023 ആഗസ്റ്റ് 7 മുതൽ സെപ്തംബർ 5 വരെ മേടം മുതൽ മീനം വരെയുള്ള പന്ത്രണ്ടുരാശിക്കാർക്കും അശ്വതി മുതൽ രേവതി വരെയുള്ള 27 നാളുകാർക്കും ശുക്രൻ നൽകുന്ന ഫലങ്ങളാണ് ഇവിടെ അപഗ്രഥിക്കുന്നത്.

മേടക്കൂറിന് (അശ്വതി, ഭരണി, കാർത്തിക ഒന്നാം പാദം): വാക്സ്ഥാനം, പണം, കുടുംബം, വാക്ക്, പ്രണയം, ദാമ്പത്യം മുതലായ വിഷയങ്ങളുമായി ബന്ധപ്പെട്ട ഗ്രഹമാണ് മേടക്കൂറുകാർക്കു ശുക്രൻ. ഈ വിഷയങ്ങളിൽ കഷ്ടനഷ്ടങ്ങളോ പരാജയമോ സ്വസ്ഥതക്കുറവോ അസംതൃപ്തിയോ സംഭവിക്കാം. പ്രണയത്തിൽ താൽകാലിക വിരഹങ്ങൾ ഒരു സാധ്യതയാണ്. സുഹൃത്തുക്കൾ വിരോധികളാവാനിടയുണ്ട്. ഭാര്യാഭർത്താക്കന്മാർ തമ്മിലുള്ള ഹൃദയബന്ധം അല്പം മങ്ങാം. ശുക്രദശ, ശുക്രാപഹാരം എന്നിവയിലൂടെ കടന്നു പോകുന്നവർക്ക് ധനക്ലേശങ്ങൾ അധികരിച്ചേക്കും. പ്രമേഹം സംബന്ധിച്ച വൈദ്യപരിശോധനകൾ മുടക്കരുത്. മാതാവിന്റെ ആരോഗ്യകാര്യത്തിൽ ശ്രദ്ധ വേണം.

ഇടവക്കൂറിന് (കാർത്തിക 2,3,4 പാദങ്ങൾ, രോഹിണി, മകയിരം 1,2 പാദങ്ങൾ): ജന്മരാശിയുടെ, കൂറിന്റെ നാഥനാണ് ശുക്രൻ. രോഗം, ശത്രു, ചോരന്മാർ, കടബാധ്യത, കാര്യതടസ്സം എന്നിവയെ കാണിക്കുന്ന ആറാം ഭാവത്തിന്റെ (തുലാം) അധിപനുമാണ്. അതിനാൽ മൂന്നാം രാശിയായ കർക്കടകത്തിൽ മൗഢ്യം, വക്രസ്ഥിതി എന്നിവയിൽ സഞ്ചരിക്കുന്ന ശുക്രൻ കുറേ ക്ലേശങ്ങൾക്കും ആത്മഗ്ളാനിക്കും വഴിവെക്കും. ദുർവാസനകൾ / ദു:ശീലങ്ങൾ നിയന്ത്രിക്കാനാവില്ല. ജീവിതശൈലീരോഗങ്ങൾ ഉപദ്രവിച്ചേക്കാം. കടം വാങ്ങിയ തുക പറഞ്ഞ സമയത്ത് കൊടുക്കാൻ പറ്റാത്തതിന്റെ മനക്ലേശവും അധിക്ഷേപവും ഉണ്ടാവാം. തൊഴിലിൽ ലാഭം കുറയുവാനിടയുണ്ട്. ദാമ്പത്യത്തിൽ ഇണക്കം ചുരുങ്ങും. മറഞ്ഞിരിക്കുന്ന ശത്രുവിന്റെ പ്രവർത്തനങ്ങളിൽ വിഷമിക്കും. സഹായ വാഗ്ദാനങ്ങൾ നിറവേറ്റപ്പെടണം എന്നില്ല. മറ്റു ഗ്രഹങ്ങളുടെ ആനുകൂല്യം ഉണ്ടാകുന്ന പക്ഷം ദോഷം ലഘുകരിക്കപ്പെടുന്നതാണ്.

