September 10- September 16, 2023: വാരഫലം, അശ്വതി മുതൽ രേവതി വരെ: Weekly Horoscope, Astrological Predictions

September 10- September 16, 2023: Weekly Horoscope Astrological Predictions Moolam to Revathi: ആദിത്യൻ ചിങ്ങം രാശിയിൽ പൂരം, ഉത്രം ഞാറ്റുവേലകളിൽ സഞ്ചരിക്കുന്നു. ചന്ദ്രൻ കൃഷ്ണപക്ഷത്തിലാണ്. വാരാന്ത്യത്തിൽ അമാവാസിയും തുടർന്ന് ശുക്ല പ്രഥമയും സംഭവിക്കുന്നു. പുണർതം മുതൽ ഉത്രം വരെയുള്ള നക്ഷത്രങ്ങളിലൂടെയാണ് ചന്ദ്രന്റെ സഞ്ചാരം. ശനി കുംഭം രാശിയിൽ ചതയം നക്ഷത്രത്തിൽ വക്ര സഞ്ചാരം തുടരുകയാണ്. വ്യാഴം മേടം രാശിയിൽ ഭരണി നക്ഷത്രത്തിൽ വക്രഗതിയിൽ സഞ്ചരിക്കുന്നു. രാഹു മേടത്തിൽ അശ്വതി ഒന്നാം പാദത്തിലും കേതു തുലാത്തിൽ ചിത്തിര മൂന്നാം പാദത്തിലുമായി അപസവ്യഗതിയിൽ ( Anti clockwise) നീങ്ങുന്നു.

കുജൻ കന്നിയിൽ അത്തം നക്ഷത്രത്തിലും, ബുധൻ വക്രമൗഢ്യത്തിൽ ചിങ്ങം രാശിയിൽ പൂരം നക്ഷത്രത്തിലും, ശുക്രൻ കർക്കടകം രാശിയിൽ ആയില്യം നക്ഷത്രത്തിൽ നേർഗതിയിലും സഞ്ചരിക്കുന്നു. ചിങ്ങമാസം ദൈർഘ്യമേറിയതാണ്, ഈയ്യാണ്ട്. 32 തീയതികൾ അഥവാ ദിവസങ്ങളുണ്ട്, ചിങ്ങമാസത്തിന്.

സെപ്തംബർ 17 വരെ ചിങ്ങമാസം തുടരുകയാണ്. സെപ്തംബർ 16 ന്, ശുക്ലപക്ഷ പ്രഥമ തിഥിയിൽ ഭാദ്രപദം എന്ന ചാന്ദ്രമാസം തുടങ്ങുകയുമാണ്.. മുകളിൽ വിവരിച്ച ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള 27 നാളുകാരുടെ അനുഭവങ്ങൾ ഇവിടെ അപഗ്രഥിക്കുകയും വിശകലനം ചെയ്യുകയുമാണ്.

അശ്വതി

സുഖാനുഭവങ്ങളുണ്ടാവും. സുഹൃത്തുക്കളുമായി ഉല്ലസിക്കാൻ സന്ദർഭം ലഭിച്ചേക്കാം.
വിനോദയാത്രകൾ ഒരു സാധ്യതയയാണ്. ഉറച്ച തീരുമാനങ്ങൾ കൈക്കൊള്ളാൻ വിഷമിച്ചേക്കും. പുതിയ കാര്യങ്ങൾ പഠിക്കാൻ ശ്രമിക്കുന്നതാണ്. തൊഴിൽ രംഗത്ത് നേട്ടങ്ങൾ, സാമ്പത്തികമായ വിജയം എന്നിവ പ്രതീക്ഷിക്കാം. എതിരാളികളോട് കാർക്കശ്യം പുലർത്തും. മക്കളുടെ വിദ്യാഭ്യാസകാര്യത്തിൽ ശ്രദ്ധ വേണ്ടതുണ്ട്.

