Monthly Horoscope September 2023: സെപ്റ്റംബർ മാസത്തെ നക്ഷത്രഫലം, സമ്പൂർണം

September Month 2023 Astrological Predictions for stars Aswathy to Revathy 2023: 2023 സെപ്തംബർ മാസത്തിലെ സമ്പൂർണ്ണ നക്ഷത്രഫലം. സൂര്യൻ ചിങ്ങം- കന്നി രാശികളിലായി സഞ്ചരിക്കുന്നു. പൂരം, ഉത്രം, അത്തം എന്നീ ഞാറ്റുവേലകൾ കടന്നുവരുന്നു. ചന്ദ്രൻ സെപ്തംബർ ഒന്നാം തീയതി കൃഷ്ണപക്ഷ ദ്വീതയയിൽ പൂരുരുട്ടാതി നക്ഷത്രത്തിലാണ്. സെപ്തംബർ 30 ന് ഒരു വട്ടം ഭ്രമണം പൂർത്തിയാക്കി കൃഷ്ണപക്ഷ പ്രഥമയിലും രേവതി നക്ഷത്രത്തിലുമാണ്.

1139 ചിങ്ങം 16 ന് സെപ്തംബർ ഒന്നാം തീയതി വരുന്നു. സെപ്തംബർ 18 ന് കന്നിമാസം തുടങ്ങുകയാണ്. ചിങ്ങം 32 തീയതികളുണ്ട്, ഈ വർഷം. 1139 ൽ 32 തീയതികൾ വരുന്ന രണ്ടുമാസങ്ങൾ ചിങ്ങവും കർക്കടകവുമത്രെ! സെപ്തംബർ 30 എന്നത് കന്നിമാസം 13-ാം തീയതിയത്രെ! ശനി വക്രഗതിയിൽ ചതയത്തിന്റെ ഒന്നാം പാദത്തിൽ സഞ്ചരിക്കുകയാണ്, സെപ്തംബർ മുഴുവൻ. സെപ്തംബർ ആദ്യവാരം മുതൽ വ്യാഴത്തിനും വക്രം സംഭവിക്കുന്നുണ്ട്. സെപ്തംബർ 7 മുതൽ അടുത്ത വർഷം ജനുവരി 2 വരെ നീളുന്നതാണ് വ്യാഴത്തിന്റെ വക്ര സഞ്ചാരം.

ഭരണി മൂന്നാം പാദത്തിലാണ് ഈ മാസം മുഴുവൻ വ്യാഴത്തിന്റെ വക്രഗതി. രാഹു മേടംരാശിയിൽ അപസവ്യഗതിയായി അശ്വതി ഒന്നാം പാദത്തിലും, കേതു തുലാംരാശിയിൽ ചിത്തിര മൂന്നാം പാദത്തിലും തുടരുന്നു. ചൊവ്വ ചിങ്ങം രാശിയിലാണ്. സെപ്തംബർ 4 മുതൽ 24 വരെ അത്തം നക്ഷത്രത്തിലാണ്. ബുധന് സെപ്തംബർ15 വരെ വക്രമൗഢ്യവും പിന്നീട് ക്രമമൗഢ്യവുമുണ്ട്. ബുധൻ ഈ മാസം മുഴുവൻ ചിങ്ങം രാശിയിലാണ്.

ശുക്രൻ ഈ മാസം കർക്കടകം രാശിയിൽ തുടരുന്നു. ആദ്യ ആഴ്ച മുതൽ ക്രമസഞ്ചാരത്തിൽ, ആയില്യം നക്ഷത്രത്തിലുമാണ്. ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ ആയില്യം വരെയുള്ള നക്ഷത്രങ്ങളിൽ ജനിച്ചവരുടെ 2023 സെപ്റ്റംബർ മാസത്തെ നക്ഷത്രഫലം ഇവിടെ അപഗ്രഥിക്കുകയാണ്. ഗുണദോഷങ്ങൾ എങ്ങനെ അനുഭവത്തിലെത്തുന്നു എന്നത് പരിശോധിക്കപ്പെടുന്നു.

