October 29-November 4, 2023 വാരഫലം, അശ്വതി മുതൽ രേവതി വരെ: Weekly Horoscope, Astrological Predictions

October 29-November 4, 2023: Weekly Horoscope Astrological Predictions Aswathi to Revathi: സൂര്യൻ നീചക്ഷേത്രമായ തുലാം രാശിയിൽ, ചോതി ഞാറ്റുവേലയിൽ സഞ്ചരിക്കുന്നു. ചന്ദ്രൻ ഗ്രഹണം കഴിഞ്ഞ് വീണ്ടും ചൈതന്യം സമാർജ്ജിക്കുന്നു. പൗർണമി കഴിഞ്ഞതിനാൽ കൃഷ്ണപക്ഷ പ്രഥമ മുതൽ സപ്തമി വരെയും ഭരണി മുതൽ പൂയം വരെയും ഉള്ള നക്ഷത്രങ്ങളിലൂടെ സഞ്ചരിക്കുകയാണ്.

ശനി വക്രഗതിയിൽ കുംഭം രാശി അവിട്ടം നാലാം പാദത്തിൽ സഞ്ചരിക്കുന്നു. വ്യാഴം വക്രഗതിയിൽ ഭരണി നക്ഷത്രത്തിലുമാണ്. ഒക്ടോബർ 30 ന് തുലാം 13 ന്, രാഹു മേടം രാശിയിൽ നിന്നും മീനത്തിലേക്കും കേതു തുലാത്തിൽ നിന്നും കന്നിയിലേക്കും അപസവ്യഗതിയായി സഞ്ചരിക്കുന്നു. അടുത്ത ഒന്നരവർഷം ഈ ഗ്രഹങ്ങൾ പ്രസ്തുതരാശികളിൽ തന്നെ തുടരും. പ്രധാനപ്പെട്ട ഒരു ജ്യോതിഷ പ്രതിഭാസമാണ് രാഹു, കേതുക്കളുടെ രാശിമാറ്റം.

നവംബർ 2 ന് ശുക്രൻ നീചരാശിയായ കന്നിയിലേക്ക് വരുന്നു. ബുധൻ തുലാം രാശിയിൽ മൗഢ്യത്തിൽ തന്നെ തുടരുകയാണ്. കുജനും (ചൊവ്വ) മൗഢ്യത്തോടെ തുലാത്തിൽ സഞ്ചരിക്കുന്നു. ഈ ആഴ്ചയിൽ അഷ്ടമരാശിക്കൂറ് വരുന്നത് ആർക്കൊക്കെ എന്നുനോക്കാം. ഞായറും തിങ്കൾ ഉച്ചവരേയും കന്നിക്കൂറുകാർക്കും തുടർന്ന് ബുധൻ സായാഹ്നം വരെ തുലാക്കൂറുകാർക്കും അഷ്ടമരാശിയാകുന്നു. തദനന്തരം വെള്ളി അർദ്ധരാത്രിവരെ വൃശ്ചികക്കൂറുകാർക്കും പിന്നീട് ധനുക്കൂറുകാർക്കും അഷ്ടരാശിക്കൂറ് സംഭവിക്കുന്നു. ശുഭകാര്യങ്ങൾക്ക് അവരവർ ജനിച്ച കൂറിന്റെ എട്ടാം രാശിയായ അഷ്ടമരാശിക്കൂറ് വർജ്ജിക്കണം. അന്ന് മനോവാക്കർമ്മങ്ങളിൽ കരുതൽ കൈക്കൊള്ളുകയും വേണ്ടതാണ്.

ഈ ഗ്രഹനില സൂചിപ്പിക്കും വിധം അശ്വതി മുതൽ രേവതി വരെയുള്ള 27 നാളുകളുകാരുടെ വാരഫലം ഇവിടെ അപഗ്രഥിക്കുകയാണ്.

അശ്വതി

ഗുണദോഷങ്ങൾ സമ്മിശ്രമായ ആഴ്ചയാണ്. വാരാദ്യം ബന്ധുസമാഗമം, വിരുന്നുകളിൽ പങ്കെടുക്കുക തുടങ്ങിയവ ഉണ്ടായേക്കാം. വിദ്യാർത്ഥികൾ പ്രോജക്ടുകൾ പൂർത്തീകരിക്കുന്നതിൽ അലംഭാവം കൈക്കൊള്ളും. യാതൊരു പ്രയോജനവുമില്ലാത്ത കാര്യത്തെക്കുറിച്ച് വെറുതെ തർക്കത്തിലേർപ്പെടാം. നക്ഷത്രനാഥനായ കേതുവിന് നീചശുക്രനുമായി യോഗം വരികയാൽ ഭൗതികതൃഷ്ണകൾ വലയ്ക്കാം. വ്യാഴം, വെള്ളി ദിവസങ്ങളിൽ സാമ്പത്തിക മെച്ചം, മനസ്സന്തോഷം, ശുഭവാർത്താശ്രവണം ഇവ പ്രതീക്ഷിക്കാം.