ഭരണി

പഴയകാര്യങ്ങൾ ഓർത്ത് സന്തോഷിക്കാനാവും. മാതൃകുടുംബത്തിലുള്ള വരെ സന്ദർശിച്ചേക്കും. പ്രധാന കാര്യങ്ങളിൽ ബന്ധുക്കളുടെ പിന്തുണ ലഭിക്കുന്നതാണ്. മാനുഷിക മൂല്യങ്ങൾ ഉയർത്തിപ്പിടിക്കും. ഉദ്യോഗസ്ഥർക്ക് ഉയർച്ചയുണ്ടാകുന്നതാണ്. ബിസിനസ്സ് യാത്രകൾ ഗുണം ചെയ്തേക്കും. സാമ്പത്തികസ്ഥിതി മോശമാവില്ല. കടബാധ്യത തീർക്കാനുള്ള ശ്രമം ഭാഗികമായി വിജയിച്ചേക്കാം.

കാർത്തിക

അനാവശ്യമായ തിടുക്കം കാട്ടും. ആലോചനാ ശൂന്യതയുണ്ടായേക്കും. ഉദരരോഗം പിടിപെടാം. ഭക്ഷ്യരീതികളിൽ മാറ്റം വേണ്ടി വരാം. ആരോഗ്യപരിരക്ഷ അനിവാര്യമാകും. പ്രതികൂല സാഹചര്യങ്ങളെ മറികടക്കാൻ സാധിക്കുന്നതാണ്. കർമ്മരംഗത്ത് കുറഞ്ഞൊരു മാന്ദ്യം ഭവിക്കാനിടയുണ്ട്. വിദ്യാർത്ഥികൾക്ക് ബുധന്റെ മൗഢ്യം കാരണം നല്ല സമയമാണെന്ന് പറയാൻ കഴിയില്ല. പഠിച്ചത് മറക്കാം; പഠിക്കാൻ ശ്രദ്ധ കുറയാം. കുടുംബബന്ധങ്ങളുടെ ദൃഢത ദുർബലമാകാം.

രോഹിണി

വാരാദ്യം മെച്ചപ്പെട്ട ഫലങ്ങൾ പ്രതീക്ഷിക്കാം. സ്ത്രീകൾ പിന്തുണയ്ക്കുന്നതാണ്. ഭൗതികമായ ആവശ്യങ്ങൾ നിറവേറാൻ പണം വന്നു ചേരും. ക്ലേശങ്ങൾക്ക് തെല്ല് ആശ്വാസം കിട്ടുന്നതാണ്. സ്വയം ചെയ്യുന്ന തൊഴിൽ നവീകരിക്കാൻ ആലോചിക്കും. എന്നാൽ അക്കാര്യത്തിൽ വ്യക്തത ഉണ്ടാവണമെന്നില്ല. സകുടുംബം വിനോദയാത്രകൾ നടത്താൻ സമയം കണ്ടെത്തും. മക്കളുടെ കാര്യത്തിൽ- പഠനം, ജോലി,വിവാഹം-വല്ല വിഷമങ്ങളും ഉണ്ടായേക്കാം. ദാനധർമ്മം, ക്ഷേത്രകാര്യങ്ങൾ, ജീവകാരുണ്യം ഇവയ്ക്ക് ചെലവു ചെയ്യും.

മകയിരം

മധുരമായും വിനീതമായും സംസാരിക്കും. ധനാഗമം സുഗമമാകും. വാരത്തിന്റെ തുടക്കത്തിൽ തന്നെ സാമ്പത്തിക നേട്ടങ്ങൾ ഉണ്ടാവും. ഗവേഷണത്തിൽ മന്ദഗതി വന്നേക്കും. തറവാടിന്റെ നവീകരണത്തിന് ഊർജ്ജിതമായ ശ്രമങ്ങൾ ആരംഭിച്ചേക്കും. ബന്ധുക്കളുടെ പിന്തുണ നേടുന്നതിൽ വിജയിക്കും. വാഹനയാത്രയിൽ നല്ല ശ്രദ്ധയുണ്ടാവണം. മേലധികാരികളുടെ അപ്രീതി നേടിയേക്കാം. യുവാക്കളുടെ ജോലിക്കായുള്ള ശ്രമം നീളുന്നതാണ്.

