Rahu Ketu transit 2023 Star Predictions, Aswathi to Revathi Stars: രാഹു-കേതു രാശി മാറ്റം, അശ്വതി മുതൽ രേവതി വരെയുള്ളവരെ എങ്ങനെ ബാധിക്കും?

Rahu Ketu transit 2023 Star Predictions  Aswathy to Revathi Stars: 2023 ഒക്ടോബർ 30 ന് (1199 തുലാം 13 ന്) രാത്രി 9.30 ന് രാഹുവും കേതുവും രാശി മാറുന്നു. മേടം രാശിയിൽ നിന്നും മീനം രാശിയിലേക്ക് രാഹുവും, തുലാം രാശിയിൽ നിന്നും കന്നി രാശിയിലേക്ക് കേതുവും മാറുന്നു. 'അപസവ്യഗതിയിൽ' അഥവാ Anti-Clockwise രീതിയിൽ ആണ് രാഹുവും കേതുവും സഞ്ചരിക്കുന്നത് എന്നത് ഓർക്കുന്നത് ഇവിടെ സംഗതമായിരിക്കും. മറ്റു ഗ്രഹങ്ങൾ സവ്യഗതിയിൽ അഥവാ Clock Wise ആണ് സഞ്ചരിക്കുന്നത്.

ഒരു രാശിയിൽ ഒന്നര വർഷം അഥവാ 18 മാസം ഇരുഗ്രഹങ്ങളും പ്രതിലോമ ഗതിയിൽ സഞ്ചരിക്കുന്നു. ഇനി രാഹു 18 മാസം മീനം രാശിയിലും കേതു 18 മാസം കന്നിരാശിയിലും സഞ്ചരിക്കും. 2025 മേയ് മാസത്തിൽ രാഹു പിന്നിലേക്ക് സഞ്ചരിച്ച് കുംഭത്തിലേക്കും, കേതു പിന്നിലേക്ക് സഞ്ചരിച്ച് ചിങ്ങം രാശിയിലേക്കും മാറും.

ഗ്രഹനിലയിൽ പരസ്പരം ഏഴാം രാശിയിലാവും രാഹുകേതുക്കളുടെ നിൽപ്പും സഞ്ചാരവും. ആകെ 360 ഡിഗ്രിയാണ് രാശിചക്രത്തിന്റെ വ്യാപ്തി. ഇരുഗ്രഹങ്ങളും പരസ്പരം 180 ഡിഗ്രി അകലത്തിൽ ആവും എപ്പോഴും നിലകൊള്ളുക.

രാഹുവിനെ ശനിയോടും കേതുവിനെ ചൊവ്വയോടും ആചാര്യന്മാർ ഉപമിക്കുന്നു. ഏതു രാശിയിലാണോ നിൽക്കുന്നത് ആ രാശിയുടെ അധിപന്റെ സ്വഭാവവും പ്രകൃതവും ഈ ഗ്രഹങ്ങൾ പ്രകടിപ്പിക്കും. ഒപ്പം സഞ്ചരിക്കുന്ന ഗ്രഹം, നിൽക്കുന്ന നക്ഷത്രത്തിന്റെ അധിപനായ ഗ്രഹം എന്നിവയുടെ പ്രകൃതവും രാഹുകേതുക്കൾക്ക് ഉണ്ടാവും.

'Dragon's Head' എന്നിങ്ങനെ രാഹുവിനെയും 'Dragon's Tail' എന്നിങ്ങനെ കേതുവിനെയും പാശ്ചാത്യർ സംബോധന ചെയ്യുന്നു. ശാസ്ത്രജ്ഞരുടെ ഭാഷയിൽ ആരോഹണ പാതൻ അഥവാ Ascending Node ആണ് രാഹു. അവരോഹണ പാതൻ അഥവാ Descending Node ആണ് കേതു. ഗ്രഹനിലയിൽ സർപ്പൻ എന്നതിലെ ആദ്യാക്ഷരമായ 'സ' രാഹുവിനെയും, ശിഖി എന്നതിലെ ആദ്യാക്ഷരമായ 'ശി' കേതുവിനെയും സൂചിപ്പിക്കുന്നു. നവഗ്രഹങ്ങളിൽ നിഴൽ ഗ്രഹങ്ങളാണ് (Shadow Planets) രാഹുകേതുക്കൾ.