ഭരണി

ആത്മവിശ്വാസം വർദ്ധിക്കും. എന്നാൽ അത് പ്രവൃത്തിയിൽ കൊണ്ടുവരുന്നതിൽ വിജയിക്കണമെന്നില്ല. ദാമ്പത്യത്തിൽ സ്നേഹോഷ്മളത കുറയാം. പ്രണയികൾ അനൈക്യത്തിലാവും. ചർച്ചകളിൽ പുരോഗതിയൊന്നും ഉണ്ടാവില്ല. നവസംരംഭങ്ങൾക്ക് മുതൽ മുടക്കുന്നത് ഇപ്പോൾ അഭിലഷണീയമല്ല. ആഴ്ചയുടെ മദ്ധ്യത്തിൽ ഗുണാനുഭവങ്ങൾ പ്രതീക്ഷിക്കാം. ക്രയവിക്രയങ്ങൾ ലാഭകരമായേക്കും. ഇഷ്ടവസ്തുക്കൾ കരഗതമാവാം.

കാർത്തിക

നക്ഷത്രനാഥന് നീചം തുടരുന്നതിനാൽ ആത്മശക്തി ചോരുന്നതായി തോന്നും. ശക്തമായ നിലപാടുകൾ എടുക്കാനാവാത്ത സ്ഥിതിയുണ്ടാവും. ശത്രുക്കൾ മേൽക്കൈ നേടുന്നുണ്ടോ എന്ന് സംശയിക്കും. വരവുണ്ടാകും; ചിലവും അതുപോലെ തന്നെയാവും. പഴയ സുഹൃത്തുക്കളെ കണ്ടുമുട്ടാം. അവരുടെ ജീവിതാനുഭവങ്ങൾ ഒരു പാഠമാകാം. കുടുംബത്തോടൊപ്പം കൂടുതൽ സമയം ചെലവഴിക്കാൻ താല്പര്യപ്പെടും. വാഹനത്തിന് ചില്ലറ റിപ്പയറിംഗ് ആവശ്യമായേക്കാം.

രോഹിണി

വാരാദ്യം ചന്ദ്രൻ പന്ത്രണ്ടാം കൂറിലാവുകയാൽ ചെലവേറും. ചെറുതോ വലുതോ ആയ യാത്രകളുണ്ടായേക്കും. അതിഥികളെത്തുന്നതിനാൽ ദിനചര്യകൾക്ക് നേരനീക്കം വരാം. മനസ്സിന്റെ പ്രസന്നത കുറയുവാനുമിടയുണ്ട്. ചൊവ്വാഴ്ച മുതൽ കാര്യസാധ്യം, സുഖഭക്ഷണയോഗം എന്നിവ കാണുന്നു. തൊഴിലിടത്തിൽ ശോഭിക്കാനാവും. സഹപ്രവർത്തകരുടെ പിന്തുണ നേടിയേക്കും. സാമ്പത്തിക ക്ലേശങ്ങൾ കുറയുന്നതാണ്. മക്കളുടെ കലാപ്രവർത്തനം അഭിമാനമേകും.

മകയിരം

ആഴ്ചയുടെ ആദ്യ ദിവസങ്ങളിൽ ഇടവക്കൂറുകാർക്ക് സ്വസ്ഥത കുറയും. ജോലിഭാരം കൂടുന്നതാണ്. ചെലവും വർദ്ധിച്ചേക്കാം. തുടർദിവസങ്ങളിൽ മനക്ലേശം കുറയുന്നതാണ്. സ്വസ്ഥത കൈവരിക്കാനാവും. സ്വന്തം കർമ്മരംഗത്ത് പല നിലയ്ക്കും മികവ് ഭവിക്കും. വ്യത്യസ്തമാവും മിഥുനക്കൂറുകാരുടെ സ്ഥിതി. നേട്ടങ്ങൾ ആഴ്ചയുടെ ആദ്യ ദിവസങ്ങളിലാവും. ന്യായമായ ആവശ്യങ്ങൾ നടന്നു കിട്ടും. വാരാന്ത്യത്തിൽ മാനസിക പിരിമുറുക്കം ഭവിച്ചേക്കാം.