അശ്വതി

ജന്മരാശ്യധിപനായ ചൊവ്വ ആറാം ഭാവത്തിൽ നിൽക്കുകയാൽ അധൃഷ്യത തുടരും. എതിർപക്ഷത്തെ നിഷ്പ്രഭമാക്കാൻ സാധിച്ചേക്കും. കർമ്മരംഗത്തെ rഉന്മേഷം നീണ്ടുനിൽക്കുന്നതായിരിക്കും. അധ്വാനത്തിന് ഉയർന്ന പ്രതിഫലം ലഭിക്കാം. പഠനത്തിൽ ഏകാഗ്രത നഷ്ടമാകാനിടയുണ്ട്. എന്നാൽ കായികകലാ മത്സരങ്ങളിൽ പങ്കെടുക്കുവാനും വിജയിക്കുവാനും സാധിക്കുന്നതാണ്. വീട്ടിൽ ആഢംബര വസ്തുക്കൾ വാങ്ങാനും അവയുടെ ഗുണപരതയിൽ സന്തോഷിക്കാനും സന്ദർഭമുണ്ടാകും. ബന്ധുജനങ്ങളുമായി ഐക്യപ്പെടാനാവും.

ഭരണി

ജന്മരാശിയിൽ, ജന്മനക്ഷത്രത്തിൽ വ്യാഴം വക്രസഞ്ചാരം തുടങ്ങുകയാൽ പ്രതീക്ഷകൾ മുഴുവൻ പൂവണിയും എന്ന് പറയാനാവില്ല. നേട്ടങ്ങൾക്ക് തിളക്കം കുറയാം. അനുകൂല സാഹചര്യങ്ങൾ മുഴുവനായി പ്രയോജനപ്പെടുത്താൻ കഴിഞ്ഞേക്കില്ല. വ്യവഹാരങ്ങളിൽ വിജയിക്കുമെങ്കിലും ചില നഷ്ടങ്ങളും കൂടി സംഭവിക്കാം. ദൈവസമർപ്പണങ്ങൾക്ക് തടസ്സം വന്നേക്കാം. ഗവേഷകർക്ക് പ്രബന്ധത്തിൽ തിരുത്തലുകൾ നടത്തി വീണ്ടും സമർപ്പിക്കേണ്ട സ്ഥിതിയുണ്ടാവുന്നതാണ്. കുടുംബ ജീവിതത്തിൽ സമാധാനം ഭാഗികമായിരിക്കും. മാസത്തിന്റെ രണ്ടാം പകുതിക്ക് മെച്ചമേറും.

കാർത്തിക

ഉത്സാഹശക്തി തെല്ല് മന്ദീഭവിച്ചേക്കാം. കഴിഞ്ഞ കാര്യങ്ങളോർത്ത് വിഷാദിക്കും. ബുധന് വക്രമൗഢ്യാദികൾ തുടരുന്നതിനാൽ പഠനം, പരീക്ഷ, ഗവേഷണം എന്നിവയിൽ താല്പര്യം കുറയാം. നിർബന്ധി ബുദ്ധിയും ശാഠ്യവും കൂടിയേക്കും. മക്കളുടെ കാര്യത്തിൽ പുലർത്തിയിരുന്ന ചില പ്രതീക്ഷകൾ സഫലമാകണം എന്നില്ല. സാമ്പത്തികമായി മെച്ചപ്പെടാം. മാസത്തിന്റെ ആദ്യ പകുതിയിൽ ചെലവുകൾ നിയന്ത്രിക്കുന്നത് ഉത്തമം. രഹസ്യ ശത്രുക്കളുടെ പ്രവർത്തനം വിഷമങ്ങൾ സൃഷ്ടിക്കാം. ഗുണദോഷസമ്മിശ്രമായ മാസമാണ്.

രോഹിണി

പ്രധാനകാര്യങ്ങളുടെ നിർവഹണത്തിന് സമയം നന്നായി വിനിയോഗിക്കും. ബന്ധുജനങ്ങളുടെയും സ്ത്രീസുഹൃത്തുക്കളുടെയും നിർലോഭമായ പിന്തുണ ലഭിക്കുന്നതാണ്. ഗൃഹനിർമ്മാണം, നവീകരണം ഇവയ്ക്ക് പണം കണ്ടെത്തുന്ന കാര്യത്തിൽ അധിക ക്ലേശമുണ്ടായേക്കാം. മക്കളുമായി ചില അഭിപ്രായ വ്യത്യാസങ്ങൾ വരാം. ഭക്ഷണത്തിന്റെ സമയവ്യത്യാസം ചില ആരോഗ്യപ്രശ്നങ്ങൾ ഉണ്ടാക്കിയേക്കും. വ്യാപാരത്തിൽ നിന്നും വലിയ ആദായം പ്രതീക്ഷിക്കേണ്ടതില്ല. ദാമ്പത്യത്തിലെ അസംതൃപ്തികൾ ഗൃഹാന്തരീക്ഷത്തിൽ ഇടക്കിടെ തലപൊക്കും.