പാപഗ്രഹങ്ങൾ, അശുഭഗ്രഹങ്ങൾ, രാക്ഷസ ഗ്രഹങ്ങൾ എന്നീ വിശേഷണങ്ങളുമുണ്ട്. നിൽക്കുന്ന അഥവാ സഞ്ചരിക്കുന്ന രാശിയുടെ 3,6,11 എന്നീ ഭാവങ്ങളിൽ മാത്രമാണ് രാഹുവും അതെ, കേതുവും അതെ, ഗുണദാതാക്കളാവുന്നത്. ജന്മരാശിയിലും 8, 12 എന്നീ രാശികളിലും അതിദോഷപ്രദന്മാരാണ്. മറ്റു ഭാവങ്ങളിലും പ്രായേണ പ്രതികൂല ഫലദാതാക്കളാണ് രാഹുവും കേതുവും.

ഓരോ നക്ഷത്രത്തിലും ശരാശരി 8 മാസം ആണ് രാഹു - കേതു സഞ്ചാരം. 2023 ഒക്ടോബർ 30 മുതൽ 8 മാസം, 2024 ജൂലയ് ആദ്യ ആഴ്ച വരെ രാഹു രേവതി നാളിലും പിന്നീട് 8 മാസം ഉത്രട്ടാതിയിലും, പിന്നീട് 8 മാസം പൂരൂരുട്ടാതിയിലും എന്ന ക്രമത്തിൽ പിന്നിലേക്ക് സഞ്ചരിക്കുന്നു. കേതു തുലാം രാശിയിൽ ചിത്തിര 4,3 പാദങ്ങളിൽ സഞ്ചരിച്ച് കന്നി രാശിയിൽ ആദ്യ നാലുമാസം (2024 മാർച്ച് ആദ്യ ആഴ്ച വരെ) ചിത്തിര 2,1 പാദങ്ങളിലും തുടർന്ന് 8 മാസം (2024 നവംബർ വരെ) അത്തം നാളിലും പിന്നീട് 8 മാസം ഉത്രം നാളിലും എന്ന ക്രമത്തിൽ പിന്നിലേക്ക് നീങ്ങുന്നു.

രാഹുവിന്റെയും കേതുവിന്റെയും മീനം- കന്നി രാശികളിലെ സഞ്ചാരം മേടക്കൂറു മുതൽ മീനക്കൂറുവരെയുള്ള പന്ത്രണ്ട് രാശികളിലും അവയ്ക്കുള്ളിലെ അശ്വതി മുതൽ രേവതി വരെയുള്ള നക്ഷത്രക്കാരെ എങ്ങനെ സ്വാധീനിക്കുന്നുവെന്ന അന്വേഷണം ഇവിടെ വിശദമായി അവതരിപ്പിക്കുന്നു.

മേടക്കൂറിന്

(അശ്വതി, ഭരണി, കാർത്തിക ഒന്നാം പാദം): ജന്മരാശിയിൽ നിന്നും പന്ത്രണ്ടാം രാശിയിലേക്ക് രാഹുവും ഏഴാം രാശിയിൽ നിന്നും ആറാം രാശിയിലേക്ക് കേതുവും മാറുന്നു. രാഹുവിന്റെ ജന്മരാശിയിൽ നിന്നുള്ള മാറ്റം വലിയൊരാശ്വാസം തന്നെയാവും. എന്നാൽ മുഴുവനും ഗുണകരമാണെന്നും പറയുക വയ്യ. പന്ത്രണ്ടിലെ രാഹു പാഴ്ച്ചെലവുകൾ, അനാവശ്യ യാത്രകൾ, നാടുവിട്ടുപോകൽ, പാപകർമ്മങ്ങളോട് ആസക്തി, സ്ഥാനഭ്രംശം, ദാമ്പത്യ ക്ലേശങ്ങൾ എന്നിവയ്ക്ക് കാരണമാകാറുണ്ട്. ഇതിൽ നിന്നും മേടക്കൂറുകാർക്ക് രാഹുമാറ്റം അത്രമേൽ ഗുണകരമല്ലെന്ന് വ്യക്തം.

ഏഴാമെടത്തിൽ നിന്നും ആറാമെടത്തിലേക്കുള്ള കേതുമാറ്റം അത്യന്തം ഗുണപ്രദമാണ്. പ്രണയ പരാജിതർക്കും ദാമ്പത്യ ക്ലേശിതർക്കും അവരുടെ വിഷമം നീങ്ങും. മനസ്സ് വീണ്ടും അനുരാഗസുരഭിലമാകുന്നതാണ്. കർമ്മരംഗം ഉണരും. തടഞ്ഞുവെച്ച ഉദ്യോഗക്കയറ്റം നിലവിൽ വരും. രാഷ്ട്രീയവിജയം, രോഗമുക്തി, ധനലാഭം എന്നിവയും പ്രതീക്ഷിക്കാം.