തിരുവാതിര

കർമ്മമേഖലയിലെ തടസ്സങ്ങൾ നീങ്ങും. സാമ്പത്തികമായ അരക്ഷിതാവസ്ഥയ്ക്ക് മാറ്റം വരുന്നതാണ്. കച്ചവടക്കാർക്ക് വിപണിയിൽ മുന്നേറാൻ പുതിയ ഏജൻസികൾ ഗുണകരമാവും. ഉദ്യോഗസ്ഥർക്ക് അല്പം സമ്മർദ്ദമേറിയ ചുമതലകൾ ലഭിച്ചേക്കാം. പൊതുപ്രവർത്തകർ സംഘടനാനേതൃത്വത്തിലേക്ക് ഉയർത്തപ്പെടുന്നതാണ്. ഊഹക്കച്ചവടവും ഭാഗ്യപരീക്ഷണവും വിജയിക്കണമെന്നില്ല. ഗാർഹികമായി ചില അലട്ടലുകൾ വരാം. നാലാം ഭാവത്തിലേക്ക് വരുന്ന കേതു മനക്ലേശം സൃഷ്ടിച്ചേക്കാം. വാഹനയാത്രയിൽ തികഞ്ഞശ്രദ്ധ വേണ്ടതുണ്ട്.

പുണർതം

ആശയക്കുഴപ്പങ്ങൾ സ്വയം പരിഹരിക്കും. വർദ്ധിതോത്സാഹത്തോടെ കർമ്മകാണ്ഡം ആരംഭിക്കും. മക്കളുടെ കാര്യത്തിൽ നല്ല തീരുമാനങ്ങൾ സ്വാഭാവികമായി വന്നുചേരും. വ്യാപാരത്തിൽ ഏർപ്പെട്ട നഷ്ടങ്ങൾ പരിഹരിക്കുവാൻ വഴി തെളിയുന്നതാണ്. വിലകൂടിയ വസ്ത്രമോ ആഭരണമോ വാങ്ങിയേക്കും. കുടുംബത്തിലും സമൂഹത്തിലും സ്വാധീനമുയരും. കലാകായിക മത്സരങ്ങളിൽ വിദ്യാർത്ഥികൾ നല്ല വിജയം കൈവരിക്കുന്നതാണ്. വാരാന്ത്യദിനങ്ങളിൽ മനപ്രയാസമോ അധികച്ചെലവോ ഭവിക്കാനിടയുണ്ട്.

പൂയം

ന്യായമായ ആവശ്യങ്ങൾ സഫലമാവുന്ന അനുകൂലവാരമാണ്. മത്സരങ്ങളിലും അഭിമുഖങ്ങളിലും വിജയിക്കും. തൊഴിലില്ലാത്തവരുടെ പ്രതീക്ഷ നിറവേറപ്പെടാം. മുൻപ് വലിയ ദുർഘടങ്ങളായി തോന്നിയിരുന്നവയെ ഇപ്പോൾ ലാഘവബുദ്ധ്യാ സമീപിക്കാൻ സാധിക്കുന്നതാണ്. കുടുംബാന്തരീക്ഷം സംതൃപ്തി നിറഞ്ഞതാവും. മക്കളുടെ വിദ്യാഭ്യാസം ആശാവഹമാവും. അടഞ്ഞിരുന്ന സാമ്പത്തിക സ്രോതസ്സുകൾ തുറക്കപ്പെടാം. വെള്ളി, ശനി ദിവസങ്ങൾക്ക് മേന്മ കുറയുന്നതാണ്.

ആയില്യം

നക്ഷത്രനാഥനായ ബുധന്റെ മൗഢ്യവും നാലിലെ പാപഗ്രഹങ്ങളും അഷ്ടമശനിയും പലതരത്തിലുള്ള തടസ്സങ്ങൾക്ക് കാരണമാകാം. എന്നാലും ചന്ദ്രബലവും സുസ്ഥിതിയും ചില നേട്ടങ്ങൾക്കും വഴിതുറന്നേക്കും. മുൻപ് തള്ളിക്കളഞ്ഞവരുടെ പിന്തുണ തേടിയെത്താം. മനസ്സമാധാനം കുറഞ്ഞാലും അത് കർമ്മജാഡ്യത്തിലേക്ക് നയിക്കാനിടയില്ല. തൊഴിലിൽ ലക്ഷ്യബോധത്തോടെ പ്രവർത്തിക്കാൻ സാധിക്കും. അദ്ധ്വാനത്തിന് അംഗീകാരവും ന്യായമായ പ്രതിഫലവും ഭവിക്കും. ധനക്ലേശത്തിന് പരിഹാരമാവും.