മകയിരം

മിഥുനക്കൂറുകാർക്ക് മാസത്തിന്റെ ആദ്യപകുതി നേട്ടങ്ങൾക്ക് കാരണമാകാം. ഇടവക്കൂറുകാർക്ക് മാസത്തിന്റെ രണ്ടാം പകുതിയാവും മെച്ചം. ധനപരമായ ആവശ്യങ്ങൾ ഉയർന്നേക്കും. സ്വർണ്ണപ്പണയം പോലുള്ള കാര്യങ്ങളെ ആശ്രയിക്കേണ്ട സ്ഥിതി വരാം. പൂർവ്വികസ്വത്തിന്റെ അവകാശത്തിൽ സഹോദരരുമായി തർക്കം ഉടലെടുക്കാം. വ്യാപാരവിപുലീകരണത്തിനായി വിദഗ്ദ്ധരുടെ അഭിപ്രായം തേടും. പ്രണയത്തിൽ തടസ്സങ്ങൾ ഉണ്ടാവുന്നതാണ്. ഗാർഹികജീവിതത്തിൽ സ്നേഹവും ദ്വേഷവും മാറി മാറി കടന്നുവന്നേക്കും.

തിരുവാതിര

മാസത്തിന്റെ ആദ്യ പകുതിക്ക് മെച്ചമേറും. വ്യാപാരം അഭിവൃദ്ധിപ്പെടുന്നതാണ്. ഉദ്യോഗസ്ഥർക്ക് പുതിയ ചുമതലകൾ ലഭിച്ചേക്കാം. വിദ്യാർത്ഥികൾക്ക് മത്സരബുദ്ധിയോടെ പഠിക്കാൻ സാധിക്കുന്നതാണ്. വാക് സ്ഥാനത്ത് ശുക്രൻ സ്ഥിതിചെയ്യുകയാൽ മധുരമായി സംസാരിക്കാൻ കഴിയും. കലാവാസനകൾ പ്രകടിപ്പിക്കാനുമായേക്കും. നാലിലെ ചൊവ്വയുടെ സ്ഥിതി കുടുംബ ജീവിതത്തിൽ ചില പ്രശ്നങ്ങൾ സൃഷ്ടിക്കാം. അമ്മയുടെ ആരോഗ്യത്തിൽ ശ്രദ്ധ വേണം. വാഹനയാത്രയിൽ ജാഗ്രത കുറയ്ക്കരുത്.

പുണർതം

സ്വന്തം കഴിവുകളെക്കുറിച്ച് സ്വയം ബോധ്യമുണ്ടാവും. ഒപ്പം മറ്റുള്ളവരുടെ അഭിനന്ദനത്തിനും ആ കഴിവുകൾ പാത്രമാകും. തൊഴിലിൽ വിജയിക്കാൻ അനുകൂലമായ സാഹചര്യം ഉടലെടുക്കും. നൂതന സംരംഭങ്ങളുമായി മുന്നോട്ടിറങ്ങും. ധനസ്ഥിതി മോശമാവില്ല. സർക്കാരിൽ നിന്നും പ്രതീക്ഷിച്ച അനുമതി ലഭിക്കുന്നതാണ്. ചെറുപ്പക്കാരുടെ വിവാഹകാര്യത്തിൽ തീരുമാനമുണ്ടാകാം. വീടുപണിയിൽ അല്പം തടസ്സങ്ങൾ വരാം. കുടുംബത്തിലെ വയോജനങ്ങളുടെ ആരോഗ്യത്തിൽ ശ്രദ്ധ വേണം. സാഹസങ്ങൾ ഒഴിവാക്കേണ്ടതുണ്ട്.

പൂയം

സുഖഭോഗങ്ങൾ ഉണ്ടാവും. ഭൗതികമായി വിജയിച്ചതായി തോന്നും. പ്രണയികളുടെ ഹൃദയബന്ധം ദൃഢമായേക്കും. പ്രവർത്തനങ്ങൾക്ക് ഉന്നതരുടെ പിന്തുണ ലഭിക്കുന്നതാണ്. പരീക്ഷകളിലും മത്സരങ്ങളിലും തിളക്കമുള്ള വിജയം നേടാനാവും. മക്കൾക്ക് ശ്രേയസ്സുണ്ടാവുന്നതാണ്.