ഇടവക്കൂറിന്

(കാർത്തിക 2,3,4 പാദങ്ങൾ, രോഹിണി, മകയിരം 1,2 പാദങ്ങൾ): രാഹു, ഇടവക്കൂറിന്റെ പന്ത്രണ്ടാം ഭാവത്തിൽ നിന്നും പതിനൊന്നിലേക്കും കേതു, ഇടവക്കൂറിന്റെ ആറാം ഭാവത്തിൽ നിന്നും അഞ്ചാം ഭാവത്തിലേക്കും മാറുകയാണ്. പന്ത്രണ്ടിലെ രാഹു കഴിഞ്ഞ ഒന്നരവർഷമായി ഇടവക്കൂറുകാർക്ക് പലതരം കഷ്ടനഷ്ടങ്ങൾക്കും മാനസിക ദു:ഖങ്ങൾക്കും കാരണമായിരുന്നിരിക്കാം. ആ ദു:സ്ഥിതി മാറി രാഹു കച്ചവടത്തിൽ നേട്ടം, ഉദ്യോഗത്തിൽ വലുതായ ഉയർച്ച, ധനോന്നതി, ഭോഗസുഖം, പഠിപ്പിൽ വളർച്ച, മത്സര വിജയം, കാര്യസിദ്ധി, വ്യവഹാരത്തിൽ മേൽക്കൈ എന്നിവ സമ്മാനിക്കും.

ഗുണകരമായ ഭാവത്തിൽ നിന്നും സമ്മർദ്ദമേകുന്ന ഭാവത്തിലേക്ക് കേതു മാറുന്നതിനാൽ കുടുംബസുഖം കുറയാം. മക്കളുടെ കാര്യത്തിൽ വിഷമം വരാം. സ്വയം ശാഠ്യം പുലർത്താം. നല്ല തീരുമാനങ്ങളെടുക്കാൻ മനസ്സിന് ശക്തിയുണ്ടാവില്ലെന്ന സ്ഥിതിയും വന്നേക്കാം. തെറ്റായ ഉപദേശങ്ങൾ കേൾക്കുക, തെറ്റായ ഉപദേശങ്ങൾ നൽകേണ്ടിവരിക എന്നതും കേതുമാറ്റത്താൽ സംഭവിച്ചേക്കാം.

മിഥുനക്കൂറിന്

(മകയിരം3,4 പാദങ്ങൾ, തിരുവാതിര, പുണർതം 1,2,3 പാദങ്ങൾ): രാഹു, മിഥുനക്കൂറിന്റെ പതിനൊന്നാമെടത്തിൽ നിന്നും പത്താമെടത്തിലേക്കും കേതു അഞ്ചാമെടത്തിൽ നിന്നും നാലാമെടത്തിലേക്കും പകരുന്നു. നല്ല അനുഭവങ്ങൾ ആണ് രാഹു സമ്മാനിച്ചിരുന്നത്. എന്നാൽ പത്തിലെ രാഹുവിൽ നിന്നും പ്രതികൂലാനുഭവങ്ങൾ ഏറും. മുഖ്യമായും തൊഴിൽ രംഗത്തെ ബാധിക്കാനിടയുണ്ട്. ഉദ്യോഗസ്ഥർക്ക് അർഹമായ സ്ഥാനക്കയറ്റം കിട്ടാനിടയില്ല. കച്ചവടക്കാർക്ക് ലാഭം കുറയും. തൊഴിലാളികളിൽ നിന്നും പ്രശ്നങ്ങൾ ഉണ്ടാവാം. പൊതുപ്രവർത്തനത്തിൽ ജനപിന്തുണ കുറയുന്നതാണ്.

കേതുവിന്റെ നാലിലെ സ്ഥിതി മൂലം ഗാർഹിക ജീവിതത്തിൽ സ്വസ്ഥത കുറയാനിടവരാം. വീട്, വാഹനം ഇവയ്ക്ക് അറ്റകുറ്റപ്പണി വേണ്ടി വന്നേക്കും. സുഹൃത്തുക്കളുടെയും ബന്ധുക്കളുടെയും പിന്തുണ ലഭിച്ചേക്കില്ല. മനസ്സിൽ പിരിമുറുക്കങ്ങൾ കൂടാം. അമ്മയുടെ ആരോഗ്യത്തിൽ ശ്രദ്ധയുണ്ടാവണം. ഉപരിവിദ്യാഭ്യാസ സാധ്യതകൾക്ക് മങ്ങലേൽക്കുന്നതാണ്.