മകം

ചന്ദ്രസഞ്ചാരം ഈയാഴ്ച ഒമ്പതുമുതൽ പന്ത്രണ്ടുവരെ രാശികളിലാകയാൽ നേട്ടങ്ങളും നല്ല അനുഭവങ്ങളും മേൽക്കൈ നേടും. തൊഴിൽപരമായ കിടമത്സരങ്ങളിൽ വിജയം നേടും. ചില കരാറുകളിൽ നിന്നും നേട്ടമുണ്ടായേക്കും. സ്വന്തം പ്രവർത്തന ക്ഷമതയെക്കുറിച്ച് തികഞ്ഞ ബോധ്യമുണ്ടാവും എന്നതുതന്നെ പ്രധാനം. നവസംരംഭങ്ങളിൽ ആശാസ്യമായ മുന്നേറ്റമുണ്ടാകുന്നതാണ്. അധികാര കേന്ദ്രങ്ങളുടെ പിൻബലം കൂടുതൽ കരുത്തേകും. വാരാന്ത്യത്തിൽ അപ്രതീക്ഷിത ചെലവുണ്ടാകാനിടയുണ്ട്.

പൂരം

ആദിത്യനും ചൊവ്വയും മൂന്നാമെടത്തിലാകയാൽ മാനസിക ബലം ഏറും. ഉദ്യോഗസ്ഥർക്ക് സ്വതന്ത്രമായി പ്രവർത്തിക്കാനവസരം വന്നുചേരും. മേലധികാരികളുടെ പിന്തുണ സിദ്ധിക്കുന്നതാണ്. വേണ്ടത്ര ധനം കൈവശമില്ലാതിരുന്ന കാരണത്താൽ നീട്ടിവെച്ചിരുന്ന കുടുംബാംഗങ്ങളുടെ ആവശ്യങ്ങൾ ഇപ്പോൾ നിറവേറ്റാനായേക്കും. വിശിഷ്ടാതിഥികളുടെ ഗൃഹസന്ദർശനം മനസ്സന്തോഷമേകും. അഷ്ടമത്തിലേക്ക് രാഹു വരികയാൽ ആരോഗ്യകാര്യങ്ങളിൽ ചിങ്ങക്കൂറുകാർ ഏറെ ജാഗ്രത പാലിക്കേണ്ട സന്ദർഭമാണ്. സാമ്പത്തിക അച്ചടക്കവും അനിവാര്യം.

ഉത്രം

സ്വപ്രയത്നം കൊണ്ടുണ്ടാകുന്ന നേട്ടങ്ങളിൽ സന്തോഷിക്കും. പുതിയ കാര്യങ്ങൾ തുടങ്ങുന്നതിന് ചില തടസ്സങ്ങൾ വരുന്നതായി അനുഭവപ്പെടും. ലോൺ, ചിട്ടി മുതലായവയുടെ ലഭ്യത പരിശോധിക്കും. വിദേശ പഠനത്തിനൊരുങ്ങുന്ന വിദ്യാർത്ഥികൾക്ക് യാത്രാനുമതിക്ക് അല്പം കാത്തിരിക്കേണ്ടതായി വരും. ഭൂമി സംബന്ധിച്ച വ്യവഹാരങ്ങൾക്ക് മുതിരാതിരിക്കുകയാവും ഉത്തമം. ശുക്രൻ ജന്മനക്ഷത്രത്തിൽ സഞ്ചരിക്കുകയാൽ ഭൗതികതൃഷ്ണകൾ പൂർത്തീകരിക്കാനായേക്കും. ഉത്രം നക്ഷത്രം ചിങ്ങക്കൂറുകാർക്കാവും കന്നിക്കൂറുകാരെക്കാൾ ഈയാഴ്ച മെച്ചം കൂടുതൽ.