മിഥുനക്കൂറിന് (മകയിരം 3,4 പാദങ്ങൾ, തിരുവാതിര, പുണർതം 1,2,3 പാദങ്ങൾ): അഞ്ച്, പന്ത്രണ്ട് ഭാവങ്ങളുടെ അധിപനാണ് ശുക്രൻ. സന്താനം, ബുദ്ധിശക്തി, ചെലവ്, ദൂരയാത്രകൾ എന്നിവ ശുക്രനുമായി ബന്ധപ്പെട്ട വിഷയങ്ങളാകുന്നു. രണ്ടാം ഭാവമായ കർക്കടകത്തിൽ സഞ്ചരിക്കുന്നതിനാൽ ഗുണാനുഭവങ്ങൾ പ്രതീക്ഷിക്കാം. ഒപ്പം ചില നഷ്ടങ്ങളും. ഊഹക്കച്ചവടത്തിൽ പണനഷ്ടം വരാനിടയുണ്ട്. കൃത്യമായ ആസൂത്രണമില്ലാതെ നടത്തുന്ന യാത്രകൾ പലതരം ക്ലേശങ്ങൾക്കിട വരുത്താം. നിക്ഷേപങ്ങൾ ചെറിയ കാര്യങ്ങൾക്കായി പിൻവലിക്കാനുള്ള പ്രേരണ വരാം. അത്യാവശ്യമല്ലാത്ത വസ്തുക്കൾ വാങ്ങരുത്. ധൂർത്തും പാഴ്ച്ചെലവുകളും ഇക്കാലത്ത് ഒരു സാധ്യതയാണെന്ന കാര്യം ഓർമ്മിക്കണം. മക്കളുടെ പഠനം, കൂട്ടുകെട്ട്, അവരുടെ വാഹനയാത്ര എന്നിവയെ സംബന്ധിച്ച എപ്പോഴും നിരീക്ഷണം പുലർത്തുന്നത് നന്നായിരിക്കും. നവസംരംഭങ്ങൾ, വിവാഹം എന്നിവയ്ക്ക് ഇക്കാലം അനുകൂലമല്ല.

കർക്കടകക്കൂറിന് (പുണർതം നാലാം പാദം, പൂയം, ആയില്യം): ശുക്രൻ പതിനൊന്ന്, നാല് എന്നീ ഭാവങ്ങളുടെ അധിപനാകുന്നു. വരവ്, സൽകീർത്തി, ഭോഗസുഖം, അംഗീകാരം, സുഹൃത്തുക്കൾ, മാതൃസൗഖ്യം, വസ്തു, ബന്ധുക്കൾ, വാഹനം എന്നീ വിഷയങ്ങളെ ശുക്രൻ സൂചിപ്പിക്കുന്നു. ജന്മരാശിയിൽ ശുക്രൻ സഞ്ചരിക്കുകയാൽ നേട്ടങ്ങൾ കൂടും. സൗഹൃദം പുഷ്ടിപ്പെടാം. പലവഴികളിൽ നിന്നും ആദായം പെരുകും. പുതുവാഹനം വാങ്ങാനോ മോടിപിടിപ്പിക്കാനോ സാധ്യതയുണ്ട്. വീടിന്റെ ജീർണ്ണോദ്ധാരണം പൂർത്തിയാക്കും. ബന്ധുക്കളുടെ പിണക്കം തീരുന്നതാണ്. മനസ്സിന് സന്തോഷം തരുന്ന വസ്തുക്കൾ, വ്യക്തികൾ, വിനോദങ്ങൾ എന്നിവ അനുഭവത്തിൽ വരും. പുതിയ സാഹചര്യങ്ങളുമായി ഇണങ്ങും. ദാമ്പത്യം ശോഭനമാകുന്നതാണ്. കലാപരമായ സിദ്ധികൾ അംഗീകരിക്കപ്പെടാം. ജീവിതശൈലീ രോഗങ്ങൾ ക്ലേശിപ്പിച്ചെന്നുവരാം.