തിരുവാതിര

ഗുണവും ദോഷവും മാറിമാറി അനുഭവപ്പെടും. ധനപരമായ കാര്യങ്ങളിലും ജോലി സംബന്ധിച്ച കാര്യങ്ങളിലും ഗുണാനുഭവങ്ങൾക്കാവും മുൻതൂക്കം. കലാകാരന്മാർ പ്രശംസിക്കപ്പെടാം. സംഭാഷണം / പ്രഭാഷണം എന്നിവയിൽ മികവ് പുലർത്തും. വൈകാരികമായ കാര്യങ്ങളിൽ ചില പ്രയാസങ്ങളുണ്ടാവാൻ ഇടയുണ്ട്. ദാമ്പത്യത്തിലെ സമാധാനക്കുറവിന് നാലിലെ ചൊവ്വ കാരണമാകുന്നതാണ്. വീടുപണിയിൽ പുരോഗതി ഉണ്ടാവില്ല. അനാവശ്യകാര്യങ്ങളിൽ ഇടപെടരുത്.

പുണർതം

സുഹൃത്തുക്കളെയും ബന്ധുക്കളെയും കാണാനാവും. വിരുന്നുകളിൽ പങ്കെടുക്കാനും വിശിഷ്ടഭോജ്യങ്ങൾ കഴിക്കാനും സന്ദർഭമുണ്ടാകുന്നതാണ്. പ്രതീക്ഷിച്ചത്ര പണവരവ് ഉണ്ടായില്ലെങ്കിലും കാര്യങ്ങൾക്ക് മുടക്കം വരില്ല. പ്രധാനവ്യക്തികളുടെ നിർദ്ദേശം ഉൾക്കൊണ്ട് പ്രവർത്തിക്കേണ്ടിവരും. രാഷ്ട്രീയത്തിൽ ആക്ഷേപം കേൾക്കേണ്ടിവന്നേക്കാം. കുടുംബബന്ധങ്ങളുടെ താളം നിലനിർത്തുന്നതിൽ വിജയിക്കാനാവും. മാതാവിന്റെ ആരോഗ്യകാര്യത്തിൽ അലംഭാവമരുത്.

പൂയം

സജ്ജനങ്ങളെ സന്ദർശിക്കും. ഗുരുജനങ്ങളുടെ അനുഗ്രഹം ലഭിക്കും. ഭൗതികമായ കാര്യങ്ങൾ നിറവേറുന്നതിൽ വിജയിക്കുന്നതാണ്. പഠനത്തിൽ ഏകാഗ്രത കുറയുന്നതായി തോന്നാം. പ്രബന്ധരചനയ്ക്ക് കൂടുതൽ ഗവേഷണം ആവശ്യമായി വന്നേക്കും. ചെറുപ്പക്കാർക്ക് പുതുജോലി ലഭിക്കുന്നതിനുള്ള തടസ്സം നീങ്ങുന്നതാണ്. വിസ, ഗ്രീൻകാർഡ് മുതലായ കാര്യങ്ങളിൽ ശുഭവാർത്തയെത്തും. വ്യവഹാരങ്ങളിൽ പ്രതീക്ഷിച്ച നീതി ലഭിക്കുന്നതാണ്. മനോബലം കൊണ്ട് എതിർപ്പുകളെ മറികടക്കാനായേക്കും.

ആയില്യം

തൊഴിൽ മേഖലയിലെ സമ്മർദ്ദങ്ങൾക്ക് തെല്ല് അയവ് വന്നേക്കും. സഹപ്രവർത്തകർക്കിടയിൽ സ്വാധീനശക്തി വർദ്ധിക്കുന്നതാണ്. പ്രണയബന്ധം ദൃഢമാകും. ദാമ്പത്യത്തിലെ അസ്വാരസ്യങ്ങൾ അവസാനിച്ചേക്കും. സഹോദരരുമായുള്ള അനൈക്യം അനുരജ്ഞനത്തിലെത്താം. കലാപ്രവർത്തനങ്ങൾ തടസ്സം കൂടാതെ മുന്നേറുന്നതാണ്. അന്യദേശ ജോലികൾക്കുള്ള ശ്രമം പുരോഗമിക്കും. ഭൂമി സംബന്ധിച്ച കൊടുക്കൽ വാങ്ങലുകളിൽ ലാഭം ഉണ്ടാവും. കരാറുകൾ സമയബന്ധിതമായി പൂർത്തീകരിക്കാൻ സാധിക്കുന്നതാണ്.