ധനവരവ് തൃപ്തികരമായിരിക്കും. എന്നാലും ചെലവിൽ നിയന്ത്രണം അനിവാര്യം. അന്യദേശത്ത് തൊഴിൽ പ്രതീക്ഷിക്കുന്നവർക്ക് അധികം വൈകാതെ ശുഭവാർത്തയെത്തും. നിലവിലെ തൊഴിൽ ഉപേക്ഷിച്ച് പുതിയ തൊഴിൽ തേടുന്നത് ആശാസ്യമാവില്ല.

ആയില്യം

അംഗീകാരങ്ങൾ തേടിയെത്തും. പ്രവർത്തനമികവ് അഭിനന്ദിക്കപ്പെടാം. കലാകാരന്മാരുടെ സർഗ്ഗവൈഭവം ഉയരുന്നതാണ്. ഭോഗസുഖം ഭവിക്കും. സഹോദരരുടെ പിന്തുണ കുടുംബപ്രശ്നങ്ങൾ പരിഹരിക്കാൻ സഹായകമായേക്കും. വസ്തുതർക്കങ്ങളിൽ സ്വന്തം നിലപാടുകൾ ശരിയാണെന്ന് വിധിക്കപ്പെടാം. വിരുന്നുകളിലും വിവാഹാദി കർമ്മങ്ങളിലും പങ്കെടുക്കാൻ സന്ദർഭമുണ്ടാകുന്നതാണ്. കരാർ പണികൾ പുതുക്കിക്കിട്ടാം. മാസത്തിന്റെ രണ്ടാം പകുതിയിൽ വലിയ നേട്ടങ്ങൾ സ്വന്തമാക്കിയേക്കും.

മകം

ജന്മരാശിയിൽ ആദിത്യബുധന്മാർ സഞ്ചരിക്കുന്നതിനാൽ കാര്യനേട്ടം എളുപ്പമാവില്ല. ശാരീരിക ക്ഷീണമുണ്ടാവുന്നതാണ്. കരുതിവെച്ചിരുന്ന ധനം അത്യാവശ്യമല്ലാത്ത കാര്യങ്ങൾക്കായി ചെലവഴിക്കേണ്ടി വരാം. അതോടൊപ്പം മനസ്സു കവർന്ന വസ്തുക്കൾ വാങ്ങാനും ചെലവുണ്ടായേക്കും. പരുഷമായി സംസാരിക്കേണ്ട സ്ഥിതി വന്നെത്താം. യാത്ര, അതധികവും അലച്ചിൽ ആയി മാറാം. തൊഴിൽ തേടുന്നവർക്ക് ചെറിയ വരുമാനമാർഗം തുറന്നുകിട്ടുന്നതാണ്. മക്കളുടെ വിവാഹകാര്യത്തിൽ തീരുമാനം നീളാം.

പൂരം

നക്ഷത്രാധിപൻ ശുക്രൻ പന്ത്രണ്ടാം ഭാവത്തിലാകയാൽ ചെറുതും വലുതും ആയ യാത്രകൾ ഉണ്ടാവും. ഉദ്യോഗസ്ഥർക്ക് പ്രതീക്ഷിച്ച സ്ഥാനക്കയറ്റം വൈകിയേക്കും. ഏജൻസി / ഫ്രാഞ്ചൈസി എന്നിവ നടത്തുന്നവർക്ക് ചെറിയ ലാഭം പ്രതീക്ഷിക്കാം. നല്ല കാര്യങ്ങൾക്കായി ധനം ചെലവഴിക്കും. വിദ്യാർത്ഥികൾക്ക് പഠനത്തിൽ മനസ്സുചെലുത്താൻ കഴിഞ്ഞേക്കില്ല. വ്യവഹാരങ്ങൾക്ക് മുതിരരുത്. പ്രണയികൾക്ക് ദുർഘടങ്ങളുണ്ടാവാം. ഗാർഹികാന്തരീക്ഷത്തിൽ പിണക്കവും ഇണക്കവും ആവർത്തിച്ചേക്കാം.

