എതിരാളികൾ അനുകൂലിക്കും, രാഷ്ട്രീയത്തിൽ വിജയം, ക്ലേശങ്ങൾ കുറയും, വരുന്ന നാലര മാസക്കാലം ഈ നാളുകാരുടെ ഫലം

വക്രത്തിൽ സഞ്ചരിക്കുന്ന ഗ്രഹത്തെ, വിശേഷിച്ചും പാപഗ്രഹത്തെ ‘ശക്തൻ’ എന്നാണ് വിളിക്കുക. ശനി മൂലക്ഷേത്രമായ കുംഭം രാശിയിൽ, ചതയം നക്ഷത്രത്തിലാണ് ഇപ്പോൾ സഞ്ചരിക്കുന്നത്. അത് ശനിയുടെ ഒരു ബലസ്ഥാനം ആണ്. വക്രവും കൂടിയാവുമ്പോൾ കൂടുതൽ ശക്തനാവുന്നു. ശനിയുടെ പാപത്വം കുറയും; ദോഷശക്തി ന്യൂനീകരിക്കും എന്നിങ്ങനെയുള്ള കാര്യങ്ങളാണ് ഈ കാലത്ത് സംഭവിക്കുക.

സൂര്യനിൽ നിന്നും 108 ഡിഗ്രി പിന്നിലാവുമ്പോൾ ശനിയുടെ വക്രം തുടങ്ങും. സൂര്യൻ മിഥുനം രാശിയിൽ 3 ഡിഗ്രി 19 മിനിറ്റിലും ശനി കുംഭം രാശിയിൽ 13 ഡിഗ്രി രണ്ട് 2 മിനിറ്റിലും സഞ്ചരിക്കുമ്പോഴാണ് വക്രം തുടങ്ങുന്നത്. ഇപ്പോൾ ഇരുഗ്രഹങ്ങളും തമ്മിൽ കൃത്യം 108 ഡിഗ്രി അകലമായിക്കഴിഞ്ഞു. വക്രം തുടങ്ങിയാൽ ശനി ആറ് ഡിഗ്രി മാത്രമാണ് പിന്നിൽ പോവുക. അതിനാൽ ശനി ഇപ്പോഴത്തെ വക്രഗതിയിൽ കുംഭം രാശിയിൽ തന്നെയാണ് ഉണ്ടാവുക.

ചതയം രണ്ടാം പാദത്തിലാണിപ്പോൾ ശനി. ചതയത്തിന്റെ രണ്ടും ഒന്നും പാദങ്ങൾ പിന്നിലേക്ക് പോയി, അവിട്ടം നാലാം പാദത്തിൽ സഞ്ചരിക്കുമ്പോൾ ശനിയുടെ വക്രം അവസാനിക്കും. 2023 ജൂൺ 21 മുതൽ നവംബർ 6 വരെ ഏതാണ്ട് 140 ദിവസമാണ് ശനിയുടെ വക്രകാലം. ശനിയുടെ വക്രഗതി ആയതിനാൽ, അടുത്ത നാലഞ്ച് മാസക്കാലത്തേക്ക് കർക്കടകക്കൂറിൽ ഉൾപ്പെടുന്ന പുണർതം, പൂയം, ആയില്യം,ധനുക്കൂറിലെ മൂലം, പൂരാടം, ഉത്രാടം,കുംഭക്കൂറിൽ വരുന്ന അവിട്ടം, ചതയം, പൂരുട്ടാതി എന്നീ നക്ഷത്രജാതരുടെ പൊതുഫലം എങ്ങനെയാകുമെന്ന് വായിക്കാം