മകം

വാരാദ്യം അലച്ചിലും നല്ല കാര്യങ്ങൾക്കായി ചെലവുമേറും. പ്രവൃത്തികളിൽ ശ്രദ്ധ കുറയുന്നതാണ്. രണ്ടാമെടത്തിൽ ചൊവ്വ നിൽക്കുകയാൽ വാഗ്വാദങ്ങൾക്ക് മുതിർന്നേക്കാം. ക്രമേണ മനസ്സന്തോഷമുണ്ടാക്കുന്ന അനുഭവങ്ങൾ വന്നുചേരും. ഗാർഹികമായും തൊഴിൽപരമായും സ്വസ്ഥത പ്രതീക്ഷിക്കാം. ചുമതലകൾ ഭംഗിയായി നിർവഹിക്കുവാനാവും. കുടുംബജീവിതത്തിൽ പിടിവാശി മാറ്റിവെയ്ക്കപ്പെടുന്നതിനനുസൃതമായി നല്ലത് പ്രതീക്ഷിക്കാം. ഊഹക്കച്ചവടം വിജയിക്കണം എന്നില്ല.

പൂരം

കാര്യങ്ങളിൽ അനുകൂലത കുറയുന്ന വാരമാണ്. ലക്ഷ്യം നേടിയെടുക്കാൻ സഹിഷ്ണുതക്കൊപ്പം കഠിനാദ്ധ്വാനവും ആവശ്യമായി വരും. പ്രവർത്തനങ്ങളിൽ ഏർപ്പെടും മുൻപ് അതിന്റെ വരുംവരായ്കകൾ അറിയുകയും വേണം. കുടുംബകാര്യങ്ങളിൽ പൊരുത്തക്കേടുകൾ കാണപ്പെടും. സാമ്പത്തിക ഗുണം പ്രതീക്ഷിക്കാം. വായ്പകൾ അനുവദിച്ചു കിട്ടുന്നതാണ്. സംഘടനാപരമായ ചില ഒത്തുചേരലുകൾക്ക് കളം ഒരുങ്ങുന്നതാണ്.

ഉത്രം

ജന്മനക്ഷത്രത്തിനു മേൽ ഇപ്പോൾ പാപഗ്രഹങ്ങളുടെ സ്വാധീനം ശക്തമാണ്. അതിനാൽ ചിന്തയുടെയും കർമ്മത്തിന്റെയും പവിത്രത നിലനിർത്തുക എളുപ്പമാവില്ല. ധനപരമായി ഞെരുക്കമനുഭവപ്പെടാനിടയുണ്ട്. ആഢംബര ച്ചെലവുകൾ കുറയ്ക്കേണ്ടതാണ്. ആരോഗ്യപരമായി ശ്രദ്ധ വേണം. പഠന ഗവേഷണാദികളിൽ ഏകാഗ്രത കുറഞ്ഞേക്കാം. നിലവിലെ തൊഴിൽ ഉപേക്ഷിക്കാതിരിക്കുകയാവും ഇപ്പോൾ കരണീയം. ഗ്രഹങ്ങൾ മാറുന്നതിനനുസരിച്ച് ഫലങ്ങളിൽ ഗുണപരത പ്രതീക്ഷിക്കാം.

അത്തം

ചൊവ്വ ജന്മരാശിയിൽ, ജന്മനക്ഷത്രത്തിൽ സഞ്ചരിക്കുകയാൽ ക്ലേശങ്ങൾ വർദ്ധിക്കും.ആരോഗ്യപ്രശ്നങ്ങൾ വരാം. സാമ്പത്തിക വിഷമങ്ങൾ കുറയില്ല. കുടുംബ ജീവിതത്തിലും സ്വൈരം നാമമാത്രമായേക്കും. പതിനൊന്നിൽ ശുക്രൻ തുടരുകയാൽ കലാകാരന്മാർക്കും കച്ചവടക്കാർക്കും നല്ല സമയമാണ്. പ്രതിഭാവിലാസം കീർത്തിക്കപ്പെടും. ആദായമുണ്ടാകും. ബസുക്കൾ എതിർപക്ഷത്ത് ചേർന്നേക്കും. രാഷ്ട്രീയ പ്രവർത്തനത്തിൽ വിമർശനങ്ങൾ ഉയരാം. ഭൂമി സംബന്ധിച്ച വ്യവഹാരങ്ങൾക്ക് ചെലവേറുന്നതാണ്.