കർക്കടകക്കൂറിന്

(പുണർതം നാലാം പാദം, പൂയം, ആയില്യം): രാഹു പത്താം ഭാവത്തിൽ നിന്നും ഒമ്പതാം ഭാവത്തിലേക്കും, കേതു നാലാം ഭാവത്തിൽ നിന്നും മൂന്നാം ഭാവത്തിലേക്കും മാറുന്നു. കർമ്മരംഗത്ത് തടസ്സം സൃഷ്ടിച്ചു കൊണ്ടിരുന്ന രാഹു ഭാഗ്യസ്ഥാനത്തേക്കാണ് വരുന്നത്. തന്മൂലം കർക്കടകക്കൂറുകാരുടെ ഭാഗ്യവും ദൈവാധീനവും തടസ്സപ്പെടാം. കപ്പിനും ചുണ്ടിനുമിടയിൽ ചില അവസരങ്ങൾ നഷ്ടപ്പെട്ടേക്കാം. മൂല്യാധിഷ്ഠിതമായ സമീപനം കൈക്കൊള്ളില്ലെന്ന ആരോപണമുയർന്നേക്കും. സർക്കാരിൽ നിന്നും കിട്ടേണ്ട നേട്ടങ്ങൾ അല്പം മന്ദഗതിയിലാകാൻ സാധ്യത കാണുന്നു. പിതാവിന്റെ ആരോഗ്യത്തിൽ ജാഗ്രത വേണം. വ്രതം, അനുഷ്ഠാനം, ഉപാസന എന്നിവയിൽ തടസ്സങ്ങൾ വരാം.

മൂന്നിലെ കേതു ഗുണദാതാവാണ്. കർമ്മരംഗത്തെ ഉദാസീനത മാറും. പുതുസംരംഭങ്ങൾ വേഗം വിജയപഥത്തിലെത്തും. അധികാരമുള്ള പദവികൾ ലഭിക്കാനിടയുണ്ട്. പ്രമുഖ വ്യക്തിത്വങ്ങൾ പിന്തുണച്ചേക്കും. സ്വയം ഒരു തിരുത്തൽ ശക്തി ആവാനും കഴിയും.

ചിങ്ങക്കൂറിന്

(മകം, പൂരം, ഉത്രം ഒന്നാം പാദം): രാഹു, ഭാഗ്യസ്ഥാനമായ ഒമ്പതാമെടത്തിൽ നിന്നും ദു:സ്ഥാനമായ എട്ടാമെടത്തിലേക്കും കേതു അനുകൂല ഭാവമായ മൂന്നാമെടത്തിൽ നിന്നും പ്രതികൂല ഭാവമായ രണ്ടാമെടത്തിലേക്കും മാറുകയാണ്. എട്ടിലെ രാഹു, ദോഷപ്രദനാണ്. നിർഭാഗ്യമനുഭവപ്പെടും. അച്ഛന്റെ സ്വത്തുക്കൾ സംബന്ധിച്ച വ്യവഹാരത്തിൽ തോൽവിയുണ്ടാകാം. അനാവശ്യമായ ഭയപ്പാടുകൾ മനസ്സിൽ നിറയാം. പൊതുവേ നിരുന്മേഷത അനുഭവപ്പെടാം.

പല പ്രവൃത്തികളും ലക്ഷ്യത്തിലെത്താൻ അകാരണമായ കാലവിളംബം ഭവിച്ചേക്കാം. ആദ്ധ്യാത്മിക കാര്യങ്ങൾ മുടങ്ങാനിടയുണ്ട്. ബന്ധുവിയോഗം, ദേഹക്ലേശം തുടങ്ങിയ അനുഭവങ്ങളും സാധ്യതയിലുണ്ട്. രണ്ടാമെടം മുഖ്യമായും വാക്-ധന- കുടുംബ സ്ഥാനമാണ്. കേതു അവിടെ സ്ഥിതി ചെയ്യുകയാൽ ധനപരമായ ക്ലേശങ്ങൾ വന്നുചേരും. പണമെടപാടുകളിൽ പഴി കേൾക്കേണ്ടതായി വന്നേക്കാം. മുഖരോഗങ്ങൾ വലയ്ക്കാനിടയുണ്ട്. വിദ്യാർത്ഥികൾക്ക് പഠനവൈകല്യം ഭവിക്കാം.

