2023 മേയ് ഒന്നാം തീയതി 1198 മേടം 17 തിങ്കളാഴ്ചയായിരുന്നു. മേയ് 15 ന് 1198 ഇടവമാസമായി. സൂര്യൻ മേടം- ഇടവം രാശികളിലായി സഞ്ചരിക്കുകയാണ്. 2023 മേയ് ഒന്നിന് ചന്ദ്രൻ പൂരം നക്ഷത്രത്തിലായിരുന്നു. മേയ് 31 ആകുമ്പോൾ ഒരു വട്ടം രാശിചക്രഭ്രമണം പൂർത്തിയാക്കിയ ചന്ദ്രൻ ചിത്തിര നക്ഷത്രത്തിൽ എത്തും.
വ്യാഴം മേടത്തിലും ശനി കുംഭത്തിലും സഞ്ചരിക്കുന്നു. രാഹുവും കേതുവും യഥാക്രമം മേടത്തിലും തുലാത്തിലും സഞ്ചരിക്കുന്നു. ബുധൻ ഈ മാസം മുഴുവൻ മേടം രാശിയിൽ തന്നെയാണ്. ശുക്രൻ മേയ് രണ്ടിന് ഇടവത്തിൽ നിന്നും മിഥുനത്തിലേക്കും ചൊവ്വ മേയ് 10 ന് മിഥുനത്തിൽ നിന്നും കർക്കടകത്തിലേക്കും സംക്രമിച്ചു.
ഈ നവഗ്രഹ സ്ഥിതി മുൻനിർത്തി പൂയം, വിശാഖം, ചിത്തിര, ഉത്രാടം, തൃക്കേട്ട എന്നീ അഞ്ച് നക്ഷത്രങ്ങളിൽ ജനിച്ചവരുടെ 2023 മേയ് മാസത്തെ സാമാന്യ ഫലങ്ങൾ ഇവിടെ വായിക്കാം.
പൂയം: പരീക്ഷ/അഭിമുഖം/ മത്സരം ഇവകളിൽ പ്രശംസാർഹമായ വിജയം നേടും. ചില പദവികളൊക്കെ കൈവരും. അധ്വാനം വിലമതിക്കപ്പെടുന്നതാണ്. വ്യക്തിത്വം ആദരിക്കപ്പെടും. ധനസ്ഥിതി മോശമാവില്ല. സർക്കാരുമായി ബന്ധമുള്ള കാര്യങ്ങൾ ഭംഗിയായി നടന്നുകിട്ടും. കിടപ്പ് രോഗികൾക്ക് ആശ്വാസമുണ്ടാകുന്ന കാലമാണ്. തൊഴിൽ തേടുന്നവർക്ക് പ്രതീക്ഷയ്ക്ക് വകയുണ്ട്. ചൊവ്വ ജന്മരാശിയിലേക്ക് പകരുന്നതിനാൽ ആരോഗ്യകാര്യത്തിൽ പ്രത്യേകമായ ശ്രദ്ധ ആവശ്യമുണ്ട്. അഗ്നി, ആയുധം, യന്ത്രം, വൈദ്യുതി, വാഹനം എന്നിവ ഏറ്റവും കരുതലോടെ ഉപയോഗിക്കുകയും വേണം.
വിശാഖം: തടസ്സങ്ങളുണ്ടായാലും ലക്ഷ്യം നേടുന്നതായിരിക്കും. വ്യാപാരത്തിൽ ദീർഘകാലപദ്ധതികൾ ആവിഷ്കരിക്കും. ഗവേഷണപ്രബന്ധം / സാഹിത്യകൃതി പരക്കെയുള്ള അഭിനന്ദനം നേടും. ബൗദ്ധികമത്സരങ്ങൾക്ക് തയ്യാറെടുപ്പുകൾ നടത്തും. സാങ്കേതിക മേഖലയിൽ ഉപരിപഠനത്തിനൊരുങ്ങും. തൊഴിലില്ലാത്തവർക്ക് പുതിയ വരുമാനമാർഗം വന്നുചേരുന്നതാണ്. കടം വാങ്ങാനുള്ള പ്രേരണ നിയന്ത്രിക്കപ്പെടേണ്ടതുണ്ട്. എതിർപ്പുകളുടെ ഉറവിടം അറിയാത്തത് ചിത്തശല്യം ഉണ്ടാക്കാം. വാഹനം സ്വന്തമാക്കാൻ സാധിക്കുന്നതാണ്. കുടുംബത്തിലെ മുതിർന്ന അംഗങ്ങളുടെ ആരോഗ്യപരിപാലനത്തിൽ അലംഭാവമരുത്.