ചിങ്ങക്കൂറിന് (മകം, പൂരം, ഉത്രം ഒന്നാം പാദം): പത്താം ഭാവം,മൂന്നാം ഭാവം എന്നിവയുടെ അധിപനാണ് ശുക്രൻ. തൊഴിൽ, രാഷ്ട്രീയം, മത്സരം, സഹോദരർ, സഹായം, ധൈര്യം ഇവ ശുക്രനുമായി ബന്ധപ്പെടുന്ന വിഷയങ്ങളാണ്. ചിങ്ങക്കൂറിന്റെ വ്യയസ്ഥാനമായ പന്ത്രണ്ടാം ഭാവത്തിൽ ശുക്രൻ സഞ്ചരിക്കുകയാൽ തൊഴിൽ സംബന്ധിച്ച ക്ലേശങ്ങൾ, അധികാരികളുമായി തർക്കം, വ്യാപാരത്തിൽ നഷ്ടം എന്നിവ സാധ്യതകളാണ്. പൊതുപ്രവർത്തകർക്ക് പ്രതീക്ഷിച്ച പിന്തുണ കിട്ടിയേക്കില്ല. പണവരവ് അല്പം മന്ദീഭവിക്കാം. അനാവശ്യ ചെലവുകൾ വരാം. നിഷ്പ്രയോജനകരമായ യാത്രകൾക്ക് തുനിയും. വാഗ്ദാനങ്ങൾ വന്നുചേരാത്തത് ക്ലേശിപ്പിക്കാം.

രഹസ്യാവയവങ്ങളെ സംബന്ധിച്ച രോഗങ്ങൾ, വൃക്ക രോഗങ്ങൾ എന്നിവയുള്ളവർ കരുതൽ കൈക്കൊള്ളണം. മറ്റു ഗ്രഹങ്ങളുടെ ബലാബലം പോലെ ഗുണവും ദോഷവും കൂടുകയോ കുറയുകയോ ചെയ്യാം.

കന്നിക്കൂറിന് (ഉത്രം 2,3,4 പാദങ്ങൾ, അത്തം, ചിത്തിര 3,4 പാദങ്ങൾ): രണ്ട്, ഒമ്പത് ഭാവങ്ങളുടെ അധിപനാണ് ശുക്രൻ. പതിനൊന്നാം രാശിയിലാണ് ശുക്രൻ സഞ്ചരിക്കുന്നത്. ഇപ്പോൾ ഈ ശുക്രസ്ഥിതിയാൽ കൂടുതൽ ഗുണം കിട്ടുന്ന ഒരു രാശി കന്നിരാശിയാണെന്ന് പറയാം. ഭാഗ്യാധിപന് മൗഢ്യം വരികയാൽ ചില ഭാഗ്യഭ്രംശങ്ങൾ വന്നേക്കും. ചില പ്രധാന അവസരങ്ങൾ നഷ്ടമാകാനും ഇടയുണ്ട്. കുടുംബസൗഖ്യവും തെല്ല് കുറഞ്ഞേക്കാം. എന്നാലും നേട്ടങ്ങൾക്കാവും മുൻതൂക്കം. സാമ്പത്തിക ശോച്യതക്ക് പരിഹാരം കിട്ടാം. ക്രയവിക്രയത്തിലെ തടസ്സങ്ങൾ മാറുന്നതാണ്. സ്ത്രീകളുടെ സഹായം, പിന്തുണ എന്നിവ മാനസിക ബലവും വിജയ സാഹചര്യവും ഒരുക്കും. കലാകാരന്മാർ പുരസ്ക്കരിക്കപ്പെടും. ആഡംബരവസ്തുക്കൾ വാങ്ങാൻ സാധിക്കും. മനസ്സന്തോഷമേകുന്ന അനുഭവങ്ങളുണ്ടാവുന്നതാണ്. ഭോഗസുഖം പ്രതീക്ഷിക്കാം. പ്രണയം പുഷ്പിതമാകും. പരീക്ഷകളിൽ വിജയിക്കുവാനാവും. എന്നാൽ ജീവിത ശൈലീരോഗങ്ങളിൽ കരുതൽ വേണം.