കന്നിക്കൂറിന്

(ഉത്രം 2,3,4 പാദങ്ങൾ, അത്തം, ചിത്തിര 1,2 പാദങ്ങൾ): രാഹു, കന്നിക്കൂറിന്റെ എട്ടാമെടത്തിൽ നിന്നും ഏഴാമെടത്തിലേക്ക് മാറുന്നു. കേതു, രണ്ടാമെടത്തിലായിരുന്നത് ഇനി ജന്മരാശിയിലേക്ക് പകരുന്നു. ജന്മകേതു എന്നു പറയും. എട്ടിലെ രാഹു ദുരിത കർത്താവാണ്. അങ്ങനെ നോക്കുമ്പോൾ രാഹുവിന്റെ ഏഴാം ഭാവത്തിലേക്കുള്ള മാറ്റം കന്നിക്കൂറുകാർക്ക് തെല്ല് ആശ്വാസകരമാണ്. ഏഴാമെടം പ്രണയം, ദാമ്പത്യം എന്നിവയെ കുറിക്കുന്നു. അതിനാൽ പ്രണയത്തിൽ പരാജയം വരാം. ദാമ്പത്യത്തിൽ ഇണക്കവും പിണക്കവും തുടർക്കഥയായേക്കും. ആടിയുലഞ്ഞ ബന്ധങ്ങൾ പിരിഞ്ഞേക്കാം. പങ്കുകച്ചവടത്തിൽ സ്വസ്ഥത കുറയും. വീടുവിട്ടുനിൽക്കേണ്ട സാഹചര്യം ഉണ്ടാവാം. ആലോചനാപൂർവ്വമായ തീരുമാനങ്ങളും കരുതലും വേണ്ടതുണ്ട്.

കേതു ജന്മരാശിയിൽ സഞ്ചരിക്കുകയാൽ രോഗാവസ്ഥ അധികരിക്കാം. സാംക്രമിക രോഗങ്ങൾക്ക് എളുപ്പം വിധേയരായേക്കും. മനസ്സിൽ പെട്ടെന്ന് ക്ഷോഭം ഉണ്ടാവുന്നതാണ്. അഗ്നി, ആയുധം, വൈദ്യുതി എന്നിവ സൂക്ഷിച്ച് കൈകാര്യം ചെയ്യണം. യോഗ, ധ്യാനം, മനോനിയന്ത്രണ മാർഗങ്ങൾ എന്നിവ പരിശീലിക്കുന്നത് നന്നായിരിക്കും.

തുലാക്കൂറിന്

(ചിത്തിര 3, 4 പാദങ്ങൾ, ചോതി, വിശാഖം 1,2,3 പാദങ്ങൾ) രാഹു, തുലാക്കൂറിന്റെ ഏഴാമെടത്തിൽ നിന്നും ആറാമെടത്തിലേക്കും കേതു, ജന്മരാശിയിൽ നിന്നും പന്ത്രണ്ടാമെടത്തിലേക്കും പകരുന്നു. ഇപ്പോൾ സംഭവിക്കുന്ന രാഹുവിന്റെ രാശിമാറ്റം ഏറ്റവും ഗുണകരമാവുന്ന കൂറുകളിലൊന്ന് തുലാക്കൂറാണ്. ആറാമെടത്തിലെ പാപഗ്രഹങ്ങൾ വലിയ തോതിലുള്ള നേട്ടങ്ങൾക്ക് കാരണമാകും. രാഹുവിന്റെ കാര്യവും അപ്രകാരം തന്നെയാണ്.

ജീവിതനിലവാരം ഉയരുമെന്നതിൽ സന്ദേഹം വേണ്ടതില്ല. സാമ്പത്തിക്ലേശം നീങ്ങി, നിക്ഷേപങ്ങളുണ്ടാവും. സ്വന്തം തൊഴിലിൽ അഭ്യുദയം പ്രതീക്ഷിക്കാം. ഉദ്യോഗസ്ഥർക്ക് സ്ഥാനോന്നതി, വേതനവർദ്ധനവ് ഇവ പ്രതീക്ഷിക്കാം. രോഗദുരിതങ്ങൾ നിയന്ത്രണത്തിലാവും. ശത്രുക്കളെക്കൊണ്ടുള്ള ഉപദ്രവം വഴിമാറിപ്പോകുന്നതാണ്. കുടുംബസൗഖ്യം മറ്റൊരു പ്രധാന അനുഭവമായിരിക്കും.