ചിത്തിര: കാര്യസാധ്യത്തിന് ശക്തമായ ഇടപെടലുകൾ നടത്തും. ഒപ്പമുള്ളവർക്ക് പ്രവർത്തനോർജ്ജം പകരും. വിശിഷ്ട വ്യക്തികളുടെ പിന്തുണ കരുത്ത് പകരും . പുതിയ സംരംഭങ്ങൾക്ക് തുടക്കം കുറിക്കും. വ്യാപാരം വിപുലികരിക്കാൻ യാത്രകൾ ചെയ്യും. വരുമാനം വർദ്ധിക്കുന്നതാണ്. കുടുംബകാര്യങ്ങൾക്ക് ചെലവേറുന്നതാണ്. ദാമ്പത്യ ജീവിതത്തിലെ ദുർവാശികൾ അവസാനിപ്പിക്കും. മക്കളുടെ ഭാവികാര്യങ്ങൾ കൂട്ടായി ആലോചിച്ച് തീരുമാനിക്കും. ഗൃഹനിർമ്മാണത്തിന് ബാങ്കുകളുടെ സഹായം തേടും.
ഉത്രാടം: വ്യക്തിപ്രഭാവത്താൽ ഒപ്പമുള്ളവരുടെ ബഹുമാനം നേടും. നക്ഷത്രനാഥൻ ആയ സൂര്യൻ ശുക്രന്റെ നക്ഷത്രത്തിലും സ്വന്തം നക്ഷത്രത്തിലും സഞ്ചരിക്കുകയാൽ കലാമത്സരങ്ങളിൽ വിജയിക്കും. ഉദ്യോഗസ്ഥർക്ക് അധികാരം വർദ്ധിക്കുന്നതാണ്. ഗൃഹം മോടിപിടിപ്പിക്കാൻ ചെലവേറും. പ്രമാണങ്ങളിൽ ഒപ്പുവെക്കുമ്പോൾ സൂക്ഷ്മത വേണം. ബുധാദിത്യയോഗത്താൽ തൊഴിലിൽ നൈപുണ്യമേറും. കുടുംബാംഗങ്ങളുമായി വിനോദയാത്രകൾ നടത്തും. മുതിർന്ന അംഗങ്ങളുടെ ആരോഗ്യ പരിപാലനത്തിൽ ജാഗ്രത വേണം. മാസാവസാനത്തിൽ അലച്ചിലുണ്ടാവാം.
തൃക്കേട്ട: വ്യക്തിപരമായും തൊഴിൽപരമായും ഉത്തരവാദിത്വങ്ങൾ വർദ്ധിക്കും. സ്വയം തിരുത്താനും നവീകരിക്കാനും ഉള്ള സാഹചര്യം സംജാതമാകുന്നതാണ്. സമയബന്ധിതമായി ജോലി പൂർത്തിയാക്കും. അന്യദേശ- വിദേശ പഠനത്തിന് സാഹചര്യം ഒരുങ്ങുന്നതാണ്. തൊഴിൽസംരംഭകർക്ക് മുന്നിൽ ചില വെല്ലുവിളികൾ ഉയരാം. പ്രോജക്ടുകൾക്ക് സർക്കാർ അനുമതി ലഭിക്കാൻ കാലവിളംബം ഉണ്ടായേക്കും. യുവാക്കളുടെ പ്രണയം കൂടുതൽ ദൃഢമാകുന്നതാണ്. വാഹനം, അഗ്നി എന്നിവയുടെ ഉപയോഗത്തിൽ ശ്രദ്ധ വേണം. കലാപ്രവർത്തനം ആദരിക്കപ്പെടും.