കർക്കടകക്കൂറിൽ ഉൾപ്പെടുന്ന പുണർതം, പൂയം, ആയില്യം എന്നീ നക്ഷത്രങ്ങളിൽ ജനിച്ചവരുടെ കാര്യത്തിൽ ക്ലേശങ്ങൾ കുറയുന്ന കാലമാണ്. അഷ്ടമശനിയുണ്ടാക്കുന്ന ദുരിതങ്ങൾ താൽകാലികമായെങ്കിലും അവസാനിക്കും. രോഗാവസ്ഥക്ക് ചികിൽസ ലഭ്യമാകും. തൊഴിൽ നവീകരണത്തിന് പ്രബലരുടെ പിന്തുണ വന്നുചേരും. മക്കൾക്ക് അന്യദേശത്ത് പഠനമോ തൊഴിലോ സിദ്ധിക്കും. വിവാഹതടസ്സങ്ങൾ നീങ്ങുന്നതാണ്. ഭൂമിസംബന്ധിച്ച ക്രയവിക്രയങ്ങളിൽ ശ്രദ്ധയുണ്ടാവണം. കടം വാങ്ങി കാര്യം നിർവഹിക്കുന്നതിൽ നിയന്ത്രണമുണ്ടാകണം.

ധനുക്കൂറിലെ മൂലം, പൂരാടം, ഉത്രാടം എന്നീ നക്ഷത്രജാതരുടെ കാര്യത്തിൽ മൂന്നാം ഭാവത്തിൽ ഗുണഫലദാതാവായി തുടരുന്ന ശനി കൂടുതൽ ആനുകൂല്യങ്ങൾ നൽകുന്നതാണ്. വിദ്യാർത്ഥികൾ മത്സരത്തിൽ വിജയം ഉറപ്പിക്കും. രാഷ്ട്രീയ പോരാട്ടങ്ങളിൽ എതിർപ്പിനെ അനായാസം മറികടക്കും. ഭാഗ്യമില്ലായ്മ കൊണ്ട് തടസ്സപ്പെട്ടിരുന്ന കാര്യങ്ങൾ നിറവേറ്റപ്പെടും. തൊഴിലിൽ അഭിവൃദ്ധി വർദ്ധിക്കും. പ്രബലന്മാരുടെ പിന്തുണ അനുഭവത്തിലെത്തും. അനാരോഗ്യം മാറി ശരീരമാനസിക ബലം തിരികെക്കിട്ടും. ഊഹക്കച്ചവടത്തിൽ നേട്ടങ്ങൾ വന്നുചേരുന്നതാണ്. കുടുംബാംഗങ്ങൾക്കൊപ്പം വിദേശ യാത്രകൾ, മംഗളാനുഭവങ്ങൾ എന്നിവയുണ്ടാകും.

കുംഭക്കൂറിൽ വരുന്ന അവിട്ടം, ചതയം, പൂരുട്ടാതി എന്നീ നക്ഷത്രങ്ങളുടെ കാര്യത്തിൽ ജന്മശനിയുടെ ധൃതരാഷ്ട്രാലിംഗനത്തിന് അയവ് വരും. സാഹചര്യങ്ങൾ അനുഗുണമാവുന്നതാണ്. എതിർപ്പ് പ്രകടിപ്പിച്ചിരുന്നവർ അനുകൂലരാവും. കുടുംബപ്രശ്നങ്ങൾക്ക് ഉചിതമായ പരിഹാരം കണ്ടെത്താനാവും. മാനസികസംഘർഷത്തിന് കുറച്ചൊക്കെ അയവ് വരുന്നതാണ്. ഉദ്യോഗസ്ഥലത്ത് നീതിയും പിന്തുണയും ലഭിച്ചേക്കും. ഉദ്യോഗാർത്ഥികൾക്ക് ചെറിയ വരുമാനമാർഗമെങ്കിലും തുറന്നുകിട്ടാതിരിക്കില്ല. രോഗസന്തപ്തർക്ക് സമാശ്വാസം അനുഭവപ്പെടുന്നതാണ്. ഭാവിയെ മുന്നിൽക്കണ്ട് പ്രവർത്തനങ്ങൾ നടത്താൻ ഇത് ഏറ്റവും ഉചിതമായ സന്ദർഭമാണ്.