ഉത്രം

തൊഴിൽപരമായും ഗാർഹികമായും സമാധാനം തെല്ല് കുറയുന്ന കാലമാണ്. ആദിത്യൻ, ചൊവ്വ എന്നീ ഗ്രഹങ്ങളുടെ ജന്മനക്ഷത്രസഞ്ചാരം അപ്രിയങ്ങളെ അഭിമുഖീകരിപ്പിക്കും. ആരോഗ്യപ്രശ്നങ്ങളുണ്ടാവാനിടയുണ്ട്. പതിവ് പരിശോധനകൾ മാറ്റിവെക്കരുത്. സാമ്പത്തിക സ്ഥിതി മോശമാവില്ല. ചിട്ടി, വായ്പ മുതലായവ പ്രയോജനപ്പെടുത്തും. പുതിയ കരാറുകൾ നേടുന്നതാണ്. ഉപരിപഠനത്തിൽ തടസ്സങ്ങൾ ഉണ്ടാവാം. അനാവശ്യമായ തിടുക്കം ഒഴിവാക്കുന്നത് ഉത്തമം. ചിന്തിച്ച ശേഷം തീരുമാനങ്ങൾ കൈക്കൊള്ളുക അഭികാമ്യം.

അത്തം

സാമ്പത്തികമായ ഭദ്രത കുറയാം. അതിനാൽ നിക്ഷേപം, നവസംരംഭങ്ങൾ തുടങ്ങുക ഇത്യാദികളിൽ നല്ല ജാഗ്രത വേണം. പഠനം, ഗവേഷണം എന്നിവയിൽ ഉത്സാഹക്കുറവ് അനുഭവപ്പെടാം. പുതിയ സൗഹൃദങ്ങൾ ഉണ്ടായേക്കും. പ്രണയകാര്യത്തിൽ മുന്നേറുന്നതാണ്. ചില സഹായ വാഗ്ദാനങ്ങളിൽ വലിയ പ്രതീക്ഷയർപ്പിക്കും. ഭോഗസുഖം ഭവിക്കുന്നതാണ്. കലാകാരന്മാരുടെ സൃഷ്ട്യുന്മുഖത വർദ്ധിക്കും. ആരോഗ്യപരമായി ജാഗ്രത വേണ്ടതുണ്ട്.

ചിത്തിര

ചെറിയ ചെറിയ കാര്യങ്ങൾ ധാരാളം ചെയ്യേണ്ടിവരും. വിശ്വസിച്ച് ഏല്പിച്ച ദൗത്യങ്ങൾ ക്ലേശിച്ചിട്ടായാലും പൂർത്തീകരിക്കും. കുടുംബാംഗങ്ങളുടെ ഐക്യം നിലനിർത്തുന്നതിൽ വലിയ പങ്കുവഹിക്കുന്നതാണ്. ഔദ്യോഗികജീവിതത്തിൽ നേട്ടങ്ങൾ പ്രതീക്ഷിച്ചത്ര ഉണ്ടാവണമെന്നില്ല. നിക്ഷേപാദികൾക്ക് അനുകൂലമായ കാലമല്ല. മക്കളുടെ പഠനം, വിവാഹം ഇത്യാദികൾക്കായി യാത്രകൾ വേണ്ടിവരും. ന്യായമായ ആവശ്യങ്ങൾക്കുള്ള ധനം വന്നുചേരുന്നതാണ്. ആരോഗ്യപരിരക്ഷയിൽ അലംഭാവമരുത്.

ചോതി

സർക്കാർ അനുമതി പ്രതീക്ഷിക്കുന്നവർക്ക് അവ ലഭിക്കും. ഉദ്യോഗസ്ഥർക്ക് പദവികളിൽ ഉയർച്ച പ്രതീക്ഷിക്കാം. മത്സരങ്ങളിൽ വിജയിക്കാൻ കഴിഞ്ഞേക്കും. പഠനത്തിൽ മുന്നേറ്റമുണ്ടാവും. സ്വയം തൊഴിൽ ചെയ്യുന്നവർക്ക് ലാഭം കൂടും. തൊഴിൽ നവീകരണം പ്രതീക്ഷിച്ച ഫലം നൽകുന്നതാണ്. ദാമ്പത്യത്തിൽ ക്ലേശങ്ങളുണ്ടാവാം. ഭാര്യാഭർത്താക്കന്മാർ പരസ്പരം തർക്കിച്ചേക്കും. പ്രണയികൾ തമ്മിൽ പിണങ്ങും. യാത്രകൾക്ക് അനുകൂലമായ കാലമല്ല. യാത്രയിൽ വസ്തുക്കൾ കളവ് പോകാനിടയുണ്ട്.