ചിത്തിര

കന്നിക്കൂറുകാർക്ക് വാരത്തിന്റെ തുടക്കവും തുലാക്കൂറുകാർക്ക് വാരത്തിന്റെ പകുതി മുതലും നല്ല ഫലങ്ങൾ. പ്രണയികൾക്ക് എതിർപ്പുകളെ നേരിടേണ്ടി വരുന്നതാണ്. വിദ്യാർത്ഥികൾക്ക് പരീക്ഷകളിൽ തിളങ്ങാനാവും. സ്വാശ്രയത്വത്തിൽ ശക്തി നേടും. ഉദ്യോഗസ്ഥരുടെ സ്ഥലം മാറ്റം സംബന്ധിച്ച് അനുകൂലത പ്രതീക്ഷിക്കാം. വായന, വിനോദ പരിപാടികൾ, സുഹൃൽ സംഗമം എന്നിങ്ങനെ ചില മാനസികോല്ലാസങ്ങൾ ഉണ്ടായേക്കാം. കുടുംബപ്രശ്നങ്ങളിൽ 'തൊട്ടും തൊടാതെയും' ഉള്ള നിലപാടുകൾ കൈക്കൊള്ളും.

ചോതി

സർക്കാർ കാര്യങ്ങൾ, പിതാവ്, രാഷ്ട്രീയം ഇവ അനുകൂല അനുഭവങ്ങൾ സൃഷ്ടിക്കുന്നതാണ്. അധികാരമുള്ള ചുമതലകൾ ലഭിച്ചേക്കാം. തൊഴിൽ തേടുന്നവർക്ക് പ്രതീക്ഷക്ക് വകയുണ്ട്. പ്രോജക്ടുകൾക്ക് അംഗീകാരം സിദ്ധിക്കുന്നതാണ്. വ്യാപാരികൾക്ക് ലാഭം കൂടുമെങ്കിലും കച്ചവടത്തിൽ ചില പ്രതിസന്ധികൾ വന്നേക്കാം. വസ്തുസംബന്ധിച്ച തർക്കങ്ങൾ ഉടലെടുക്കാം. സഹോദരരുമായി കലഹസാധ്യത കാണുന്നു. ദാമ്പത്യത്തിലും ചില അനൈക്യങ്ങൾ പ്രത്യക്ഷപ്പെട്ടേക്കാം.

വിശാഖം

നക്ഷത്രനാഥനായ വ്യാഴത്തിന് വക്രം വരുന്നതിനാൽ നിലപാടുകളിൽ നിന്നും അല്പം പിന്നിലേക്ക് പോയേക്കാം. ഉദ്യോഗസ്ഥർക്ക് കൂടുതൽ അദ്ധ്വാനിക്കേണ്ടിവരും. സഹപ്രവർത്തകരുടെ പിന്തുണ വേണ്ടത്ര ലഭിച്ചേക്കില്ല. സാമ്പത്തിക കാര്യങ്ങളിൽ മിതത്വം പാലിക്കണം. കടം വാങ്ങുന്ന കാര്യത്തിൽ പുനരാലോചന വേണ്ടതുണ്ട്. എല്ലാത്തിനും കുടുംബാംഗങ്ങളുടെ പിന്തുണയുണ്ടാകും. ബന്ധുക്കൾ/ സുഹൃത്തുക്കൾ തുടങ്ങിയവർക്കായി ജാമ്യം നിൽക്കുക വേണ്ടത്ര ആലോചിച്ചിട്ടാവണം.