ജന്മകേതു മാറുന്നത് വലിയൊരു ആശ്വാസമാണ്. എങ്കിലും പന്ത്രണ്ടിലെ കേതു ചില കഷ്ടനഷ്ടങ്ങൾ വരുത്തിയേക്കാം. ചിലർക്ക് അന്യനാട്ടിൽ ജീവിതം കരുപ്പിടിപ്പിക്കേണ്ട സാഹചര്യം സംജാതമാകും. വിദ്യാർത്ഥികൾക്ക് വിദൂര വിദ്യാഭ്യാസം വേണ്ടി വന്നേക്കും. ചിലപ്പോഴെങ്കിലും മനസ്സ് നന്മയിൽ നിന്നും വ്യതിചലിച്ചേക്കാം. ചെലവ് അധികരിക്കാൻ സാധ്യതയുണ്ട്. പാദരോഗങ്ങൾ ഉപദ്രവിച്ചേക്കാം.

വൃശ്ചികക്കൂറിന്

(വിശാഖാം നാലാംപാദം, അനിഴം, തൃക്കേട്ട): രാഹു, വൃശ്ചികക്കൂറിന് ആറാമെടത്തായിരുന്നു. ഇനി അഞ്ചാമെടത്തിലേക്ക് മാറുന്നു. കേതു പന്ത്രണ്ടാം രാശിയിലായിരുന്നു. ഇനി പതിനൊന്നാമെടത്തിലേക്ക് പകരുന്നു. ഗുണകരവും ക്ഷേമപ്രദവുമായ സ്ഥാനമാണ് ആറാമെടം. രാഹു അവിടെ നിന്നും അഞ്ചിലെത്തുമ്പോൾ ഗുണം കുറയുന്നു. കാര്യങ്ങളുടെ ശീഘ്രത മെല്ലെപ്പോക്കായി മാറുന്നു.

ബുദ്ധി അലസമാകുന്നു. പലതും സമയബന്ധിതമായി തീർക്കാൻ ഉത്സാഹം കാട്ടാതെ വരും. നല്ല ഉപദേശം എന്ന് കരുതി ദുർബോധനങ്ങളുടെ പിറകെ പോകും. അഞ്ചാമെടം മക്കളെ ചിന്തിക്കുന്ന ഭാവം കൂടിയാണ്. അതിനാൽ മക്കളുടെ പരിപാലനം, പഠിപ്പ് തുടങ്ങിയ കാര്യങ്ങളിൽ നല്ല ശ്രദ്ധ ആവശ്യമാണ്.
ഉദരരോഗത്തിന് ചികിൽസ വേണ്ടിവരാം.

അനിഷ്ടഭാവത്തിൽ നിന്നും നീങ്ങി ഇഷ്ടഭാവത്തിലാണ് കേതു വരുന്നത്. നേർവഴിയിലൂടെയും കുറുക്കുവഴികളിലൂടെയും സമ്പാദ്യമുണ്ടാവും. കച്ചവടത്തിൽ ആദായമുയരും. സകുടുംബം വിനോദയാത്രകൾക്കും തീർത്ഥാടനത്തിനും അവസരം സിദ്ധിക്കും. ആഢംബരവസ്തുക്കൾ വാങ്ങും. വയോജനങ്ങളുടെ ആരോഗ്യത്തിൽ പുരോഗതിയുണ്ടാവുന്നതാണ്. പൊതുരംഗത്ത് ബഹുമാന്യതയേറും.

ധനുക്കൂറിന്

(മൂലം, പൂരാടം, ഉത്രാടം ഒന്നാം പാദം): രാഹു, ധനുക്കൂറിന്റെ അഞ്ചാമെടത്തുനിന്നും നാലാമെടത്തേക്ക് മാറുന്നു. കേതു, പതിനൊന്നാമെടത്തിൽ നിന്നും പത്താമെടത്തിലേക്ക് പകരുന്നു. നാലാമെടം കൊണ്ട് ഗൃഹവും സുഹൃത്തുക്കളും ബന്ധുക്കളും ചിന്തിക്കപ്പെടുന്നു. വാഹനം, മനസ്സ്, അമ്മ എന്നിവയും നാലാമെടം കൊണ്ടാണ് മനസ്സിലാക്കപ്പെടുക. രാഹു, നാലാം ഭാവത്തിലേക്ക് വരികയാൽ ഇവയ്ക്കെല്ലാം ചെറുതോ വലുതോ ആയ രീതിയിൽ പോരായ്മകളും പരാധീനതകളും വരുന്നതാണ്. സുഹൃത്തുക്കളും ബന്ധുക്കളും പിണങ്ങാം. സഹായവാഗ്ദാനങ്ങൾ നിറവേറപ്പെടാതെ പോകാം. ഗൃഹനിർമ്മാണം പതുക്കെയാകുന്നതാണ്. വാഹനത്തിന് മെയിന്റനൻസ് വേണ്ട സ്ഥിതിയുണ്ടാവാം. വളർത്തുമൃഗങ്ങളാൽ ഉപദ്രവം ഭവിച്ചേക്കാം. മാതാവിന്റെ ആരോഗ്യസ്ഥിതിയിൽ ഉൽക്കണ്ഠ ഉണ്ടായേക്കാം. വിദ്യാർത്ഥികൾക്ക് ഉപരിപഠനത്തിൽ പ്രശ്നങ്ങൾ വന്നെത്താനിടയുണ്ട്.