തുലാക്കൂറിന് (ചിത്തിര 3,4 പാദങ്ങൾ, ചോതി, വിശാഖം 1,2,3): ജന്മരാശി, അഷ്ടമം എന്നീ ഭാവങ്ങളുടെ അധിപനാണ് ശുക്രൻ. പത്താം ഭാവത്തിൽ സഞ്ചരിക്കുന്നു. അല്പമൊരു ക്ഷീണാവസ്ഥയാണ് തുലാക്കൂറുകാർക്ക് വരിക. ആത്മവിശ്വാസം കുറയും. ചില ഭയപ്പാടുകൾ ഉണ്ടാവാം. ശത്രുഭയം കൂട്ടത്തിൽ പ്രധാനം. തൊഴിലിൽ നല്ല ശ്രദ്ധ ചെലുത്തണം. കരാറുകളും ഉടമ്പടികളും ഒപ്പിടുമ്പോൾ രണ്ടുവട്ടം ചിന്തിക്കണം. വ്യാപാരാവശ്യത്തിന് എടുത്ത വായ്പകൾ തിരിച്ചടക്കാൻ ക്ലേശിച്ചേക്കും. നവസംരംഭങ്ങൾക്ക് ഇക്കാലം ഉചിതമല്ല. നിലവിലെ തൊഴിൽ ഉപേക്ഷിച്ച് പുതിയ തൊഴിൽ തേടുന്നതും അബദ്ധമായേക്കും. പൊതുപ്രവർത്തകർ പദവികൾ നിലനിർത്താൻ വിഷമിക്കുന്നതാണ്. ആരോഗ്യപ്രശ്നങ്ങൾ ഉള്ളവർ കൂടുതൽ ശ്രദ്ധാലുക്കളാവണം. പ്രണയം, ദാമ്പത്യം ഇവയിൽ സംതൃപ്തി സാമാന്യം മാത്രമാവും.

വൃശ്ചികക്കൂറിന് (വിശാഖം നാലാം പാദം, അനിഴം, തൃക്കേട്ട): ഏഴും പന്ത്രണ്ടും ഭാവങ്ങളുടെ നാഥനാണ് ശുക്രൻ. ഭാഗ്യഭാവത്തിൽ സഞ്ചരിക്കുന്നു. ദാമ്പത്യജീവിതം ബാധിക്കപ്പെടാം. ഭാര്യാഭർത്താക്കന്മാർക്കിടയിലെ പാരസ്പര്യം കുറയാം. പ്രണയികൾ വഴിപിരിയലിന്റെ വക്കോളമെത്താം. വിട്ടുവീഴ്ചാ മനോഭാവം നഷ്ടപ്പെടുന്നതാണ്. മറ്റൊരു പ്രശ്നം, അനാവശ്യമായ ആഢംബരച്ചെലവുകൾ വരാം എന്നുള്ളതത്രെ! കുടുംബ കാര്യങ്ങൾക്ക് കരുതിയ ധനം മറ്റു വിഷയങ്ങൾക്ക് ചെലവഴിച്ചേക്കാം. പിതാവിന്റെ ആരോഗ്യകാര്യത്തിൽ ശ്രദ്ധ വേണം. കഫരോഗങ്ങൾ പിടിപെടാനിടയുണ്ട്. ഉപാസനാദികൾക്ക് ഭംഗം വരാം. തീർത്ഥാടന പരിപാടി നടന്നില്ലെന്ന് വന്നേക്കാം. വാഗ്ദാനം ചെയ്ത ജീവകാരുണ്യ പ്രവർത്തനങ്ങൾ നടക്കാത്തതു മനോവിഷമത്തിന് വഴിവെക്കാനിടയുണ്ട്.