അനിഴം

അവിവാഹിതർക്ക് വിവാഹാലോചനകൾ വരാം. പ്രണയത്തിലെ വിഘ്നങ്ങൾ അകലുന്നതാണ്. മംഗളകാര്യങ്ങളിൽ പങ്കെടുക്കാൻ സാധിക്കും. പിണങ്ങി നിന്ന കുടുംബാംഗങ്ങളെ ഇണക്കിച്ചേർക്കുന്നതിൽ വിജയിക്കും. യോഗം, സമാജം തുടങ്ങിയവ കാര്യങ്ങളിൽ മുഖ്യപങ്കുവഹിക്കുന്നതാണ്. ഉദ്യോഗസ്ഥർക്ക് അംഗീകാരം കൈവരും. നവസംരംഭങ്ങൾക്ക് കാലം അനുകൂലമാണ്. സംഘടനാരംഗത്ത് നേതൃപദവി ലഭിച്ചേക്കും.

തൃക്കേട്ട

തൊഴിൽ രംഗത്തെ പരീക്ഷണങ്ങൾക്ക് ഉചിതസന്ദർഭമാണ്. നവമാധ്യമങ്ങളിലൂടെ പ്രശസ്തിയുണ്ടാവും. വിശ്വസിച്ചേല്പിച്ച കൃത്യങ്ങളിൽ വിജയം നേടുന്നതാണ്. വിദ്യാർത്ഥികൾക്ക് പഠനത്തിൽ മുന്നേറാൻ സാധിക്കും. കലാപരമായ പ്രവർത്തനങ്ങൾക്ക് പാരിതോഷികങ്ങൾ ലഭിക്കാനിടയുണ്ട്.
ഭൂമി സ്വന്തമാക്കാനുള്ള ശ്രമം വിജയം കാണുന്നതാണ്. വിദേശയാത്രകൾക്ക് അനുമതി കൈവരും. യുവാക്കളുടെ വിവാഹാലോചനകളിൽ തീർപ്പുണ്ടാകും. ഉപാസനാദികൾ തടസ്സം കൂടാതെ നിറവേറപ്പെടും.

മൂലം

വാരാദ്യം ക്ലേശപ്രദമാവാം. കാര്യവിളംബമോ കാര്യക്ലേശമോ ഉണ്ടായേക്കാം. ബുധൻ മുതൽ അനുകൂല ദിവസങ്ങൾ. വ്യാപാരത്തിൽ ചലനം കണ്ടുതുടങ്ങുന്നതാണ്. വായ്പാതിരിച്ചടവുകൾക്ക് പണം സ്വരൂപിക്കാനാവും. പിതാവിൽ നിന്നും ചില ആനുകൂല്യങ്ങൾ പ്രതീക്ഷിക്കാം. ഉദ്യോഗസ്ഥർക്ക് ഓഫീസിലെ സമ്മർദ്ദം കുറയാനിടയുണ്ട്. വിജ്ഞാനാന്വേഷണം, പഠനം എന്നിവയിൽ പൂർവ്വാധികം ശക്തിയോടെ മുന്നോട്ട് നീങ്ങാനാവും. ചില ഭാവികാര്യങ്ങൾ സംബന്ധിച്ച് കുടുംബാംഗങ്ങളുമായി ആശയവിനിമയത്തിൽ ഏർപ്പെടാം.

പൂരാടം

വാരാദ്യത്തിലെ മൂന്നുദിവസങ്ങൾ അഷ്ടമരാശിക്കൂറിൽ വരികയാൽ വാക്കിലും കർമ്മത്തിലും ആരോഗ്യത്തിലും ഒക്കെ കരുതൽ വേണം. തദനന്തരം കർമ്മഗുണം മെച്ചമാകുന്നതാണ്. കച്ചവടത്തിൽ ഉപഭോക്താക്കളെ ആകർഷിക്കാൻ പുതിയ പദ്ധതികൾ ആവിഷ്കരിക്കും. ഉദ്യോഗസ്ഥർക്ക് പുതുദൗത്യങ്ങൾ ഏറ്റെടുക്കേണ്ടതായി വരുന്നതാണ്. പണയവസ്തുക്കൾ തിരിച്ചെടുക്കാനുള്ള ശ്രമം തുടങ്ങും. ന്യായമായ ആവശ്യങ്ങൾക്ക് ധനം വന്നുചേരുന്നതാണ്.