കേതുവിന്റെ സ്ഥിതിയും അത്ര അനുകൂലമല്ല. തൊഴിലിൽ മാന്ദ്യം, തൊഴിൽ ചെയ്യുന്നതിന് ഉത്സാഹക്കുറവ് എന്നിവ അനുഭവപ്പെട്ടേക്കാം. തൊഴിൽ തേടുന്നവരുടെ കാത്തിരിപ്പ് നീളുന്നതാണ്. ഉദ്യോഗസ്ഥർക്ക് ഒപ്പമുള്ളവരുടെ പിന്തുണ കിട്ടിയെന്ന് വരില്ല. ചുമതലകൾ പൂർത്തിയാക്കുന്നതിൽ ക്ലേശിച്ചേക്കും. ദൂരദിക്കുകളിലേക്ക് അപ്രതീക്ഷിത സ്ഥലം മാറ്റവും ഒരു സാധ്യതയാണ്.

മകരക്കൂറിന്

(ഉത്രാടം 2,3,4 പാദങ്ങൾ, തിരുവോണം, അവിട്ടം 1,2 പാദങ്ങൾ): രാഹു, മകരക്കൂറിന് നാലാമെടുത്തു നിന്നും മൂന്നാമെടത്തിലേക്ക് പകരുന്നു. കേതു, പത്താം ഭാവത്തിൽ നിന്നും ഒമ്പതാം ഭാവത്തിലേക്കും മാറുന്നു.പാപഗ്രഹങ്ങൾ മൂന്നാം രാശിയിൽ ഗുണദാതാക്കളത്രെ! അതിനാൽ മീനത്തിലെ രാഹു, മകരക്കൂറുകാർക്ക് ധാരാളം നേട്ടങ്ങൾ സൃഷ്ടിക്കും.

പഠനത്തിൽ മികവുണ്ടാകുന്നതാണ്. ഗവേഷണം ഭംഗിയായി പൂർത്തീകരിക്കാനാവും. നവസംരംഭങ്ങൾ തുടങ്ങാനായേക്കും. നവമാധ്യമങ്ങളിൽ പുതിയ ആശയങ്ങളുമായി മുന്നോട്ടു പോകാൻ കഴിയുന്നതാണ്. നിലവിലെ ജോലിയിൽ പുരോഗമനാത്മകമായ മാറ്റം വന്നെത്തും. പ്രമുഖരുടെ ഒത്താശയുണ്ടാവും. കുടുംബജീവിതം ഐശ്വര്യപൂർണമാകുന്നതാണ്. ഗൃഹനിർമ്മാണം പൂർത്തീകരിക്കുവാൻ സാധിച്ചേക്കും. മാനസികവും ശാരീരികവും ആയ ആരോഗ്യം മെച്ചപ്പെടുന്നതാണ്.

പത്താം ഭാവത്തിൽ നിന്നും കേതു ഒമ്പതിലേക്കു വരികയാൽ ഉപാസനാദികൾക്കും ദൈവവഴിപാടുകൾക്കും തടസ്സം വരാം. സൽകർമ്മങ്ങൾ നീട്ടി വെക്കേണ്ടതായ സ്ഥിതി സംജാതമാകാം. ചില പ്രവർത്തനങ്ങൾ സജ്ജനങ്ങളിൽ അവമതിപ്പുണ്ടാക്കിയേക്കാം. പിതാവിന്റെ വിരോധം നേടാനിടയുണ്ട്. വളരെ ചെറിയ നേട്ടങ്ങൾ വന്നുചേരുകയും ചെയ്യും.