ധനുക്കൂറിന് (മൂലം, പൂരാടം, ഉത്രാടം ഒന്നാം പാദം): ആറും പതിനൊന്നും ഭാവങ്ങളുടെ അധിപനാണ് ശുക്രൻ. അവ അനിഷ്ടഭാവങ്ങളാണ്. ശുക്രൻ സഞ്ചരിക്കുന്നതാകട്ടെ മറ്റൊരു അനിഷ്ടഭാവമായ എട്ടാം ഇടത്തിലും. ആ സാഹചര്യം ദോഷത്തെ കുറക്കും. ശത്രുക്കളുടെ ഉപദ്രവം ഉണ്ടായാലും അതിനെ മറികടക്കാനാവും. കടം വാങ്ങേണ്ടിവന്നേക്കും. എന്നാൽ മറ്റുചില വഴികളിലൂടെ പണം വന്നെത്തും. രോഗികൾ വിഷമിക്കാം. എന്നാൽ തുടർചികിത്സക്ക് സന്ദർഭം ഉണ്ടാവുന്നതാണ്. വിദ്യാർത്ഥികൾ പഠനത്തിൽ പിന്നിലായേക്കും. ഉദ്ദേശിച്ച വിജയം നേടാൻ കഠിനാധ്വാനം ആവശ്യമായി വരുന്നതാണ്. നിയമനം പ്രതീക്ഷിക്കുന്നവർക്ക് അല്പം കൂടി കാത്തിരിപ്പ് കൂടിയേ കഴിയൂ. വരവുണ്ടാവുമെങ്കിലും അതിനെ നല്ലകാര്യങ്ങൾക്കായിട്ടാണ് ചിലവഴിക്കുന്നതെന്ന് ഉറപ്പിച്ച് പറയാനാവില്ല. ആത്മസംയമനം, സ്ഥിരോത്സാഹം, ആരോഗ്യപരിരക്ഷ, മിതവ്യയം എന്നിവ അനിവാര്യമായ കാലമാണിത്.

മകരക്കൂറിന് (ഉത്രാടം2,3,4 പാദങ്ങൾ, തിരുവോണം, അവിട്ടം 1,2 പാദങ്ങൾ): പഞ്ചമദശമ ഭാവങ്ങളുടെ അധിപനാണ് ശുക്രൻ. സപ്തമഭാവമായ കർക്കടകത്തിൽ സഞ്ചരിക്കുന്നു. വിജയപ്രതീക്ഷ ഭാഗികമായി നിറവേറും. ബിസിനസ്സ് ചർച്ചകളിൽ നേട്ടങ്ങളുണ്ടാവുന്നതാണ്. തൊഴിൽ തേടുന്നവർക്ക് പുതിയ അവസരങ്ങൾ തുറന്നുകിട്ടാം. എന്നാൽ വലിയ മുതൽമുടക്കിന് ഇപ്പോൾ സമയം അനുകൂലമല്ല. പ്രണയത്തിൽ കയ്പുരസം നിറഞ്ഞേക്കാം. പരസ്പരവിശ്വാസം നഷ്ടമാകുന്നതായി തോന്നും. ദാമ്പത്യത്തിലും സ്ഥിതി വ്യത്യസ്തമാവണമെന്നില്ല. അനാവശ്യമായ കുറ്റപ്പെടുത്തലുകൾ പരസ്പരം ഉണ്ടായേക്കും. ഉദ്യോഗസ്ഥർക്ക് പതിവ് സമയം കഴിഞ്ഞാലും ജോലി പൂർത്തിയാക്കാൻ സാധിച്ചേക്കില്ല. വിദേശത്തുപോകാൻ കാത്തിരിക്കുന്നവർക്ക് തടസ്സങ്ങൾ ഉടലെടുത്തേക്കും. ആദായം കുറയില്ലെങ്കിലും അത്യാവശ്യങ്ങൾക്ക് മാത്രം ചെലവാക്കുന്നതിൽ കരുതൽ വേണം. കഫജന്യരോഗങ്ങൾ, പകർച്ചവ്യാധികൾ ഇവ സാധ്യതയാണ്.