വിശാഖം

വ്യാപാരം / വ്യവസായം അഭിവൃദ്ധിപ്പെടും. തൊഴിൽ ചെറുതായാലും വലുതായാലും, പദവികൾ ഏതായാലും കർമ്മരംഗത്ത് മികവുണ്ടാകും. പൊതുവേ ചിന്തയ്ക്ക് തെളിച്ചമുണ്ടാവുന്നതാണ്. അതിനാൽ പ്രവർത്തനങ്ങൾക്ക് ദിശാബോധം വന്നെത്തും. പഠിക്കാനുള്ള അവസരങ്ങൾ പരമാവധി പ്രയോജനപ്പെടുത്തും. കുടുംബകാര്യങ്ങൾക്കായി യാത്രകൾ വേണ്ടിവരുന്നതാണ്. ദാമ്പത്യത്തിൽ നീരസങ്ങൾ ഉയരാം. കടം വാങ്ങാനുള്ള പ്രവണതയെ നിയന്ത്രിക്കേണ്ടതുണ്ട്.

അനിഴം

ഒമ്പതിലെ ശുക്രനും പത്തിലെ സൂര്യബുധന്മാരും പതിനൊന്നിലെ ചൊവ്വയും അനുകൂല ഫലങ്ങളേകും. ന്യായമായ ആവശ്യങ്ങൾ മിക്കതും വലിയ തടസ്സങ്ങൾ കൂടാതെ നേടാനാവും. പരീക്ഷകളിൽ തിളക്കമാർന്ന വിജയമുണ്ടാകും. തൊഴിൽ പ്രതീക്ഷിക്കുന്നവർക്ക് നല്ല അവസരങ്ങൾ തേടിവരുന്നതാണ്. ധാർമ്മിക കാര്യങ്ങളും ദൈവസമർപ്പണങ്ങളും നിർവഹിക്കാനാവും. കുടുംബാംഗങ്ങൾക്കൊപ്പം ഉല്ലാസ യാത്രകൾ, സന്തോഷ സന്ദർഭങ്ങൾ എന്നിവയും ഭവിക്കാം. മാസത്തിന്റെ രണ്ടാം പകുതിയിൽ കുറച്ചുകൂടി മെച്ചപ്പെട്ട ഫലങ്ങൾ പ്രതീക്ഷിക്കാം.

തൃക്കേട്ട

ഗ്രഹങ്ങളുടെ ആനുകൂല്യം ജീവിതത്തിൽ ഗുണകരമായ മാറ്റങ്ങൾ സൃഷ്ടിക്കും. സാമ്പത്തിക ക്ലേശങ്ങൾക്ക് അയവ് വരുന്നതാണ്. വിജയിക്കുവാനുള്ള ത്വര എല്ലാക്കാര്യങ്ങളിലും നിലനിർത്തുന്നതാണ്. സുഖഭോഗങ്ങൾ വേണ്ടുവോളമുണ്ടാവും. സംഘടനാ രംഗത്ത് പ്രവർത്തിക്കുന്നവർക്ക് പദവികൾ കൈവരുന്നതാണ്. കുടുംബത്തിലെ പ്രശ്നങ്ങൾ രമ്യമായി പരിഹരിക്കാനാവും. തൊഴിലിടത്തിൽ പുതിയ കാര്യങ്ങൾ നടപ്പിലാക്കാൻ ആത്മാർത്ഥമായി ശ്രമിക്കുന്നതാണ്.

മൂലം

പ്രവർത്തനരംഗം മന്ദീഭവിച്ചേക്കും. കച്ചവടത്തിൽ മുതൽമുടക്കിയത് തിരിച്ചുകിട്ടാൻ കാലതാമസമുണ്ടാവാം. പണവരവ് കുറയുന്നതാണ്. ചിലവുകളിൽ നിയന്ത്രണം വേണ്ടതുണ്ട്. ഭാഗ്യം കൊണ്ടു മാത്രം ആപത്തുകളെ അതിജീവിക്കും. രാഷ്ട്രീയ പ്രവർത്തനത്തിൽ എതിർപ്പുകൾ കൂടുന്നതാണ്. മാതാപിതാക്കളുടെ ആരോഗ്യസ്ഥിതിയിൽ ശ്രദ്ധ വേണം. കുടുംബജീവിതത്തിലെ താളപ്പിഴകൾ പരിഹരിക്കാനാവും.