കുംഭക്കൂറിന്

(അവിട്ടം 3,4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ): രാഹു, കുംഭക്കൂറുകാർക്ക്, മൂന്നാം ഭാവത്തിൽ നിന്നും രണ്ടിലേക്കും, കേതു, ഒമ്പതിൽ നിന്നും എട്ടാം ഭാവത്തിലേക്കും വരുന്നു. രണ്ടാം ഭാവത്തിലേക്ക് വരുന്ന രാഹു, ദോഷപ്രദനാണ്. മാരകസ്ഥാനമാണ് രണ്ടാമെടം. കാര്യതടസ്സം ഭവിക്കുന്നതാണ്. മനസ്സിൻ ഭയപ്പാടുകൾ വരാം. സൽചിന്തകൾ മറയും. തെറ്റായ കാര്യങ്ങൾ ചെയ്യാൻ പ്രേരണയുണ്ടാകാം. അധികാരികളുടെ കണ്ണിലെ കരടാകും. കടബാധ്യത വർദ്ധിച്ചേക്കാം. വലിയ സാമ്പത്തിക മുതൽ മുടക്ക് വേണ്ട കാര്യങ്ങൾ തുടങ്ങാതിരിക്കുകയാണ് അഭികാമ്യം.

ഉയർന്ന പദവികൾ ലഭിക്കാനുള്ള ശ്രമം വിജയം കാണണമെന്നില്ല. ചെറുതും വലുതുമായ എല്ലാ പ്രവർത്തനങ്ങളും ആലോചനാപൂർവ്വം വേണം നിർവഹിക്കുവാൻ. വിദ്യാർത്ഥികൾക്ക് പഠനത്തിൽ തടസ്സം വരാനിടയുണ്ട്.

കേതു, അഷ്ടമത്തിലാകയാൽ ദോഷാധിക്യം തന്നെയാണ് ഫലം. സാഹസങ്ങൾ ഒഴിവാക്കണം. വാഹനം, അഗ്നി ഇവയുടെ ഉപയോഗം കരുതലോടെ വേണ്ടതുണ്ട്. സാംക്രമിക രോഗങ്ങൾ ബാധിക്കാൻ സാധ്യത കാണുന്നു.

മീനക്കൂറിന്

(പൂരൂരുട്ടാതി നാലാം പാദം, ഉത്രട്ടാതി, രേവതി): രാഹു, മീനക്കൂറിന് രണ്ടാം രാശിയിൽ നിന്നും ജന്മരാശിയിലേക്ക് പകരുന്നു. കേതു, അഷ്ടമത്തിൽ നിന്നും ഏഴാം ഭാവത്തിലേക്കും മാറുന്നു. ജന്മരാഹു, ക്ലേശാനുഭവത്തെ സൂചിപ്പിക്കുന്നു. ജന്മശനിക്ക് തുല്യമായ തിക്താനുഭവങ്ങൾ രാഹുവും നൽകിയേക്കാം. വ്യക്തിത്വപ്രതിസന്ധി ഉണ്ടാവാം. ആരോഗ്യപ്രശ്നങ്ങൾ ഉടലെടുത്തേക്കാം. എല്ലാക്കാര്യത്തിലും വിശാലമായ ചിന്താഗതി പുലർത്തിയവർ അല്പം ഇടുങ്ങിയതെന്ന് പറയാവുന്ന ചിന്താഗതിയിലേക്ക് നീങ്ങാനിടയുണ്ട്. പ്രവർത്തനം മന്ദഗതിയിലായേക്കാം.

നല്ല തീരുമാനങ്ങൾ എടുക്കാനാവാതെ കുഴങ്ങുന്ന സ്ഥിതിയും ഒരു സാധ്യതയാണ്. പാപകർമ്മാസക്തിയും പറയാറുണ്ട്, ജന്മരാഹുവിന്. എട്ടാമെടത്തിൽ നിന്നും കേതു ഏഴാമെടത്തിലേക്ക് വരുന്നത് ചില കാര്യങ്ങളിലെങ്കിലും തെല്ല് ആശ്വാസകരമാണ്. ആയുർഭീതി, കാര്യവിഘ്നം, ബന്ധനം എന്നിവ നീങ്ങാം. എന്നാൽ പ്രണയം, ദാമ്പത്യം, കൂട്ടുകച്ചവടം ഇവയെ പ്രതികൂലമായി ബാധിച്ചേക്കും. വിദേശയാത്ര, അന്യദേശത്ത് പഠനം, ഭാര്യാഭർത്താക്കന്മാർ പിരിഞ്ഞുതാമസിക്കൽ എന്നിവയും ഏഴിലെ കേതു നൽകുന്ന ഫലങ്ങളിൽ ഉൾപ്പെടുന്നു.