കുംഭക്കൂറിന് (അവിട്ടം 3,4 പാദങ്ങൾ, ചതയം, പൂരുരുട്ടാതി 1,2,3 പദങ്ങൾ): കുംഭക്കൂറുകാർക്ക് നാലും ഒമ്പതും ഭാവങ്ങളുടെ അധിപതിയാണ് ശുക്രൻ. ഭാഗ്യാധിപതിയും യോഗകാരകനും ആകയാൽ ശുക്രന്റെ മൗഢ്യം / വക്രം എന്നിവ ദോഷപ്രദമാണ്. കഴിവുകൾ തമസ്കരിക്കപ്പെടാം. സ്വന്തം കഴിച്ചകൾക്കുള്ള അംഗീകാരം മറ്റുള്ളവർ അപഹരിച്ചെന്നും വരാം. ആറാം ഭാവമായ കർക്കടകത്തിൽ ശുക്രൻ സഞ്ചരിക്കുകയാൽ ഋണബാദ്ധ്യത ക്ലേശിപ്പിക്കും. കഫ - ജല ജന്യരോഗങ്ങൾ വിഷമിപ്പിക്കാം. ആരോഗ്യത്തിൽ വേണ്ടത്ര ശ്രദ്ധിക്കാൻ കഴിയാത്തവിധം മറ്റു പ്രശ്നങ്ങളും വരാം. യഥാർത്ഥ ശത്രുവിനെ തിരിച്ചറിയാൻ പറ്റാത്ത സ്ഥിതിയുണ്ടാവും. തൊഴിലിൽ നിന്നും നിത്യവൃത്തിക്കാവശ്യമായ വരുമാനം മാത്രം ലഭിക്കുന്നതാണ്. ഗൃഹത്തിൽ അറ്റകുറ്റപ്പണികൾക്ക് കൂടുതൽ ചെലവുണ്ടാകും. ബന്ധു, ശത്രുവാണോ എന്ന് സംശയിച്ചേക്കും. രണ്ടാം ഭാവത്തിന്റെ ഉച്ചാധിപൻ കൂടിയാണ് ശുക്രൻ എന്നതിനാൽ പഠനത്തെയും ശുക്രൻ കുറച്ചൊന്ന് ദുർബലപ്പെടുത്തിയേക്കാം.

മീനക്കൂറിന് (പൂരുരുട്ടാതി നാലാംപാദം, ഉത്രട്ടാതി, രേവതി): മൂന്ന്, എട്ട് എന്നീ ദു:സ്ഥാനങ്ങളുടെ ആധിപത്യമാണ് ശുക്രന്. പഞ്ചമഭാവത്തിൽ സഞ്ചരിക്കുകയും ആണ്. അതിനാൽ തീരുമാനങ്ങൾ കൈക്കൊള്ളുമ്പോൾ എല്ലാവശങ്ങളും പരിഗണിക്കണം. വിവേകത്തെ അവിവേകം പുറന്തള്ളുന്ന സ്ഥിതിവരാം. നേട്ടങ്ങൾക്കായി കുറുക്കുവഴികൾ തേടും. ദുശ്ശീലങ്ങളുടെ പിടിയിൽ നിന്നും മോചനം നേടാനുള്ള ശ്രമം വിജയിക്കണമെന്നില്ല. മക്കളുടെ കാര്യത്തിൽ കൂടുതൽ ശ്രദ്ധ വേണം. ഉപരിപഠനം, ഗവേഷണം എന്നിവയിൽ തടസ്സങ്ങൾ അനുഭവപ്പെട്ടേക്കാം. അവർക്ക് ആവശ്യമായ മാനസിക പിന്തുണ നൽകാൻ മടിക്കരുത്. ഉദരരോഗങ്ങൾ, രഹസ്യാവയവ രോഗങ്ങൾ എന്നിവ ചില സാധ്യതകളാണ്. പ്രണയം, ദാമ്പത്യം, ധനകാര്യം എന്നിവയിലും ചില മനക്ലേശങ്ങൾ വന്നേക്കാം. ക്ഷമയും വിവേകവും വഴികാട്ടികളായേക്കും.