ശനിക്ക് ശക്തിയേറിയ കാലം, കണ്ടകശനിക്കാരായ ഈ നാളുകാർക്ക് ദുരിതം കുറയുന്ന നാല് മാസങ്ങൾ

വക്രത്തിൽ സഞ്ചരിക്കുന്ന ഗ്രഹത്തെ, വിശേഷിച്ചും പാപഗ്രഹത്തെ ‘ശക്തൻ’ എന്നാണ് വിളിക്കുക. ശനി മൂലക്ഷേത്രമായ കുംഭം രാശിയിൽ, ചതയം നക്ഷത്രത്തിലാണ് ഇപ്പോൾ സഞ്ചരിക്കുന്നത്. അത് ശനിയുടെ ഒരു ബലസ്ഥാനം ആണ്. വക്രവും കൂടിയാവുമ്പോൾ കൂടുതൽ ശക്തനാവുന്നു. ശനിയുടെ പാപത്വം കുറയും; ദോഷശക്തി ന്യൂനീകരിക്കും എന്നിവയൊക്കെയാണ് ഇതിൽ നിന്നും വ്യക്തമാക്കുന്നത്.

സൂര്യനിൽ നിന്നും 108 ഡിഗ്രി പിന്നിലാവുമ്പോൾ ശനിയുടെ വക്രം തുടങ്ങും. സൂര്യൻ മിഥുനം രാശിയിൽ 3 ഡിഗ്രി 19 മിനിറ്റിലും ശനി കുംഭം രാശിയിൽ 13 ഡിഗ്രി രണ്ട് 2 മിനിറ്റിലും സഞ്ചരിക്കുമ്പോഴാണ് വക്രം തുടങ്ങുന്നത്. ഇപ്പോൾ ഇരുഗ്രഹങ്ങളും തമ്മിൽ കൃത്യം 108 ഡിഗ്രി അകലമായിക്കഴിഞ്ഞു. വക്രം തുടങ്ങിയാൽ ശനി ആറ് ഡിഗ്രി മാത്രമാണ് പിന്നിൽ പോവുക. അതിനാൽ ശനി ഇപ്പോഴത്തെ വക്രഗതിയിൽ കുംഭം രാശിയിൽ തന്നെയാണ് ഉണ്ടാവുക.

ചതയം രണ്ടാം പാദത്തിലാണിപ്പോൾ ശനി. ചതയത്തിന്റെ രണ്ടും ഒന്നും പാദങ്ങൾ പിന്നിലേക്ക് പോയി, അവിട്ടം നാലാം പാദത്തിൽ സഞ്ചരിക്കുമ്പോൾ ശനിയുടെ വക്രം അവസാനിക്കും. 2023 ജൂൺ 21 മുതൽ നവംബർ ആറ് വരെ ഏതാണ്ട് 140 ദിവസമാണ് ശനിയുടെ വക്രകാലം. ശനിയുടെ വക്രഗതി അടുത്ത നാലഞ്ച് മാസക്കാലത്തേക്ക് ചിങ്ങക്കൂറിൽ വരുന്ന മകം, പൂരം, ഉത്രം, വൃശ്ചികക്കൂറിൽ വരുന്ന വിശാഖം അനിഴം തൃക്കേട്ട എന്നീ നാളുകളിൽ ജനിച്ചവർക്ക് നൽകുന്ന ഫലങ്ങളെ കുറിച്ച് വായിക്കാം.

ചിങ്ങക്കൂറിൽ വരുന്ന മകം, പൂരം, ഉത്രം കാൽ എന്നീ നക്ഷത്രങ്ങളിലുള്ളവർക്ക് കണ്ടകശനി തുടരുകയാണെങ്കിലും തൽസംബന്ധമായി തുടരുന്ന ദുരിതങ്ങൾക്ക് കുറവുണ്ടാകും. തടസ്സപ്പെട്ടിരുന്ന പ്രോജക്ടുകൾ അധികൃതർക്ക് സമർപ്പിക്കാനാവും. കച്ചവട കാര്യങ്ങൾക്ക് വായ്പ, ചിട്ടി, ഇൻഷ്വറൻസ് തുടങ്ങിയ വഴികളിലൂടെ ധനം വന്നെത്തും. ദിവസവേതനക്കാർക്ക് കരാർ പുതുക്കിക്കിട്ടും. വൈവാഹിക തടസ്സങ്ങൾ നീങ്ങും എന്നതും പ്രധാന ഫലമാണ്. പഠനം, തൊഴിൽ ഇവയ്ക്കായി വിദേശയാത്രയുണ്ടാവാം. ദാമ്പത്യത്തിൽ അനുഭവപ്പെട്ടിരുന്ന അനൈക്യം താൽകാലികമായെങ്കിലും അവസാനിച്ചേക്കും. ആരോഗ്യ വിഷയത്തിൽ മെച്ചം പ്രതീക്ഷിക്കാം.

വൃശ്ചികക്കൂറിൽ വരുന്ന വിശാഖം നാലാം പാദം, അനിഴം, തൃക്കേട്ട എന്നീ നക്ഷത്രങ്ങളിൽ ജനിച്ചവർക്ക് കണ്ടകശനി ഏൽപ്പിച്ചു കൊണ്ടിരിക്കുന്ന പരുക്കുകളിൽ നിന്ന് താൽകാലിക മോചനം ലഭിക്കും. കർമ്മരംഗത്താവും മുഖ്യമായും ഗുണം അനുഭവപ്പെടുക. ജോലിയിലെ ആയാസവും സമ്മർദ്ദവും കുറയുന്നതാണ്. ഉദ്യോഗസ്ഥർക്ക് വീട്ടിനടുത്തേക്ക് സ്ഥലം മാറ്റം ലഭിക്കാം. വാഹനം, പുതിയത് വാങ്ങാനുള്ള ശ്രമം വിജയിച്ചേക്കും. മാതാവിന്റെ ആരോഗ്യകാര്യത്തിൽ മാറ്റം ഭവിക്കുന്നതാണ്. ഗാർഹികജീവിതം സമാധാനപൂർണമാകും. അയൽവഴക്കുകൾ പരിഹൃതമാകാം. വരവ് കൂടുന്നതാണ്. നല്ല കാര്യങ്ങൾക്ക് ചെലവും വന്നേക്കാം.