അത്തം

നക്ഷത്രനാഥനായ ചന്ദ്രന് രാഹുഗ്രസ്ത ഗ്രഹണം കഴിഞ്ഞ പിറ്റേന്ന് തുടങ്ങുന്ന ഈ ആഴ്ച ചന്ദ്രാഷ്ടമത്തിലാണ് ആരംഭം. ഞായർ, തിങ്കൾ ദിവസങ്ങൾക്ക് പകിട്ട് കുറയും. ചെലവേറുന്നതാണ്.കലഹപ്രേരണയുണ്ടാവാം. ക്രമേണ കാര്യങ്ങൾ വരുതിയിൽ വന്നെത്തുമെന്ന് ആശിയ്ക്കാം. സാമ്പത്തികശോച്യത പരിഹരിക്കപ്പെടും. ഗാർഹികാന്തരീക്ഷം മെച്ചപ്പെടുന്നതാണ്. പാരിതോഷികങ്ങൾ ലഭിക്കാനിടയുണ്ട്. വിരുന്നുകളിൽ പങ്കെടുത്തേക്കും. ജീവിതത്തോടുള്ള കയ്പുരസം താത്കാലികമായെങ്കിലും മാറുന്നതാണ്.

ചിത്തിര

പ്രയത്നത്തിനും ആത്മാർത്ഥതയ്ക്കും അനുസൃതമായി നേട്ടങ്ങൾ ഉണ്ടാവുന്നില്ല എന്ന ഖേദം തുടരാം. സാമ്പത്തികമായോ തൊഴിൽപരമായോ പരീക്ഷണങ്ങൾക്ക് മുതിരാതിരിക്കുക ഉത്തമം. കന്നിക്കൂറുകാർക്ക് ജന്മകേതുവാണെങ്കിൽ തുലാക്കൂറുകാർക്ക് ജന്മത്തിൽ ചൊവ്വയും ആദിത്യനും ഒക്കെയാണ്. അതിനാൽ ക്ഷമയും നിരന്തര പരിശ്രമവും വേണ്ടതുണ്ട്. ചെറിയനേട്ടങ്ങളും അത്യാവശ്യകാര്യങ്ങൾക്കുള്ള പണവുമൊക്കെ വന്നെത്തും. അനാവശ്യമായ ഉൽക്കണ്ഠകളും മാനസിക പിരിമുറുക്കവും ഒഴിവാക്കേണ്ടതുണ്ട്.

ചോതി

ആഴ്ചയുടെ തുടക്കത്തിൽ കുടുംബസൗഖ്യം പ്രതീക്ഷിക്കാം. കുടുംബാംഗങ്ങളൊത്ത് യാത്ര, ഇഷ്ടഭക്ഷണം, സുഹൃൽ - ബന്ധു സമാഗമം ഇവ ഭവിക്കാം. ചൊവ്വ, ബുധൻ അഷ്ടമരാശിക്കൂറ് ദിവസങ്ങളാകയാൽ കരുതൽ വേണം. പ്രധാന കാര്യങ്ങൾ അന്ന് ചെയ്യാതിരിക്കുക നന്ന്. മറ്റു ദിവസങ്ങളിൽ മനസ്സുഖവും ദേഹസ്സുഖവും പ്രതീക്ഷിക്കാം. മുൻപ് തീരുമാനിച്ച കാര്യങ്ങൾ ഭംഗിയായി പൂർത്തികരിക്കാനാവും. സ്വന്തം വാക്കുകൾക്ക് വില കല്പിക്കുന്നവരുണ്ടെന്ന് ബോധ്യമാകും. പ്രതീക്ഷിച്ച ധനം കൈവശം വന്നുചേരുന്നതാണ്.

വിശാഖം

പ്രണയികൾക്ക് സന്തോഷിക്കാനാവും. വാഗ്ദാനങ്ങൾ നിറവേറുന്നതാണ്. ആവശ്യങ്ങൾ ഭംഗിയായി നിർവഹിക്കാനാവശ്യമായ ധനം വന്നു ചേരും. പുതിയ ഗൃഹോപകരണങ്ങൾ വാങ്ങിയേക്കും. ഗ്രഹാനുകൂല്യം കുറവായതിനാൽ വലിയ മുതൽ മുടക്കുകൾക്ക് തുനിയാതിരിക്കുകയാണ് അഭികാമ്യം. നിലവിലെ ജീവിത സാഹചര്യങ്ങളിൽ നിന്നും വലിയ മാറ്റം തൽകാലം ഉണ്ടാവണമെന്നില്ല. വൈകാരികക്ഷോഭം നിയന്ത്രിക്കപ്പെടേണ്ടതുണ്ട്. ബുധൻ, വ്യാഴം ദിവസങ്ങളിൽ ശുഭകാര്യങ്ങൾ ഒഴിവാക്കുക ഉചിതം.