പൂരാടം

നല്ല കാര്യങ്ങൾക്ക് സമയം കണ്ടെത്താനാവും. അവയിൽ സക്രിയമായ ഇടപെടലുകൾ നടത്തും. സാമ്പത്തികമായി അല്പം ഞെരുക്കമുളള സമയമാണ്. ആഢംബരത്തിന് നിയന്ത്രണം വേണം. പഠനത്തിൽ ശ്രദ്ധ കേന്ദ്രീകരിക്കാൻ വിദ്യാർത്ഥികൾ വിഷമിക്കും. കലാപ്രവർത്തനത്തിന് പുതിയ ഊർജ്ജം കൈവരിക്കാനാവും. കുടുംബസംഗമത്തിൽ, സുഹൃൽസദസ്സുകളിൽ സജീവമായി പങ്കെടുക്കും. തൊഴിൽ പരിഷ്കാരങ്ങൾക്ക് കാലം അനുകൂലമല്ല. യുവാക്കളുടെ വിവാഹ കാര്യത്തിന് വിളംബം വരാം. പുതിയ ജോലിക്ക് ശ്രമിക്കുന്നവർ അല്പകാലം കൂടി പരിശ്രമം തുടരുകയാവും ഉചിതം.

ഉത്രാടം

ഗുണദോഷസമ്മിശ്രമായ മാസമാണ്. കാര്യസാധ്യത്തിന് കുറച്ചധികം അലച്ചിലുണ്ടാവും. ഉദ്യോഗസ്ഥർക്ക് ചുമതലകളും ജോലിഭാരവും കൂടും. എന്നാൽ ആഗ്രഹിച്ച സ്ഥാനോന്നതിയുടെ സൂചന ലഭിക്കുകയുമില്ല. വരവുചെലവുകളെ പൊരുത്തപ്പെടുത്താൻ ക്ലേശിക്കുന്നതാണ്. നവസംരംഭങ്ങൾ ആരംഭിക്കുവാൻ പല തടസ്സങ്ങൾ ഉണ്ടായേക്കും. ഒപ്പം സഹകരിച്ച് പോകുന്നവരെ കണ്ടെത്തുന്നത് എളുപ്പപ്പണിയാവില്ല. കുടുംബാംഗങ്ങൾക്കൊപ്പം ഉല്ലാസയാത്രകൾ നടത്തിയേക്കും.

തിരുവോണം

ഗ്രഹങ്ങൾക്ക് അനിഷ്ടസ്ഥിതിയുള്ള കാലമായതിനാൽ നേട്ടങ്ങൾക്ക് കഠിനാദ്ധ്വാനം ആവശ്യമായിവരും. അകർമ്മണ്യത പിടികൂടാനിടയുണ്ട്. സമയബന്ധിതമായി ജോലികൾ പൂർത്തിയാക്കുന്നതിൽ ഉത്സാഹം കുറഞ്ഞേക്കും. സാമ്പത്തിക സ്രോതസ്സുകൾ ക്ഷീണിക്കുന്നതായി അനുഭവപ്പെടാം. തർക്കങ്ങളിലും വ്യവഹാരങ്ങളിലും മാധ്യസ്ഥശ്രമങ്ങൾ ഉണ്ടായേക്കും. വിദ്യാർത്ഥികൾ പാഠ്യേതരപ്രവർത്തനങ്ങളിൽ താല്പര്യം കാട്ടും. പ്രണയികൾ സ്നേഹ-ദ്വേഷ ബന്ധം പുലർത്താം. കുടുംബജീവിതത്തിൽ ഗുണാനുഭവങ്ങൾ കുറയാം.

അവിട്ടം

അനുകൂലമാവും സാമൂഹിക ചുറ്റുപാടുകൾ. ചെലവുകൾ ഭംഗിയായി നടന്നുപോവും. എന്നാൽ മിച്ചം ഉണ്ടാക്കാനാവുമെന്ന് പറയാനാവില്ല. മകരക്കൂറുകാർക്ക് അഷ്ടമത്തിൽ ആദിത്യനും കുംഭക്കൂറുകാർക്ക് അഷ്ടമത്തിൽ കുജനുമുള്ളതിനാൽ ആപത്തുകളെക്കുറിച്ച് മുൻകരുതൽ വേണം. ദീർഘദൂരയാത്രകൾ ഒഴിവാക്കുകയാവും അഭികാമ്യം. അവിവാഹിതരുടെ വിവാഹമെന്ന സ്വപ്നം നീണ്ടേക്കാം. നവമാധ്യമരംഗത്തുള്ളവർക്ക് മോശം പ്രസ്താവനകൾ കേൾക്കേണ്ടതായി വരാം.