ഉത്രാടം

വിജയിക്കാൻ കൂടുതൽ വിയർപ്പൊഴുക്കേണ്ടതായി വരാം. സുപ്രധാന തീരുമാനങ്ങൾ കൈക്കൊള്ളുമ്പോൾ ഉറ്റവരുടെ അഭിപ്രായം കൂടി പരിഗണിക്കുന്നത് നന്നായിരിക്കും. അന്യദേശത്ത് കഴിയുന്നവർക്ക് നാട്ടിലെത്താനാവും. സർക്കാരുമായി ബന്ധപ്പെട്ട വിഷയങ്ങളിൽ അനുകൂല ഫലം പ്രതീക്ഷിക്കാം. വസ്തുവിൽ നിന്നുള്ള ആദായം പ്രതീക്ഷിച്ചത്ര ഉണ്ടാവണമെന്നില്ല. വ്യാഴത്തിന് വക്രഗതി വരികയാൽ സാമ്പത്തിക ഇടപാടുകളിൽ ശ്രദ്ധ വേണ്ടതുണ്ട്.

തിരുവോണം

നക്ഷത്രനാഥനായ ചന്ദ്രന്റെ പക്ഷബലമില്ലായ്മ, ബുധൻ, വ്യാഴം ദിവസങ്ങളിലെ അഷ്ടമരാശി എന്നിവയാൽ ഈയാഴ്ചക്ക് ഗുണം കുറയാം. സുപ്രധാന കാര്യങ്ങളുടെ നിർവഹണത്തിന് ഉചിത കാലമല്ല. സാമ്പത്തിക സ്രോതസ്സുകളിൽ നിന്നും വരവ് കുറഞ്ഞേക്കും. ആരോഗ്യപരമായ പരിശോധനകൾ മുടക്കരുത്. യാത്രകളിൽ കരുതൽ വേണം. വിദ്യാർത്ഥികൾക്ക് പഠനത്തിലെ ഏകാഗ്രത മന്ദീഭവിക്കാം. മാതൃപരിചരണത്തിൽ ശ്രദ്ധയുണ്ടാവണം.

അവിട്ടം

സർക്കാർ സംബന്ധിച്ച കാര്യങ്ങൾ നേടാൻ കുറെ ഊർജ്ജവും സമയവും ചെലവാകും. പൂർവ്വിക സ്വത്ത് സംബന്ധിച്ച തർക്കങ്ങളിൽ പരിഹാരം കണ്ടേക്കാം. സാമ്പത്തിക ക്ലേശങ്ങൾ തുടരുമെങ്കിലും ന്യായമായ ആവശ്യങ്ങൾക്ക് പണം വന്നുചേരുന്നതാണ്. സുഹൃത്തുക്കളുടെയോ ബന്ധുക്കളുടെയോ പിന്തുണ പ്രതീക്ഷിച്ചത്ര കൈവരണം എന്നില്ല. ഭാര്യാഭർത്താക്കന്മാർക്കിടയിൽ അസ്വാരസ്യങ്ങൾ ഉയരാം. വിവാഹകാര്യത്തിൽ വ്യക്തമായ തീരുമാനം ഉണ്ടാവണമെന്നില്ല. മകരക്കൂറുകാർക്ക് വാരമധ്യവും കുംഭക്കൂറുകാർക്ക് വാരാന്ത്യവും ഗുണകരമല്ല.

