ശനിയുടെ വക്രഗതി, ഈ നാളുകാരുടെ ഉത്കണ്ഠകൾക്ക് വിട, ഗുണഫലം കൂടും

വക്രത്തിൽ സഞ്ചരിക്കുന്ന ഗ്രഹത്തെ, വിശേഷിച്ചും പാപഗ്രഹത്തെ ‘ശക്തൻ’ എന്നാണ് വിളിക്കുക. ശനി മൂലക്ഷേത്രമായ കുംഭം രാശിയിൽ, ചതയം നക്ഷത്രത്തിലാണ് ഇപ്പോൾ സഞ്ചരിക്കുന്നത്. അത് ശനിയുടെ ഒരു ബലസ്ഥാനം ആണ്. വക്രവും കൂടിയാവുമ്പോൾ കൂടുതൽ ശക്തനാവുന്നു. ശനിയുടെ പാപത്വം കുറയും; ദോഷശക്തി ന്യൂനീകരിക്കും എന്നിവയൊക്കെയാണ് ഇതിൽ നിന്നും വ്യക്തമാക്കുന്നത്.

സൂര്യനിൽ നിന്നും 108 ഡിഗ്രി പിന്നിലാവുമ്പോൾ ശനിയുടെ വക്രം തുടങ്ങും. സൂര്യൻ മിഥുനം രാശിയിൽ 3 ഡിഗ്രി 19 മിനിറ്റിലും ശനി കുംഭം രാശിയിൽ 13 ഡിഗ്രി രണ്ട് മിനിറ്റിലും സഞ്ചരിക്കുമ്പോഴാണ് വക്രം തുടങ്ങുന്നത്. ഇപ്പോൾ ഇരുഗ്രഹങ്ങളും തമ്മിൽ കൃത്യം 108 ഡിഗ്രി അകലമായിക്കഴിഞ്ഞു. വക്രം തുടങ്ങിയാൽ ശനി ആറ് ഡിഗ്രി മാത്രമാണ് പിന്നിൽ പോവുക. അതിനാൽ ശനി ഇപ്പോഴത്തെ വക്രഗതിയിൽ കുംഭം രാശിയിൽ തന്നെയാണ് ഉണ്ടാവുക.

ചതയം രണ്ടാം പാദത്തിലാണിപ്പോൾ ശനി. ചതയത്തിന്റെ രണ്ടും ഒന്നും പാദങ്ങൾ പിന്നിലേക്ക് പോയി, അവിട്ടം നാലാം പാദത്തിൽ സഞ്ചരിക്കുമ്പോൾ ശനിയുടെ വക്രം അവസാനിക്കും. 2023 ജൂൺ 21 മുതൽ നവംബർ 6 വരെ ഏതാണ്ട് 140 ദിവസമാണ് ശനിയുടെ വക്രകാലം. ശനിയുടെ വക്രഗതി അടുത്ത നാലഞ്ച് മാസക്കാലത്തേക്ക് ശനിയുടെ വക്രഗതി അടുത്ത നാലഞ്ച് മാസക്കാലത്തേക്ക് മേടക്കൂറിൽ വരുന്ന അശ്വതി, ഭരണി, കാർത്തിക,കന്നിക്കൂറിൽ വരുന്ന ഉത്രം, അത്തം, ചിത്തിര, തുലാക്കൂറിൽ വരുന്ന ചിത്തിര, ചോതി, വിശാഖം എന്നീ നാളുകളിൽ ജനിച്ചവർക്ക് നൽകുന്ന ഫലങ്ങളെ കുറിച്ച് വായിക്കാം.

മേടക്കൂറിൽ വരുന്ന അശ്വതി, ഭരണി, കാർത്തിക ഒന്നാം പാദത്തിൽപ്പെട്ടവർക്ക് ഗുണഫലമാണ്, ശനി ഇപ്പോൾ നൽകി വരുന്നത്. അത് കുറച്ചുകൂടി കൂടും. ഗൃഹത്തിലെ മുതിർന്നവർക്ക് സന്തോഷം ഭവിക്കും. അവരുടെ ആരോഗ്യകാര്യത്തിൽ മെച്ചം വരാം. പൂർവ്വികസ്വത്തുക്കൾ അനുഭവത്തിലും അവകാശത്തിലും വന്നെത്തും. അതുസംബന്ധിച്ച തർക്കങ്ങൾ പരിഹൃതമാവും. മക്കൾക്ക് ശ്രേയസ്സുണ്ടാവും. തൊഴിൽ പുഷ്ടിപ്പെടാം. വരുമാനം ഉയരുന്നതാണ്. വ്യക്തി, തൊഴിൽ കാര്യങ്ങളിൽ വിജയം ഉറപ്പാണ്.

കന്നിക്കൂറിൽ വരുന്ന ഉത്രം മുക്കാൽ, അത്തം, ചിത്തിര ആദ്യ പകുതിയിൽപ്പെട്ടവർക്ക് തൊഴിലിലെ ആലസ്യം മാറും. നവോന്മേഷം സംജാതമാകും. വ്യാപാരികളുടെ കെട്ടിക്കിടക്കുന്ന ഉല്പന്നങ്ങൾ ഒരു പരിധി വരെ വിറ്റഴിക്കാൻ സാധിക്കും. സാമ്പത്തിക ദുരിതത്തിന് തെല്ലെങ്കിലും ആശ്വാസം വന്നെത്തുന്നതാണ്. രോഗാരിഷ്ടകളാൽ ദുരിതം പേറുന്നവർക്ക് ഉചിതമായ ചികിൽസക്ക് അവസരം സംജാതമാകും. പല കാരണങ്ങളാൽ നാട്ടിലേക്ക് മടങ്ങാൻ കഴിയാതെ വിഷമിക്കുന്നവർക്ക് പ്രസ്തുതക്ലേശത്തിന് പരിഹാരമാവും. മുടങ്ങിക്കിടക്കുന്ന വീടുപണി തുടരാനുള്ള വഴിയൊരുങ്ങും. മക്കളുടെ കാര്യത്തിലുള്ള ഉൽക്കണ്ഠകൾക്കും പരിഹാരം ലഭിക്കാം.

തുലാക്കൂറിൽ വരുന്ന ചിത്തിര രണ്ടാം പകുതി, ചോതി, വിശാഖം മുക്കാൽവരെയുള്ളവരുടെ കാര്യത്തിൽ അതിചിന്തയും കർമ്മഭംഗവും കുടുംബക്ലേശവും ജീവിതത്തെ പിന്നിലേക്ക് വിളിച്ചിരുന്ന കാലത്തിന് അവസാനം വരികയാണ്. മക്കളുടെ കാര്യത്തിൽ ഉണ്ടായിരുന്ന ആകുലതയ്ക്ക് പരിഹാരം പ്രതീക്ഷിക്കാം. സാമ്പത്തികമായ അപര്യാപ്തതകൾ നീങ്ങും. സ്വന്തം തൊഴിലിൽ നിന്നും ആദായം കൂടും. ഉപരിപഠനത്തിന് അവസരങ്ങൾ സിദ്ധിക്കും. ദാമ്പത്യത്തിൽ അനുരഞ്ജനം സാധ്യമാകും. രോഗാവസ്ഥയ്ക്ക് മാറ്റം പ്രതീക്ഷിക്കാം. കച്ചവടക്കാർക്ക് വായ്പാ തിരിച്ചടവ് സാധ്യമാകും. പുതുവാഹനം വാങ്ങാൻ കഴിയുന്നതാണ്.