അനിഴം

കർമ്മരംഗത്ത് ശോഭിക്കാനാവും. ആത്മാർത്ഥതയും തൊഴിൽ വൈദഗ്ദ്ധ്യവും അംഗീകരിക്കപ്പെടുന്നതാണ്. പൊതുപ്രവർത്തകർക്ക് അനുയായികളുടെ പിന്തുണ ലഭിച്ചേക്കും. വിദ്യാർത്ഥികൾക്ക് പഠന മികവിനൊപ്പം കലാമത്സരങ്ങളിലും വിജയിക്കാൻ കഴിയുന്നതാണ്. കുടുംബത്തിൽ ഐക്യവും സമാധാനവും അനുഭവപ്പെടും. കച്ചവടം വിപുലീകരിക്കുന്നതിനുള്ള ശ്രമം തുടങ്ങുന്നതാണ്. വ്യാഴം, വെള്ളി ദിവസങ്ങൾക്ക് മേന്മ കുറയുന്നതിനാൽ സാഹസകർമ്മങ്ങൾ ഒഴിവാക്കണം.

തൃക്കേട്ട

ദേഹാലസ്യം നീങ്ങും. പാരമ്പര്യ വസ്തുക്കളുടെ വില്പനയിൽ നിന്നും ആദായമുണ്ടാകും. നക്ഷത്രനാഥന് മൗഢ്യം തുടരുകയാൽ ചില തീരുമാനങ്ങൾ ബുദ്ധിപരമായില്ലെന്ന് പിന്നീട് തോന്നിയേക്കും. ഗൃഹനിർമ്മാണത്തിൽ നേരിയ പുരോഗതിയുണ്ടാകും. അന്യനാട്ടിൽ പഠനം, തൊഴിൽ എന്നിവയ്ക്ക് ശ്രമിക്കുന്നവർക്ക് അല്പം കൂടി കാത്തിരിക്കേണ്ടിവരും. ഗാർഹികജീവിതത്തിൽ സംതൃപ്തിയനുഭവപ്പെടും. ഉദ്യോഗസ്ഥലത്തിൽ സഹപ്രവർത്തകരുടെ എതിർപ്പ് നേരിടേണ്ടിവരുമെങ്കിലും അവയെ പ്രത്യുല്പന്നമതിത്വത്തോടെ നേരിടാൻ കഴിയും. വ്യാഴം, വെള്ളി ദിവസങ്ങളിൽ കൂടുതൽ ജാഗ്രത വേണം.

മൂലം

കർമ്മവിളംബും മനക്ലേശവുമൊക്കെ വരാം, വാരത്തിന്റെ തുടക്കത്തിൽ. ആശയക്കുഴപ്പം വ്യക്തിജീവിതത്തിലും തുടരും. ചൊവ്വ മുതൽ വെള്ളിവരെ മികച്ച അനുഭവങ്ങൾ പ്രതീക്ഷിക്കാം. കാര്യവിജയം വന്നുചേരും. സ്വതന്ത്രമായി പ്രവർത്തിക്കാൻ അവസരം ഉണ്ടാകും. മുൻപ് നിശ്ചയിച്ച ലക്ഷ്യം ഈ ദിവസങ്ങൾ കൊണ്ട് നേടിയെടുക്കാനാവും. പ്രണയികൾക്ക് ഭാവിതീരുമാനങ്ങൾ കൈക്കൊള്ളാൻ കഴിഞ്ഞേക്കും. ജീവിത പങ്കാളിയുടെ അകമഴിഞ്ഞപിന്തുണ കരുത്തേകും.

പൂരാടം

നക്ഷത്രനാഥനായ ശുക്രൻ ആഴ്ച മധ്യത്തിൽ നീചനായി കർമ്മഭാവമായ പത്താമെടത്തിലേക്ക് പോകുന്നത് തൊഴിൽ സംബന്ധിച്ച ചില ക്ലേശങ്ങൾക്ക് കാരണമായേക്കാം. ലക്ഷ്യം നേടാൻ ഇരട്ടി അദ്ധ്വാനിക്കേണ്ടി വരാം. സൂര്യകുജന്മാർ പതിനൊന്നാം ഭാവത്തിൽ തുടരുകയാൽ സാമ്പത്തികമായി മെച്ചമുണ്ടാകുന്നതാണ്. ഉദ്യോഗസ്ഥർക്കും സ്ഥിരശമ്പളക്കാർക്കും ഏതുനിലയ്ക്കും മെച്ചപ്പെട്ട വാരമായിരിക്കും. സ്വതന്ത്ര ജോലികളിൽ ഏർപ്പെട്ടവർക്ക് മുൻകൂർ ആയി കുറച്ച് തുക കിട്ടിയേക്കാം. സ്വയം തീരുമാനം കൈക്കൊള്ളുന്നതിലും സ്വയം അത് നടപ്പിലാക്കുന്നതിലും വിജയിക്കുന്നതാണ്.