ചതയം

തൊഴിൽപരമായും, പ്രത്യേകിച്ച് കാരണമില്ലാതെയും കുറേ സഞ്ചരിക്കേണ്ടി വരാം. പുതിയ ഉദ്യോഗത്തിനായി ശ്രമങ്ങൾ തുടരുന്നതാണ്. പ്രണയികൾക്ക് കാലം അനുകൂലമല്ല. മനസ്സ് ഒരിടത്തും ഉറച്ച് നിൽക്കില്ല. വിദ്യാർത്ഥികൾക്ക് പഠനകാര്യത്തിൽ ശ്രദ്ധ കുറയുന്നതാണ്. എന്നാൽ പാഠ്യേതര കാര്യങ്ങളിൽ താല്പര്യം കൂടും. വീഴ്ച, മുറിവ് ഇവയ്ക്ക് സാധ്യതയുണ്ട്. വസ്തു വില്പനയിൽ തടസ്സങ്ങളോ തർക്കങ്ങളോ ഉണ്ടാകാം. ദമ്പതികൾക്കിടയിൽ അനൈക്യം തലപൊക്കാം.

പൂരുരുട്ടാതി

ഗ്രഹങ്ങളുടെ ആനുകൂല്യം കുറവായ കാലമാണ്. ചെറുനേട്ടങ്ങൾക്കാ യിപ്പോലും ഒരുപാട് വിയർക്കേണ്ടി വരാം. എന്തിനെക്കുറിച്ചും വ്യക്തമായ ആശയമുള്ളവരാണെങ്കിലും ഇപ്പോൾ ചില ആശയക്കുഴപ്പവും ഇവരെ ഭരിക്കുന്നുണ്ട്. ദിശാബോധം കുറയും. നഷ്ടം, പരാജയം എന്നിത്തരം ഭീതികളുണ്ടാവാം. പണവരവ് കുറയാം. മിതവ്യയം ശീലിക്കേണ്ടതുണ്ട്. ഹിതോപദേശങ്ങളിൽ കയർക്കും. നിലവിലെ ജോലി / വ്യാപാരം ഉപേക്ഷിക്കരുത്. സുഹൃൽബന്ധങ്ങൾ തെല്ല് ആശ്വാസകരമായേക്കാം.

ഉത്രട്ടാതി

ഉറ്റവരെക്കുറിച്ച് വിഷാദിക്കേണ്ടിവരാം. നിലവിലെ സ്ഥിതിയിൽ അസംതൃപ്തിയുണ്ടാവുന്നതാണ്. എന്നാൽ മാറ്റത്തിനുവേണ്ടി വലുതായി ഒന്നും പ്രവൃത്തിക്കാനും കഴിഞ്ഞേക്കില്ല. ഭാവനാശാലികളുടെ സർഗാത്മകത വർദ്ധിക്കും. അഭിനയം, വര, കവിത, പാട്ട് എന്നിവ സഹൃദയ പ്രശംസ നേടാം. ജന്മരാശിയുടെ അധിപനായ വ്യാഴത്തിന് വക്രഗതി തുടങ്ങുകയാൽ മനോഭാവത്തിൽ, നിലപാടുകളിൽ പിന്നോട്ടുപോക്ക് ഉണ്ടാവാനിടയുണ്ട്. പ്രണയികൾക്ക് നല്ല കാലമല്ല. ദാമ്പത്യജീവിതത്തിലും പൊരുത്തക്കേടുകൾ തുടർന്നേക്കും.

രേവതി

ബഹുമാനം പിടിച്ചുപറ്റേണ്ടിവരും. സ്നേഹിക്കുന്നവരുടെ ഇടയിലും ചില വിയോജിപ്പുകൾ കണ്ടേക്കാം. യഥാർത്ഥവും ന്യായവുമായ കാര്യങ്ങൾക്കും ആവശ്യങ്ങൾക്കും ആണ് പണം ചെലവഴിക്കുന്നതെന്ന് സ്വയം ബോധ്യമാവണം. ന്യായരഹിതമായ കാര്യങ്ങൾക്കായി നിയമപ്രശ്നങ്ങൾ നേരിടുന്നവർക്ക് ആശ്വാസവാർത്തകൾ വന്നുചേരുന്നതാണ്. സർക്കാരുമായി ബന്ധപ്പെട്ട കാര്യങ്ങൾക്ക് അനുമതി ലഭിക്കാം. കരാറുപണികൾ തുടരപ്പെടാം. കുടുംബത്തിന്റെ പിന്തുണ ആത്മശക്തി നിറയ്ക്കുന്നതാവും.