ചതയം

അഷ്ടമത്തിൽ ചൊവ്വ, ചതയത്തിന്റെ വേധനക്ഷത്രമായ അത്തത്തിൽ തുടരുകയാൽ വിചാരിച്ച കാര്യങ്ങൾ നേടാൻ വിഷമിക്കും. ആരോഗ്യപ്രശ്നങ്ങളിൽ കരുതൽ വേണ്ടതുണ്ട്. മാനസികപിരിമുറുക്കങ്ങൾ വരാം. നേട്ടങ്ങൾ ഉണ്ടാവുമെങ്കിലും അവ പ്രതീക്ഷക്കനുസരിച്ചാവണം എന്നില്ല. പഠനപുരോഗതി മെല്ലെയാവും. വ്യാപാരത്തിൽ ലാഭം കുറയാം. ദാമ്പത്യത്തിൽ നിന്നും വിട്ടുവീഴ്ചയും പാരസ്പര്യവും താൽകാലികമായിട്ടെങ്കിലും പിൻവാങ്ങാം. അഗ്നി, യന്ത്രം, വാഹനം ഇവയുടെ ഉപയോഗം ഏറ്റവും കരുതലോടെ വേണം.

പൂരൂരുട്ടാതി

മീനക്കൂറുകാർക്ക് നേരിയ ഗുണാനുഭവങ്ങൾ ഉണ്ടാവും. കലാപരമായ കഴിവുകൾ വികസിക്കുന്നതാണ്. കുംഭക്കൂറുകാർക്ക് ചൊവ്വയുടെ അനിഷ്ടസ്ഥിതിയാൽ കാര്യതടസ്സം ഉണ്ടായേക്കാം. ശത്രുക്കളുടെ ഉപജാപം അറിയാനോ പ്രതിരോധിക്കാനോ കഴിയാതെ പോകുന്നതാണ്. ക്ഷോഭം നിയന്ത്രിക്കേണ്ടതുണ്ട്. ദാമ്പത്യത്തിൽ സൗഖ്യക്കുറവ് ഉണ്ടാകാം. എന്നാൽ ധനപരമായി ചെറിയ നേട്ടങ്ങൾ വന്നുചേരുകയും ചെയ്യും. കരാറുപണികൾ തുടരാൻ അനുമതി ലഭിക്കാം. ഏജൻസി / ഫ്രാഞ്ചൈസി പോലുള്ള കാര്യങ്ങളിൽ നിന്നും വരുമാനം ഭവിക്കും. കാലികമായ വൈദ്യപരിശോധനകൾ മുടക്കരുത്.

ഉത്രട്ടാതി

മുൻപിൻ രാശികളിൽ പാപഗ്രഹങ്ങൾ നിൽക്കുന്നതും വക്രസ്ഥിതി വരുന്നതും ചില തിരിച്ചടികൾക്ക് കാരണമാകാം. ചില സാഹചര്യങ്ങളുടെ തടവറയിൽ കഴിയുന്നതായി തോന്നാം. പാരതന്ത്ര്യം ഉണ്ടാകാം. വിയോജിപ്പുകൾ കലഹമാവാതെ നോക്കേണ്ടതുണ്ട്. ധനവരവ് കുറയാം. കലാകാരന്മാർക്ക് തരക്കേടില്ലാത്ത സമയമാണ്. പ്രബന്ധങ്ങൾ പൂർത്തിയാക്കാൻ സാധിച്ചേക്കും. ദൂരയാത്രകൾ വേണ്ടിവരുന്നതാണ്. കുടുംബത്തിന്റെ പിന്തുണ ലഭിക്കാം.

രേവതി

പ്രൊഫഷണലുകൾക്ക് സ്വന്തം തൊഴിലിൽ കാലോചിതമായ നവീകരണം വേണ്ടിവരും. കച്ചവടക്കാർ ഉപഭോക്താക്കളുടെ ആവശ്യമറിഞ്ഞ് പ്രവർത്തിക്കാൻ സന്നദ്ധരാവും. ഉദ്യോഗസ്ഥർക്ക് കർമ്മഗുണമുള്ള കാലമാണ്. ഏഴിലെ ചൊവ്വ ദാമ്പത്യക്ലേശങ്ങൾക്ക് കാരണമാകാം. കുടുംബസ്വത്തിന്മേൽ തർക്കം വരാനിടയുണ്ട്. മക്കളുടെ പഠനം സംബന്ധിച്ച് യാത്രകൾ ഉണ്ടാവാം. വാഗ്ദാനങ്ങൾ പാലിക്കാൻ ക്ലേശിച്ചേക്കും. സാമ്പത്തികസ്ഥിതി മെച്ചപ്പെടുന്നതാണ്.