ഉത്രാടം

വലിയ നേട്ടങ്ങളോ കോട്ടങ്ങളോ അനുഭവപ്പെടണമെന്നില്ല. സ്വന്തം തൊഴിലിൽ മാറ്റങ്ങൾ വരുത്താനുള്ള ശ്രമം പ്രാവർത്തികമായിത്തീരാൻ കുറച്ചുകൂടി സമയം വേണ്ടിവരുന്നതാണ്. പ്രയത്നത്തിന് അർഹമായ വരുമാനം ലഭിക്കും. പിതാവിൽ നിന്നും ധനം വന്നുചേരാനിടയുണ്ട്. കുടുംബബന്ധങ്ങളിൽ പിണക്കവും ഇണക്കവും ആവർത്തിച്ചേക്കും. നവമാധ്യമങ്ങളിലെ . പരിശ്രമങ്ങൾക്ക് പിന്തുണ കൂടണമെന്നില്ല. ധനുക്കൂറുകാർക്ക് നാലിൽ രാഹു വരുന്നതിനാൽ അയൽ ബന്ധങ്ങൾ വഷളാകാതെ നോക്കേണ്ടതുണ്ട്.

തിരുവോണം

നക്ഷത്രാധിപനായ ചന്ദ്രന് സാമാന്യം കാര്യങ്ങൾ ഒരുവിധം വരുതിയിലായേക്കും. വാരത്തിന്റെ തുടക്കത്തിലെ രണ്ടുദിവസം ശരിയായ തീരുമാനങ്ങൾ കൈക്കൊള്ളാനോ അവ പ്രാവർത്തികമാക്കാനോ സാധിച്ചേക്കില്ല. മറ്റു ദിവസങ്ങളിൽ സ്വതന്ത്രമായി കർമ്മരംഗത്ത് വ്യാപരിക്കാനാവും. സുഹൃത്തുക്കളുടെ പിന്തുണ ലഭിക്കാം. അറ്റകുറ്റപ്പണി കഴിഞ്ഞ് വാഹനം കൈവശം വന്നുചേരുകയാൽ സമയവും ഊർജ്ജവും നന്നായി വിനിയോഗിക്കും. വായ്പാ തിരിച്ചടവ് സുഗമമാവും. ദാമ്പത്യത്തിൽ സമാധാനം പുലരും.

അവിട്ടം

സഹോദരഗുണം ഉണ്ടാകും. വ്യവഹാരത്തെക്കുറിച്ച് പുനശ്ചിന്ത നടത്തും. ഇടയ്ക്ക് മനസ്സ് ചഞ്ചലമാവും. ഉദരരോഗമുപദ്രവിച്ചേക്കാം. വിവാഹാനന്തരം ചില പൊരുത്തക്കേടുകൾ വരാം. ഭൗതികകാര്യങ്ങളിലെ നേട്ടക്കുറവിന് പോംവഴി ആരായും. വിരോധികളുണ്ടെന്ന് സങ്കല്പിച്ച് മുൻകരുതൽ വാക്കിലും പ്രവൃത്തിയിലും കൈക്കൊള്ളും. പഠിച്ച ജോലിക്കനുസരിച്ചതല്ല എന്ന ന്യായത്താൽ തൊഴിലവസരം ഉപേക്ഷിക്കും. എന്നാൽ ഉൽകർഷേച്ഛ ഉള്ളതിനാൽ അലസരാവില്ല. തെറ്റായ ഉപദേശങ്ങളെ തിരിച്ചറിയും. അത്യാവശ്യങ്ങൾ നിർവഹിക്കാൻ ധനക്ലേശം അനുഭവപ്പെടുന്നതല്ല.

ചതയം

പ്രൊഫഷണലുകളുടെ വൈദഗ്ദ്ധ്യത്തിന് അംഗീകാരം ലഭിക്കും. ഏജൻസികളോ ഫ്രാഞ്ചൈസികളോ നടത്തുന്നവർക്ക് വിപണിമൂല്യം ഉള്ള ഉല്പന്നങ്ങളുടെ വിതരണാവകാശം കൈവരുന്നതാണ്. പണം ചെലവഴിക്കുന്നതിലെ മിടുക്ക് പിശുക്കായി ചിത്രീകരിക്കപ്പെടാം. അതിഥികളെ നന്നായി സൽക്കരിക്കുവാൻ സാധിച്ചേക്കും. പാചകനൈപുണ്യം പ്രശംസിക്കപ്പെടാം. കുടുംബാംഗങ്ങളുടെ പിടിവാശിക്കുമുന്നിൽ തോറ്റുകൊടുക്കുന്നതാണ്. നവമാധ്യമങ്ങളിൽ രേഖപ്പെടുത്തപ്പെടുന്ന അഭിപ്രായങ്ങൾ വിമർശന വിധേയമായേക്കാം.

പൂരൂരുട്ടാതി

പഴയ സഹായവാഗ്ദാനങ്ങൾ നിറവേറപ്പെടാം. നിരുന്മേഷത നീങ്ങി മനസ്സ് കർമ്മോന്മുഖമാകുന്നതാണ്. ആശിച്ചതുപോലെ എല്ലാം ഉടച്ചുവാർക്കാനൊന്നും കഴിഞ്ഞേക്കില്ല. സ്വജീവിതത്തിൽ ചില പുതുമകൾ കൊണ്ടുവരാനായേക്കുമെന്നുമാത്രം. വ്യാഴം സഹായ സ്ഥാനത്ത് സഞ്ചരിക്കുകയാൽ സജ്ജനങ്ങളുടെ പിന്തുണയുണ്ടാവുന്നതാണ്. സാമ്പത്തിക കാര്യങ്ങളിൽ കൂടുതൽ ശ്രദ്ധയുണ്ടാവുന്നത് നന്ന്. ബിസിനസ്സ് യാത്രകൾ പ്രയോജനകരമാവും. നിലവിലെ തൊഴിൽ ഉപേക്ഷിച്ച് മറ്റൊരു തൊഴിൽ തേടാൻ സമയം ഒട്ടും അനുകൂലമല്ലെന്നത് മറക്കരുത്.

ഉത്രട്ടാതി

വാക്കുകളുടെ നന്മയും നേർമ്മയും കൊണ്ട് ചില കാര്യങ്ങൾ നേടിയേക്കും. പഠനത്തിലും കലാശിക്ഷണത്തിലും ശ്രദ്ധയുണ്ടാവും. വൈകാരികക്ഷോഭങ്ങളെ നിയന്ത്രിക്കേണ്ടതുണ്ട്. പ്രണയികൾക്ക് ഇച്ഛാഭംഗത്തിനിടവരാം. കുടുംബത്തിൽ നിന്നും, ചിലപ്പോൾ ബന്ധുക്കളിൽ നിന്നും ശകാരം കേൾക്കാൻ സാധ്യതയുണ്ട്. ആരോഗ്യപരമായി ശ്രദ്ധ വേണ്ടതാണ്. സർക്കാർ കാര്യങ്ങളിൽ വല്ല തടസ്സവും ഉണ്ടായേക്കാം. അമിത പ്രതീക്ഷകളെക്കാൾ പ്രായോഗിക വീക്ഷണമാണ് ജീവിതത്തിനുതകുന്നത് എന്ന തിരിച്ചറിവുണ്ടാകും. ന്യായമായ ആവശ്യങ്ങൾ നടന്നുകിട്ടുന്നതാണ്.

രേവതി

ജന്മരാശിയിലേക്കും ജന്മനക്ഷത്രത്തിലേക്കും രാഹു പകരുന്ന ആഴ്ചയാണ്. അതിന്റെ ഫലം ഉടനെ വ്യക്തമാവുകയില്ലെങ്കിലും കരുതൽ വേണ്ടതായ കാലമാണ്. വാരാദ്യം അല്പം സാമ്പത്തിക ഞെരുക്കം വന്നേക്കാം. ചൊവ്വ, ബുധൻ ദിവസങ്ങളിൽ ന്യായമായ ആവശ്യങ്ങൾ നിറവേറ്റപ്പെടും. പണവരവ് പ്രതീക്ഷിച്ചത്ര തന്നെയാവും. തുടർ ദിവസങ്ങളിലും കർമ്മരംഗം മികച്ചതായി തുടരും. ഏഴിലെ കേതു ചില ഗാർഹിക ക്ലേശങ്ങൾ സൃഷ്ടിച്ചെന്ന് വരാം. ബിസിനസ്സിൽ പങ്കാളികളെ ചേർക്കുന്നത് രണ്ടുവട്ടം ചിന്തിച്ചിട്ടാവണം. പ്രണയികൾക്കിടയിൽ പൊരുത്തക്കേടുകൾ തലപൊക്കാം.